Uqaqtittiiji, Qitiqqautijurmi quviahuutigijaujun’nga an’ngiqhugit qaitqujaugama malruungnit maligaliuqtinit pulaaquplugit nunagijainnut. Quviahuutigijatka ilaujunut Amittuq MLA nga Joelie Kaernerk Kugluktuklu MLA nga Bobby Anavilok ilauqungmanga nunagijainni.
Uqaqtittiiji, ukpirijara qaffini an’nginiqagungnaqhijut havaarijaqhani kavamaliqidjutijunin talvamit katimaqatigilugitnut naalaklugitlu niruaqtittiuvijunit. Himmauhiqanggittuq talvaniitpiangnikkut inungni.
Tamainni Sanirajakmi Kugluktumilu, katimaqatigijatka igluliqiijitkut, ilinniaqtuliriijitkut katimajiita hamalatkutlu katimajiita. Pulaaqhugit ilihaqtut sikuuqviuvigijainni, aliattaqpiagutigiplugit niqitigut pinahuagutinggit sikuuqvingmilu quviahungnia. Nirinnaqhitillugu katimaqatigijatka nunallaami hivuliqtiit tikkuaqhimajainnik MLA ngit. Uqaqvigijatka tamaita tahapkunanit qiniqhiajiit akiittumik ikajujuqtunit tahapkununga Inuit timiqutiujuni kivraqtuvinggit, munaqhitkunni havaktiit, Inirniqhaatlu taapkuatut Alice Hitkoak Ayalik Nagleena lu Inuksuk.
Uqaqtittiiji, Sanirajak mi, pulaaqpaktaga North Warning System katimaqatigiplugu Joan Innuksuk, titiqqiviliqiujuq atauhiqlu nainnit Inuit havaktut Nasittuq Kuapuraisinggani talvani radar tarmaaqvianni.
Kugluktumi, crown nguqtitatka Nattiq Frolics Queens Genevieve Macila lu Nivingalok, ajuirhaqhun’ngalu in’ngutaaqtittugu takujaq aullaqtigutiqhaannut raisiktut Frolics ni.
Havaarijamni Ministauplun’nga Qulliq Auladjutiqhanut Kuapuraisingani, quviahuktun’njga pulaagapku Kugluktup pauwaqarvia takudjutiplugitlu havadjariqpiaqtut havaktiit Sheldon Klengenberg Bill McWilliam lu aulapkaidjutitigun utuqqangguqtumi igluqpaa havaliqtavutlu himmauhiqhaanut.
Uqaqtittiiji, pulaaqtillugit nunallaat tamaani nunaptingni, amigaittut nunaqaqhimajut uqautivaktaan’nga puiguqtaujutun ivaktut un’ngahiktuugamikluunniit kavamatkunnit. Talvuuna miqhaatigut, ilihimaqujatka Nunavunmiut havaktuguq nunakput ilauqatauhimmaariamingnik un’ngahiqkaluaqhutik ikajuutikkutlu akturnarniit akuqtauvaktaptingnik. Talvauvukli talvuuna miqhaatigut aqhuungniaqtun’nga havaklugitlu ihivriuqlugit nuutirniagutikkut havaaqhanik nunallaangginnut mikijunut.
Uqaqtittiiji, piumakpiagijainnik nunallaamiittunit aqhuuqhutik pivangmata pidjutijaan’nga uvamnut aqhuuquplun’nga nakuutqianiqhaatigut kivraqtuinikkut kavamaliqidjutaitigut. Tamainni aullagutini, takudjutivaktun’nga inungnik alliagijainnik nunagijainnik piumaplutiklu aadlangguqtigumaplugulu Katujjiluta tun’ngavigijaatanik.
Quana Uqaqtittiiji.