Uqaqtittiiji, quviahuktun’nga unniutijaamni Ministat katimaqativakkamikkiq havaqativut kavamatuqait Ottawa mi, May 1 mi 2 milu katimaqatigiiqattarnirmun taijavut imaa Nunavut Hill mi. Ministavut aqhuuqhaivaktait hivulliutigijaujutigut Katujjilutani katimaqatigiplugit 15 ngujungnaqhijut kavamatuqait havagviit, taapkuatlu Munaqhiliqiijitkut, Maligaliqiijitkut, Igluliqiijitkut, Aulapkaijiliqiijitkut, Kanatamilu An’ngujaqtit.
Uqaqtittiiji, May 2 mi, katimaqatigijara An’ngajuqqaarjuaq Justin Trudeau uqautigiplugit aqhuuqhaijavut nappaktiriami amigaittuqhanik igluqpanik, hakugingniqhainnutlu munaqhiliqidjutit, ilauniqhatigunlu Ukiuqtaqtumi Atanniqtuidjutiqarnirmun Aktuqtauniatigunlu Nalliutiqhamik, nuutirunmunlu atanniqtuidjutiqhanut Nunavutip nunainnut imaitlu talvuunatigut hakugingniqhatigut. An’ngajuqqaarjuaq ilitarijaitlu havaarijait Ministavut amigaiqlugit paannariingnikkut Kanatamun talvuuna Nunavut Hill mi hulidjutimi.
Katimadjutiptingni, An’ngajuqqaarjuaq Ministaitlu ilitarijait aadlanggajut atuqpagait nunallaaptingni, ikittuutitigut qilaminnuaq maniliurutiqhatigun imaa ipluni Nunavunmiut takudjutivaktut ubluq tamaat akturnarniitigun piqangginmat ihuaqtumik igluqhatigun,
inuuhirittiarnirmun, pijaami ilihangnikkut, ikittutiklu nunallaami maniliurutiqhatigun, piagainggittutlu ikajuutiqhat inirniqhaangguliqtunut.
Uqaqtittiiji, kingullirpaamut, aliahuutigijaralu katimaqatigigapku Minista Kavamaliqidjutinut Dominic Leblanc, havaqatigiumapluni uvaptingnut utiriamingnik Inirniqhaavut Nunavunmut.
Uqaqtittiiji, ilitturipkaijumajavut Kanata havaktuguq aadjikkiingnitigun ihuaqhaidjutiqhanut Nunavunmut.
Hapinggittuguq hadjamin maniit avatquliajdutiqaqtutigut nakuujumik pidjutiniatuq hapkuninga pivalliajuqhani – talvalluarmi igluqhanik nappaktitaulutik aujangguqqat. Kihimi ihariagijavut hivuni pian’ngaigutiqhanik Kanatamin imaalu pijaami piviqhaqarnirmun piqaqlutik Nunavunmut pilihaaqtumi kavamatuqait maniliqidjutainni. Ukiuqtaqtumi Hivuliqtiuqatitka uvangalu ilihimajuguq ukiuqtaqtumi avikturviit ihariagijait kitulluani atuguminaqtumik-akiqhanik Ukiuqtaqtumun.
Talvuuna miqhaatigut, quviahuktun’nga uqariami, Uqaqtittiiji, aadjikkiivjaqtunik katimadjutigivaktait tahapkunani Kanata Kavamaitlu Yukon Nunattiaqlu. Aliahuutigijara ilihimajaami Ukiuqtaqtuq naalaqtauliqtuq Ottawa mi. Niriuqtuguq hapkua pipkaidjavait uqaqviqattarnirmun kavamatuqainni talvuunatigut pivalliadjutiqhaqarnirmun Ukiuqtaqtumi.
Quana, Uqaqtittiiji.