ᐅᖃᖅᑏ, ᖁᕕᐊᓱᒃᐳᖓ ᐅᓂᒃᑳᕆᐊᒃᓴᖅ ᒥᓂᔅᑕᐅᖃᑎᒌᑦ ᑲᑎᒪᖃᑎᖃᓚᐅᕐᒪᑕ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐋᑐᕚᒥ ᒪᐃ 1-ᖑᑎᓪᓗᒍ ᐊᒻᒪᓗ 2-ᒥ ᑲᑎᒪᑲᑕᒃᖢᑎ ᑕᐃᔭᕗᑦ ᓄᓇᕗᑦ ᐋᑐᕚᒥ. ᒥᓂᔅᑕᕗᑦ ᐅᔾᔨᕐᓇᖅᓯᑎᑦᑎᓚᐅᖅᐳᑦ ᓯᕗᓪᓕᖅᐸᐅᔾᔭᐅᓯᒪᔪᓂᒃ ᑲᑐᔾᔨᓗᑕᒥᑦ ᑲᑎᒪᖃᑎᖃᖅᖢᑎᒃ 15 ᐅᖓᑖᓃᑦᑐᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᒋᔭᖏᓐᓂᒃ, ᐃᓚᒋᔭᐅᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᒪᓕᒐᓕᕆᔨᒃᑯᑦ, ᐃᒡᓗᓕᕆᔨᒃᑯᑦ, ᒪᑭᒪᔾᔪᑎᓂᑦ, ᐊᒻᒪᓗ ᑲᓇᑕᓕᒫᒥ ᐅᓇᑕᖅᑐᒃᓴᐃᑦ.
ᐅᖃᖅᑎᑦᑎᔩ, ᒪᐃ 2-ᖑᑎᓪᓗᒍ ᑲᑎᖃᑎᒋᓚᐅᕋᒃᑯ ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐅᖃᐅᓯᖃᖅᖢᑕᓗ ᐱᓇᔪᖕᓂᑦᑎᓐᓂ ᐃᒡᓗᓕᐅᒃᑲᓐᓂᕋᓱᒃᖢᑕ, ᓴᙱᓂᖅᓴᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓚᐅᓪᓗᑕ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕐᒥᒃ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᒃ, ᐊᒻᒪ ᓅᑕᐅᓗᑎᒃ ᐱᔪᓐᓇᕐᓂᖃᖅᑐᑦ ᓄᓇᕗᒻᒥ ᓄᓇᓂᒃ ᐊᒻᒪ ᐃᒪᕐᓂᒃ ᓇᖕᒥᓂᕐᓱᕐᓂᒃᑯᑦ. ᑲᓇᑕᒥ ᐊᖓᔪᖅᑳᕐᔪᐊᖅ ᓇᓗᓇᐃᖅᓯᓚᐅᕐᒥᔪᖅ ᐱᓇᔪᒃᑕᐅᔪᓂᒃ ᒥᓂᔅᑕᐅᖃᑎᒌᓂᒃ ᐱᕚᓪᓕᖅᑎᓐᓇᓱᒃᖢᒋᑦ ᐱᓕᕆᖃᑎᒌᒍᓯᑦ ᑲᓇᑕᒥ ᓄᓇᕘᓕᒫᒥ ᐋᑐᕚᒥ ᐱᓕᕆᑎᑦᑎᑎᓪᓗᒋᑦ.
ᑲᑎᒪᓂᖃᖅᑎᓪᓗᑕ, ᑲᓇᑕᐅᑉ ᐊᖓᔪᖅᑳᕐᔪᐊᖓ ᐊᒻᒪ ᒥᓂᔅᑕᖏᑦᑕ ᑲᑎᒪᔨᖏᑦ ᓇᓗᓇᐃᖅᓯᓚᐅᖅᐳᑦ ᐊᔾᔨᒋᔭᐅᙱᑦᑐᓂᒃ ᓴᖅᑭᑉᐸᓪᓕᐊᔪᓂᒃ ᓄᓇᑦᑎᓐᓂ, ᐃᕐᖐᓐᓇᖅ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᐱᑕᖃᑦᑎᐊᙱᓐᓂᖓ ᑐᑭᖃᖅᖢᓂ ᓄᓇᕗᒥᐅᑦ ᖃᐅᑕᒫᑦ ᐊᒃᓱᕈᕐᓇᖅᑐᖅᓯᐅᓲᖑᕗᑦ ᓈᒻᒪᒃᑐᓂᒃ ᐃᒡᓗᖃᖅᑎᑦᑎᕙᒃᖢᑎᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᒻᒪ ᖃᓄᐃᙱᑦᑎᐊᕐᓂᕐᒥᒃ, ᐃᓕᓐᓂᐊᖃᑕᐅᔪᓐᓇᕐᓂᕐᒥᒃ, ᓄᓇᓕᖕᓂ ᑮᓇᐅᔭᓕᐅᕈᑎᒃᓴᑦ ᑭᒡᓕᖃᖅᑎᑕᐅᓪᓗᑎᒃ, ᐊᒻᒪ ᐃᑲᔪᖅᓱᖅᑕᐅᑦᑎᐊᙱᖦᖢᑎᒃ ᐃᓐᓇᕈᖅᐸᓪᓕᐊᔪᑦ.
ᐅᖃᖅᑏ, ᑭᖑᓪᓕᖅᐹᒥ, ᑲᑎᖃᑎᒋᔪᓐᓇᓚᐅᕋᒃᑯ ᒥᓂᔅᑕᖓᑦ ᒐᕙᒪᐅᖃᑎᒌᑦᑐᓕᕆᔨᒃᑯᑦ ᑖᒥᓂᒃ ᓕᐸᓛᖕᒃ, ᐱᓕᕆᖃᑎᖃᕈᒪᑦᑎᐊᖅᑐᖅ ᐅᕙᑦᑎᓐᓂᒃ ᐃᓐᓇᑐᖃᖁᑎᕗᑦ ᐊᖏᕐᕋᐅᔾᔭᐅᖁᓪᓗᒋᑦ ᓄᓇᕗᒻᒧᑦ.
ᐅᖃᖅᑏ, ᑲᓇᑕ ᖃᐅᔨᒪᖁᔭᕗᑦ ᓇᒻᒥᓂᖅ ᑮᓇᐅᔭᓕᐅᕈᑎᖃᕋᓱᐊᕋᑦᑕ ᓄᓇᕗᒻᒧᑦ. ᓇᓗᙱᓚᒍᑦ ᒫᓐᓇᐅᔪᖅ ᑮᓇᐅᔭᖁᑎᕗᑦ ᐊᑦᑐᐃᓂᖃᕐᓂᐊᕐᒪᑕ ᑕᒪᒃᑯᓂᖓ ᐱᓕᕆᐊᔅᓴᓂᒃ - ᐱᓗᐊᖅᑐᒥ ᐃᓪᓗᓕᐅᕐᓂᕐᒧᑦ ᐊᐅᔭᐅᓂᐊᖅᑐᖅ. ᑭᓯᐊᓂ ᓯᕗᓂᑦᑎᓐᓂᒃ ᑮᓇᐅᔭᓂᒃ ᐊᑐᕆᐊᖃᕐᓂᐊᖅᑐᒍᑦ ᑲᓇᑕᒥ ᐊᒻᒪᓗ ᐃᓂᖃᑦᑎᐊᖁᔨᓗᑕ ᓄᓇᕗᒻᒧᑦ ᒫᓐᓇᕋᑖᖅ ᒐᕙᒪᑐᖃᒃᑯᑦ ᑮᓇᐅᔭᖁᑎᖏᓐᓂ. ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᒃᑲ ᐅᕙᖓᓗ ᓇᓗᓇᐃᖅᓯᑦᑎᐊᖅᓯᒪᕗᒍᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᑦ ᐋᖅᑭᒃᓯᒪᓪᓚᕆᒃᑐᓂ ᐅᑭᐅᖅᑕᖅᑐᒧᑦ.
ᑕᒪᓐᓇ ᐱᔾᔪᑎᒋᓪᓗᒍ, ᖁᕕᐊᓱᒃᐳᖓ ᐅᖃᕈᓐᓇᕋᒪ, ᐅᖃᖅᑏ, ᑕᐃᒪᐃᑦᑐᓴᐃᓐᓇᐸᓗᓐᓂᒃ ᑲᑎᒪᓂᖃᓚᐅᕐᒪᑕ ᑲᓇᑕᒥ ᐊᒻᒪᓗ ᒐᕙᒪᒃᑯᑦ ᔫᑳᓐᒥ ᐊᒻᒪᓗ ᓄᓇᑦᓯᐊᕐᒥ. ᑲᔪᖏᕐᓱᕐᐳᖓ ᐅᑭᐅᖅᑕᖅᑐᖅ ᑐᓴᖅᑕᐅᕙᓪᓕᐊᖕᒪᑦ ᐋᑐᕚᒥ. ᓂᕆᐅᒃᐳᒍᑦ ᑕᒪᓐᓇ ᐅᖃᖃᑎᒌᒍᑕᐅᓂᐊᖅᑐᖅ ᒐᕙᒪᑐᖃᒃᑯᓐᓂ ᐱᕙᓪᓕᐊᓂᐅᑉ ᒥᒃᓵᓄᑦ ᐅᑭᐅᖅᑕᖅᑐᒥ.
ᖁᔭᓐᓇᒦᒃ, ᐅᖃᖅᑏ.