ᐃᖃᓗᐃᑦ, ᓄᓇᕗᑦ (ᔪᓚᐃ 16, 2025) – ᓄᓇᕗᒻᒥ ᒐᕙᒪᒃᑯᖏᑦ (GN) ᖁᕕᐊᓱᑦᑐᖅ ᑐᓴᖅᑎᑦᓯᔭᕆᐊᑦᓴᖅ ᐊᕐᕌᒍᓄᑦ ᖁᓕᓄᑦ ᐊᐅᓪᓚᕐᓂᕐᒧᑦ ᐊᖏᕈᑎᑖᓚᐅᒻᒪᑕ ᐳᕌᑦᓕ ᐃᐅᒃᑯᓐᓂᑦ (ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ (EIC)), ᓄᑖᙳᖅᑎᕆᔪᓐᓇᖅᓱᑎᒃ ᐊᕐᕌᒍᓄᑦ ᑕᓪᓕᒪᒃᑲᓐᓂᕐᓄᑦ.
ᑖᓐᓇ ᐊᖏᖃᑎᒌᒍᑎ ᐅᖓᕙᕆᐊᖅᑎᑦᓯᕗᖅ ᒪᓕᒋᐊᓕᓐᓂᒃ ᐱᔨᑦᓯᕋᐅᑎᒋᔭᐅᕙᒌᖅᑐᓂᒃ ᑳᓪᒻ ᐃᐅᒃᑯᓐᓂ ᐊᒻᒪᓗ ᑲᓃᑎᐊᓐ ᓄᐊᑦᑯᓐᓄᑦ ᓄᓇᕗᒻᒥ ᒐᕙᒪᒃᑯᓐᓄᑦ, ᐱᐅᓯᒋᐊᕈᑕᐅᓪᓗᓂᓗ ᐋᖅᑭᒍᑕᐅᓪᓗᓂᓗ ᓄᓇᕗᒻᒥ ᒐᕙᒪᒃᑯᑦ ᑲᑐᔾᔨᖃᑎᒌᕐᓂᖅ ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ ᑲᔪᓯᑎᑦᓯᓂᕐᒧᑦ ᐱᔭᕆᐊᖃᓪᓚᕆᑦᑐᓂᒃ ᖃᖓᑕᔫᒃᑯᑦ ᐱᔨᑦᓯᕋᐅᑎᓂᒃ ᓄᓇᕘᓕᒫᒥ ᑲᓃᑎᐊᓐ ᓄᐊᑦᑯᑦ ᐊᒻᒪᓗ ᑳᓪᒻ ᐃᐅᒃᑯᑦ.
"ᓄᓇᕗᒻᒥ, ᖃᖓᑕᔫᒃᑯᑦ ᐊᐅᓪᓚᕐᓂᖅ ᐊᖅᑯᑎᐅᕗᖅ − ᐊᖅᑯᑎᕐᔪᐊᕗᑦ. ᐊᑦᑐᐊᓂᖃᕐᒪᑦ ᐃᓚᑦᑎᓐᓄᑦ, ᐱᔭᕆᐊᖃᓪᓚᕆᑦᑐᓂᒃ ᐱᖁᑎᓂᒃ ᐱᔨᑦᓯᕋᐅᑎᓂᓪᓗ, ᐊᒻᒪᓗ ᓄᓇᓕᑉᐳᑦ ᓴᙱᔫᑎᓪᓗᒋᑦ. ᑕᑎᒋᔭᒃᓴᐅᔪᖅ ᖃᖓᑕᓗᓂ ᐱᔨᑦᓯᕋᐅᑎ ᑐᙵᕕᐅᔪᖅ ᓄᓇᕘᑉ ᐃᓅᖃᑎᒌᓐᓂᕐᒧᑦ ᒪᑭᐅᒪᐃᓐᓇᕈᑎᒃᓴᓄᓪᓗ ᖃᓄᐃᙱᑦᓯᐊᕐᓂᕐᒥ, ᐱᒻᒪᕆᐅᓪᓗᓂᓗ ᐱᖁᓪᓗᒍ ᐊᔾᔨᒌᒃᑎᑦᓯᓂᖅ ᐱᕕᑦᓴᖃᕐᓂᕐᒧᓪᓗ ᓄᓇᕗᒻᒥᐅᓕᒫᓄᑦ," ᐅᖃᖅᑐᖅ ᓯᕗᓕᖅᑎ ᐲᔭᐃ. ᐊᕿᐊᕈᖅ. "ᑖᓐᓇ ᐊᖏᖃᑎᒌᒍᑎ ᐅᕙᑦᑎᓐᓂᒃ ᓴᖅᑭᑎᑦᓯᓂᐊᕆᕗᖅ ᐃᑲᔪᖅᑕᐅᔾᔪᑎᓂᒃ ᐃᓄᓐᓄᑦ ᐃᖅᑲᓇᐃᔭᖅᑎᑦᓯᓂᒃᑯᑦ, ᐱᓕᒻᒪᑦᓴᕐᓂᒃᑯᑦ, ᓴᙱᓂᖅᓴᒃᑯᓪᓗ ᐊᑕᓂᕆᔭᐅᔪᓂᒃ ᑭᒃᑯᑐᐃᓐᓇᓄᑦ ᓯᕗᓪᓕᖅᐸᐅᔾᔭᐅᓯᒪᔪᓄᑦ ᐃᓛᒃᑰᖅᑐᓄᓪᓗ ᑲᔪᓯᑎᑦᓯᓂᕐᒧᑦ."
ᐊᖏᕈᑎ ᓴᖅᑭᔮᖅᑎᑦᓯᕗᖅ ᐊᖏᖅᓯᒪᓂᖃᑎᒌᓐᓂᕐᒧᑦ ᐱᐅᓯᒋᐊᕈᑎᑦᓴᓂᒃ ᐱᔨᑦᓯᕋᐅᑎᓂᒃ ᑲᔪᓯᑎᑦᓯᓂᕐᒧᑦ, ᐊᑐᓕᖅᑕᐅᓗᑎᒃ ᐊᑯᓂᐅᔪᒃᑯᑦ ᒪᑭᒪᔾᔪᑎᓄᑦ ᐱᕈᖅᐸᓪᓕᐊᔪᑦ, ᓇᓗᓇᐃᖅᓯᓂᕐᒧᓪᓗ ᑕᑎᒋᔭᒃᓴᐅᔪᑦ ᖃᖓᑕᔫᒃᑯᑦ ᐃᓯᕈᓐᓇᕐᓂᖅ ᓄᓇᕗᒥᐅᓕᒫᓄᑦ. ᖃᖓᑕᓂᕆᔭᐅᕙᑦᑐᖅ ᐱᒻᒪᕆᐊᓘᖏᓐᓇᖅᑎᓪᓗᒍ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓂᕐᒧᑦ ᓄᓇᕗᒻᒥ, ᐊᖏᖃᑎᒌᒍᑕᐅᓯᒪᔪᖅ ᓴᖅᑭᑎᑦᓯᕗᖅ ᐊᐅᓚᑕᐅᔪᒥᒃ ᐊᑐᖅᑕᐅᖃᑦᑕᕋᔭᖅᑐᒥᒃ ᓴᙱᓕᖅᑎᑦᓯᓂᕐᒧᑦ ᓇᓕᒧᒌᓕᖅᑎᑦᓯᓂᕐᒧᑦ ᑭᒃᑯᑐᐃᓐᓇᓄᑦ ᐱᔭᐅᔭᕆᐊᓕᓐᓄᑦ ᐃᓛᒃᑰᖅᑐᓄᓪᓗ ᐊᐅᓚᓂᕆᔭᐅᕙᑦᑐᓄᑦ.
ᓄᓇᕗᒻᒥ ᒐᕙᒪᒃᑯᑦ ᓂᐱᖃᑦᓯᐊᕐᓂᐊᖅᐳᑦ ᐱᓕᕆᐊᖑᙱᑦᑐᓂᒃ ᑲᔪᓯᑎᑦᓯᓂᕐᒧᓪᓗ ᑳᑦᑐᓛᒃᑕᐅᔪᓂᒃ ᖃᖓᑕᔫᒃᑯᑦ ᐱᔨᑦᓯᕋᐅᑎᓂᒃ, ᐃᓚᒋᔭᐅᓗᑎᒃ ᐋᓐᓂᐊᕐᕕᓕᐊᖅᑐᑦ, ᐱᓕᕆᐊᒃᓴᐃᑦ, ᐃᓄᓕᕆᔨᒃᑯᓪᓗ ᐱᔨᑦᓯᕋᖅᑕᐅᔪᓄᑦ ᖃᖓᑦᑕᐅᑎᖏᑦ, ᐊᒻᒪ ᐅᓯᓕᖅᑐᖅᑕᐅᔭᕆᐊᓖᑦ ᐅᓄᙱᓐᓂᖅᓴᐅᓗᑎᒃ ᖃᖓᑦᑕᐅᑏᑦ.
ᓄᑖᖅ ᐊᖏᕈᑎ ᐱᑎᑦᓯᔪᖅ ᓄᓇᕗᒻᒥ ᒐᕙᒪᒃᑯᓐᓂ ᐊᖏᓂᖅᓴᒥᒃ ᐅᖃᐅᓯᒃᓴᓂᑦ ᑕᑯᒃᓴᐅᓂᖅᓴᐅᓗᓂᓗ ᐊᐅᓚᓂᕐᓄᑦ ᐃᑲᔪᖅᑐᐃᔪᓄᑦ ᓄᓇᓕᓐᓂ ᑲᓲᒪᓂᕐᒥᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ, ᐃᓕᓐᓂᐊᕐᓂᕐᒥᒃ, ᒪᑭᐅᒪᐃᓐᓇᕈᑎᒃᓴᓄᓪᓗ ᐱᕕᒃᓴᕐᓂᑦ. ᓴᖅᑭᑎᑦᓯᖃᑦᑕᕆᕗᖅ ᐱᓕᒻᒪᑦᓴᕐᓂᕐᒥᑦ ᐃᖅᑲᓇᐃᔮᒃᓴᓂᓪᓗ ᓄᓇᕗᒻᒥ ᐃᓄᓐᓄᑦ.
ᐊᒻᒪ ᓱᓕ, ᓄᓇᕗᒻᒥ ᒐᕙᒪᒃᑯᑦ ᐱᓯᒪᓕᖅᑐᑦ ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ ᓂᐅᕕᕈᓐᓇᕐᓗᑎᒃ ᓇᒻᒥᓂᖅᑖᕆᓂᐊᕐᓗᒍ ᕗᕌᑦᓕ ᐃᐅᒃᑯᓐᓂ (ᐊᐅᓚᑕᐅᔪᖅ ᑲᓃᑎᐊᓐ ᓄᐊᑦ), ᓂᕈᐊᕐᓂᖅᐸᑕ ᐊᑐᕈᒪᓗᒍ ᑖᓐᓇ ᐱᕕᒃᓴᖅ. ᓴᖅᑭᑎᑦᓯᕗᖅ ᐊᖅᑯᑎᒃᓴᒥᑦ ᐃᑎᓂᖅᓴᒧᑦ ᓄᓇᕗᒻᒥ ᐊᑯᓂᐅᔪᒧᑦ ᐃᑲᔪᖅᑐᐃᓂᕐᒥᑦ ᐋᖅᑭᑦᓱᐃᓂᒻᒥᓪᓗ ᐅᑭᐅᖅᑕᖅᑐᒥᑦ ᖃᖓᑕᔫᓂᑦ ᐱᔨᑦᓯᕋᕐᓂᕐᒧᑦ ᑲᔪᓯᑎᑦᓯᓂᕐᒧᑦ.
ᓄᓇᕗᒻᒥ ᒐᕙᒪᒃᑯᑦ ᓂᕆᐅᑉᐳᑦ ᐊᑐᓕᖅᑎᑦᓯᔪᒪᓪᓗᑎᒃ ᑖᑦᓱᒥᖓ ᐊᖏᖃᑎᒌᒍᑎᒥᒃ ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ ᐊᒻᒪᓗ ᐳᕌᑦᓕ ᐃᐅᒃᑯᓐᓂ ᓯᕗᓪᓕᐊᔾᔨᓂᖏᓐᓄᑦ ᐊᐅᓚᑦᓯᔾᔪᑎᓂᒃ ᐱᐅᑦᓯᐊᖅᑐᓂᒃ, ᑕᑯᒃᓴᐅᔪᓂᒃ, ᐊᒻᒪᓗ ᖃᓄᐃᙱᑦᓯᐊᕈᓯᖏᓐᓂᒃ ᓄᓇᓖᑦ ᓄᓇᕘᓕᒫᒥ.
ᓄᓇᕗᒻᒥ ᒐᕙᒪᒃᑯᖏᑦᑕ ᖃᖓᑕᔫᖁᑎᓄᑦ ᐱᔨᑦᓯᕋᐅᑎᖏᓐᓄᑦ ᐊᖏᕈᑎ
- ᖃᓄᐃᒻᒪᑦ ᓄᓇᕗᒻᒥ ᒐᕙᒪᒃᑯᖏᑦ ᑖᑦᓱᒥᖓ ᐊᖏᖃᑎᒌᒍᑎᖃᖅᓯᒪᕙᑦ?
ᐱᓕᕆᐊᑦᓴᖏᑦ ᐱᔨᑦᓯᕋᐅᑎᖏᓪᓗ ᑲᔪᓯᑎᒍᒪᓪᓗᒋᑦ, ᓄᓇᕗᒻᒥ ᒐᕙᒪᒃᑯᑦ (GN) ᐱᔨᑦᓯᕋᕆᐊᖃᖅᐳᑦ ᐊᔪᙱᑦᑐᓂᒃ ᑮᓇᐅᔾᔭᒃᓴᕋᓱᐊᖅᑐᓂᒃ ᐊᐅᓚᑦᓯᔨᓂᒃ ᐱᔨᑦᓯᕋᕈᓐᓇᑦᓯᐊᖁᓪᓗᒋᑦ ᐱᔨᑦᓯᕋᑦᓯᐊᖃᑦᑕᖁᓪᓗᒋᑦ ᐊᑑᑎᖃᑦᓯᐊᖅᑐᒥᓪᓗ. ᓄᓇᕗᒻᒥ ᒐᕙᒪᒃᑯᑦ ᒫᓐᓇ ᑖᒃᑯᓂᖓ ᐱᔨᑦᓯᕋᐅᑎᓂᒃ ᐊᑐᖃᑦᑕᖅᐳᑦ ᒪᕐᕉᓐᓂ ᐃᓛᒃᑰᖅᓱᑎᒃ ᑳᓐᑐᓛᒃᑕᐅᓯᒪᔫᓐᓂᒃ ᑳᓪᒻ ᐃᐅᒃᑯᓐᓂ ᐊᒻᒪᓗ ᑲᓃᑎᐊᓐ ᓄᐊᑦᑯᓐᓂ, ᑭᓯᐊᓂ ᑕᒪᕐᒥᒃ ᑳᓐᑐᓛᒃᓵᒃ ᐃᓱᓕᑉᐸᓪᓕᐊᓕᖅᑑᒐᓗᐊᑦ ᐃᓱᓕᕝᕕᒃᓴᖏᓐᓄᑦ.
ᐊᑐᕐᓂᒃᑯᑦ ᐊᑯᓂᐅᔪᒃᑯᑦ ᐊᖏᖃᑎᒌᓐᓂᕐᒥᒃ, ᓄᓇᕗᒻᒥ ᒐᕙᒪᒃᑯᑦ ᖃᐅᔨᒪᒋᐊᖅᓯᒪᔪᑦ ᑲᔪᓯᓗᑎᒃ ᐊᑐᖅᑎᑦᓯᓂᕐᓂ ᓄᓇᕗᒻᒥ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ ᐱᔨᑦᓯᕋᐅᑎᖏᓐᓂᓪᓗ ᓄᓇᕗᒻᒥᐅᓄᑦ.
- ᖃᖓ ᑖᓐᓇ ᐊᖏᕈᑎ ᐊᑐᓕᕐᓂᐊᖅᐸ?
ᐊᖏᕈᑎ ᐊᑐᓕᓚᐅᖅᑐᖅ ᔪᓚᐃ 15, 2025−ᒥ.
- ᓱᓇᐅᕙᑦ ᖃᖓᑕᔫᖁᑎᓄᑦ ᐱᔨᑦᓯᕋᐅᑎᖏᓐᓄᑦ ᐊᖏᕈᑎ (ᐊᐅᓪᓚᖃᑦᑕᕐᓂᕐᒧᑦ ᐊᖏᕈᑎ)?
ᐊᐅᓪᓚᕐᓂᐊᕐᓗᓂ ᐊᖏᖃᑎᒌᒍᑎ ᑳᓐᑐᓛᖑᔪᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐊᒻᒪᓗ ᐳᕌᑦᓕ ᐃᐅᕐ ᐱᔨᑦᓯᕋᖅᑎᒃᑯᓐᓄᑦ (Bradley Air) ᓇᓗᓇᐃᖅᓯᒪᓪᓗᑎᒃ ᐊᑐᕆᐊᓖᑦ ᒪᓕᒋᐊᓖᓪᓗ ᐱᔨᑦᓯᕋᐅᑏᑦ ᐊᑐᐃᓐᓇᕈᖅᑎᑕᐅᓂᐊᖅᑐᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐅᑭᐅᓄᑦ ᖁᓕᓄᑦ ᑳᓐᑐᓛᒃ ᐊᑐᖅᑎᓪᓗᒍ.
- ᖃᓄᐃᑦᑐᑦ ᐱᔨᑦᓯᕋᐅᑏᑦ ᐊᑭᓕᖅᑕᐅᓯᒪᕙᑦ ᑳᓐᑐᕌᑎᒍᑦ?
ᑳᓐᑐᕌᒃ ᐃᓚᖃᖅᑐᖅ ᐱᔨᑦᓯᕋᐅᑎᓂᒃ ᒫᓐᓇᐅᔪᖅ ᐱᑎᑕᐅᔪᓂᒃ ᓄᓇᕗᒻᒥ ᒐᕙᒪᒃᑯᓐᓄᑦ ᑲᓇᐃᑎᐊᓐ ᓄᐊᑦᑯᓐᓄᑦ ᐊᒻᒪᓗ ᑳᓪᒻ ᐃᐅᒃᑯᓐᓄᑦ, ᐃᓚᐅᓪᓗᑎᒃ ᐃᖅᑲᓇᐃᔭᕆᐊᖅᑐᕐᓗᓂ ᐊᐅᓪᓚᕐᓂᖅ, ᐋᓐᓂᐊᕐᕕᓕᐊᕐᓗᓂ ᐊᐅᓪᓚᕐᓂᖅ ᐅᓯᔭᐅᔪᓄᓪᓗ. ᐊᔾᔨᒋᙱᑦᓱᓂᐅᒃ ᑳᓐᑐᕌᖑᒌᑦᑑᑉ, ᓄᑖᖅ ᐊᖏᕈᑎ ᐃᓚᖃᕐᒥᔪᖅ ᑐᕌᖓᑦᓯᐊᖅᑐᓂᒃ ᑭᓪᓕᖏᓐᓂ ᐃᓄᓕᕆᔨᒃᑯᓐᓄᑦ ᐱᔨᑦᓯᕋᖅᑕᐅᔪᓄᑦ ᐊᐅᓪᓚᕐᓂᕐᓂ.
- ᑭᓱ ᓄᑖᖑᕙ ᑖᑦᓱᒧᖓ ᑳᓐᑐᕌᒃᒧᑦ?
ᐊᔾᔨᒋᙱᓗᐊᖅᑕᖓ ᑖᑦᓱᒪ ᑳᓐᑐᓛᑉ ᒫᓐᓇᓗ ᐊᖏᕈᑎᐅᔪᖅ ᑲᑎᑎᑦᓯᒻᒪᑦ ᑕᒪᐃᓐᓂᒃ ᓄᓇᕗᒻᒥ ᒐᕙᒪᒃᑯᖏᑦᑕ ᖃᖓᑕᔫᖁᑎᓄᑦ ᐱᔨᑦᓯᕋᐅᑎᖏᓐᓂᑦ ᐊᑕᐅᓯᒃᑯᑦ ᑳᓐᑐᓛᒃᑯᑦ ᐳᕌᑦᓕ ᐃᐅᒃᑯᓐᓂᑦ ᑳᓐᑐᓛᖃᖅᑕᖓᓗ ᑳᒻ ᐃᐅᒃᑯᓐᓂᑦ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ ᓄᓇᕗᒻᒥ ᒐᕙᒪᒃᑯᖏᑦ ᐊᐅᓚᑦᓯᓂᐊᖅᐳᑦ ᐊᑕᐅᓯᕐᒥᒃ ᑳᓐᑐᓛᒋᔭᐅᓂᐊᖅᑐᒥᒃ ᐊᑕᖐᔪᒥᒃ ᖃᖓᑕᓂᕐᒧᑦ ᐱᔨᑦᓯᕋᕐᓂᕆᔭᐅᕙᑦᑐᓂᒃ ᑕᒪᐃᓐᓂ ᐱᖓᓱᓂ ᐊᕕᑦᑐᖅᓯᒪᓂᐅᔪᓂ, ᐃᒪᓐᓇᐅᙱᖔᖅᑐᖅ ᐃᓛᒃᑰᖅᑐᓂᒃ ᑳᓐᑐᓛᒋᔭᐅᔪᓂᒃ ᑭᕙᓪᓕᕐᒧᑦ (ᑳᓪᒻ ᐃᐅᒃᑯᓐᓄᑦ) ᐊᒻᒪᓗ ᐳᕌᑦᓕ ᐃᐅᕐ (ᑲᓃᑎᐊᓐ ᓄᐊᑦ) ᕿᑎᕐᒥᐅᓂ ᕿᑭᖅᑕᓂᓗ.
- ᓱᓇᑦᑕᐅᖅ ᓄᑖᖑᕙ ᑖᑦᓱᒧᖓ ᑳᓐᑐᕌᒃᒧᑦ?
ᑖᓐᓇ ᑳᓐᑐᓛᖑᔪᖅ ᐃᓚᖃᕆᕗᖅᑕᐅᖅ ᓄᑖᓂᒃ ᒪᓕᒋᐊᓖᑦ ᖃᐅᔨᓴᕐᓂᕐᒧᑦ ᐊᐅᓚᑦᓯᓂᐊᕐᓗᓂᓗ ᖃᖓᑕᕙᑦᑐᑦ ᐱᓕᕆᐊᕆᕙᑦᑕᖏᓐᓂᑦ ᑐᑭᓯᓇᖅᓯᑎᑦᓯᓗᓂᓗ ᐊᑭᓕᕆᐊᖃᓕᖅᐸᑦᑐᓂᒃ ᖃᖓᑕᔪᓄᑦ ᓄᓇᕗᒻᒥ ᒐᕙᒪᖓᑕ ᑳᓐᑐᓛᒃᑯᑦ ᐊᑭᓕᕆᐊᖃᖅᑕᖏᓐᓄᑦ.
- ᖃᓄᖅ ᑕᐅᖅᓰᓂᕐᒧᑦ ᑮᓇᐅᔭᓕᐊᓂᑦ ᑯᐊᐳᕇᓴᒃᑯᑦ ᐱᓚᐅᖅᑕᖓ ᐳᕌᑦᓕ ᐃᐊᒃᑯᑦ ᐱᔨᑦᓯᕋᖅᑏᑦ ᐊᑦᑐᐃᓂᖃᓚᐅᖅᐸᑦ ᑖᑦᓱᒥᖓ ᐊᖏᕈᑎᒥᑦ?
ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ (EIC) ᐱᑖᕐᓂᖏᑦ ᐳᕌᑦᓕ ᐃᐅᒃᑯᑦ ᐊᑦᑐᐃᓪᓗᓂ ᐱᓕᕆᖃᑎᒌᓐᓂᖏᓐᓂ ᓄᓇᕗᒻᒥ ᒐᕙᒪᒃᑯᑦ ᒪᕐᕉᒃ ᑳᓐᑐᐊᒃᓯᔨᖏᑦ ᖃᖓᑕᔫᒃ (ᐳᕌᑦᓕ ᐃᐅᒃᑯᑦ ᐊᒻᒪᓗ ᑳᓪᒻ ᐃᐅ) ᐊᒻᒪᓗ ᓄᓇᕗᒻᒥ ᒐᕙᒪᒃᑯᑦ ᐱᕕᒃᓴᖏᓐᓂ ᐃᓚᐅᖃᑕᐅᓗᑎᒃ ᐊᑕᐅᓯᕐᒥᒃ ᓂᐅᕕᖅᑎᑦᓯᔨᒥᒃ.
- ᖃᓄᖅ ᓄᓇᕗᒻᒥᐅᑦ ᐊᑦᑐᖅᑕᐅᓂᖃᕐᓂᐊᖅᐸᑦ ᓄᓇᕗᒻᒥ ᒐᕙᒪᖓᑕ ᐊᑯᓂᐅᔪᒧᑦ ᐊᖏᖃᑎᒌᒍᑎᖓᓄᑦ?
ᓄᓇᕗᒻᒥᐅᑦ ᐊᑐᐃᓐᓇᕐᓂᐊᖅᐳᑦ ᓄᓇᕗᒻᒥ ᒐᕙᒪᖓᑕ ᐱᓕᕆᐊᑦᓴᖏᓐᓂᒃ ᐱᔨᑦᓯᕋᐅᑎᖏᓐᓂᓪᓗ ᑭᒡᒐᖅᑐᖅᑕᖏᓐᓄᑦ ᓄᓇᕗᒻᒥ ᒐᕙᒪᖓᑕ ᐱᓕᕆᕝᕕᒋᔭᖏᑎᒍᑦ. ᓄᓇᕗᒻᒥ ᒐᕙᒪᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᑳᑦᑐᓛᒃᑎᒥᓂᒃ (ᖃᖓᑕᔫᓕᕆᔨᒃᑯᓐᓂ) ᓇᓗᓇᐃᖅᓯᓂᕐᒧᑦ ᐱᔨᑦᓯᕋᐅᑏᑦ ᑲᔪᓯᑎᑕᐅᓂᖏᓐᓄᑦ.
- ᖃᓄᑎᒋ ᑖᓐᓇ ᑳᓐᑐᕌ ᐊᑭᖃᖅᐸ ᓄᓇᕗᒻᒥ ᒐᕙᒪᒃᑯᖏᓐᓄᑦ?
ᑲᑎᓪᓗᒋᑦ ᐊᑭᖓ ᑖᑦᓱᒪ ᑳᓐᑐᓛᒋᔭᐅᔫᑉ ᓇᓗᓇᐃᖅᓯᓂᐊᖅᐳᖅ ᖃᑦᓯᑐᕐᓂᖓᓄᑦ ᐋᓐᓂᐊᕐᕕᓕᐊᕐᓂᕐᒧᑦ, ᐱᓕᕆᔭᖅᑐᕐᓗᓂ ᐃᓄᓕᕆᔨᒃᑯᓪᓗ ᐊᐅᓪᓚᖃᑦᑕᕐᓂᕐᒧᑦ ᓂᐅᕕᖅᑕᐅᔪᖅ, ᐅᓯᔭᐅᔪᒃᓴᐃᓪᓗ ᐊᐅᓪᓚᖅᑎᑕᐅᓗᓂ ᐊᑐᕈᓐᓇᕐᓂᓕᒫᖓᓂ ᐊᖏᖃᑎᒌᒍᑕᐅᓯᒪᔪᖅ. ᐊᖏᖃᑎᒌᒍᑎ ᓇᓗᓇᐃᔭᐃᓯᒪᔪᖅ ᐊᑭᓪᓗᐊᑕᖏᓐᓂᑦ ᓄᓇᕗᒻᒥ ᒐᕙᒪᒃᑯᖏᑦᑕ ᑳᓐᑐᕌᒃᑯᑦ ᖃᖓᑦᑕᐅᑎᖏᓐᓂᑦ ᐅᓯᔭᐅᔾᔪᑏᓪᓗ ᐊᑭᑦᑐᖅᐸᓪᓕᐊᓂᖏᓐᓄᑦ ᓲᕐᓗ ᐅᖅᓱᐊᓗᒃ, ᐊᑭᑦᑐᖅᐸᓪᓕᐊᓂᖏᑦ ᒪᓕᒐᖏᓪᓗ ᐊᓯᔾᔨᓐᓂᖏᑦ.
- ᖃᓄᖅ ᐊᑦᑐᐃᓂᖃᕐᓂᐊᖅᐸ ᓄᓇᕗᒻᒥ ᒐᕙᒪᒃᑯᑦ ᐊᐅᓪᓚᕐᓂᐊᕐᓗᓂ ᐊᖏᖃᑎᒌᒍᑎᖓ ᐃᓄᓐᓄᑦ ᐊᐅᓪᓚᖃᑦᑕᖅᑐᓄᑦ?
ᐊᖏᕈᑎ ᑐᕌᖓᕗᖅ ᓄᓇᕗᒻᒥ ᒐᕙᒪᒃᑯᑦ−ᑮᓇᐅᔭᖃᖅᑎᑕᖏᓐᓄᑦ ᖃᖓᑦᑕᐅᑎᓄᑦ ᐱᔨᑦᓯᕋᐅᑎᓄᓪᓗ, ᑭᓯᐊᓂ ᐃᑲᔫᑎᖃᑲᐅᑎᒋᙱᑦᑐᖅ ᐊᐅᓪᓚᖅᐸᑦᑐᓄᑦ ᐃᓄᓐᓄᑦ. ᐱᐅᓯᒋᐊᖅᓯᒪᔪᑦ ᐱᔨᑦᓯᕋᐅᑎᓄᑦ ᑕᑎᒋᔭᒃᓴᐅᔪᑦ ᐊᒻᒪᓗ ᐱᓕᕆᔾᔪᓯᓄᑦ ᒪᓕᑦᑕᐅᔭᕆᐊᓖᑦ ᐋᖅᑭᖅᑕᐅᓯᒪᔪᑦ ᐱᔭᐅᒋᐊᓖᑦ ᑳᓐᑐᓛᒃᑯᑦ ᐱᐅᓯᒋᐊᖅᑕᐅᓂᐊᕋᓱᒋᔭᐅᕗᑦ ᐊᑕᖏᕐᓗᒋᑦ ᐊᐅᓚᓂᕆᔭᐅᔪᑦ, ᐃᓚᒋᓪᓗᒍ ᓄᓇᕗᒻᒥ ᒐᕙᒪᒃᑯᓐᓂᙶᙱᑦᑐᑦ ᐊᐅᓪᓚᖅᐸᑦᑐᓄᑦ.
ᐃᓄᓐᓄᑦ ᖃᖓᑦᑕᐅᑏᑦ, ᐃᓚᒋᔭᐅᓪᓗᑎᒃ ᒪᑭᒪᔾᔪᑎᓄᑦ ᐊᑭᓕᕆᐊᓖᑦ, ᐃᓱᒪᖅᓲᑕᐅᖏᓐᓇᖅᐳᑦ ᐅᓯᔨᐅᔪᓄᑦ ᐋᖅᑦᒃᑕᐅᓯᒪᙱᑦᓱᑎᓪᓗ ᓄᓇᕗᒻᒥ ᒐᕙᒪᒃᑯᓐᓄᑦ. ᑭᓯᐊᓂ, ᓄᓇᕗᒻᒥ ᒐᕙᒪᒃᑯᑦ ᐅᔾᔨᕐᓇᖅᑐᒥᒃ ᑮᓇᐅᔭᓕᐅᕋᓱᐊᕈᑎᖏᑦ ᐋᓐᓂᐊᕐᕕᒻᒥ, ᐱᓕᕆᐊᒃᓴᐃᑦ, ᐊᒻᒪᓗ ᐃᓄᓕᕆᔨᒃᑯᓐᓂ ᐱᔨᑦᓯᕋᖅᑕᐅᔪᑦ ᐊᐅᓪᓚᖅᐸᑦᑐᑦ ᐃᑲᔪᓲᖑᕗᑦ ᐃᖏᕐᕋᔾᔪᑕᐅᔪᓐᓇᕐᓗᑎᒃ ᐃᑲᔫᑕᐅᔪᓐᓇᖅᓱᑎᓪᓗ ᐊᑭᓕᖅᑐᒐᕐᓂᕐᓂᖅᓴᐅᓪᓗᑎᒃ ᖃᖓᑕᔫᒃᑯᑦ ᐊᐅᓪᓚᖅᐸᑦᑐᓕᒫᓄᑦ.
ᐊᒻᒪ ᓱᓕ, ᓇᒻᒥᓂᖁᑎᒃᑲᓐᓂᖓ ᑕᐅᖅᓰᖃᑎᒌᓐᓂᕐᒧᑦ ᑮᓇᐅᔾᔭᒃᓵᑎᒍᑦ ᐃᓄᓐᓄᑦ ᐊᖏᖅᓯᒪᕗᑦ ᐊᑭᑦᑐᕆᐊᖅᓯᔾᔮᙱᓐᓂᖏᓐᓂᒃ ᑮᓇᐅᔭᓕᐅᕈᑎᓄᑦ ᐊᑭᓕᒃᑲᓐᓂᕆᐊᓕᓐᓄᑦ 2025−ᒥ, ᐊᑐᐃᓐᓇᐅᑎᑦᓯᓂᕐᒧᑦ ᕿᓚᒻᒥᐅᔪᒃᑯᑦ ᐊᑭᖏᑦ ᓱᕐᕌᓗᐊᙱᓪᓗᑎᒃ ᐃᓄᓐᓄᑦ ᖃᖓᑕᔫᓕᕆᔨᒃᑯᑦ ᕿᒥᕐᕈᑎᓪᓗᒋᑦ ᖃᖓᑦᑕᐅᑏᑦ ᐋᖅᑭᑦᓯᒪᓂᕆᔭᖏᓐᓂᒃ.
- ᖃᓄᖅ ᐊᑦᑐᐃᓂᖃᖅᐸ ᐊᐅᓪᓚᖅᐸᑦᑐᓄᑦ ᐊᖏᖃᑎᒌᒍᑎ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑦᓯᓂᕐᒧᑦ ᐱᔨᑦᓯᕋᐅᑎᓄᑦ?
ᑖᓐᓇ ᐊᐅᓪᓚᕐᓂᐊᕐᓗᓂ ᐊᖏᖃᑎᒌᒍᑎ ᐃᓚᖃᙱᓚᖅ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑦᓯᓂᕐᒧᑦ ᐱᔨᑦᓯᕋᐅᑎᓂᒃ; ᑖᒃᑯᐊ ᐱᔨᑦᓯᕋᐅᑏᑦ ᐊᐅᓚᑕᐅᓲᑦ ᐃᓛᒃᑰᖓᔪᒃᑯᑦ ᑳᓐᑐᕌᖃᖅᑎᑦᓯᓂᒃᑯᑦ.