Iqaluit, Nunavut (Taaqhivalirvia 16, 2025) – Nunavut Kavamanga (GN) quviahuktun tuhaqtitijaangat taima ilauliqtun 10-ukiuni Tingmitikkut An’ngirunmik taapkuning Bradley Air Services Limited () nanminiujut an’ngajuqqaat Himmauhikkut Maniliurutinut Kuapuraisinga (EIC)), piqaqluni naliangnik nutaangguqtiffaariami aadlanik talimanik ukiunik.
Una an’ngirut hivumuuqtuq iluaniittup pidjutihimajuq kivraqtuinikkut Calm Air kunnit Canadian North GN kunnut, ihuarhijuummigutigipluni havaqhugit GN paatnariit EIC kunnun tunihijaami ihariangnirit tingmitikkut kivraqtuutit tamaani avikturviugijaptingni talvuuna Canadian North Calm Air lu.
“Nunavunmi, tingmijaami aularaangginnaktuq inuuhiptingni – apqutigigaptigu. Atapkaqhugit ilavut, tunihijutlu ihariagijaujunik hunanik kivraqtuutiniklu, hakugingniqhaqhugitlu nunallaavut. Ihuangnikkut tingmitiqhat ikajuutaujut avikturviugijaptingnut inungnun maniliurnikkutlu inuuhirinnaktumik, ihuaqtuqlu imaa pijaami adjikkiingniqhatigun piviqhaqarnirmiklu tamainnut Nunavunmiunut”, uqaqtuq Hivuliqti P.J. Akeeagok. “Una an’ngirut pidjutigijaatigut uvaptingnut piliuriami talvainnarmi ikajuutinik Inuinnarnut talvuunatigut havaaqhanut, ilihainirnut, hakugingniqhatigutlu atadjutit qitqani inungni hivulliugutaujunut nanminiqarnirmiklu tunihiniq”.
Taamna an’ngirut takupkaqtittijuq aqhuungniqhatigut nakuuhivalliadjutiqhanut kivraqtuqtaujaami, pipkailunilu hivuniraalurmun maniliurnikkut, imaalu ajurnaittumik tingmitiqarnirmik tamainnut Nunavunmiunut. Tingmijaami aqhuugutaujut inungnut kivraqtuutit Nunavunmi, an’ngirutaa piliurniaqtuq ihuarhaqhimajumik havauhiqhainnut hakugingniqhainnut aadjikkiingniqhatigut tahapkunani inungnut ihariangniit nanminiujutlu aulapkaidjutait.
GN kut piqarniaqtut ihuaqtumik nipimik atauttini tunihinirmiklu kaantrangnikkut tingmitikkut kivraqtuutinik tahapkunanilu aanniaqtukkut, havaatigut, ilagiiktutlu Kivraqtuijit inungmik tingmiviqhait, imaalu ikiniatigut tingmimi uqumaigutait.
Nutaaq angirut piviqhaqaqtittijut GN kut angitqiamik uqaraqhamingnik tautuknaqtuniklu auladjutinun tapkua ikajuutaujut nunallaanun atadjutinun, aaniaqtailinikkut, ilihaqnikkut, maniliungnikkutlu piviqhaqarnirmik. Piliurhunilu alianaktumik ilihainirmik havaaqhatigunlu Inuinnarnut Nunavunmiunut.
Imaalu, GN kut piqaqtut piyakhanik naliangnik hapkunanga EIC kunnit niuviqlutik aadjikiingnikkut piumayamingnik Bradley Air Services Limited (auladjutilutik Canadian North tut), pijakhaqaqqa atuqlugit taamna naliak. Piliuqtuq pittaagungnaqhijuq apqutinga angiklijuummiriami nunavuutim akuniraalukmik havaanga ikayuriami piliuriamilu ukiuqtaqtumi tingmijjutinganik tuniqhaininnganik.
GN kut niriuktun atuqtipkailirnikkut uuminnga angirutimik hapkunanit EIC kut Bradley Air lu taimaatun hivulliutijaujukhanut aulapkainikkut nakuuninginnik, tautungnaqtumik, inuuhirinnaktumiklu nunallaani tamaani Nunavunmi.
Nunavut Kavamanga Tingmidjutikhanut Havaakhat Angirut
- Huuq Nunavut Kavamanga ilauvat haffumunga angirunmun?
Tunigiami pinahuarutinginnit havaanginniklu, Nunavut Kavamanga (GN) ihariagijuq havaangit ajuittiaqtunik nanminiqaqtunut aulapkaijut pittaarninnga tunigiami havaangit nakuujumik ihuaqtumiklu. GN kut tadja aturiagani ukua ikajuutit malruungniq ilikuuqtunit kantraanggit Calm Air kut Canadian North kutlu, kihiani tamangnik kaantraanggit upautiliktut nunggunianut pittaiqhimajut taidjutait.
Ilaunikkut uumunga hivituniqaqtumik angirutimun, GN kut pipkailiqtun aularaanginnaqtuqhamik tuniutinikkut GN kunni pinahuarutinik hulidjutiniklu Nunavunmiunnun.
- Qakugu una angirut atuliqtauniaqqa?
Tamna angirutikhaq aulaniaqtuq Taaqhivalirvia 15, 2025 mi.
- Hunaujuq Tingmidjutikhanut Kivraqtuinikkut An’ngirut(Tingmijaami An’ngirut)?
Tingmijaami An’ngirut kaantraaktitaujuq tahapkunani GN kut Bradley Air Services Limited kutlu (Bradley Air) naunaittumik atuqtaqhaujut maliqqajaqhatlu kivraqtuijut tunihiniaqtut GN kunnut pidjutilluni qulini ukiuni kaantraagutaujumi.
- Hunaujut kivraqtuutit ikajuutaujut ataani kaantraangganni?
Kaantraanga ilaliutigijait kivraqtuinikkut hadjamin tunijaujut tahapkununga GN Canadian North kut Calm Air lu, pittiaqhutik, ilaliutiliklu havaamitigut tingmitiqhainnut, aanniarviliaqtuqhanut tingmitiqhainnut uhiijaqtaujuqhanutlu. Taimainggittutigut hadjamin kaantraanggit, nutaaq an’ngirutaa ilaliutilik kitunut havauhiinnut Ilagiiktunut Kivraqtuijit inungmik tingmitiqhainnut.
- Hunaujuq nutaaq haffumatigut kaantraanga?
Hivullilluanga aadlanggajuq tahapkunani una kaantraak pihimajutlu an’ngirutit imaa una an’ngirut hakugingniqhajait tamaita GN tingmitiqhainnut kivraqtuutit ataani atauhiinarmi kaantraanga tahapkuatlu Bradley Air kaantraagutainnutlu Calm Air. Imaa kangiqhidjutaa GN kut munariniaqtait atauhiq kaantrangmik pidjutiplugit tingmitiqhanut kivraqtuijinik tamainni pinggahuni avikturviujuni, talvalluarmin ilikkut kaantraagutiqhat Kivalliq avikturviannut (Calm Air) Bradley Air lu (Canadian North) Kitikmeoni Qikiqtanilu avikturviit.
- Hunaujuq nutaaq haffumatigut kaantraanga?
Kaantraak ilaqaqtuqlu nutaanik iluaniittut munarinikkut munarinikkullu tingmitini havagutinik naunaittiarutiniklu tingmidjutinik pidjutinik tingmijunun aullaaqtunun GN kut kaantraakkut akiliqtuidjutainni.
- Qanuqtut Aallanguqtiqhimajut Akiliuhiangit Kuapuraisitkut niuvrutainnik Bradley Air Services aktuqtaujut uumani angirutaa?
Himmautinga Akiliuhiangit Kuapuraisinga (EIC) niuviqtangit uuminnga Bradley Air pilaqutijuq ilauqatauninnga tahapkunani GN kut malruuk kaantraktiujut tingmitit (Bradley Air unalu Calm Air) GN kutlu pivikhaqautikhanga ilaugiamingnik avaliittumik niuvvaavikhamik.
- Qanuq Nunavunmiun hulaqiniaqqat GN kunnit hivitujumik Tingminikkut An’ngirutaa?
Nunavummiut aulahimaarniaqtun pijaangat GN kut ilihagutiqhainnut kivraqtuutinutlu ihuaqtumun GN havagviugijainnut. GN kut havangniaqtut kaantraanga (Tingmiti) imaa pijaami taapkua kivraqtuutit tunijaujaangginni.
- Qanuraaluktut una kaantraak qaffitaalamik akiliktuqhat GN kut?
Atauttimut akinga uuma kaantraanga ihumaliugutiginiaqtaat kaffiutigut aanniaqviliaqtuqhanut, havaamitigut ilagiiktunut kivraqtuijit tingmitiqhainnut, tamajaitlu pidjutilluni an’ngirutip. An’ngirutaa naittut akiit GN kaantraaktittijut tingmitiqhanut akiit tamajaniklu qaffiunitigut ihumagiplugit taapkuatut urhuqjuaq, akiqhilaagutit pidjutigijaungginnaktunik aadlanggurniit.
- Hunat hulaqutit GN kut Tingminikkut An’ngirutit piqaqqat tingminirmun inungnun?
An’ngirutimi ihumagilluaqtait GN-maniqhaqtitaujut tingmitiqhanut kivraqtuutinutlu, kihimi aadlaujuniklu ikajuutit tingmijaami inungnut. Ihuarhijuummiktuqhat kivraqtuinikkut ihuarnirinnik havaamilu atuqtaujuqhat pitqujut ataani kaantraakmi niriugijaujut nakuuhivalliajaami tamainni auladjutini, tahapkunanilu GN kuunggittut tingminahuat.
Inungnut tingmitiqhainnut akiit, tahapkuatlu Economy Akiit, aulahimmaangniaqtut ihumagitigijait agjaqtuqtut ihuarhaqhimanggittait GN kut. Kihiani, GN kut an’ngijuamik maniliugutait Aanniaqviliaqtunut, Havaamitigut Tingmijut, Ilagiiktunutlu Kivraqtuijit kimut aullaqtuqhamut ikajuutaujuq aulahimmaariami nakuujumik pidjutijaam aulaviit ikajuutitlu amigaitigut akiliruminaktumik tamainnut tingminahuaqtunut.
Imaalu, Himmauhinga Akiliuhiagutit Kuapuraisinga inungnut tuhaqtitijut aqhuungniaqtut akitturjuaqanggillutik taaffumamut Economy Akiit talvuuna ilakua 2025 mi, tunihilutik naittumik-hadjakaffuk akiitigut aulahimmaagutiqhaa inungnut pidjutillutik tingmitigut ihivriugutit akiinnut havauhiit.
- Hunat hulaqutit Tingminikkut An’ngigutit piqaqqat medevacmik kivgaqtuutinik?
Una Tingmidjutikhanut An’ngirutaa ilaungittuq Medevac Kivraqtuutainnut; hapkua kivgaqtuutit munaqtaujut ilikuuqtukkut kantaanggit.