ᐅᖃᖅᑎᑦᑎᔨ, ᐊᐃᕆᓕᒥ ᖃᐃᖅᑯᔭᐅᓚᐅᕋᒪ ᒪᕐᕉᓐᓂᒃ ᒪᓕᒐᓕᐅᖅᑏᓐᓂᒃ ᐳᓛᖁᔭᐅᓪᓗᖓ ᓄᓇᓕᖏᓐᓄᑦ. ᖁᔭᓕᔪᒻᒪᕆᐅᕗᖓ ᒪᓕᒐᓕᐅᖅᑎ ᐊᒥᑦᑐᕐᒧᑦ ᔪᐃᓕ ᖃᐃᕐᓂᖅ ᐊᒻᒪ ᖁᕐᓗᖅᑐᕐᒥ ᒪᓕᒐᓕᐅᖅᑎ ᐹᐱ ᐊᓇᕐᕕᓗᒃ ᓄᓇᒥᖕᓄᑦ ᑐᙵᓱᒃᑎᑦᑎᓚᐅᕐᓂᖏᓐᓄᑦ.
ᐅᖃᖅᑎᑦᑎᔨ, ᐅᒃᐱᕈᓱᒃᑐᖓ ᖃᔅᓰᓐᓇᐅᒐᓗᐊᓂᒃ ᐱᒻᒪᕆᐅᓂᖅᑕᖃᕐᓂᖓᓂᒃ ᒐᕙᒪᓕᕆᔨᓄᑦ ᑲᑎᒪᖃᑎᖃᕐᓂᕐᒥᒃ ᓈᓚᖕᓂᕐᒥᓪᓗ ᓂᕈᐊᖅᑎᒥᖕᓂᒃ. ᐃᓇᖏᖅᑕᐅᔪᖃᙱᑦᑐᖅ ᐅᐸᒍᑎᓗᑎᒃ ᐊᑦᑕᑕᕐᕕᐅᓲᓂᒃ.
ᑕᒪᐃᓐᓂ ᓴᓂᕋᔭᖕᒥ ᐊᒻᒪᓗ ᖁᓪᓗᖅᑑᒥ, ᑲᑎᒪᖃᑎᖃᓚᐅᖅᑐᖓ ᐃᒡᓗᓕᕆᔨᒃᑯᓐᓂᑦ, ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᒻᒪᓗ ᕼᐋᒻᒪᓚᒃᑯᑦ ᑲᑎᒪᔨᖏᓐᓂᒃ. ᐳᓛᕆᐊᖃᑦᑕᓚᐅᖅᑐᖓ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᖏᓐᓄᑦ, ᑕᐃᑲᓂᓗ ᖁᕕᐊᒋᑦᑎᐊᓚᐅᖅᑕᕋ ᓂᕿᓕᕆᓂᕐᒧᑦ ᐱᓕᕆᐊᖏᑦ ᐊᒻᒪᓗ ᐃᓕᓐᓂᐊᕐᕕᖏᑦ. ᐅᓪᓗᕈᕐᒥᑕᖃᑎᒋᓚᐅᖅᐸᒃᑲ ᓄᓇᓕᖕᓂ ᓯᕗᓕᖅᑎᐅᔪᑦ ᓂᕈᐊᖅᑕᐅᓚᐅᖅᑐᑦ ᒪᓕᒐᓕᐅᖅᑎᖏᓐᓄᑦ. ᐅᖃᖃᑎᖃᓚᐅᖅᑐᖓ ᑕᒪᐃᓐᓂᑦ ᐸᖅᓴᐃᔨᓂᒃ ᕿᓂᖅᑎᓂᒡᓗ ᐃᓄᖕᓂ ᑲᑐᔾᔨᖃᑎᒌᑦ ᑭᒡᒐᖅᑐᖅᑎᓂᒃ, ᐋᓐᓂᐊᕐᕕᖕᒥᑦ ᐃᖅᑲᓇᐃᔭᖅᑎᓂᑦ, ᐊᒻᒪ ᐃᓐᓇᕐᓂᒃ ᓲᕐᓗ ᐋᓕᔅ ᕼᐃᖅᑯᐊᖅ ᐊᔭᓕᒃ ᐊᒻᒪᓗ ᓇᒡᓕᖕᓂᖅ ᐃᓄᒃᓱᒃ.
ᐅᖃᖅᑎᑦᑎᔨ, ᓴᓂᕋᔭᖕᒥ, ᐳᓛᕆᐊᓚᐅᕋᒪ ᐅᑭᐅᖅᑕᖅᑐᒥ ᓇᐅᑦᑎᖅᓱᖅᑎᓄᑦ ᑲᑎᖃᑎᒋᓚᐅᖅᖢᒍᓗ ᔫᓐ ᐃᓄᒃᓱᒃ, ᐊᐅᓚᑦᑎᔨᐅᔪᖅ ᐊᒻᒪᓗ 9-ᖑᔪᓂᒃ ᐃᓄᖕᓂᒃ ᐃᖅᑲᓇᐃᔭᖃᑕᐅᓪᓗᓂ ᓇᓯᑦᑐᖅ ᑯᐊᐳᕇᓴᓐᑯᓐᓂᑦ ᑕᐃᑲᓂ ᓇᐅᑦᑎᖅᓱᖅᑎᕐᕕᒋᔭᒥᓂᒃ.
ᖁᕐᓗᖅᑑᒥ, ᓂᐊᖁᕈᓯᖅᓯᓚᐅᖅᐳᖓ ᓇᑦᑎᖅ ᖁᕕᐊᓲᑕᐅᑎᓪᓗᒍ ᑯᐄᓐ ᔭᓇᕖᕝ ᐊᒻᒪ ᒪᓯᓚ ᓂᕕᖓᓗᖕ−ᒥ, ᐊᒻᒪᓗ ᐃᓕᑦᑎᓚᐅᖅᑐᖓ ᖃᓄᖅ ᐊᐅᓚᖁᑎᒥᒃ ᒪᓕᒍᓐᓇᕐᒪᖔᕐᒪ ᓱᑲᓐᓂᑭᓴᐅᑎᔪᓄᑦ.
ᐱᓕᕆᐊᓐᓂ ᒥᓂᔅᑕᐅᓪᓗᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ, ᐅᐱᒍᓱᓚᐅᖅᐳᖓ ᐳᓛᕆᐊᕈᓐᓇᓚᐅᕋᒪ ᖁᕐᓗᖅᑑᑉ ᐊᐅᓚᐅᑎᖃᕐᕕᖓᓄᑦ ᐊᒻᒪᓗ ᖃᓄᖅ ᐃᖅᑲᓇᐃᔭᖅᑎᑦᑎᐊᕙᐅᒻᒪᖔᑕ ᓯᐅᓪᑕᓐ ᑲᓚᓐᔭᓐᐴᒡ ᐊᒻᒪᓗ ᐱᐅᓪ ᒪᒃᕕᓕᐊᒻ ᐊᐅᓚᑦᑎᓂᐊᓕᕐᒪᑕ ᐱᑐᖃᕈᖅᐸᓪᓕᐊᔪᓂᑦ ᐱᖁᑎᕐᔪᐊᓂᑦ ᐊᓯᔾᔩᕙᓪᓕᐊᓪᓗᑕ.
ᐅᖃᖅᑎᑦᑎᔨ, ᐳᓚᕋᖅᑎᓪᓗᖓ ᓄᓇᓕᖕᓄᑦ ᓄᓇᕗᒻᒥ, ᐊᒥᓱᑦ ᓄᓇᖃᖅᑎᐅᔪᑦ ᐅᖃᖃᑦᑕᖅᓯᒪᖕᒪᑕ ᐳᐃᒍᖅᑕᐅᓯᒪᓂᕐᒥᓂᒃ ᐅᕝᕙᓘᓐᓃᑦ ᐅᖓᓯᒃᑐᐊᓘᒋᐊᖓᓂᒃ ᒐᕙᒪᒃᑯᓐᓂᑦ. ᑕᒪᓐᓇ ᐱᔾᔪᑎᒋᓪᓗᒍ, ᓄᓇᕗᒻᒥᐅᑦ ᖃᐅᔨᒪᖁᕙᒃᑲ ᐱᓕᕆᐊᖃᕐᓂᑦᑎᓐᓂᒃ ᓄᓇᕗᑦ ᐊᑕᑏᓐᓇᕋᓱᒃᖢᒋᑦ ᐅᖓᓯᒋᒐᓗᐊᖅᖢᒍ ᐊᑐᒐᒃᓴᓄᓪᓗ ᐊᒃᓱᕈᕐᓇᖅᓯᕙᒃᑲᓗᐊᖅᑎᓪᓗᒍ. ᑕᒪᓐᓇ ᐱᔾᔪᑎᒋᓪᓗᒍ ᕿᒥᕐᕈᓂᐊᕐᓂᕋᖅᓯᒪᕗᖓ ᓯᐊᒻᒪᒃᑎᕆᓂᕐᒥᒃ.
ᐅᖃᖅᑎᑦᑎᔨ, ᑲᔪᖏᖅᓴᖅᑕᐅᖏᓐᓇᖃᑦᑕᖅᐳᖓ ᐱᓇᔪᒃᖢᑎᒃ ᓄᓇᓕᖕᒥᐅᑦ ᐃᑲᔪᖅᓱᖅᖢᑎᒃ ᐅᕙᓐᓂᒃ ᒐᕙᒪᒃᑯᓐᓂᓪᓗ ᐱᔨᑦᑎᑦᑎᐊᓂᖅᓴᐅᖁᓪᓗᒋᑦ. ᐊᐅᓪᓚᕐᓂᑕᒫᑦ, ᐃᓄᖕᓂᒃ ᑕᑯᖃᑦᑕᖅᑐᖓ ᐅᐱᒍᓱᒃᑐᓂᒃ ᐊᖏᕐᕋᖏᓐᓂᒃ ᐊᒻᒪᓗ ᐊᓯᔾᔩᔪᒪᔪᓂᒃ ᑲᑐᔨᓗᑕᐅᑉ ᐱᒋᐊᖅᑎᑕᐅᓂᖓᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔨ.