ᐊᕕᑐᖅᓯᒪᔪᓂᑦ ᓯᕗᓕᖅᑏᑦ ᐅᑭᐅᖅᑕᖅᑑᑉ ᑭᒡᓕᙳᐊᖓᓂ ᑲᑎᒪᔪᑦ ᓅᒃ, ᑲᓛᖠᑦ ᓄᓈᓂ

ᐊᕕᑐᖅᓯᒪᔪᓂᑦ ᓯᕗᓕᖅᑏᑦ ᐅᑭᐅᖅᑕᖅᑑᑉ ᑭᒡᓕᙳᐊᖓᓂ ᑲᑎᒪᔪᑦ ᓅᒃ, ᑲᓛᖠᑦ ᓄᓈᓂ

ᓯᕗᓕᖅᑎ ᔫᑳᓐᒥ ᓵᓐᑎ ᓯᐅᓪᕗ, ᓯᕗᓕᖅᑎ ᓄᓇᑦᑎᐊᒥ ᑭᐅᕈᓕᓐ ᑳᒃᕋᐃᓐ ᐊᒻᒪᓗ ᓯᕗᓕᖅᑎ ᓄᓇᕗᒻᒥ ᐸᐅᓗᓯ ᐊᕿᐊᕈᖅ ᐅᑯᓂᖓ ᐅᖃᐅᓯᒃᓴᓂᑦ ᓴᖅᑭᑎᑦᑎᓚᐅᖅᐳᖅ:

"ᐅᐱᒍᓱᑦᑎᐊᓚᐅᖅᐳᖓ ᖃᐃᖁᔭᐅᒐᒪ ᐅᑭᐅᖅᑕᖅᑑᑉ ᑭᒡᓕᙳᐊᖓ ᑲᑎᒪᓂᐊᖅᑐᓄᑦ ᐅᐸᒍᑎᓪᓗᖓᓗ ᓄᓇᕐᔪᐊᓕᒫᒥ ᐅᖃᖃᑎᖃᒃᑲᓐᓂᕆᐊᖅᑐᖅᖢᖓ ᐅᑭᐅᖅᑕᖅᑑᑉ ᒥᒃᓵᓄᑦ. ᓇᓗᓇᙱᑦᑐᖅ ᓄᓇᕐᔪᐊᕐᒥᐅᑦ ᐱᓕᕆᖃᑎᒌᒋᐊᖃᓪᓚᕆᒃᐳᑦ ᑲᑐᔾᔨᖃᑎᒌᒡᓗᑎᒡᓗ ᐊᔾᔨᒌᙱᑦᑐᓂᒃ ᐱᔾᔪᑎᖃᕐᓗᑎᒃ. ᐊᑦᑕᕐᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᐃᓅᓯᖃᑦᑎᐊᕐᓂᖅᓴᐅᖁᓪᓗᒋᑦ ᐱᕙᓪᓕᐊᑎᑦᑎᒃᑲᓐᓂᕐᓗᓂᓗ ᐃᓄᖁᑎᑦᑎᓐᓄᑦ, ᐅᖃᖃᑎᒌᖏᓐᓇᕆᐊᖃᖅᐳᑦ ᓴᐃᒪᑦᑎᐊᕐᓂᖅᓴᓂᒃ ᓴᓗᒪᓂᖅᓴᒥᓪᓗ ᓯᕗᓂᒃᓴᖃᖁᓪᓗᒋᑦ. 

"ᑲᑎᒪᕐᔪᐊᖅᑎᓪᓗᒋᑦ, ᓱᓕ ᐅᔾᔨᕆᔭᐅᓕᖅᑎᑦᑎᒃᑲᓐᓂᓚᐅᖅᐳᒍᑦ ᓴᖅᑭᔮᖅᑎᑦᑎᒃᑲᓐᓂᖅᖢᑕᓗ ᐊᑦᑕᕐᓇᙱᓐᓂᖅᓴᒥᒃ ᖃᓄᐃᙱᑦᑎᐊᕐᓂᕐᓴᒥᒡᓗ ᐅᑭᐅᖅᑕᖅᑐᒥᑦ. ᓱᓕ ᓇᓗᓇᐃᖅᓯᔪᓐᓇᖅᐳᒍᑦ ᐅᑭᐅᖅᑕᖅᑐᒥ ᓄᓇᖁᑎᖓ ᐊᑦᑕᕐᓇᖅᑐᒦᑎᑦᑎᑦᑕᐃᓕᒪᓂᕐᓗ ᐱᐅᓯᒋᐊᖅᑕᐅᓯᒪᕗᑦ ᐃᓄᖁᑎᕗᑦ ᐊᓂᒍᐃᑦᑎᐊᕈᓐᓇᖅᓯᑎᒃᑲᓐᓂᖅᖢᒋᑦ ᐊᒻᒪᓗ ᓄᓇᓕᕗᑦ. ᑮᓇᐅᔾᔭᒃᓴᕈᑕᐅᔪᑦ ᐱᔭᕆᐊᖃᓪᓚᕆᒃᑐᓂᑦ ᓄᓇᓖᑦ ᒪᑭᒪᔾᔪᑎᖏᓐᓂ ᑲᔪᓰᓐᓇᕈᓐᓇᖅᑐᓂᒃ ᐆᒻᒪᖅᑯᑎᖃᖅᑎᑦᑎᑦᑎᐊᕐᓗᑎᒃ, ᐊᑐᖅᑕᐅᑦᑎᐊᕈᓐᓇᖅᑐᓂᒃ ᐃᖏᕐᕋᔾᔪᑎᓂᒃ ᐊᒻᒪᓗ ᑐᓴᐅᒪᖃᑎᒌᖕᓂᑦ ᒪᕐᕉᖕᓂᒃ ᐱᔾᔪᑎᖃᕈᓐᓇᖅᐳᖅ ᓴᖅᑭᑎᑦᑎᕙᓪᓕᐊᓗᑎᒃ ᓴᐳᔾᔨᔾᔪᑎᓂᒃ ᓄᓇᓕᖕᓂᓪᓗ ᐱᔭᐅᔭᕆᐊᓕᖕᓂᒃ.

"ᑖᔅᓱᒥᖓ ᐱᓕᕆᑎᓪᓗᑕ, ᐅᓂᒃᑲᐅᓯᖃᕈᓐᓇᖅᓯᓚᐅᖅᐳᒍᑦ ᐊᕕᒃᑐᖅᓯᒪᔪᑦ' ᑕᐅᑐᖅᑰᖅᑕᖏᓐᓂᒃ ᐊᑦᑕᕐᓇᙱᓐᓂᖅᓴᒦᖁᓪᓗᒋᑦ ᐅᑭᐅᖅᑕᖅᑐᒥ ᐱᔪᒃᓯᑦᑎᐊᕐᓂᑦᑎᓐᓂᓪᓗ ᓄᓇᓕᖕᓂ ᑮᓇᐅᔭᓕᐅᕈᑎᒃᓴᓂᑦ ᓴᖅᑭᔮᖅᑎᑦᑎᒃᑲᓐᓂᖅᑐᓂᒃ ᖃᓄᐃᙱᑦᑐᑦ ᐋᓐᓂᐊᓯᐅᖅᑎᓂᒃ ᑲᒪᒋᔭᐅᑦᑎᐊᕐᓂᖅᓴᐅᓕᕐᓗᑎᒃ, ᐃᓕᓐᓂᐊᕐᓂᕐᒥᒃ ᐊᒻᒪᓗ ᐱᕙᓪᓕᐊᓕᒃᑲᓐᓂᕈᑎᒃᓴᓂᒃ.  ᑖᒃᑯᓂᖓ ᐱᔨᑦᑎᕋᐅᑎᓂᒃ ᐊᑐᐃᓐᓇᐅᑎᑦᑎᓗᑎᒃ ᐃᒡᓗᒃᓴᖃᑦᑎᐊᖅᑎᑦᑎᓂᕐᓗ ᐊᒃᑐᐊᓂᖃᖅᐳᑦ ᖃᓄᑐᐃᓐᓇᖅ ᖃᓄᐃᙱᑦᑎᐊᕐᓂᕐᒧᑦ, ᐊᓂᒍᐃᑦᑎᐊᕈᓐᓇᕐᓗᑎᒡᓗ ᓄᓇᓕᕗᑦ.

"ᐅᖃᐅᓯᖃᓚᐅᖅᐳᒍᑦ ᖃᓄᖅ ᐅᔭᕋᖕᓂᐊᕐᓂᖅ ᐱᕐᔪᐊᖑᑎᒋᖕᒪᖔᑦ ᐅᑭᐅᖅᑕᖅᑐᒥ ᑲᓇᑕᒥ ᐅᑭᐅᖅᑕᖅᑐᒥᐅᓪᓗ ᐱᒻᒪᕆᐅᔪᒥᒃ ᐱᓕᕆᐊᒃᓴᖃᕐᓂᐊᖅᐳᑦ ᑲᔪᓯᑦᑎᐊᖏᓐᓇᕈᓐᓇᖅᑐᓂᒃ ᐋᖅᑭᒃᓱᐃᓗᑎᒃ ᓯᕗᓂᒃᓴᑦᑎᓐᓄᑦ.  ᓄᓇᕐᔪᐊᕐᒥᐅᑦ ᐅᑭᐅᖅᑕᖅᑐᒥ ᐊᑐᒐᒃᓴᖏᓐᓂᒃ ᕿᓂᖃᑦᑕᖅᐳᑦ ᓄᓇᕐᔪᐊᓕᒫᒥ ᓱᓇᒃᑯᑖᖃᖅᑎᑦᑎᕙᒃᑐᓂᑦ ᐊᑐᓗᐊᙱᓐᓂᖅᓴᐅᔪᒪᓪᓗᑎᒃ ᐊᕙᑎᑦᑎᓐᓂ ᐊᒻᒪᓗ ᐃᓅᖃᑎᒌᓄᑦ ᐊᑐᖅᑕᐅᔭᕆᐊᓕᖕᓂᑦ ᓄᓇᓕᒡᔪᐊᓂ ᐃᑲᔪᖅᑐᐃᙱᑦᑐᓂᒃ ᐊᒻᒪᓗ ᓂᐅᕕᖅᐸᒃᑐᓄᑦ ᐱᔭᐅᔭᕆᐊᓕᖕᓂᒃ.

"ᖁᔭᓕᑦᑎᐊᖅᐳᒍᑦ ᐅᑭᐅᖅᑕᖅᑑᑉ ᑭᒡᓕᙳᐊᖓᓂ ᑲᑐᔾᔨᖃᑎᒌᓄᑦ ᐊᒻᒪᓗ ᑲᓛᖠᑦ ᓄᓈᓂ ᑲᑎᒪᔭᖅᑐᖅᓯᒪᔪᓂᑦ ᐱᕕᒃᓴᖃᖅᑎᑕᐅᒐᑦᑕ ᐅᑭᐅᖅᑕᖅᑐᒥ ᐅᖃᖃᑎᒌᒃᑐᓂᑦ ᐱᓕᕆᖃᑎᒌᒃᑐᓂᓪᓗ. ᐃᓕᑦᑎᕝᕕᒋᕕᒡᔪᐊᖅᑕᕗᑦ ᓄᓇᕐᔪᐊᓕᒫᒥ ᐱᓕᕆᖃᑎᒋᔭᕗᑦ, ᓂᕆᐅᒃᐳᒍᓪᓗ ᐱᕕᒃᓴᖃᒃᑲᓐᓂᕐᓂᐊᕋᑦᑕ ᐅᖃᖃᑎᒌᒃᑲᓐᓂᓛᕋᑦᑕᓗ ᓯᕗᓂᒃᓴᑦᑎᓐᓂ."