ᐅᖃᖅᑎᑦᑎᔩ,
ᐅᓪᓗᒥ ᐃᓕᓴᕆᔪᒪᕙᒃᑲ ᒐᕙᒪᒃᑯᑦ ᑭᐅᔾᔪᑎᖓᑦ ᓄᓇᑦᓯᐊᕐᒥ ᐃᑭᕐᔪᐊᖅᑐᓄᑦ.
ᐅᖃᖃᑎᒌᖏᓐᓇᓚᐅᖅᑐᒍᑦ ᓄᓇᑦᓯᐊᑉ ᒐᕙᒪᒃᑯᖏᓐᓂᒃ, ᑎᑭᖦᖢᒍ, ᐊᒻᒪᓗ ᑭᖑᓂᐊᒍᑦ ᕿᒫᔭᕆᐊᖃᕐᔪᐊᓚᐅᖅᑎᓪᓗᒋᑦ. ᐅᕙᖓ ᓇᖕᒥᓂᖅ ᐅᖃᖃᑎᒋᓯᒪᔭᕋ ᓯᕗᓕᖅᑎ ᑳᓚᐃ ᑳᒃᕋᓐ ᖃᔅᓰᖅᓱᑲᓪᓚᒃᖢᓄᒃ. ᐅᖃᖃᑎᖃᐃᓐᓇᓚᐅᕐᒥᔪᖓ ᒪᓕᒐᓕᐅᖅᑎᐅᖃᑎᓐᓂᒃ ᕿᑎᕐᒥᐅᓂ.
ᑐᕌᕆᔭᕗᑦ ᐃᑲᔪᖅᑐᐃᔪᒪᓪᓗᑕ, ᑕᐃᒪᐃᓕᐅᕐᓂᕐᒥᓂᓗ ᓇᓗᙱᑦᑎᐊᕐᓗᑕ ᖁᐊᖅᓵᕐᓇᖅᑐᒦᙱᒃᑲᓗᐊᕐᒪᖔᑕ ᓄᓇᕗᒻᒥᐅᑦ ᑲᒪᒋᔭᐅᕙᒃᑐᑦ.
ᐅᖃᖅᑎᑦᑎᔩ, ᓯᕗᓂᐊᒍᑦ ᑖᒃᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᖅᑏᑦ ᐱᓕᕆᖃᑎᖃᓚᐅᕐᒪᑕ ᑲᓇᐃᑎᐊᓐ ᓄᐊᑦᑯᓐᓂᑦ. ᓂᐅᕕᓚᐅᖅᑐᒍᑦ ᓵᑕᖅᑕᐅᓯᒪᔪᒥᒃ ᖃᖓᑕᓲᒥᒃ ᓅᑕᐅᖁᓪᓗᒋᑦ ᐋᓐᓂᐊᕕᓕᐊᖅᐸᒃᑐᑦ ᒪᓕᒃᑎᖏᓪᓗ ᔭᓗᓇᐃᒥᑦ ᐃᐊᑦᒪᓐᑕᓐᒧᑦ. ᑕᒪᕐᒥᑦᑎᐊᖅ 85−ᖑᔪᑦ ᐋᓐᓂᐊᕕᓕᐊᖅᖢᑎᒃ ᐊᐅᓪᓚᖅᑐᑦ ᒪᓕᒃᑎᖏᓪᓗ ᓇᓗᓇᐃᖅᑕᐅᓚᐅᖅᐳᑦ ᓯᕗᒧᑦᑎᐊᖅᖢᑎᒡᓗ ᐃᑦᒪᓐᑕᓐ−ᒧᑦ. ᐋᓐᓂᐊᕕᓕᐊᖅᓯᒪᔪᑦ ᑐᐊᕕᕐᓇᖅᑐᒃᑯᑦ ᑲᒪᒋᔭᐅᒋᐊᓖᑦ ᓯᕗᓪᓕᐅᔾᔭᐅᓚᐅᖅᐳᑦ.
ᐃᑲᔪᓚᐅᖅᐳᒍᑦ ᑕᐃᒃᑯᐊ ᐱᓕᕆᔭᖅᑐᖅᖢᑎᒃ ᐊᐅᓪᓚᖅᑐᑦ ᑎᑎᕋᖅᑕᐅᑦᑎᐊᖁᓪᓗᒋᑦ, ᐊᒻᒪᓗ ᐃᓄᓕᕆᔨᒃᑯᓐᓂ ᑲᒪᒋᔭᐅᓪᓗᑎᒃ ᐊᒻᒪ ᒪᓕᒐᓕᕆᔨᒃᑯᓐᓄᑦ.
ᒐᕙᒪᑦᑕ ᐱᓕᕆᔨᐅᖃᑎᒌᑦ ᑲᑎᒪᔨᕋᓛᖏᑦ ᖃᐅᔨᓴᓚᐅᕐᒪᑕ ᖃᓄᐃᓕᔪᖃᐃᓐᓇᖃᑦᑕᕐᓂᖓᓂᒃ ᐊᒻᒪᓗ ᐊᒃᑐᐃᓂᕆᕙᑦᑕᖏᓐᓂᒃ ᑕᒪᒃᑯᐊ ᐃᖏᕐᕋᔪᓕᕆᓂᖅ ᐱᔾᔪᑎᒋᓪᓗᒍ ᐊᒻᒪᓗ ᐅᓯᑲᖅᑕᖅᑕᐅᖃᑦᑕᕐᓂᖏᑦ ᕿᑎᕐᒥᐅᓄᑦ.
ᐅᖃᖅᑎᑦᑎᔩ, ᑐᓂᓯᓚᐅᖅᐳᒍᑦ $250, 000−ᓂᒃ ᑲᑐᔾᔨᖃᑎᒌᒍᑕᐅᓪᓗᓂ ᓄᓇᑦᓯᐊᒥ ᑐᐊᕕᕐᓇᖅᑐᒧᑦ ᖃᓄᐃᓕᐅᕈᑕᐅᔪᒥᑦ ᑮᓇᐅᔭᑦ ᓄᓇᓕᖕᒥᐅᓂᒃ ᐃᑲᔪᖅᑐᐃᓪᓗᑎᒃ ᓄᓇᒥ ᐃᑭᕐᔪᐊᖅᑐᓄᑦ ᐊᒃᑐᖅᑕᐅᓯᒪᔪᓂᑦ ᐊᐅᔭᐅᓵᖅᑐᒥᑦ. ᑖᒃᑯᐊ ᑮᓇᐅᔭᐃᑦ ᑐᕌᖓᓚᐅᖅᐳᑦ ᑲᑐᔾᔨᖃᑎᒌᓄᑦ ᑐᙵᓇᑦᑎᐊᓚᐅᖅᑐᓄᑦ ᐊᒻᒪ ᐃᑲᔫᑕᐅᓪᓗᑎᒃ ᑕᐅᓴᖏᓐᓃᑦᑐᓂᒃ ᕿᒫᒋᐊᖃᖅᑐᓄᑦ.
ᐃᑉᐱᖕᓂᐊᓂᖃᒻᒪᕆᓚᐅᖅᑐᒍᑦ, ᐊᒃᓱᑲᓪᓚᒃ, ᐱᓂᕐᓗᖕᓂᐅᓚᐅᖅᑐᖅ ᓄᓇᒥ ᐃᑭᕐᔪᐊᖅᑐᓄᑦ ᐊᒃᑐᖅᑕᐅᔪᓄᑦ ᓯᓚᖅᑲᑎᑦᑎᓐᓄᑦ ᐱᖓᓐᓇᖓᓃᑦᑐᓄᑦ, ᐱᖃᓯᐅᑎᓪᓗᒋᑦ ᐃᓚᖏᑦ ᐊᒻᒪᓗ ᓇᒡᓕᒋᔭᖏᑦ. ᐃᓱᒪᒌᓐᓇᖅᑕᕗᑦ ᑲᔪᓯᕙᓪᓕᐊᑎᓪᓗᒋᑦ, ᐊᒻᒪᓗ ᐃᓚᖏᓐᓄᑦ ᓴᓇᒃᑲᓂᕆᐊᓕᖕᓄᑦ, ᐃᓅᓯᖏᑦ ᓄᓇᒥ ᐃᑭᓚᐅᖅᑎᓪᓗᒋᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.