ᓯᑎᐱᕆ 11, 2025
ᐃᖃᓗᐃᑦ, ᓄᓇᕗᑦ
ᓄᓇᕗᒻᒥ ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᓪᓗᒥ ᑭᐅᖅᑲᐅᕗᖅ ᒐᕙᒪᑐᖃᒃᑯᑦ ᓴᖅᑭᑎᑕᖏᓐᓂᒃ ᓯᕗᓪᓕᖅᐹᓂᒃ ᐊᖏᔪᓂᒃ ᐱᓕᕆᐊᒃᓴᓂᒃ ᑐᓴᖅᑎᑦᑎᔾᔪᑎᓂᒃ.
"ᓂᕆᐅᖕᓂᖃᑦᑎᐊᖅᐳᖓ ᐊᖅᑯᑎᒋᓂᐊᖅᑕᑦᑎᓐᓂ ᓄᓇᕘᑉ ᓯᕗᓪᓕᐅᑎᔪᒪᔭᖏᓐᓂᒃ. ᐱᓕᕆᐊᒃᓴᕗᑦ ᐃᓚᓕᐅᔾᔭᐅᓯᒪᙱᒃᑲᓗᐊᖅᖢᓂ ᓯᕗᓪᓕᕐᒥ ᑐᓴᖅᑎᑦᑎᔾᔪᑕᐅᔪᓂ, ᐱᔪᒥᓇᖅᐳᖅ ᑕᑯᓪᓗᓂ ᐅᑭᐅᖅᑕᖅᑐᒥ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐊᖅᑯᑎᖓ − ᖁᕐᓗᖅᑐᐊᕐᔪᖕᒥ ᐊᖅᑯᑎ ᐊᒻᒪ ᑐᓚᒃᑕᕐᕕᒃ ᐃᓕᓴᕆᔭᐅᓗᓂ ᓂᕈᐊᒐᒃᓴᐅᓂᖓᓂᒃ ᑐᒡᓕᐊᓂ ᑐᓴᖅᑎᑦᑎᔾᔪᑎᓂᒃ.
ᑲᑐᔾᔨᖃᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦ, ᓯᕗᒻᒧᐊᒃᑎᑦᑎᓯᒪᕗᒍᑦ ᑎᓴᒪᓂᒃ ᐊᓯᔾᔨᖅᐸᓪᓕᐊᔪᓂᒃ ᐱᓕᕆᐊᖑᕙᓪᓕᐊᔪᒪᔪᓂᒃ: ᕿᑭᖅᑕᕐᔪᐊᕐᒥ ᐃᑎᔪᒥ ᑐᓚᒃᑕᕐᕕᒃ, ᐅᑭᐅᖅᑕᖅᑐᒥ ᐊᑦᑕᕐᓇᖅᑕᐃᓕᒪᑎᑦᑎᓂᕐᒧᑦ ᐊᖅᑯᑎᒋᔭᐅᔪᖅ, ᑭᕙᓪᓕᕐᒥ ᐃᒪᕐᒧᑦ−ᓄᑭᓪᓚᐅᑎᓄᑦ ᐊᑦᑕᑕᕐᕕᒃ, ᐊᒻᒪ ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖑᔪᖅ. ᑖᒃᑯᐊ ᐱᓕᕆᐊᒃᓴᐃᑦ ᑲᓇᑕᓕᒫᒥ ᐅᔾᔨᕐᓇᕐᓂᖃᖅᐳᑦ ᓴᙱᒃᑎᒋᐊᖅᑎᑦᑎᓂᐊᖅᖢᑎᒃ ᐅᑭᐅᖅᑕᖅᑐᒥ ᓇᖕᒥᓂᖃᕐᓂᕐᒥᒃ, ᓄᓇᕘᒥᓗ ᐊᑐᙱᓐᓂᖅᓴᐅᓕᖅᑎᑦᑎᓗᓂ ᐅᖅᓱᐊᓗᖕᒥᒃ, ᓂᕿᒃᓴᖃᑦᑎᐊᕐᓂᖅᓴᐅᓕᕐᓗᑎᒃ ᐆᒻᒪᖅᑯᑎᖃᑦᑎᐊᕈᓐᓇᖅᓯᒃᑲᓐᓂᕐᓗᑎᒡᓗ, ᓴᖅᑭᑎᑦᑎᓗᑎᒡᓗ ᐱᓕᕆᐊᒃᓴᐅᑯᑖᖕᓂᐊᖅᑐᓂᒃ ᓄᓇᓕᑦᑎᓐᓄᑦ.
ᐅᓪᓗᒥ ᑐᓴᖅᑎᑦᑎᔾᔪᑕᐅᔪᑦ ᑭᒡᒐᖅᑐᐃᕗᑦ ᐱᒻᒪᕆᐊᓗᖕᒥᒃ ᐱᕙᓪᓕᐊᓂᕆᔭᐅᔪᒥᒃ ᑲᓇᑕᒧᑦ, ᑐᙵᓱᒃᑎᑉᐸᒃᑲᓗ ᐱᓕᕆᐊᒃᓴᐃᑦ ᓂᕈᐊᖅᑕᐅᓚᐅᖅᑐᑦ. ᓄᓇᕗᑦ ᓂᕆᐅᒋᔭᖃᑦᑎᐊᖅᐳᖅ ᓂᕆᐅᖕᓂᖃᑦᑎᐊᖅᖢᑎᒡᓗ ᐱᓕᕆᖃᑎᖃᕐᓂᐊᕐᓂᕐᒥᓂᒃ ᒐᕙᒪᑐᖃᒃᑯᓐᓂ ᐃᓄᖕᓂᓪᓗ ᐱᓕᕆᖃᑎᒋᕙᒃᑕᑦᑎᓐᓂᒃ ᑕᑯᖁᓪᓗᒋᑦ ᓯᕗᓪᓕᐅᑎᔪᒪᔭᑦᑎᓐᓂᒃ ᓯᕗᒻᒧᐊᒃᑎᑦᑎᓂᕐᒥᒃ ᑭᖑᓪᓕᕐᒥ."