ᐅᖃᖅᑎᑦᑎᔩ,
ᖁᕕᐊᓱᕝᕕᐅᒌᓚᐅᖅᑎᓪᓗᒍ, ᐅᕙᖓᓗ ᐊᓯᖏᓪᓗ ᒥᓂᔅᑕᐅᖃᑎᒃᑲ ᐱᕕᖃᕐᓂᑎᓐᓂ ᐳᓛᕆᐊᕈᓐᓇᓚᐅᖅᑐᒍᑦ ᑎᑭᕋᕐᔪᐊᒧᑦ ᐃᒡᓗᓕᒑᔪᒻᒧᓪᓗ. ᒫᓐᓇᒫᖑᕋᑖᓚᐅᖅᑐᖅ, ᐅᐸᓚᐅᖅᑕᕗᑦ ᐃᖃᓗᑦᑑᑦᑎᐊᖅ ᕿᑎᕐᒥᐅᑦ ᐊᔾᔨᒌᖏᑦᑐᓂᒃ ᑎᒥᐅᔪᓂᒃ ᓴᖅᑭᔮᖅᑎᑦᓯᑎᓪᓗᒋᑦ, ᓂᐅᕐᕈᓚᐅᖅᑐᖓ ᑕᓗᕐᔪᐊᒧᑦ.
ᖁᔭᓐᓇᒦᖅᑕᒃᑲ ᒪᓕᒐᓕᐅᖅᑎᑐᐃᓐᓇᐃᑦ ᐋᓕᒃᓵᓐᑐ ᓴᒻᒧᖅᑐᖅ, ᔫᓯᐱ ᖁᖅᑭᐊᖅ, ᓯᕗᓕᖅᑎᐅᑉ ᑐᒡᓕᐊ ᐸᒥᓚ ᕼᐊᑯᖓᒃ ᒍᕌᔅ, ᐊᒻᒪᓗ ᒥᓂᔅᑕ ᔮᓐ ᒪᐃᓐ ᐃᓇᑦᓯᓯᒪᓚᐅᕐᖓᑕ ᐸᕐᓇᓂᕐᒧᓪᓗ ᐃᑲᔪᓚᐅᕐᓂᖏᓐᓄᑦ ᑐᙵᓱᑦᑎᑕᐅᓯᐊᓚᐅᕋᑦᑕᓗ.
ᐅᖃᖅᑎᑦᑎᔩ, 25 ᓄᓇᕗᒻᒥ ᓄᓇᓕᕗᑦ ᓯᐊᕐᒪᖅᓯᒪᒻᒪᑕ 2 ᒥᓕᐊᓐ ᓯᒃᑭᑦᑕᑦ ᑭᓚᒥᑕᐃᑦ ᐅᖓᑖᓂ. ᐊᑐᓂᑦ ᓄᓇᓖᑦ, ᒥᑭᔫᒐᓗᐊᕈᑎᒃ ᐊᖏᔫᒐᓗᐊᕈᑎᓪᓗᓐᓃᑦ, ᐊᖓᓯᑦᑑᓂᕋᖃᑦᑕᕐᖓᑕ ᒐᕙᒪᒃᑯᑦ ᐃᑦᓯᕚᕐᕕᖏᓐᓂᒃ.
ᑭᖑᕝᕕᕋᑦᓴᐅᖏᑦᑐᑦ ᑲᑎᖃᕐᓂᐅᕙᑦᑐᑦ ᓄᓇᓕᓐᓂ ᒐᕙᒪᐃᑦ ᓯᕗᓕᖅᑎᖏᓐᓂᒃ ᓄᓇᓕᖏᓐᓂ. ᑕᐃᒫᒃ ᐃᓕᑉᐸᓪᓕᐊᖃᑦᑕᕈᓐᓇᖅᑐᒍᑦ ᓄᓇᓕᓐᓂ ᓴᓇᑐᓂᐅᔪᓂᒃ ᓄᓇᓕᓐᓂᓗ ᐱᔭᕆᐊᓕᖏᓐᓂᒃ. ᑲᑎᖃᑎᒋᓚᐅᖅᑕᒃᑲ ᒪᐃᔭ ᐊᓕᕗ ᓯᑉᑕᓐ, ᓯᒥᐅᓂ ᓴᒻᒧᖅᑐᖅ, ᓕᐊᓂ ᐸᓂᒐᔭᒃ ᐊᒻᒪᓗ ᐅᐃᓐ ᒍᕋᒍᕆ ᑲᑎᒪᔨᖏᓪᓗ.
ᑕᑯᓐᓇᖃᑎᒌᓪᓗᓂ ᐅᖃᖃᑎᒌᓐᓂᐅᔪᑦ ᓯᕗᓕᖅᑎᓂᒃ, ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᓐᓂ, ᐃᓐᓇᒻᒪᕆᓐᓂᓪᓗ, ᐃᓕᑉᐹᓪᓕᕈᓐᓇᖅᑐᒍᑦ ᓄᓇᓕᑦᑕ ᒥᑦᓵᓄᑦ − ᐱᓗᐊᖑᐊᖅᑐᖅ ᓄᓇᓕᓐᓂ ᓂᕆᕕᔾᔪᐊᖃᑎᒌᑦᑐᓂ. ᐳᓚᕋᓐᓂᐅᔪᓪᓗ ᖃᐅᔨᕚᓪᓕᕈᑎᒋᒍᓐᓇᖅᑕᕗᑦ ᓄᓇᓕᑦᑎᓐᓂ ᑕᑯᓪᓚᑦᑖᖃᑦᑕᕐᓗᒋᑦ.
ᖁᐊᖅᓵᕐᓇᓚᐅᖏᑦᑐᖅ, ᐅᖃᖅᑎᑦᑎᔩ, ᐊᑐᓂᑦ ᓄᓇᓕᓐᓂ ᐱᓗᐊᖑᐊᖅᑎᑦᓯᖃᑦᑕᓚᐅᕐᖓᑕ ᐃᓪᓗᑖᒃᑲᓐᓂᕆᐊᖃᕐᓂᖏᓐᓂᒃ. ᕿᓚᒥᐅᓂᖅᓴᒃᑯᑦ ᐃᓪᓗᓕᐅᕈᓐᓇᖏᓐᓇᑦᑕ, ᑭᓯᐊᓂ ᖃᐅᔨᒪᔪᖓ ᓄᓇᕗᑦ 3000 ᐃᑲᔪᕐᓂᖃᕐᓂᐊᕐᖓᑦ − 3000-ᓂᒃ ᐊᖏᕐᕋᑖᖅᑲᐅᑎᑦᓯᓂᖅ 2030 ᑐᖔᓂ. ᓄᙳᐊᓂ 2024, ᐊᑐᓂᑦ ᓄᓇᓕᓐᓂ ᐃᓪᓗᑖᖅᑲᐅᖃᓛᖅᑐᑦ ᓴᓇᔭᐅᕙᓪᓕᐊᔪᓂᒃ.
ᐊᑐᓂᑦ ᓄᓇᓕᓐᓂ ᑐᙵᓇᑦᓯᐊᖃᑦᑕᓚᐅᖅᑐᑦ. ᓂᐅᕐᕈᕕᒋᔭᐃᓐᓇᕗᑦ ᖃᐅᔨᒪᒍᑎᒋᓂᐊᖅᑕᕗᑦ ᐱᓕᕆᐊᕆᒋᐊᓕᑦᑎᓐᓂᒃ. ᖁᔭᓐᓇᒦᒃ ᐊᑕᖏᖅᑐᒋᑦ ᐱᕕᖃᖃᑦᑕᓚᐅᖅᑐᑦ ᑲᑎᓯᒍᓐᓇᖅᑐᑎᒃ ᐅᕙᑦᑎᓐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.