Ukiuqtaqtuni Hivuliqtiit uvani Ukiuqtaqtumi Avalunnguami Katimanirjuarmi uvani Nuuk, Greenland (Kalaalliit)
Hivuliqti Yukonmi Sandy Silver, Hivuliqti Nunatsiami Caroline Cochrane unalu Hivuliqti Nunavunmi P.J. Akeeagok tunihimaliqtaa una uqauti:
“Quvianaqtuq qaitqujaujumi uumunga Ukiuqtaqtumi Avalunnguami Katimanirjuarmun ilaujaamilu upautihimapluni aulapkaihimmaarutaanun nunarjuami uqautiqatigiingnikkut Ukiuqtaqtumik. Anginiqarniit nunarjuami havaqatigiingnikkut paannariingnikkullu amigaittuni ihumagijaujuni naunaittuq. Talvannga amirittiarnirnin talvunga piliurnikkut nakuutqijaujunik inuuhirnik piangaijarnikullu uuktuqvikhanik inuutiptiknun, uqautiit pidjutijun niamnginnaqtumun auladjaritqijaujumullu hivunikhamun aulahimmaaqtukhaq.
“Talvani katimanirmi, aulapkaihimmaaqtugun kangiqhittiarutikhanik akhuurutikhaniklu amirittiaqtaujuummirutikhanik naammaktumullu Ukiuqtaqtumik. Uqarhimmaaqtugun taimaa Ukiuqtaqtumi aulapkainiqarnikkut amirittiarnikkullu pimmarighaqtaujun talvuuna hakugikharnikkut mahulingainniinni inuptiknik nunallaaptiknilu. Maniliqtuutiit ihariagijaujuni aulapkaidjutikhani pipkainikkut aulahimmaaqtaaqtuni auladjutikkut pidjutainnik, nakuujunik ingilradjutikhanik alrujaqtuqtunilu-tuhaumapkaidjutainnik pipkaijaaqtuq malruungnik qanuriliurutikhanik havagutainnik akiraqtuidjutinik nunallaanilu ihariagijainnik.
“Uumani hulidjutimi, naunaijaqhimajavun nunaptikni tautugutaanik amirijaujumik Ukiuqtaqtumik pijumajaptikniklu nunallaani maniliurutikhanik akhuurutikhat nakuutqijaujunik aanniaqtailinikkut munaridjutiknanik, iliharutikhanik piangaijarnikkullu uuktuqvikhanik. Pidjutait hapkununga havagutinun ukunungalu nakuujunik iglukhanun atadjutihimajun tamainnun pidjutainnun inuuhiriknirnun, ukunungalu mahulingainninginnun nunallaaptikni.
“Uqautigivaktavun qanuqtun ihariagijaujun ujaraghiurutit talvannga tununngani Kanadami Ukiuqtaqtumillu pidjutiniaqtuq anginiqaqtumik havagutimik piliurnikkut auladjaritqijaujumullu hivunikhamik. Nunarjuaq qinirhimaliqtuq ukiuqtaqtumun taapkununga piqutikhanun mikhilaaqtirutikhanun nunarjuami ihagiagiinnaqtainnun pivikhanin ikajurutiqangittun qulvahiktuni avatikkut inuuqatigiingnikkullu aturutinik nunagijaujun atuqpaktunullu pijumajainnik.
“Tunijavun qujagidjutivun uvunga Ukiuqaqtumi Avalunnguami timiqutimun ukunungalu Kalaalliinmi pipkaijun uumunga uuktuqvikhamun pimmarigharnikkut ukiuqtaqtumi uqautiptikni havaqatigiigutiptiknilu. Huli amigaittunik ajuirhaqtukhaujugun nunarjuarmi paannarijaptiknik havaqatigiigutiptingnillu, niriuktugullu aallanun uuktuqvikhanun uqaqatigiingnikkut hivunikhani.”