ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᖁᕕᐊᓲᑎᒋᒍᒪᓪᓗᒍ ᓄᓇᕐᔪᐊᒥ ᐊᕐᓇᐃᑦ ᐅᓪᓗᖓ. ᑕᕝᕙᓂ ᐅᓪᓗᖓᓂ ᐃᓕᓴᖅᓯᓇᐅᒐᓗᐊᖅᑎᓪᓗᒍ ᐃᓅᓯᓕᕆᓂᕐᒧᑦ, ᒐᕙᒪᓕᕆᓂᕐᒧᑦ, ᐱᕙᓪᓕᐊᔪᓕᕆᓂᕐᒧᓪᓗ ᐃᑲᔪᖅᓯᒪᓂᖏᓐᓂᒃ ᐊᕐᓇᐃᑦ ᓄᓇᕐᔪᐊᒥ, ᓇᓗᓇᐃᖅᓯᒋᐊᕈᑎᐅᒻᒥᔪᖅ ᐱᓕᕆᐊᖑᒋᐊᖃᓪᓚᕆᓐᓂᖏᓐᓂᒃ ᐊᕐᓇᐃᑦ/ᐊᖑᑏᑦ ᓇᓕᒧᒌᑦᑎᑕᐅᒋᐊᖃᕐᓂᖏᓐᓂᒃ; ᓯᖁᒥᑦᑕᐅᒋᐊᖃᕐᓂᖏᓐᓂᓪᓗ ᐊᕐᓇᐅᓂᖏᓐᓂᒃ ᐃᓚᐃᓐᓈᖅᑕᐅᖃᑦᑕᕐᓂᖏᓐᓂᒃ ᐃᓅᖃᑎᒌᑦᑎᓪᓗᑕ, ᓄᖅᑲᖅᑎᑕᐅᖁᓪᓗᒍᓗ ᐋᓐᓂᖅᑎᕆᓂᐅᕙᑦᑐᖅ ᐱᓂᕐᓗᐃᓂᐅᕙᑦᑐᕐᓗ ᐊᕐᓇᓂ ᓂᕕᐊᖅᓯᐊᓂᓪᓗ.
ᑕᕝᕙᓂ ᐅᓪᓗᖓᓂ, ᐃᓕᓴᕆᒍᒪᔭᒃᑲᑕ ᓴᙱᔪᑦ, ᓴᐱᓕᕈᓐᓇᖏᑦᑐᑦ, ᑲᔪᓯᑦᓯᐊᕈᑎᖃᖅᓯᒪᔪᓂᓪᓗ ᐊᕐᓇᓂᒃ ᓄᓇᕗᒻᒥ ᐃᑲᔪᕐᓂᖃᖅᓯᒪᔪᓂᒃ ᐃᑲᔪᕐᓂᖃᖅᐸᓪᓕᐊᖏᓐᓇᖅᑐᓂᓪᓗ.
ᐱᒋᐊᕈᑎᒋᓗᒍ ᑲᒥᓯᓇᕗᑦ, ᐄᕙ ᐋᕆᐊᒃ. ᒥᔅ ᐋᕆᐊᒃ ᑐᓴᐅᒪᓇᑦᓯᐊᖅᑐᓂᒃ ᐃᖅᑲᓇᐃᔮᖃᖅᓯᒪᔪᖅ ᓂᕈᐊᖅᑕᐅᓯᒪᓂᒃᑯᑦ ᓯᕗᓪᓕᖅᐹᖑᖃᑕᐅᓯᒪᓪᓗᓂ ᐃᓄᓐᓄᑦ ᐊᕐᓇᓄᑑᙱᑦᑐᖅ ᑭᓯᐊᓂᑦᑕᐅᖅ ᑲᓇᑕᓕᒫᒥ ᐊᕐᓇᓄᑦ. ᓂᕈᐊᖅᑕᐅᓚᐅᖅᓯᒪᔪᖅ ᑐᒡᓕᐊᓂ ᓯᕗᓕᖅᑎᐅᓂᕐᒧᑦ 2008-ᒥ, ᑐᙵᕕᓕᐅᖃᑕᐅᓯᒪᓪᓗᓂ ᓄᓇᕗᑦ ᐱᒋᐊᕋᑖᖅᑐᒥᓂᐅᑎᓪᓗᒍ. ᒥᔅ ᐋᕆᐊᒃ ᑕᓪᓕᒪᒋᔭᐅᓪᓗᓂ ᐊᕐᓇᓂ ᑲᓇᑕᒥ ᑕᒪᑐᒥᖓ ᐃᓂᑖᖅᓯᒪᓚᐅᖅᑐᖅ. ᐃᔾᔪᐊᕋᑦᓴᐅᒍᒥᓇᑦᓯᐊᖅᑐᓂ ᓯᕗᓕᖅᑎᐅᔪᖅ.
ᐅᖃᖅᑎᑦᑎᔩ, ᐃᓕᓴᕆᑲᐃᓐᓇᕈᒪᒻᒥᔭᕋ ᐋᓐ ᒥᑭᔾᔪᒃ ᕼᐊᓐᓴᓐ, ᐱᖓᔪᐊᓐᓂ ᑲᒥᓯᓇᐅᓚᐅᖅᑐᖅ ᓄᓇᕗᒻᒥ, ᐱᔨᑦᓯᕋᓚᐅᖅᑐᖅ 2005-ᒥ 2010-ᒧᑦ. ᐃᖅᑲᓇᐃᔭᖅᑎᐅᓯᒪᓂᖓ, ᒥᔅ ᕼᐊᓐᓴᓐ ᒐᕙᒪᒃᑯᓐᓄᑦ
ᐃᖅᑲᓇᐃᔭᖅᑎᐅᓯᒪᔪᖅ, ᓈᓚᐅᑎᖅᑎᐅᓯᒪᓪᓗᓂ, ᐱᕙᓪᓕᐊᔪᓕᕆᔨᐅᓯᒪᓪᓗᓂ ᐅᖃᓕᒫᒐᓕᐅᖅᑎᐅᓪᓗᓂᓗ. ᐊᑕᖏᖅᑐᒋᑦ, ᐃᓅᓯᓕᒫᒥᓂ ᐊᔭᐅᖅᑐᐃᒍᑎᖃᖅᓯᒪᔪᖅ ᐃᓄᒃᑐᑦ ᐅᖃᐅᓯᑦᑎᓐᓂᒃ. 2003-ᒥ ᑐᓂᔭᐅᓚᐅᖅᓯᒪᔪᖅ ᑲᓇᑕᒥ ᖁᑦᑎᓂᖅᐹᒥᒃ ᐃᓕᓴᕆᔭᐅᔾᔪᑎᒥᒃ, ᐊᑦᓱᕉᑎᖃᖅᓯᒪᓂᖓᓄᑦ ᐊᓯᐅᔭᐅᖁᓇᒍ ᐃᓄᐃᑦ ᐃᖅᑲᐅᒪᔭᐅᔾᔪᑎᑦᓴᖏᓐᓂᒃ.
ᐃᓕᓴᕆᒍᒪᒻᒥᔭᕋ ᓯᕗᓪᓕᖅᐹᒥ ᐊᕐᓇᐅᓪᓗᓂ ᒪᓕᒐᓕᐅᕐᕕᔾᔪᐊᒥ ᑭᒡᒐᖅᑐᖅᑎᐅᓚᐅᖅᑐᖅ ᓄᓇᕗᒻᒧᑦ, ᐅᖅᑯᒥᐅᓄᓪᓗ, ᓈᓐᓯ ᖃᕆᑕᖅ-ᓕᓐᑎᐅᓪ. ᒥᔅ ᖃᕆᑕᖅ-ᓕᓐᑎᐅᓪ ᓂᕈᐊᖅᑕᐅᓚᐅᖅᓯᒪᔪᖅ ᖁᕝᕙᓯᑦᑐᒧᑦ ᐃᓂᖓᓄᑦ 1997-ᖑᑎᓪᓗᒍ, ᓂᕈᐊᖅᑕᐅᒃᑲᓐᓂᖅᑐᓂᓗ 2000-ᒥ, 2004-ᒥ 2006-ᒥᓗ. ᐊᑯᓂ ᓂᕈᐊᖅᑕᐅᓯᒪᓂᕐᒧᑦ ᐱᓕᕆᐊᖃᓚᐅᖅᑐᖅ, ᐃᓂᖃᖅᐸᑦᑐᓂ ᐊᔾᔨᒌᙱᑦᑐᓂᒃ ᓯᕗᓕᖅᑎᐅᓂᕐᒧᑦ ᐃᓚᒋᔭᐅᓪᓗᓂ ᐊᖏᔪᖅᑳᖑᓂᕐᒧᑦ ᐃᓄᐃᑦ ᓯᓚᕐᔪᐊᕐᒥ ᑲᑎᒪᔨᖏᓐᓄᑦ. ᐊᒥᓱᓂᒃ ᐱᔭᕇᖅᓯᓯᒪᓂᖓ ᐃᓚᒋᔭᐅᓯᒪᖃᑕᐅᓪᓗᓂ ᐱᓕᕆᔨᒻᒪᕆᐅᖃᑕᐅᓂᕐᒧᑦ ᐊᔩᕈᑕᐅᓂᖏᓐᓄᑦ ᓴᖅᑭᖅᑕᐅᖁᓪᓗᒋᑦ ᓄᓇᕗᑦ ᒐᕙᒪᐅᓂᕐᒧᑦ ᐊᕕᑦᑐᖅᓯᒪᓂᐅᖃᑕᐅᖁᓪᓗᒍ ᑲᓇᑕᒥ.
ᐅᖃᖅᑎᑦᑎᔩ ᐊᒥᓱᒃᑲᓐᓃᑦ ᐊᕐᓇᐃᑦ ᐅᓪᓗᒥ ᐅᖃᐅᓯᕆᒍᓐᓇᑕᒃᑲ ᐅᓪᓗᒥ, ᑯᐃᓐ ᑭᒡᒐᖅᑐᖅᑎᖓ, ᒥᐊᓕ ᓴᐃᒪᓐ, ᒫᓐᓇᐅᔪᖅ ᒪᓕᒐᓕᐅᕐᕕᔾᔪᐊᒥ ᑭᒡᒐᑐᖅᑎ ᓗᐊᕆ ᐃᓪᓚᐅᑦ, ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ, ᐊᓗᑭ ᑰᑦᑎᖅ. ᐃᓚᓯᒍᓐᓇᕐᒥᔪᖓ ᐊᕐᓇᓕᒫᑦ ᐃᑦᓯᕚᖃᑕᐅᔪᑦ ᒥᓂᔅᑕᐅᕕᑦᑎᓐᓂ ᒪᓕᒐᓕᐅᕐᕕᑎᓐᓂᓗ ᒪᓕᒐᓕᐅᖅᑎᐅᖃᑎᕗᑦ.
ᐅᖃᖅᑎᑦᑎᔩ, ᓄᓇᕗᒻᒥ ᐊᓚᖅᑕᐅᓯᒪᙱᑦᑐᑦ ᑭᖑᕚᕇᓂ ᑭᖑᕚᖃᑎᒌᓂᓗ ᖁᐊᖅᓵᕐᓇᖅᑐᒃᑰᕈᑎᖃᖅᓯᒪᓂᕐᒧᑦ ᓄᓇᕗᒻᒥᐅᓕᒫᓄᑦ, ᐱᓗᐊᖅᑐᒥᓗ ᐊᕐᓇᓄᑦ ᓂᕕᐊᖅᓯᐊᓄᓪᓗ. ᐱᓕᕆᑦᓯᐊᒃᑲᓐᓂᕆᐊᖃᖅᑐᒍᑦ. ᓂᓪᓕᐊᖃᑦᑕᕆᐊᖃᖅᑐᒍᑦ ᐊᑭᕋᖅᑐᕐᓗᑕ ᐊᕐᓇᐅᓂᖏᓐᓂᒃ ᐃᓚᐃᓐᓈᖅᑕᐅᖃᑦᑕᕐᓂᕐᒧᑦ ᐋᓐᓂᖅᑎᖅᑕᐅᖃᑦᑕᓂᕐᒧᓪᓗ, ᑲᑐᔾᔨᓗᑕ ᐃᓂᖃᖅᑎᑦᓯᒋᐊᖃᖅᑐᒍᑦ ᐊᕐᓇᐃᑦ ᓂᕕᐊᖅᓯᐊᓪᓗ ᑲᔪᓯᑦᓯᐊᕈᑎᖃᕈᓐᓇᕐᓂᖏᓐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.