qaluktuttiaq, Nunavut (Saptaiba 5, 2025) – Ublumi, Hivuliqti P.J. Akeeagok, Minista Aanniaqtailinirmut John Main unalu Minista Ingilradjutiliqijikkut Aulapkaidjutinullu Nunavunmi David Joanasie ilauqatigijait nunallaani ukiuqtaqtumilu paannarijait uvunga quviahuutiginirmun uvani nunami-pualriharnirmun hilirnimi Iqaluktuuttiami naunaijaqhugu hivumuunia uumani nutaami 24nik igluqaqtumik Kitikmeoni Akuniraaluk Munarijauhimmaarvingmun (LTC) Munarivik. Una naunaitkuti taututijuq aullaqtirninganik nappaqtirnikkut havagutinun tautuktijuqlu angijunik hivumuudjutinik Nunavutim havakhimmaaraanginnaqtainnun hakugikharnirnun Inirnikhanun munaridjutikhainnun tamaani nunaptingni.
“Quvianaqtuq ilaugama Iqaluktuuttiami, talvani hitamani ukiuqni qaangiqhimajuni havagumadjutiptingnun ililugun Inirnikhavun qitqanun havagutiptingnun imaalu angilraqtillugillu aihimavingmingnun,” uqaqtuq Hivutiqti P.J. Akeeagok. “Ublumi, hivumuudjutaani Nunavutim tuklia Akuniraalukkut Munarivikhami, pidjutiqtaqqut taamna uqariiguti – pipkainikkut Inirnikhavun aaquaqtaaqtun/inutquaqtaaqtun ihumagittiarijaulutik.”
“Ublumi hulidjutaa tautuktitaa aulahimmaaqtuq havagutivun Nunavutim Inirnikhainnun,” uqaqtuq Minista Main. Piliqtugun piqpiaqtunik hivumuudjutinik qarritinikkut akuniraaluk munaridjutikhanun qanitqijaunirnun aihimavingnun, pipkaiplugin Inirnikhat Kitikmeoni pijaaqtun munaridjutikhanik ihariarijamngnik nunallaani ikajuqpaktait piliurutainnik. Una pihimadjuti pilimaitkaluaqtuq havagumadjutainnin havaqatigiigutinillu nunallaaptingni, ukiuqtaqtumi, kavamatuqatkunnilu paannarijaptingnin. Pilluarutiujuq nutaangujumik igluqpamik, hapkuat atauttikkut havagutit ihumagittiarutiujun, ihumagittiaqhugin ikajuqhugillu Inirnikhavun aaqurianginni/inutqurianginni iliulliutihimajukkut pitquhikkut, ilainnin nunallaamillu.”
Una Kitikmeoni LTC Munarivik tukliujuq taimaittumi Nunavunmi, pidjutaanin nakuujumik angmaqtirutaani uvani akuniraaluk munarvingmi Kangiqlinirmi atulihaaliqtillugu una ukiuq. Una nutaaq igluqpat tautuktittu angijunik maniliqtuutiit umiktiqhugin akuniraaluk piqangidjutit munaridjutikkut tamaani nunaptingni, pilluaqhunilu Kitikmeoni, qanga taimaa havagutigilluaqhimajuittuq.
“Hakugiktut paannaqatigiigutit tunngavigijaujun nakuujuni auladjutikhanun havaktakhanun. Una Kitikmeoni LTC Munarivik pilimaittuugaluaq pihimangitpat qanittukkut havaqagitigiigutinik ukunani havagviptingni, kavamatuqatkunni paannarijaptingni, uumanilu nunallaami.” uqaqtuq Minista Joanasie. “Quviahuktugun tunijaami auladjutikhanik tamarmik mahulingaittuq kiuhainnaqtaaqtuqlu ihariagijainnun Nunavunmiunnin.”
Maniliqtuutikhat uumunga havaktakhamun tunijauliqtun uvuuna Kanada-Nunavut ihuaqhaqtauhimajumi Atuni Angirutini, ataani Inuqqukittuni Ukiuqtaqtunilu Nunallaani Auladjutikhani havagutainni uvani Maniliurutini Kanadami Auladjutikhanun Pinahuarutimi. Una havaktakhaq naunaijaqtait akhuunarniit hakugikni naliinnikavamagijaujuni paannariigutini hivumuudjutini iharianaqtuni auladjutikhani ukiuqtaqtumi ungahiktunilu nunallaani.
“Ublumi nunami-pualriharniq naunaiqtitaa aullaqtirnia havaktakhami pidjutiniaqtuq aallanguqtiqpiarutinik inuuhiinni Inirnikhani ilagijainnullu tamaani Iqaluktuuttiami,” uqaqtuq Minista Ukiuqtaqtuni Ukiuqtaqtunilu Qanuriliudjutainni Ministaujuqlu munarijuq ukunani Kanadaup Ukiuqtaqtumi Piangaijarnikkut Pivallianikkut Havagvingmi Rebecca Chartrand. “Una akuniraalungni munarivik tautuktitaa atauttikkut havagumadjutikput pipkanirnun Nunavunmiutat aaquaqtaaqtun/inutquaqqataaqtun ihumagittiarijaulutik, qanuttumi aihimavingnun pitquhiinnullu. Nutaaq kavamakput quviahuktuq ikajuriami una akhuurnaqtuq hivumuudjuti, taamna tautuktiaa aulahimmaaqtuq paannariigutivun Nunavunmiutanun.”
Havaktakhaup piliurnia piliuqhimajuq ihumagittiaqhimajunin nunallaanin uqautainnin. Nunallaami ilauqatigiinnikkut katimadjuti pijuq tahamaniittumi havaktakhami titiraujaqtimi Saptaibami 2024mi pipkaqtitait nunallaamiutat tuniudtiplugin ihumagijatik hivulilutiujumajatik igluqpakhamun, pipkainirnun tautungnarniqaqtuq uppirijainnik pitquhikkullu ihariagijainnik Kitikmeoni. Una Kitikmeoni LTC Munarivik tuniniaqtuq pitquhikkut idjutiqarluni munaridjutinik Inirnikhanun nappaqtirutikhallu aullaqtirniaqtun iniqqata niuvirutainnik havagutinik.