ᒪᐃ 30, 2023
ᓇᓗᓇᐃᕈᑎ
ᓯᕗᓕᖅᑎ ᑭᐅᔪᖅ ᑕᒻᒪᖅᓯᒪᔪᖅᓯᐅᖅᑎᐅᑉ ᐅᓂᒃᑳᓕᐊᒥᓂᖏᓐᓄᑦ
ᓯᕗᓕᖅᑎ ᐱᔭᐃ ᐊᕿᐊᕈᖅ ᐅᓪᓗᒥ ᓴᖅᑭᖅᑎᑦᓯᖅᑲᐅᔪᖅ ᐅᑯᓂᖓ ᓇᓗᓇᐃᕈᑎᒥᒃ ᑭᐅᔾᔪᑎᖃᖅᑐᓂ ᐅᓂᒃᑳᓕᐊᒥᓂᖏᓐᓄᑦ ᑲᓇᑕᒥ ᑕᒻᒪᖅᓯᒪᔪᖅᓯᐅᖅᑎᐅᑉ ᐊᑎᓕᒃ ᓱᕈᓯᕐᓄᑦ ᐃᓚᒌᓄᓪᓗ ᐱᔨᑦᓯᕋᐅᑏᑦ ᓄᓇᕗᒻᒥ ᐊᒻᒪᓗ ᓄᕙᔾᔪᐊᕐᓇᖅ 19 ᑲᐴᑎᓂᒃ ᓯᐊᕐᒪᖅᑎᑦᓯᕙᓪᓕᐊᓯᒪᓂᖏᑦ ᓄᓇᕗᒻᒥ:
“ᒐᕙᒪᒃᑯᑦ ᓇᓗᓇᐃᖅᓯᔪᑦ ᐊᖏᕈᑎᖃᖅᑐᑎᓪᓗ ᑕᒻᒪᖅᓯᒪᔪᖅᓯᐅᖅᑎ ᑭᐅᕋᓐ ᕼᐅᒐᓐ ᖃᐅᔨᔭᒥᓂᖏᓐᓂᒃ.
ᓱᕈᓰᑦ ᓯᕗᓂᑦᓴᕆᒐᑦᑎᒍ ᓄᓇᕗᒻᒥ. ᓯᕗᓕᖅᑎᐅᓪᓗᖓ, ᐊᑖᑕᒋᔭᐅᓪᓗᖓ, ᖁᓅᒻᒥᕈᑎᖃᒻᒪᕆᑦᑐᖓ ᐅᓂᒃᑳᓕᐊᒥᓂᖓᓂᒃ ᓇᓗᓇᐃᖅᓯᒍᑕᐅᔪᒥᒃ ᐊᐅᓚᑕᐅᖃᑦᑕᕐᓂᖏᓐᓂᒃ ᓱᕈᓯᕐᓄᑦ ᐃᓚᒌᓄᓪᓗ ᐱᔨᑦᓯᕋᐅᑎᐅᔪᑦ ᓄᓇᕗᒻᒥ ᑐᐊᕕᕐᓇᖅᑐᒃᑯᑦ ᐃᓱᒫᓗᓐᓇᓗᐊᓕᖅᓯᒪᓂᖓᓂᒃ.
ᑭᐅᔾᔪᑎᕗᑦ ᕿᓚᒥᐅᔪᒃᑰᕆᐊᓖᑦ. ᐊᑕᖏᖅᑐᒃᑯᑦ ᐃᑲᔪᖅᓱᖅᑕᐅᓗᑎᒃ ᒥᓂᔅᑕᐅᖃᑎᒌᓄᑦ, ᒐᕙᒪᒋᔭᕗᑦ ᐊᑐᐃᓐᓇᕈᖅᑎᑦᓯᓂᐊᖅᑐᑦ ᐱᓕᕆᔾᔪᑎᑦᓴᓂᒃ ᐃᓄᓕᕆᔨᒃᑯᑦ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ, ᐃᖅᑲᓇᐃᔭᖅᑐᓕᕆᔨᒃᑯᓪᓗ ᑲᒪᒋᔭᖃᕈᓐᓇᖁᓪᓗᒋᑦ ᑮᓇᐅᔭᖅᑎᒍᑦ ᐊᒥᓱᕐᖑᕆᐊᖅᑕᐅᓗᑎᓪᓗ ᐃᖅᑲᓇᐃᔭᖅᑎᖃᕐᓂᖏᑦ. ᒐᕙᒪᓕᕆᔨᒃᑯᑦ ᐋᖅᑭᑦᓯᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᓐᓂ ᑕᒻᒪᖅᓯᒪᔪᖅᓯᐅᕈᑎᓂᒃ ᐃᑲᔪᖅᓱᐃᓂᕐᒧᓪᓗ ᐊᐅᓚᑦᓯᒍᑎᓂᒃ ᐋᖅᑭᑦᓱᐃᓗᑎᓪᓗ ᐊᐅᓚᑦᓯᓂᐅᔪᓂᒃ ᓵᑕᑦᓴᐅᒍᑎᖃᖃᑦᑕᓂᕐᒧᑦ ᐸᕐᓇᐅᑎᓂᒃ. ᒐᕙᒪᒃᑯᓐᓂ ᐊᑕᖏᖅᑐᒥᒃ ᐱᓕᕆᔾᔪᓯᖃᕐᓗᑎᒃ, ᒐᕙᒪᓕᕆᔨᒃᑯᑦ ᖃᐅᔨᓴᖅᐸᓪᓕᐊᖏᓐᓇᕐᓂᐊᖅᑐᑦ ᐱᓕᕆᕕᐅᔪᓂ ᐱᔨᑦᓯᕋᐅᑎᖏᓐᓂᒃ ᐱᔾᔪᑎᒋᓪᓗᒋ ᖃᓄᐃᑦᑕᐃᓕᑎᑕᐅᒋᐊᖃᕐᓂᖏᑦ ᓱᕈᓰᑦ, ᒪᒃᑯᑦᑐᐃᑦ, ᐃᓚᒌᓪᓗ.
ᐱᔾᔪᑎᒋᓪᓗᒍ ᓄᕙᔾᔪᐊᕐᓇᖅ 19 ᑲᐴᑎᓂᒃ ᓯᐊᒻᒪᖅᑎᑦᓯᕙᓪᓕᐊᓯᒪᓂᖏᓐᓄᑦ, ᐊᑐᓕᖁᔨᔾᔪᑏᑦ ᐊᑐᓕᖅᑎᑕᐅᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᖅᓯᓯᒪᒐᓱᐊᖏᓐᓇᑎᓪᓗᒋᑦ ᑲᐴᑎᓂᒃ ᐊᑐᐃᓐᓇᕈᖅᑎᑦᓯᖃᑦᑕᕐᓂᖅ ᐊᑑᑎᖃᑦᓯᐊᖁᓪᓗᒍ ᐃᓚᐃᓐᓈᕈᑕᐅᓯᒪᖁᓇᒍᓗ. ᑕᒪᓐᓇ ᖃᐅᔨᓴᖅᑕᐅᓂᒥᓂᖓ ᓇᓗᓇᐃᖅᓯᒋᐊᒃᑲᓐᓂᕈᑕᐅᔪᖅ ᖃᓄᐃᓕᒋᐊᕈᑎᒋᓚᐅᖅᑕᑦᑎᓐᓂᒃ ᑲᔪᓯᒍᑎᖃᕐᓂᐊᖅᑐᑕᓗ ᐱᐅᓯᕙᓪᓕᐊᑎᑦᓯᖏᓐᓇᓂᕐᒥᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᐅᓚᑦᓯᓂᕐᒥᒃ ᐱᔨᑦᓯᕋᐅᑎᓂᓪᓗ ᓄᓇᕗᒻᒥᐅᑦ ᐃᒻᒥᓂᒃ ᓴᐳᒻᒥᓯᒪᑦᓯᐊᕈᓐᓇᖁᓪᓗᒋᑦ ᓄᓇᖅᑲᑎᒥᓂᓪᓗ ᑲᐱᔭᐅᖃᑦᑕᕐᓗᑎᒃ.
ᖁᔭᓐᓇᒦᒃ, ᒥᔅ ᕼᐅᒐᓐ, ᐱᓕᕆᐊᕆᓯᒪᔭᕐᓄᑦ. ᑕᒪᒃᑯᐊ ᕿᒥᕐᕈᔭᐅᓯᒪᓂᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ ᓵᑕᑦᓴᐅᒍᑎᐅᕙᓪᓕᐊᖏᓐᓇᓂᐊᖅᑐᑦ ᑐᑭᓯᓇᑦᓯᐊᖅᑐᒥᓪᓗ ᓴᖅᑭᔮᕈᑕᐅᓗᑎᒃ ᐊᐅᓚᑦᓯᓂᑦᑎᓐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᐃᓄᓕᕆᓂᕐᒥᓪᓗ.”