Ms. Elizabeth May, O.C., M.P
Leader of the Green Party of Canada
PO Box 997, Station B
Ottawa, ON K1P 5R1
ᓯᑎᐱᕆ 13, 2019
ᒪᐃ−ᒧᑦ,
2019−ᒥ ᑲᓇᑕᒥᐅᓂ ᓂᕈᐊᕐᓂᐅᓂᐊᖅᑐᖅ ᐅᖃᐅᓯᐅᓯᒪᓕᖅᑎᓪᓗᒍ, ᐊᐱᕆᔪᒪᕙᒋᑦ ᖃᓄᖅ ᓯᕗᓂᒃᓴᒥ ᑕᐅᑐᖅᑰᕆᔭᖃᕐᒪᖔᖅᐱᑦ ᐱᓕᕆᖃᑎᖃᖅᐸᖕᓂᕐᒥᒃ ᓄᓇᕗᑦ ᒐᕙᒪᒃᑯᖏᓐᓂᒃ, ᑕᐃᒃᑯᐊ ᐱᓕᕆᖃᑎᒋᕙᒃᑕᑎᑦ ᒐᕙᒪᒋᔭᐅᓂᐊᓕᕐᓂᖅᐸᑕ.
ᖃᐅᔨᒪᑎᓪᓗᑎᑦ, ᓄᓇᕗᒻᒥᐅᑦ ᓵᑦᑎᐊᕐᒥᐅᑕᖃᖅᐸᒃᐳᑦ ᐊᒥᓱᓂᒃ ᐊᔪᕐᓇᕈᔪᒃᑐᓂᒃ ᐃᓱᒪᒋᔭᒃᓴᓂᒃ ᑕᒪᒃᑯᐊᓗ ᐅᕙᑦᑎᓐᓂᒃ ᐊᔪᕐᓇᕐᓂᖅᓴᒦᑎᑦᑎᕙᒃᖢᑎᒃ ᑭᖑᕙᓯᒃᑎᑦᑎᕙᒃᖢᑎᒡᓗ ᑕᐅᑐᒃᖢᒋᑦ ᑲᓇᑕᒥᐅᑕᐅᖃᑎᕗᑦ. 2019-ᖑᓕᖅᐳᖅ ᓄᓇᒋᔭᕗᓪᓗ − ᐱᐅᓂᖅᐹᑦᑎᐊᖅ ᓄᓇᒋᔭᐅᕙᒃᑐᓂ ᓄᓇᕐᔪᐊᓕᒫᒥ − ᓱᓕ ᒫᓐᓇ ᐊᑐᖅᐸᙱᓚᖅ ᐊᔾᔨᒌᒃᑎᑦᑎᓂᕐᒧᑦ ᐊᑐᖅᑕᐅᕙᒃᑐᒥᒃ ᑕᒪᐃᓐᓄᑦᑎᐊᖅ ᑲᓇᑕᒥᐅᓄᑦ.
ᓄᓇᒋᔭᕗᑦ, ᐃᓕᖅᑯᓯᕆᔭᕗᑦ, ᐊᑐᖅᐸᒃᑕᑐᖃᕗᑦ, ᐅᖃᐅᓯᕗᓪᓗ ᑕᒪᕐᒥᑦᑎᐊᖅ ᐊᔾᔨᖅᐸᓪᓕᐊᖏᓐᓇᐅᔭᖅᐳᑦ. ᓄᓇᕗᑦ ᐃᓂᐅᕗᖅ ᐊᖏᔪᒻᒪᕆᖕᒥᒃ ᐊᔪᙱᓐᓂᖃᕈᓐᓇᖅᖢᓂ ᐱᕕᒃᓴᖃᕈᓐᓇᖅᖢᓂᓗ − ᓇᓄᓇᙱᑦᑎᐊᖅᖢᓂᓗ ᐱᓇᔪᒡᕕᐅᓯᒪᙱᖦᖢᓂ, ᑐᑭᓯᔭᐅᒐᔪᒃᐸᖕᓇᓂ ᑭᒡᒐᖅᑐᖅᑕᐅᑦᑎᐊᙱᒐᔪᒻᒪᕆᒃᖢᓂᓗ.
ᑭᓯᐊᓂᓗᑦᑕᐅᖅ, ᓄᓇᕗᒻᒥᐅᑦ ᐊᒃᓱᕈᖃᑦᑕᖅᐳᑦ. ᐊᒃᓱᕈᕈᑎᖃᖅᐸᒃᖢᑎᒃ ᐊᑭᖏᓐᓄᑦ ᓂᕿᑦᑎᐊᕙᐃᑦ, ᐊᑐᕈᓐᓇᕐᓂᕐᒥᒃ ᓈᒻᒪᒃᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᓂᕐᒥᒃ, ᑕᒪᒃᑯᓄᖓᓗ ᐱᓪᓗᐊᑕᕆᔭᐅᕙᒃᑐᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᓇᑉᐸᖅᑎᖅᑕᐅᓯᒪᔪᓄᓪᓗ ᑕᒪᕐᒥᑲᓴᒃ ᑲᓇᑕᒥᐅᑦ ᐊᑐᖅᐸᒃᑕᖏᓐᓄᑦ ᖃᐅᑕᒫᑦᑎᐊᖅ. ᐱᖁᑎᓄᑦ ᓲᕐᓗ ᐃᒡᓗᖃᖅᑎᑕᐅᓂᕐᒧᑦ, ᐊᑐᕈᓐᓇᕐᓂᕐᒧᑦ ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐅᐃᕆᓯᒪᔾᔪᑕᐅᓕᖅᐸᒃᑐᓄᓪᓗ ᑲᒪᒋᔭᐅᓂᕐᒧᑦ ᐃᓗᐊᖅᓴᖅᑕᐅᓂᕐᒧᑦ, ᑲᒪᒋᔭᖃᕐᓂᕐᒧᑦ ᐃᓐᓇᕆᔭᑦᑎᓐᓂᒃ ᑕᒫᓂ ᐅᑭᐅᖅᑕᖅᑐᒥ, ᐃᓕᓐᓂᐊᕐᓂᕐᒧᑦ ᐊᔪᕈᓐᓃᖅᓴᕐᓂᕐᒧᓪᓗ, ᐆᒻᒪᖅᑯᒻᒥᒃ ᓇᒧᙵᖅᑎᑦᑎᕙᓪᓕᐊᕙᖕᓂᕐᒧᑦ ᓄᒃᑕᖅᑐᓕᕆᓂᕐᒧᓪᓗ ᐊᑐᖅᑕᐅᕙᒃᑐᓄᑦ.
ᑕᐃᒪᐃᓐᓂᖓᓄᓪᓗ, ᓄᓇᕗᑦ ᑕᐅᑐᒐᖃᓪᓗᐊᑕᖅᐳᖅ ᐃᓕᓯᕝᕕᖃᕐᓗᓂ ᐊᖏᒡᓕᕙᓪᓕᐊᑎᑦᑎᓂᕐᒥᒃ ᐃᓚᐅᕙᖕᓂᕐᒥᒡᓗ ᐱᑐᐃᓐᓇᐅᙱᑦᑐᓄᑦ ᓯᕗᓪᓕᖅᐸᐅᔾᔭᐅᓯᒪᔪᓄᑦ ᐊᑕᐅᑦᑎᒃᑰᖃᑎᖃᓕᖁᓪᓗᑕ ᐊᑐᖅᑕᐅᑦᑎᐊᕈᓐᓇᖅᑐᓄᑦ, ᑲᓇᑕᓕᒫᒥ ᐊᑐᖅᑕᐅᕙᒃᑐᓂ. ᑕᒪᒃᑯᐊ ᐅᑯᓂᖓ ᐃᓚᖃᖅᐳᑦ:
- ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓄᑦ ᐃᓕᐅᖅᑲᖅᑕᐅᓯᒪᔪᓄᓪᓗ
- ᐃᒡᓗᖃᖅᑎᑦᑎᓂᖅ
- ᐃᓱᒪᒃᑯᑦ ᖃᓄᐃᑎᑦᑎᐊᕈᓐᓇᕐᓂᖅ ᐅᐃᕆᓯᒪᔾᔪᑕᐅᕙᒃᑐᓄᓪᓗ ᑲᒪᒋᔭᐅᓂᕐᒧᑦ
- ᐱᕙᓪᓕᐊᔪᓕᕆᓂᕐᒧᑦ ᓄᓇᓕᒥᐅᓪᓗ ᑲᔪᓯᓂᖃᑦᑎᐊᕐᓂᖏᓐᓄᑦ
- ᓴᙱᒃᑎᒋᐊᖅᑎᑦᑎᓂᖅ ᐅᑭᐅᖅᑕᖅᑐᒥᒃ ᓄᓇᒋᔭᐅᔪᒥᒡᓗ−ᐊᖏᒡᓕᕙᓪᓕᐊᑎᑦᑎᓂᖅ
- ᓄᒃᑕᖅᑎᑦᑎᓂᖅ, ᐆᒻᒪᖅᑯᓯᓕᕆᓂᖅ ᐊᓕᒎᔭᕐᓂᕐᒡᓗ ᓴᕕᒐᐅᔭᕐᓄᑦ ᐃᓂᒋᔭᐅᕙᒃᑐᑦ
- ᐃᓕᓐᓂᐊᖅᑐᓕᕆᓂᖅ, ᐃᓄᒃᑐᑦ ᐅᖃᐅᓰᑦ ᐊᔪᕈᓐᓃᖅᓴᐅᕙᒃᑐᓄᑦ ᐊᔪᕈᓐᓃᖅᑕᐅᕙᒃᑐᓄᑦ
ᐃᓕᖕᓂᒃ ᓵᙵᕗᖓ, ᓯᕗᓕᖅᑎᒋᔭᐅᓂᕐᓄᑦ ᐱᓕᕆᕝᕕᒋᕙᒃᑕᕐᓂᒃ, ᑐᓴᐅᒪᓂᖃᑦᑎᐊᖅᑐᒧᑦ ᐱᑐᐃᓐᓇᐅᙱᑦᑐᒧᓪᓗ ᐱᕙᒌᔭᖅᑕᐅᓯᒪᔪᒧᑦ, ᖃᓄᖅ ᐃᑲᔪᕋᔭᕐᒪᖔᖅᐱᑦ ᓄᓇᕗᒻᒥᒃ ᑕᒪᒃᑯᓄᖓ ᐱᑐᐃᓐᓇᐅᙱᑦᑐᒻᒪᕆᖕᓄᑦ ᐃᓂᓄᑦ. ᖃᐅᔨᒪᑎᓪᓗᑎᑦ, ᓄᓇᕗᑦ ᖁᕕᐊᓱᒍᑎᖃᖅᐳᖅ 20−ᓂᒃ ᐊᕐᕌᒍᖃᓕᕐᓂᕐᒥᓄᑦ ᑕᒪᑐᒪᓂ ᐊᕐᕌᒍᒥ, ᐊᒻᒪᓗ ᒫᓐᓇᓵᒃᑯᑦ ᐊᑎᓕᐅᖅᓯᓵᖅᐳᒍᑦ ᐊᖏᖃᑎᒌᒍᑎᒥᒃ−ᓯᕗᓪᓕᖅᐹᖅᓯᐅᑎᒥᒃ ᓯᐊᒻᒪᒃᑎᖅᑕᐅᕙᓪᓕᐊᓂᕆᔭᐅᔪᒧᑦ. 20−ᓂᒃ ᐊᕐᕌᒍᓂᒃ ᐱᕈᖅᐸᓪᓕᐊᓂᖃᖅᑎᓪᓗᒍ, ᖃᐅᔨᔾᔪᑕᐅᓯᒪᔪᓄᑦ ᐃᓕᑦᑎᔾᔪᑕᐅᓯᒪᔪᓄᑦ, ᐋᖅᑭᒃᓱᐃᕙᓪᓕᐊᓂᖅ ᓇᖕᒥᓂᖅ ᐊᖅᑯᑎᒋᓂᐊᖅᑕᑦᑎᓐᓂᒃ, ᒫᓐᓇ ᑕᕝᕙ ᐱᓕᕆᕝᕕᖃᕈᒪᓐᓇᕐᓂᐅᕗᖅ ᐃᓕᐅᖅᑲᐃᕝᕕᖃᕐᓗᓂ, ᓇᑉᐸᖅᑎᖅᑕᐅᓯᒪᔪᓄᑦ ᐊᒻᒪᓗ ᑐᕌᒐᓂᖃᓪᓚᕆᖕᓂᐊᖅᑐᓄᑦ, ᐊᕗᖓᑲᓪᓚᒃ ᑮᓇᐅᔭᖁᑎᒋᔭᐅᓂᐊᖅᑐᓄᑦ ᓴᖅᑭᔮᓕᖅᑎᑦᑎᔪᒪᓪᓗᑕ ᐊᔪᙱᓐᓂᕆᔪᓐᓇᖅᑕᑦᑎᓐᓂᒃ.
ᑖᒃᑯᐊ ᒍᕆᓐ ᐸᐅᑎᒃ−ᑯᑦ ᐱᓕᕆᖃᑎᒌᑦ ᐱᓕᕆᐊᖃᖅᕕᖃᓪᓚᕆᒍᒪᕙᑦ ᓱᓕᔪᒧᑦ ᐅᑭᐅᖅᑕᖅᑐᒧᑦ, ᓴᙱᔪᒧᑦ ᐃᓱᒪᖅᓱᖅᑐᒧᓪᓘ? ᐱᓕᕆᕝᕕᒋᔭᐃᑦ ᐱᑐᐃᓐᓇᕆᐊᖃᖅᓯᒪᓕᖅᐹ ᐊᑐᓪᓚᕆᒍᒪᓪᓗᓂ ᐊᑐᖅᑕᐅᔪᓐᓇᖅᑐᓃᒃ, ᑮᓇᐅᔭᖁᑎᒋᔭᐅᔪᓂᒃ, ᐱᕕᒃᓴᒥᒃ, ᐆᒻᒪᕆᖕᓂᕐᒥᒃ ᐅᑕᖅᑭᔪᓐᓇᑦᑎᐊᕐᓂᕐᒥᒡᓗ ᓇᖕᒥᓂᖅ ᐅᑭᐅᖅᑕᖅᑐᒥᐅᑕᐅᓕᖅᑎᑦᑐᓐᓇᕐᓗᓂ, ᓇᐅᒃᑯᓕᒫᑦᑎᐊᖅ? ᑕᐃᒪᓪᓚᕆᒃᑐᖅ.
ᓇᓗᓇᙱᑦᑎᐊᖅᐳᖅ ᓴᙱᔪᖅ ᑲᓇᑕ ᐱᖃᕆᐊᖃᖅᐳᖅ ᓴᙱᔪᒥᒃ ᐅᑭᐅᖅᑕᖅᑐᒥᒃ, ᑕᒪᓐᓇᓗ ᐃᒪᓐᓇ ᑐᑭᖃᖅᖢᓂ, ᑲᔪᓯᓂᖃᑦᑎᐊᖅᑐᒥᒃ, ᓇᖕᒥᓂᖅᓱᕈᓐᓇᖅᑐᒥᒃ ᓄᓇᕗᒻᒥᒃ. ᓂᕆᐅᒋᔭᖃᑦᑎᐊᖅᐳᖓ ᑭᐅᓂᕆᓂᐊᖅᑕᕐᓂᒃ
ᒪᓕᒐᓕᐅᖅᑎ ᔫ ᓴᕕᑲᑖᖅ
ᓯᕗᓕᖅᑎ ᓄᓇᕗᒻᒧᑦ
ᐊᔾᔨᖓᓂᒃ ᑐᓂᔭᐅᔪᖅ ᓯᕗᓕᖅᑏᑦ ᑲᑎᒪᔨᖏᑦ
ᑕᒡᓕᔅ ᕈᐊᐃ, ᓄᓇᕗᒻᒧ ᒍᕆᓐ ᐸᐅᑎ ᐱᓕᕆᖃᑎᒌᓄᑦ ᓂᕈᐊᒐᒃᓴᖅ