ᔪᓚᐃ 7−ᒥ 9−ᒧᑦ, 2023
ᓄᓇᕗᓕᒫᒧᑦ
ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᒃ ᐃᓕᓴᖅᓯᓂᕐᒧᑦ ᓄᓇᕗᒻᒥᑦ ᕿᑲᕐᓇᒥ:
"ᖁᕕᐊᓲᑎᖃᖅᑎᓪᓗᑕ ᓄᓇᕗᑦ ᐅᓪᓗᖓᓂᒃ ᐊᒻᒪ 30−ᓂᒃ ᐊᕐᕌᒍᖃᓕᖅᑎᓪᓗᒍ ᓄᓇᕗᑦ ᐊᖏᕈᑎᖓ, ᓄᓇᕗᒻᒥᐅᓕᒫᑦ ᐅᖃᐅᑎᔪᒪᕙᒃᑲ ᖁᔭᓕᑦᑎᐊᕋᒪ ᐱᓇᔪᖃᑦᑕᕋᔅᓯ ᓄᓇᕗᑦ ᓴᙱᑦᑎᒃᑲᓐᓂᖁᓪᓗᒍ ᐊᒻᒪ ᐊᑕᐅᓯᐅᖃᑎᒌᖕᓂᖅᓴᐅᖁᓪᓗᒍ. ᓯᕗᒻᒧᐊᒃᑐᒻᒪᕆᐅᕗᒍᑦ ᐊᓯᔾᔩᕙᓪᓕᐊᓂᕐᒥᑦ ᑕᐅᑐᙳᐊᖅᑕᑦᑎᓐᓂᑦ ᓄᓇᕗᒻᒧᑦ.
ᐱᔾᔪᑎᒋᓪᓗᒍ ᑲᑐᔾᔨᓗᑕ, ᑐᙵᓱᒃᑎᑉᐸᔅᓯ ᖁᕕᐊᓲᑎᖃᖅᑎᓪᓗᑕ ᐃᓕᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒃ, ᐊᒻᒪ ᓴᐱᓕᖅᓴᕋᐃᙱᓐᓂᖏᓐᓂᒃ ᓄᓇᓕᒃᐳᑦ. ᑕᒪᑐᒪᓂ ᐊᕐᕌᒍᒥ ᓇᓗᓇᐃᖅᓯᖕᒪᑦ 30−ᓂᒃ ᐅᑭᐅᓂᒃ ᑲᔪᓯᑎᑕᐅᔪᓂᒃ ᑕᐃᒪᙵᑦ ᓄᓇᕗᒻᒥ ᐊᖏᖃᑎᒌᒍᑎᓄᑦ ᐱᖁᔭᖅ ᐊᒻᒪ ᓄᓇᕗᒻᒥ ᐱᖁᔭᖅ ᐊᓂᒍᖅᑎᑕᐅᓚᐅᖅᑎᓪᓗᒋᑦ ᒪᓕᒐᓕᐅᕐᕕᒡᔪᐊᕐᒥ ᔪᓚᐃ 9, 1993-ᒥ.
ᐃᓕᑕᕆᔪᒪᖕᒥᔭᒃᑲ ᓯᕗᓕᖅᑏᑦ ᐋᔩᖃᑎᒌᒃᐸᓚᐅᖅᑐᑦ ᓄᓇᑖᕋᓱᒃᑎᓪᓗᑕ, ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐱᓕᕆᐊᖃᓚᐅᕐᓂᖏᓐᓄᑦ ᓴᖅᑭᑎᑦᑎᓂᕐᒥᒃ ᓄᓇᑦᑎᓐᓂᒃ ᐊᑐᓕᖅᑎᑦᑎᓂᕐᒥᒡᓗ ᓄᓇᕗᒻᒥ ᐊᖏᖃᑎᒌᒍᑎᒥ. ᓇᓗᓇᐃᖅᓯᔾᔪᑕᐅᔪᖅ ᒐᕙᒪᒃᑯᑦ ᐱᖁᔭᖏᓐᓂᒃ, ᐱᓕᕆᖃᑎᒌᖕᓂᖏᓐᓂᒃ ᒐᕙᒪᒃᑯᑦ ᐃᓄᐃᓪᓗ, ᐊᒻᒪᓗ ᐱᓕᕆᐊᕗᑦ ᓴᐳᔾᔨᓂᕐᒥᒃ ᓄᓇᑦᑎᓐᓂᒃ, ᐃᒪᑦᑎᓐᓂᒃ, ᐆᒪᔪᓂᒡᓗ.
ᖁᕕᐊᓱᒋᑦᑎ ᓄᓇᕗᑦ ᐅᓪᓗᖓᓂᑦ!