ᐋᓐᑎᐅᕆᐅ (ᐊᐃᕆᓕ 28, 2023) − ᓄᓇᕗᒻᒥ ᓯᕗᓕᖅᑏᑦ ᑲᑎᒪᔨᖏᑦ ᓴᖅᑭᔮᖅᑎᑦᑎᕗᑦ ᑲᑐᔾᔨᓗᑕᒥ ᐱᓕᕆᐊᒃᓴᖏᓐᓂᒃ ᓯᕗᓪᓕᐅᔾᔭᐅᔪᒪᔪᓂᒃ ᒪᐃ 1 ᐊᒻᒪ 2 ᖃᔅᓰᖅᓱᑲᓪᓚᒡᓗᑎᒃ ᑲᑎᒪᖃᑎᖃᖅᐸᒡᓗᑎᒃ ᑲᓇᑕᒥ ᐱᓕᕆᖃᑎᒋᕙᒃᑕᖏᓐᓂᒃ ᐋᑐᕚᒥ. "ᓄᓇᕗᒥᐅᑦ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓃᑎᓪᓗᒋᑦ" ᐅᓪᓘᖕᓄᑦ ᒪᕐᕉᖕᓄᑦ ᒐᕙᒪᓕᕆᔭᖅᑐᖅᓯᒪᓂᐊᕐᒪᑕ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓄᑦ ᐱᓕᕆᖃᑎᒌᒃᐸᓪᓕᐊᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ.
"ᒥᓂᔅᑕᐃᑦ ᐅᕙᖓᓗ ᖃᐅᔨᒪᒋᐊᕐᓂᐊᖅᐳᒍᑦ ᖃᐅᑕᒫᑦ ᐱᓪᓚᕆᐅᔪᑦ ᓄᓇᕗᒻᒥᐅᓄᑦ ᑐᓴᖅᑕᐅᒐᓗᐊᕐᒪᖔᑕ ᐋᑐᕚᒥ, ᐊᒥᓱᑦ ᐃᓱᒪᓕᐅᕈᑕᐅᔪᑦ ᐊᒃᑐᐃᔪᑦ ᓄᓇᕗᒻᒥ ᐅᓪᓗᒥ ᐋᖅᑭᒃᑕᐅᔪᓂᒃ," ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᖃᖅᑲᐅᕗᖅ.
"ᑲᓇᑕᒥ ᐅᓄᕐᓂᖅᓴᐃᑦ ᐱᕈᖅᐸᓪᓕᐊᑎᓪᓗᒋᑦ ᑲᓇᑕᒥ ᑲᓇᖕᓇᖔᖓᓂ ᐱᖓᓐᓇᕐᒧᑦ, ᑕᑯᔪᒪᕗᒍᑦ ᑲᓇᑕᒥ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᐊᒻᒪ ᓄᓇᓖᑦ ᐊᐅᓚᔪᓐᓇᐅᑎᖏᓐᓂᒃ ᐱᓕᕆᐊᒃᓴᓂᒃ ᐅᑭᐅᖅᑕᖅᑑᑉ ᓯᒡᔭᖓᓄᑦ ᑎᑭᓪᓗᒍ. ᒫᓐᓇᒧᑦ ᑎᑭᖦᖢᒍ, ᒐᕙᒪᕗᑦ ᓇᖕᒥᓂᖅ ᑮᓇᐅᔭᖃᖅᑎᑦᑎᕗᑦ ᓇᖕᒥᓂᖅ ᐋᖅᑭᒋᐊᕈᑎᒃᓴᓂᒃ ᐃᑲᔪᖅᑐᐃᔪᓂᒃ ᓴᙱᔪᓂᒃ ᐊᒻᒪ ᓴᐱᓕᖅᓴᕋᐃᙱᑦᑐᓂᒃ ᓄᓇᓕᖕᓂ ᐊᒻᒪ ᐃᑲᔫᑕᐅᓗᑎᒃ ᑲᓇᑕᒥ ᑎᒍᒥᐊᖅᑕᐅᓂᖓᓄᑦ ᐅᑭᐅᖅᑕᖅᑐᒥ."
ᓯᕗᒻᒧᐊᒃᑎᑦᑎᓂᖅ ᓄᓇᕗᒻᒥ ᓴᓇᔭᐅᓯᒪᔪᖅ ᐅᕘᓇ, ᑲᑐᔾᔨᓗᑕᒃᑯᑦ ᐱᔭᒃᓴᕆᔭᖓᑦ ᐊᖏᒡᓕᒋᐊᖅᑎᑦᑎᓂᐊᖅᐳᖅ ᓄᓇᕗᒻᒥᐅᑦ ᐃᒡᓗᖃᖅᑎᑦᑎᕙᖕᓂᕐᒧᑦ ᑲᔪᓯᓂᕆᔭᖓᓄᑦ, ᐊᔪᖅᑎᑦᑎᙱᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᒪᒥᓴᕐᓂᕐᒥᒡᓗ, ᐅᑎᖅᑎᑦᑎᓂᕐᒥᒃ ᐃᓕᓐᓂᐊᕐᓂᓕᕆᓂᕐᒥᒃ, ᐊᔾᔨᒌᙱᕈᓘᔭᖅᑐᓄᑦ ᓄᓇᓕᖕᓂ ᑮᓇᐅᔭᓕᐅᕋᓱᖕᓂᕆᔭᐅᕙᒃᑐᓂᒃ, ᐃᑲᔪᕐᓗᒋᓪᓗ ᐃᓐᓇᖁᑎᕗᑦ ᐃᓐᓇᕈᖅᐸᓪᓕᐊᑦᑎᐊᕐᓗᑎᒃ ᐊᖏᕐᕋᕆᔭᒥᓂ.