ᐃᖃᓗᒃᑑᑦᑎᐊᖅ, ᓄᓇᕗᑦ (ᓯᑎᐱᕆ 5, 2025) −ᐅᓪᓗᒥ, ᓯᕗᓕᖅᑎ ᐱᔾᔭᐃ ᐊᕿᐊᕈᖅ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐊᒻᒪ ᒥᓂᔅᑕ ᐃᖏᕐᕋᔪᓕᕆᔨᒃᑯᓐᓄᑦ ᐊᒻᒪ ᐊᐅᓚᔪᓐᓇᐅᑎᓕᕆᔨᒃᑯᓐᓄᑦ ᓄᓇᕗᒻᒥ ᑕᐃᕕᑦ ᔪᐊᓇᓯ ᐃᓚᐅᓚᐅᖅᑲᐅᕗᑦ ᓄᓇᓕᖕᓂ ᐊᒻᒪ ᓄᓇᕗᒻᒥ ᐱᓕᕆᔨᐅᖃᑎᖏᓐᓂᒃ ᖁᕕᐊᓲᑎᖃᖅᑎᓪᓗᒋᑦ ᓄᓇᒥ−ᐱᕚᓪᓕᕈᑎᒧᑦ ᐱᓕᕆᓗᑕ ᐃᖃᓗᒃᑑᑦᑎᐊᒥ ᓇᓗᓇᐃᖅᓯᓇᓱᒡᓗᑕ ᐱᕙᓪᓕᐊᓂᖏᓐᓂᒃ ᓄᑖᖑᓪᓗᓂ 24-ᓂᒃ ᐃᒡᓕᖃᖅᑐᖅ ᕿᑎᕐᒥᐅᑦ ᑲᒪᒋᔭᐅᖏᓐᓇᖅᑐᒃᑯᕕᖕᒥ. ᑖᓐᓇ ᓇᓗᓇᐃᒃᑯᑕᖅ ᓇᓗᓇᐃᖅᓯᔾᔪᑕᐅᕗᖅ ᐃᒡᓗᓕᐅᖅᑕᐅᓯᒋᐊᖅᑐᓂᒃ ᑕᑯᒃᓴᐅᑎᑦᑎᓪᓗᓂᓗ ᐅᔾᔨᕐᓇᕐᔪᐊᖅᑐᒥᒃ ᓄᓇᕗᒻᒥ ᐱᓕᕆᐊᖑᖃᑦᑕᖅᑐᒥᒃ ᓴᙱᒃᑎᒋᐊᕈᑎᒃᓴᓂᒃ ᐃᓐᓇᕐᓄᑦ ᐱᔨᑦᑎᕋᐅᑎᓂᒃ ᓄᓇᕘᓕᒫᒥ.
"ᐊᓕᐊᓇᐃᒍᓱᑦᑎᐊᖅᐳᖓ ᐃᖃᓗᒃᑑᑦᑎᐊᕐᒦᑦᑕᕆᐊᒃᓴᖅ, ᐊᕐᕌᒍᑦ ᑎᓴᒪᑦ ᐊᓂᒍᖅᓯᒪᓕᖅᑐᑦ ᐊᖏᖅᓯᒪᓪᓗᑕ ᐃᓐᓇᖁᑎᕗᑦ ᐱᓕᕆᐊᒃᓴᑦᑎᓐᓄᑦ ᐃᓕᔭᐅᖁᓪᓗᒋᑦ ᐊᖏᕐᕋᐅᑎᓗᒋᓪᓗ," ᓯᕗᓕᖅᑎ ᐱᔾᔭᐃ ᐊᕿᐊᕈᖅ ᐅᖃᖅᑐᖅ. "ᐅᓪᓗᒥ, ᐱᕙᓪᓕᐊᓂᖃᖅᑎᓪᓗᒍ ᓄᓇᕘᑉ ᐊᐃᑉᐸᖓᓂ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ, ᑲᔪᓯᑎᑦᑎᔪᒍᑦ ᓱᓕᓂᐊᕐᓂᕋᕈᑎᒥᒃ − ᐱᑎᓪᓗᒋᑦ ᐃᓐᓇᑐᖃᕗᑦ ᐃᓐᓇᕈᕈᓐᓇᑦᑎᐊᖁᓪᓗᒋᑦ."
"ᐅᓪᓗᒥ ᖃᓄᐃᓕᐅᕐᓂᐅᔪᖅ ᑕᑯᒃᓴᐅᑎᑦᑎᔪᖅ ᐊᖏᖅᓯᒪᐃᓐᓇᕐᓂᑎᓐᓂᑦ ᓄᓇᕗᒻᒥ ᐃᓄᑐᖃᕐᓄᑦ," ᐅᖃᖅᑐᖅ ᒥᓂᔅᑕ ᒪᐃᓐ. "ᐱᕙᓪᓕᐊᓂᖃᓪᓚᕆᒃᐳᒍᑦ ᑲᒪᒋᔭᐅᖏᓐᓇᖅᑐᒃᑯᕕᖕᒥᑦ ᖃᓂᓐᓂᖅᓴᒥᒃ ᐊᖏᕐᕋᒧᑦ, ᓇᓗᙱᑦᑎᐊᕈᒪᒧᑦ ᐃᓐᓇᐃᑦ ᕿᑎᕐᒥᐅᓂ ᑲᒪᒋᔭᐅᔪᓐᓇᕋᓗᐊᕐᒪᖔᑕ ᐱᔭᕆᐊᖃᖅᑕᒥᓂᒃ ᓄᓇᓕᖕᓂ ᐃᑲᔪᓚᐅᖅᑕᒥᓂᒃ ᐋᖅᑭᒃᓱᐃᕙᓪᓕᐊᑎᓪᓗᒋᑦ. ᑕᒪᓐᓇ ᐊᓂᒍᖅᑕᐅᔪᓐᓇᖅᑐᖅ ᐊᔪᕐᓇᕋᔭᖅᑐᖅ ᐱᓕᕆᓪᓚᕆᒍᒪᓚᐅᙱᑉᐸᑕ ᑲᑐᔾᔨᖃᑎᒌᙱᑉᐸᑕᓗ ᓄᓇᓕᕗᑦ, ᓄᓇᕗᑦ, ᒐᕙᒪᑐᖃᒃᑯᓪᓗ ᐱᓕᕆᖃᑎᖏᑦ. ᓄᑖᖑᑐᐃᓐᓇᙱᑦᑐᖅ ᐃᒡᓗᕐᔪᐊᖅ, ᑖᓐᓇ ᑲᑐᔾᔭᐅᓪᓗᓂ ᐱᓕᕆᐊᖑᔪᖅ ᐃᑉᐱᒍᓱᖕᓂᕐᒥᑦ, ᐅᐱᒍᓱᖕᓂᕐᒥᑦ, ᐃᑲᔪᖅᑐᕐᓂᕐᒥᓪᓗ ᐃᓄᑐᖃᕐᓂᑦ ᐊᕐᕌᒍᖃᑎᒌᙱᑦᑐᓄᑦ ᐊᕙᓗᔭᐅᓯᒪᔪᓄᑦ ᐃᓕᖅᑯᓯᕐᓄᑦ, ᐃᓚᒌᓄᑦ ᓄᓇᓕᖕᓄᓪᓗ."
ᕿᑎᕐᒥᐅᑦ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᑐᒡᓕᕆᔭᐅᓂᐊᖅᐳᖅ ᓄᓇᕗᒻᒥ, ᐅᒃᑯᐃᖅᑕᐅᓚᐅᖅᑎᓪᓗᒍ ᐊᑯᓂᐅᔪᒃᑯᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᑲᖏᖅᖠᓂᕐᒥ ᑕᒪᑐᒪᓂ ᐊᕐᕌᒍᒥ ᐱᒋᐊᓵᖅᑎᓪᓗᒍ. ᑖᓐᓇ ᓄᑖᖅ ᑲᒪᒋᔭᐅᖏᓐᓇᖅᑐᒃᑯᕕᒃ ᑭᒡᒐᖅᑐᐃᕗᖅ ᐊᖏᔪᑲᓪᓚᖕᒥᒃ ᑮᓇᐅᔭᓂᒃ ᐊᑐᕐᓂᕐᒥᒃ ᒪᑐᓯᓂᕐᒧᑦ ᐊᕗᖓᑲᓪᓚᒃ ᐱᑕᖃᙱᓐᓂᕆᔭᖏᓐᓂᒃ ᑲᒪᒋᔭᐅᓂᕐᒧᑦ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ, ᐱᓗᐊᙳᐊᖅᑐᒥ ᕿᑎᕐᒥᐅᓂ, ᑕᒪᓐᓇᓗ ᑭᖑᓂᑦᑎᓐᓂ ᐱᔨᑦᑎᕋᕐᕕᐅᓯᒪᙱᖦᖢᓂ.
"ᐱᓕᕆᖃᑎᒌᑦᑎᐊᕐᓂᖅ ᑐᙵᕕᒋᔭᐅᕗᖅ ᑲᔪᓯᓂᖃᑦᑎᐊᖅᑐᓄᑦ ᓇᑉᐸᖅᑎᖅᑕᐅᓯᒪᔪᓄᑦ ᐱᓕᕆᐊᖑᔪᓄᑦ. ᕿᑎᕐᒥᐅᑦ ᑲᒪᒋᔭᐅᖏᓐᓇᖅᑐᒃᑯᕕᖓ ᓴᖅᑭᑦᑐᓐᓇᕋᔭᓚᐅᙱᒻᒪᑦ ᑲᑐᔾᔨᖃᑎᒌᑦᑎᐊᖅᑐᓂᒃ ᐱᓕᕆᕝᕕᑦᑎᒍᑦ, ᒐᕙᒪᑐᖃᒃᑯᓐᓂ ᐱᓕᕆᖃᑎᕗᑦ, ᐊᒻᒪ ᓄᓇᓖᑦ." ᒥᓂᔅᑕ ᔪᐊᓇᓯ ᐅᖃᖅᐳᖅ. "ᐅᐱᒍᓱᒃᐳᒍᑦ ᑲᔪᓯᑎᑦᑎᔪᓐᓇᕋᑦᑕ ᐊᐅᓚᔪᓐᓇᐅᑎᓂᒃ ᑕᒪᐃᓐᓂᒃ ᓴᐱᓕᖅᓴᕋᐃᙱᑦᑐᓂᒃ ᐊᒻᒪ ᑭᐅᔪᓐᓇᑦᑎᐊᖅᑐᓂᒃ ᓄᓇᕗᒻᒥᐅᑦ ᐱᔭᕆᐊᖃᖅᑕᖏᓐᓄᑦ."
ᖁᕕᐊᓇᖅᐳᖅ ᑮᓇᐅᔭᖅᑖᕈᓐᓇᕋᑦᑕ ᑲᓇᑕ−ᓄᓇᕗᒃᑯᓐᓂᑦ ᐃᓚᔭᐅᓪᓗᑎᒃ ᑕᒪᕐᒥᒃ ᐊᖏᕈᑎᑦ, ᐅᕘᓇ ᓄᓇᓕᒡᔪᐊᖑᙱᓐᓂᖅᓴᓂ ᐊᒻᒪ ᐅᑭᐅᖅᑕᖅᑐᒥ ᓄᓇᓕᖕᓂ ᐊᐅᓚᔪᓐᓇᐅᑎᓕᕆᔨᒃᑯᑦ ᐃᖏᕐᕋᓂᕆᔭᖓ ᑲᓇᑕᒥ ᑮᓇᐅᔭᖅᑐᕈᑎᖃᕐᓂᖅ ᐊᐅᓚᔪᓐᓇᐅᑎᓄᑦ ᐱᓕᕆᐊᒃᓴᒃᑯᑦ. ᑖᓐᓇ ᐱᓕᕆᐊᒃᓴᖅ ᓇᓗᓇᐃᖅᓯᔪᖅ ᐱᒻᒪᕆᐅᓂᖓᓂᒃ ᓴᙱᔪᒥᒃ ᑲᓇᑕᒥ ᒐᕙᒪᒃᑯᓐᓂ ᐱᓕᕆᖃᑎᒌᓂᒃ ᓯᕗᒻᒧᐊᒃᑎᑦᑎᓪᓗᑎᒃ ᐱᔭᕆᐊᖃᖅᑐᓂᒃ ᐊᐅᓚᔪᓐᓇᐅᑎᓂᒃ ᐅᑭᐅᖅᑕᖅᑐᒥ ᐅᖓᓯᒃᑐᒦᑦᑐᓂᓪᓗ ᓄᓇᓕᖕᓂᑦ.
"ᐅᓪᓗᒥ ᓄᓇᒥ ᐱᒋᐊᕈᑎᑦᑎᐊᕙᒃ ᓇᓗᓇᐃᖅᓯᖕᒪᑦ ᐱᒋᐊᕐᓂᖓᓂ ᐱᓕᕆᐊᒃᓴᐅᑉ ᐊᓯᔾᔩᓂᖃᒻᒪᕆᖕᓂᐊᖅᑐᒥᑦ ᐃᓅᓯᖏᓐᓂᑦ ᐃᓐᓇᐃᑦ ᐃᓚᒌᓪᓗ ᐃᖃᓗᒃᑑᑦᑎᐊᒥᑦ," ᐅᖃᖅᑐᕕᓂᖅ ᒥᓂᔅᑕ ᐅᑭᐅᖅᑕᖅᑐᒥᑦ ᐅᑭᐅᖅᑕᖅᑐᒥᓪᓗ ᐱᓕᕆᐊᓄᑦ ᒥᓂᔅᑕᓗ ᑲᒪᒋᔭᓕᒃ ᑲᓇᑕᒥᑦ ᐅᑭᐅᖅᑕᖅᑐᒥᑦ ᐱᕙᓪᓕᐊᔪᓕᕆᔨᒃᑯᑦ ᐅᓖᐱᑲ ᓵᑦᕌᓐᑦ. "ᑖᓐᓇ ᑲᒪᒋᔭᐅᖏᓐᓇᖅᑐᒃᑯᕕᒃ ᑭᒡᒐᖅᑐᐃᔪᖅ ᑐᓴᐅᒪᖃᑎᒌᒃᖢᑕ ᐱᓕᕆᓂᐊᕐᓂᕋᖅᓯᒪᔭᑦᑎᓐᓄᑦ ᓄᓇᕗᒻᒥᐅᑦ ᐅᑭᐅᖃᕈᓐᓇᖁᓪᓗᒋᑦ ᐃᓐᓇᕈᑦᑎᐊᕐᓗᑎᒃ, ᐊᖏᕐᕋᒥᓄᑦ ᖃᓂᒃᓴᕐᓗᑎᒃ ᐃᓕᖅᑯᓯᕐᒥᓄᓪᓗ. ᓄᑖᖅ ᒐᕙᒪᕗᑦ ᐅᐱᒍᓱᒃᐳᑦ ᐃᑲᔪᖅᑐᐃᔪᓐᓇᕐᒪᑕ ᑖᔅᓱᒥᖓ ᐱᒻᒪᕆᐅᔪᒥᒃ ᓯᕗᒻᒧᐊᒍᑎᒥᒃ, ᐊᒃᑐᐊᓂᖃᖅᑐᒥᒃ ᐱᓕᕆᖃᑎᒌᖏᓐᓇᕐᓂᕆᔭᑦᑎᓐᓂᒃ ᓄᓇᕗᒻᒥᐅᓂᒃ."
ᐱᓕᕆᐊᒃᓴᐅᑉ ᐋᖅᑭᒃᓯᒪᓂᖓ ᐋᖅᑭᒃᓱᖅᑕᐅᓯᒪᕗᖅ ᑐᑭᖃᑦᑎᐊᖅᑐᓂᑦ ᓄᓇᓕᖕᓂᑦ ᑐᓴᕐᕕᐅᓪᓗᑎᒃ. ᓄᓇᓕᖕᓂᑦ ᐃᓚᐅᑎᑦᑎᔪᑦ ᑲᑎᒪᔪᓂᑦ ᑲᑎᒪᖃᑎᖃᓚᐅᖅᐳᑦ ᑎᑎᕋᐅᔭᖅᑎᒥᑦ ᓯᑎᐱᕆ 2024−ᒥᑦ ᓄᓇᓕᖕᒥᐅᓂᑦ ᐃᓱᒪᒋᔭᖏᓐᓂᒃ ᑐᓴᖅᑎᑦᑎᔪᓐᓇᓚᐅᖅᐳᑦ ᓯᕗᓪᓕᐅᔾᔭᒃᓴᓂᒡᓗ ᑲᒪᒋᔭᐅᖏᓐᓇᖅᑐᒃᑯᕕᖕᒧᑦ, ᓴᖅᑭᔮᖅᑎᑦᑎᒐᓗᐊᕆᐊᒃᓴᖏᓐᓂᑦ ᐱᒻᒪᕆᐅᒋᔭᓂᑦ ᐃᓕᖅᑯᓯᕐᓄᓪᓗ ᐱᔭᐅᔭᕆᐊᓕᖕᓂᑦ ᕿᑎᕐᒥᐅᓂᑦ.
ᕿᑎᕐᒥᐅᓂᑦ ᑲᒪᒋᔭᐅᖏᓐᓇᖅᑐᒃᑯᕕᒃ ᐊᑐᐃᓐᓇᐅᑎᑦᑎᓂᐊᖅᑐᖅ ᐃᓕᖅᑯᓯᕆᔭᐅᔪᒃᑯᑦ ᑐᙵᕕᖃᕐᓗᓂ ᑲᒪᒋᔭᐅᓗᑎᒃ ᐃᓐᓇᐃᑦ ᓴᓇᔭᐅᓯᒋᐊᕐᓗᓂ ᓂᐅᕕᖅᐸᓪᓕᐊᓕᖅᐸᑕ.