ᓯᕗᓕᖅᑎᐅᑉ ᐅᖃᐅᓯᖏᑦ
ᑐᕌᖅᑕᕗᑦ ᑐᕌᑕᐅᓇᓱᐊᖅᑑᕗᖅ 22-ᖑᔪᓂᒃ ᑕᓪᓕᒪᒋᓕᖅᑕᖓᓂ ᒪᓕᒐᓕᐅᖅᑎᓂᒃ ᓄᓇᕗᒻᒥ. ᑎᑎᖅᑲᐅᕗᖅ ᐃᑲᔫᑎᐅᓂᐊᖅᖢᓂᑦ ᓄᓇᕗᑦ ᒐᕙᒪᒃᑯᑦ ᐱᓕᕆᐊᕆᔭᖓᓄᑦ ᑎᑭᓪᓗᒍᑦ 2021, ᑕᑯᒃᓴᐅᑎᑦᑎᓪᓗᓂᓗ ᐱᔭᐅᔭᕆᐊᓕᖕᓂᑦ ᓯᕗᓪᓕᐅᔾᔭᐅᔪᒪᔪᓂᒡᓗ ᓄᓇᕗᒻᒥ.
ᑖᓐᓇ ᐱᓕᕆᐊᒃᓴᖅ ᐊᑐᖅᑎᓪᓗᒍᑦ, ᒪᕐᕉᖕᓂᑦ ᐅᔾᔨᕐᓇᓪᓚᕆᒃᑐᓂᑦ ᓇᓗᓇᐃᖅᓯᓂᐊᖅᑐᒍᑦ: 2018−ᖑᔪᖅ 25 ᐊᕐᕌᒍᒋᕙᖓ ᐊᑎᓕᐅᖅᑕᐅᓚᐅᕐᓂᖓ ᓄᓇᕗᒻᒥ ᐊᖏᕈᑎ, ᐊᒻᒪ ᐊᐃᕐᕆᓕ 1, 2019 20 ᐊᕐᕌᒍᒋᕙᖓ ᓄᓇᕘᑉ ᓴᖅᑭᑕᐅᓂᖓ. ᑕᒪᒃᑯᐊ ᐱᕕᖃᖅᑎᑦᑎᓂᐊᖅᐳᑦ ᐅᔾᔨᕈᓱᒃᑎᑦᑎᓂᕐᒥᑦ, ᓄᑖᙳᕆᐊᖅᓯᓂᕐᒥᑦ ᑐᕌᒐᒥᑦ ᓂᕆᐅᒋᔭᖃᕐᓂᕐᒥᒡᓗ.
ᓄᓇᕗᑦ ᐱᕈᖅᓯᒪᕗᖅ ᓄᓇᕐᔪᐊᓕᒫᕐᒥᑦ ᖃᐅᔨᒪᔭᐅᓕᖅᖢᓂᑦ, ᐃᓕᖅᑯᓯᕗᓪᓗ, ᐃᓱᒪᓕᐊᕗᑦ, ᐱᖅᑯᓯᕗᑦ ᐱᒻᒪᕆᐅᒋᔭᕗᓪᓗ ᐅᔾᔨᕆᔭᐅᕙᓪᓕᐊᖏᓐᓇᖅᐳᑦ ᐊᒃᑑᑎᕙᒃᖢᑎᒡᓗ ᐃᓄᖕᓂ ᓄᓇᕐᔪᐊᓕᒫᕐᒥᑦ.
ᐱᓕᕆᕙᓪᓕᐊᖏᓐᓇᖅᐳᒍᑦ ᑐᓗᖅᑕᕈᑎᑦᑎᓐᓂᒃ − ᓄᓇᓕᒃᐳᑦ ᐊᐅᓚᔪᓐᓇᐅᑎᑖᖅᑐᒃᑲᓐᓂᕆᐊᓖᑦ, ᐋᓐᓂᐊᖃᕐᓇᖏᑐᓕᕆᔾᔪᑎᑖᒃᑲᓐᓂᕆᐊᓖᑦ ᐃᓅᓯᖃᑦᑎᐊᖅᑐᓕᕆᔾᔪᑎᑖᒃᑲᓐᓂᕆᐊᓖᓪᓗ, ᖃᑭᒪᓇᓱᐊᕈᑎᓕᕆᒃᑲᓐᓂᕆᐊᖃᕐᒥᔪᑦ ᐱᕙᓪᓕᐊᖁᓪᓗᒍᑦ. ᓄᓇᕗᒻᒥᐅᑦ, ᓱᕈᓯᕐᓂᑦ ᐃᓐᓇᕐᓄᑦ, ᐊᑯᓂᐅᔪᒧᑦ ᐃᑲᔫᑎᑖᕆᐊᓖᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᒪᒋᔭᐅᓂᕐᒧᓪᓗ, ᑕᒫᓂ ᓄᓇᕗᒻᒥ. ᒐᕙᒪᕗ ᐊᒃᓱᕈᐊᕆᔭᖃᕐᓂᐊᖅᑐᖅ ᐃᖏᕐᕋᑦᑎᐊᕐᓂᖅᓴᓂᒃ ᐱᔨᑦᑎᕋᕈᒪᓪᓗᓂᑦ, ᑮᓇᐅᔭᒃᑲᓐᓂᕐᓂᒃ ᕿᓂᖅᑎᓪᓗᑕ ᓴᖅᑭᑦᑎᐊᒃᑲᓐᓂᖁᓪᓗᒋᓪᓗ, ᐊᓯᖏᓪᓗ, ᐱᒻᒪᕆᐅᔪᑦ.
ᓄᓇᕗᑦ ᐱᕕᒃᓴᖃᕐᕕᑦᑎᐊᕙᐅᕗᖅ, ᒪᑭᒪᔪᓐᓇᖅᑑᕗᖅ ᐊᒻᒪ ᐱᔭᒃᓴᖃᕆᓪᓗᓂᑦ. ᑕᐅᑐᒃᑕᕗᑦ ᐊᓂᒎᑎᓯᒪᑦᑎᐊᖅᑕᕗᑦ − ᐋᔩᖃᑎᖃᖅᑎᐅᓪᓗᑕ ᐊᖏᓂᖅᐹᕐᒥᒃ ᓄᓇᑖᕐᓂᕐᒧᑦ ᑲᓇᑕᒥ, ᐅᓄᖅᓯᕙᓪᓕᐊᔪᑦ ᐃᓄᐃᑦ ᐃᖅᑲᓇᐃᔭᖅᑏᑦ, ᓴᙱᔪᒥᒡᓗ ᑲᑎᙵᖃᑎᖃᕐᓂᖅᐳᑦ ᓄᓇᒥ, ᐅᖃᐅᓯᕐᒥᑦ ᐃᓄᖕᓂᓪᓗ. ᓴᙱᔫᕗᒍᑦ. ᐱᔪᒃᓯᓯᒪᕗᒍᑦ. ᐱᕙᓪᓕᐊᓂᖃᑦᑎᐊᓕᖅᐳᒍᑦ.
ᓯᕗᑎᐅᓪᓗᖓ ᐊᕐᕌᒍᑦ ᐱᖓᓱᓄᑦ ᓇᑉᐸᖓᓄᓪᓗ, ᐃᑲᔪᕈᒪᕗᖓ ᓯᕗᓪᓕᐅᑎᔪᒪᔭᑦᑎᓐᓂᒃ ᑎᑎᕋᖅᓯᒪᔪᑦ ᑐᕌᖅᑕᕗᒻᒥ, ᓴᙱᔪᒥᒡᓗ ᓂᐱᖃᕐᓗᖓ ᓄᓇᕗᒻᒧ. ᒐᕙᒪᖁᑏᑦ ᐃᓕᖕᓄ ᐱᓕᕆᓲᖑᕗᖅ, ᐅᐱᖦᖢᖓᓗ ᓯᕗᑎᐅᕕᒋᕙᕋ. ᐱᓕᕆᐊᒃᓴᖃᕋᑦᑕ ᑕᑯᒃᓴᐅᔪᓂᒃ, ᑐᓴᐅᒪᖃᑎᒌᑦᑎᐊᕐᓂᕐᒥᒃ, ᓯᕗᓕᖅᑎᐅᖃᑎᒌᖕᓂᕐᒥᒃ ᐊᒻᒪ ᓱᓕᔪᒥᒃ ᓂᓪᓕᐊᑦᑎᐊᕐᓗᑕ. ᐊᑕᐅᑦᑎᒃᑯᑦ, ᐃᑲᔪᖅᑐᖅᐸᕗᑦ ᓂᕈᐅᖕᓂᑦᑎᐊᕙᐃᑦ ᐱᔭᐅᔪᒪᔪᓪᓗ ᓄᓇᕗᒻᒥᑦ, ᐱᑎᑕᐃᓐᓇᕆᓗᒋᓪᓗ ᑕᒪᖕᒥᒃ.
ᔫ ᓴᕕᑲᑖᖅ
ᓯᕗᓕᖅᑎ ᓄᓇᕗᒻᒥᐅᓄᑦ
ᒐᕙᒪᐅᓂᑦᑎᓐᓂ, ᖃᓄᐃᓕᒋᐊᕈᑎᖃᕐᓂᐊᖅᑐᒍᑦ ᒐᕙᒪᐅᓪᓗᑕ ᐅᑯᓂᖓ ᑕᓪᓕᒪᐅᓕᖓᔪᓂᒃ:
- ᐱᓕᕆᐊᖃᕐᓂᐊᖅᑐᒍᑦ ᐊᑲᕐᕆᔮᑦᓯᐊᖁᓪᓗᒋᑦ ᓇᒻᒥᓂᕐᓗ ᒪᑭᒪᒍᓐᓇᖅᓯᖁᓪᓗᒋᑦ ᐃᓅᖃᑎᕗᑦ ᓄᓇᓕᕗᓪᓗ ᒪᓕᑦᑕᐅᓗᓂ ᐃᓅᓯᕗᑦ.
- ᐋᖅᑭᑦᓱᐃᓂᐊᖅᑐᒍᑦ ᒪᑭᒪᔾᔪᑎᑦᓴᑎᓐᓂᒃ ᑮᓇᐅᔭᓕᐅᕈᑕᐅᒍᓐᓇᖅᑐᓂᓪᓗ ᐃᑲᔪᖅᓱᐃᓂᒃᑯᑦ ᓯᕗᓂᑦᓴᖃᑦᓯᐊᖁᔨᓂᕐᒧᑦ ᐃᓅᖃᑎᑦᑎᓐᓄᑦ, ᓄᓇᓕᑦᑎᓐᓂ, ᓄᓇᑦᑎᓄᓪᓗ ᒪᓕᑦᑕᐅᓗᓂ ᐱᕚᓪᓕᕈᑎᕗᑦ.
- ᐊᑐᐃᓐᓇᐅᑎᑦᓯᓂᐊᖅᑐᒍᑦ ᐃᓕᓐᓂᐊᕈᑎᑦᓴᓂᒃ ᐱᔭᖅᑭᓴᕈᑎᑦᓴᓂᓪᓗ ᐅᐸᓗᖓᐃᔭᕈᑎᐅᒍᓐᓇᖅᑐᓂᒃ ᓱᕈᓯᕐᓄᑦ, ᒪᒃᑯᑦᑐᓄᑦ ᐃᓐᓇᕐᓄᓪᓗ ᐊᑑᑎᓕᓐᓂᒃ ᐃᑲᔪᕈᓐᓇᖅᓯᖁᓪᓗᒋᑦ ᐃᓅᖃᑎᒌᓄᑦ ᐃᖅᑲᓇᐃᔮᖃᑦᓯᐊᕈᓐᓇᖅᓯᖁᓪᓗᒋᓪᓗ ᒪᓕᑦᑕᐅᓗᓂ ᓯᕗᒻᒧᐊᖅᐸᓪᓕᐊᔾᔪᑎᕗᑦ.
- ᑐᙵᕕᓕᐅᕐᓂᐊᖅᑕᕗᑦ ᓄᓇᕗᑦ ᐊᔾᔨᐅᙱᑦᑑᓂᖓ ᑲᓇᑕᒥ ᓄᓇᕐᔪᐊᒥᓗ ᒪᓕᑦᑕᐅᓗᓂ ᐃᓅᓂᕗᑦ.
- ᐱᓕᕆᖃᑎᖃᕐᓂᐊᖅᑐᒍᑦ ᑲᑐᔾᔨᖃᑎᖃᕐᓗᑕ ᓯᕗᒧᒋᐊᕈᑕᐅᒍᓐᓇᖅᓯᖁᓪᓗᒋᑦ ᐃᓄᐃᑦ ᑐᕌᒐᖏᑦ ᑕᑯᒍᒪᔭᖏᓪᓗ ᓄᓇᕗᒻᒥᐅᑦ ᒪᓕᑦᑕᐅᓗᓂ ᑲᑐᔾᔨᖃᑎᒌᓐᓂᕗᑦ.