ᐅᖃᖅᑎᑦᑎᔩ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖁᕕᐊᓱᒃᐳᑦ ᑐᓴᖅᑎᑦᑎᔪᓐᓇᕐᒪᑕ ᐊᖏᖅᑕᐅᓂᖏᓐᓂᒃ ᑎᓴᒪᑦ ᐃᖅᑲᓇᐃᔭᐃᓐᓇᕐᓂᐊᓕᕐᓗᑎᒃ ᐃᖅᑲᓇᐃᔮᖅᑖᕋᓱᐊᖅᑐᑦ ᑖᒃᑯᓇᓂ ᑲᑐᔾᔨᖃᑎᒌᒡᕕᖕᒥ. ᑕᒪᓐᓇ ᐅᔾᔨᕐᓇᖅᑐᒻᒪᕆᐅᕗᖅ ᓈᒻᒪᖅᑰᑦᑎᓪᓗᓂᓗ ᐱᓕᕆᐊᖑᕙᓪᓕᐊᕗᖅ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐊᖏᖃᑎᒌᒃᑎᑦᑎᓇᓱᒃᑎᓄᑦ ᐋᖅᑭᒃᓯᒪᓕᖅᑎᑕᐅᓚᐅᖅᑎᓪᓗᒍ ᒫᑦᓯ 25, 2023−ᒥ. ᑕᑯᒃᓴᐅᑎᑦᑎᕗᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᖏᖅᓯᒪᓂᖏᓐᓂᒃ ᐃᑲᔪᖅᑐᐃᔪᒪᓪᓗᑎᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑎᒥᒃ ᐅᓄᖅᓯᒋᐊᕐᓗᒋᓪᓗ ᐃᓄᐃᑦ ᐃᖅᑲᓇᐃᔭᖅᑎᑦ ᐃᒡᓗᓕᕆᔨᕐᔪᐊᒃᑯᓐᓂ.
ᑖᒃᑯᐊ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐃᖅᑲᓇᐃᔮᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᐱᒻᒪᕆᐅᔪᓂᑦ ᐃᓕᓐᓂᐊᑎᑦᓯᓂᕐᒥᑦ ᖃᐅᔨᒪᓂᖃᕐᓂᕐᒥᓪᓗ ᑭᒃᑯᑐᐃᓐᓇᕐᓄᑦ ᐱᔪᒪᓂᖃᖅᑐᓄᑦ ᖁᕕᐊᓇᖅᑐᒥᑦ ᐃᖅᑲᓇᐃᔮᖃᕐᓂᕐᒥᑦ ᐆᒻᒪᖅᑯᑎᓕᕆᓂᕐᒧᑦ. ᑕᒪᕐᒥᒃ ᑎᓴᒪᑦ ᐃᖅᑲᓇᐃᔮᒃᓴᑦ ᐊᔪᙱᔾᔪᑎᓕᖕᓂᒃ ᓴᓇᔨᖃᕐᓂᐊᖅᑐᑦ ᐃᓕᓐᓂᐊᖅᑎᑦᑎᔨᖃᕐᓗᑎᒃ. ᑖᒃᑯᐊ
ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐃᓕᓐᓂᐊᕐᓂᖅ ᐱᕕᖃᕐᓂᐅᔪᑦ ᐊᑐᐃᓐᓇᐅᑎᑦᓯᑐᐃᓐᓇᓚᖓᖏᑦᑐᑦ ᐱᒻᒪᕆᐅᔪᓂᑦ ᐃᓕᓐᓂᐊᑎᑦᓯᓂᕐᒥᑦ ᖃᐅᔨᒪᓂᖃᕐᓂᕐᒥᓪᓗ ᐃᒻᒥᑰᖅᑐᓄᑦ ᐊᑎᓕᐅᖅᑕᐅᓯᒪᔪᓄᑦ ᑭᓯᐊᓂ ᐃᑲᔪᕐᓂᐊᖅᑐᖅ ᐱᕈᖅᐸᓪᓕᐊᓂᕐᒥᑦ ᑲᔪᓯᓂᖃᑦᓯᐊᕐᓂᕐᒥᓪᓗ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᑦ ᑯᐊᐳᕇᓴᐅᓗᓂ ᐱᓯᒪᑦᓯᓂᕐᒥᑦ ᐊᑯᓂᐅᔪᒧᑦ ᑲᑐᔾᔨᖃᑎᒌᓄᑦ ᖃᐅᔨᒪᓂᕐᒥᑦ ᒥᑭᓪᓕᕚᓪᓕᑎᑦᓯᓂᕐᒥᓪᓗ ᑕᑎᖃᕐᓂᕐᒥᑦ ᖃᓪᓗᓈᓂᑦ ᐃᖅᑲᓇᐃᔭᖅᑎᓂᑦ.
ᐊᕐᕌᒎᓵᖅᑐᓂ ᑕᓪᓕᒪᓂ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᓴᙱᒃᑎᒋᐊᖅᑎᑦᑎᓯᒪᕗᑦ ᑐᙵᕕᒋᔭᐅᔪᓄᑦ ᐱᓕᕆᐊᕆᔭᒥᓄᑦ, ᓲᕐᓗ ᐃᖅᑲᓇᐃᔭᖅᑎᐅᓂᕐᒧᑦ ᐱᕙᓪᓕᐊᑎᑕᐅᓂᕐᒧᑦ ᐱᕙᒌᔭᖅᑕᐅᓯᒪᔪᒥᒃ, ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑦᑎᕙᖕᓂᕐᒧᑦ ᐱᓕᕆᐊᖑᕙᒃᑐᒥᒃ, ᐃᖅᑲᓇᐃᔭᖅᑎᕈᖅᓴᓂᕐᒧᓪᓗ ᐱᓕᕆᐊᖑᕙᒃᑐᒥᒃ, ᓴᖅᑭᔮᓕᖅᑎᑦᑎᔪᒪᓪᓗᑎᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐱᓕᕆᐊᖑᕙᒃᑐᒧᑦ ᑐᕌᕆᔭᒥᓄᑦ. ᐃᓚᒃᑲᓐᓂᖓ ᑖᒃᑯᐊ ᑎᓴᒪᑦ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐃᓕᓐᓂᐊᕐᓂᖅ ᐱᑎᑦᑎᔪᖅ ᐃᓄᖕᓂᒃ ᐊᒥᓱᕈᕆᐊᖅᑐᓂᒃ ᐱᕕᒃᓴᓂᑦ ᓇᓗᓇᐃᒃᑯᑕᖅᑖᕐᓗᑎᒃ ᓴᓈᖅᑖᕈᓐᓇᖅᓯᓗᑎᒃ ᓴᓈᖅᑖᕈᓐᓇᖅᓯᓗᑎᒃ ᓄᓇᕗᒻᒥ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᕿᓂᖅᐸᓪᓕᐊᕗᑦ ᑎᒃᑯᐊᖅᑕᐅᑲᐅᑎᒋᔪᒥᒃ ᐊᖏᖅᑕᐅᔾᔪᑎᒃᓴᒥᒃ ᒪᕐᕉᖕᓄᑦ ᐃᖅᑲᓇᐃᔭᓚᐅᑲᖕᓂᐊᖅᑑᖕᓄᑦ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐃᓕᓐᓂᐊᕐᓂᕐᒧᑦ. ᒪᕐᕉᒃ ᐃᓅᒃ ᐃᖅᑲᓇᐃᔭᖅᑏᒃ ᑕᑯᒃᓴᐅᑎᑦᑎᓯᒪᔫᒃ ᐊᔪᖖᒋᓐᓂᖃᕐᓂᕐᒥᓂᒃ ᐊᒻᒪᓗ ᐊᖏᖅᓯᒪᑦᑎᐊᕐᓂᕐᒥᒃ ᓴᓇᔨᓪᓚᕆᙳᕐᓂᕐᒧᑦ. ᐊᒥᐊᒃᑯᖏᑦ ᒪᕐᕉᒃ ᐃᖅᑲᓇᐃᔮᒃᓵᒃ ᐃᓐᓄᒃᑕᐅᓂᐊᖅᑐᑦ ᐊᑐᕐᓗᑎᒃ ᖁᓪᓕᒃᑯᑦ ᐃᓗᐊᓂ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔮᒃᓴᒧᑦ ᓴᓇᔨᐅᓂᕐᒧᓪᓘᓐᓃᑦ ᐱᓇᔫᑎᖏᓐᓂ. ᑯᐊᐳᕇᓴᒃᑯᑦ ᓂᕆᐅᒃᐳᑦ ᐊᖏᒡᓕᒋᐊᖅᑕᐅᖏᓐᓇᕐᓂᐊᕐᓂᖓᓂᒃ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕐᓂᕐᒧᑦ ᐃᓕᓐᓂᐊᕐᓂᖅ ᓯᕗᓂᒃᓴᑦᑎᓐᓂ. ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ ᐱᒃᑯᓕᔪᑦ ᐱᓇᔪᐃᓐᓇᕐᓂᕐᒥᓂᒃ ᐱᕈᖅᐸᓪᓕᐊᑎᑦᑎᓗᑎᒃ ᐊᔾᔨᒌᖏᑦᑐᓂᒃ ᐃᓚᐅᑎᑦᑎᔪᓂᒃᓗ ᐃᖅᑲᓇᐃᔭᖅᑎᓂᒃ ᐊᔾᔨᖃᖅᑐᓂᒃ ᓄᓇᓕᖕᓂ ᐱᔨᑦᑎᕋᖅᑕᑦᑎᓐᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.