Apitilirvik 11, 2025
Iqaluit, Nunavut
Nunavutim Hivuliqtia P.J. Akeeagok kiujuq ublumi uumunga kavamatuqatkunnin tuniudjutainnik hivulliinni angijuni havaktakhani tuhaqtipkaidjutinik
“Niriuktara apkutikhaq hivunikhamik Nunavutim hivulliutihimajainnik. Taima havaaqhangit ilaungitkaluaqtilunik talvani hivullirmi tuhaqtitihimaaqtunik, quvianaqtuq tautugianganik Ukiuktaqtuniitunik Qajangnairutikharnik Pihukvikharnik - Qurluqtuarjungmi Apqutikhaq Tulaktarvikhangitlu ilitagijauniaqtun uuktuqtukharnik kinguliujunik tuhaqtitijaangat.
Atauttikkut Nunavut Tunngavitkunni, hivumuudjutijavun hitamat aallanguqtiujaaqtun piniaqhimadjutikhat: Qikiqtarjuaq Itijumi Tariumi Tulaktaqvik, Ukiuqtaqtumi Qajangnaittukkut Aulavikhaq, Kivalliq Hydro-Fibre Atadjuti, unalu Iqaluit Imakkut-auladjuti (Hydroelectric) Havaktakhaq. Hapkuat havaktakhaq Kanadami akhuuqtaujun hakugikharniaqtaa Ukiuqtaqtumi atanniqtuidjuti, mikhilaaqtirlugu Nunavutim aturnianik uqhuqlungnik, pimmarigharlugin niqikhaqarnikut auladjutikhaqarnikkullu qajangnaittumik, piliurlunilu aularaanginnaqtunik uuktuqvighanik nunallaaptingnun.
Ublumi tuhaqtidjutait ilitturipkaijun akhuurnaqtunik hivumuudjutinik Kanadamun, quviagijatkalu havaktakhat pijauhimajun. Nunavut niriuktut pijumanikkut quviahuutikkullu havaqatigijaami kavamatuqatkunni ukunanilu Inuinnait paannarijainnik takupluni hivulliutiujumajavun hivumuujun uvani tuklirmi piliqtukhami.”