ᐅᖃᖅᑏ, ᐅᓪᓗᒥ ᓇᖏᖅᓯᔪᖓ ᑐᓴᖅᑎᑦᑎᔪᒪᓪᓗᖓ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ ᐱᓕᕆᐊᕆᓯᒪᔭᖓᓂᒃ, ᐃᒻᒥᒃᑰᖅᑐᑦ ᒪᓕᒐᖅᑎᒍᑦ ᑎᒥᙳᖅᑎᑕᐅᓂᑯᑦ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ ᐊᖅᑯᑎᒋᓪᓗᒍ.
ᓄᑖᙳᕆᐊᖅᓯᒪᔪᒥᑦ ᓯᕗᓕᖅᑎᖃᓕᖅᖢᑎᒃ ᐃᑲᔪᖅᑕᐅᓪᓗᑎᒡᓗ ᐃᓕᖅᑯᓯᓕᕆᔨᒃᑯᓐᓄᑦ, ᑲᑐᔾᔨᖃᑎᒌᑦ ᐅᖃᐅᓯᕐᓂᑦ ᓯᕗᒧᐊᒃᑎᑦᑎᔪᑦ ᑐᑭᓯᓇᑦᑎᐊᕐᓗᑎᒃ, ᐊᖏᖅᓯᒪᓗᑎᒃ, ᐃᑲᔪᖅᑎᒌᒡᓗᑎᒡᓗ.
ᐅᖃᖅᑎᑦᑎᔩ, ᐊᕐᕕᓂᓖᑦ ᑕᐃᒎᓯᕐᓂᒃ ᐃᓕᓐᓂᐊᖅᑎᑦᑎᓂᐊᓚᐅᖅᐳᑦ ᐱᐊᓂᒃᑕᐅᓪᓗᑎᒡᓗ ᑮᓇᐅᔭᓕᕆᓐᓇᖅ ᐊᕐᕌᒍᒥ 2024-2025−ᒥ. ᐃᓕᓐᓂᐊᖅᑎᑦᑎᓂᐊᖅᑐᑦ−ᐱᖓᓱᑦ ᐃᓄᒃᑎᑐᑦ ᐊᒻᒪ ᐱᖓᓱᑦ ᐃᓄᐃᓐᓇᖅᑐᓐ—ᑲᑎᑎᑦᑎᓚᐅᖅᐳᑦ ᐅᖃᐅᓯᓕᕆᔨᒻᒪᕆᖕᓂᒃ ᓇᑭᙶᕈᓘᔭᖅᑐᓂᒃ ᓄᓇᕗᒻᒥ.
ᑕᐃᒪᐃᒻᒪᑦ, 600 ᐅᖓᑖᓂ ᐊᑐᓕᖁᔨᓚᐅᖅᐳᑦ ᓄᑖᓂᒃ ᑕᐃᒍᓯᕐᓂᒃ ᐋᖅᑭᒃᑕᐅᖁᔨᓪᓗᑎᒃ ᐊᖏᖅᑕᐅᓗᑎᒡᓗ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᑦ ᑲᑎᒪᔨᖏᓐᓂᑦ. ᐊᒥᓱᑦ ᑖᒃᑯᐊ
ᐅᖃᐅᓰᑦ ᐊᒃᑐᐊᓂᖃᖅᐳᑦ ᐃᓕᓐᓂᐊᕐᓂᕐᒧᑦ, ᐃᑲᔪᖅᖢᑎᒃ ᐱᕙᓪᓕᐊᑎᑕᐅᔪᓄᑦ ᓄᑖᓄᑦ ᓄᓇᕗᒻᒥ ᓴᓇᔭᐅᓯᒪᔪᓄᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᐃᓕᓐᓂᐊᖅᑎᖁᑎᕗᑦ ᐃᑲᔪᕈᒪᓪᓗᒋᑦ ᐃᓄᒃᑐᑦ ᐃᓕᓐᓂᐊᖅᐸᓪᓕᐊᓗᑎᒃ.
ᐅᖃᖅᑎᑦᑎᔩ, ᐃᓄᒃᑐᑦ ᐆᒻᒪᕆᒃᖢᓂ ᐅᖃᐅᓯᐅᓪᓚᕆᒃᐳᖅ ᐋᖅᑭᒋᐊᖅᐸᓪᓕᐊᓪᓗᓂ 2000-ᒦᓕᖅᑎᓪᓗᑕ. ᓄᑖᓂᒃ ᑕᐃᒎᓯᕐᓂᒃ ᐋᖅᑭᒃᓱᐃᕙᓪᓕᐊᓗᓂ ᐱᒻᒪᕆᐊᓘᕗᖅ ᐃᓄᒃᑐᑦ ᐊᑐᖅᑕᐅᖏᓐᓇᖁᓪᓗᒍ ᐊᕐᕌᒎᓂᐊᖅᑐᓂᑦ.
ᑖᓐᓇ ᐱᓕᕆᐊᖑᔪᖅ ᐊᒃᑐᐊᓂᖃᖅᐳᖅ ᐊᖏᓂᖅᓴᒥᒃ ᐱᔭᒃᓴᕆᔭᐅᔪᒥᒃ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦ ᐃᑲᔪᖅᑐᐃᓪᓗᑎᒃ ᐃᓄᒃᑐᑦ ᓴᖅᑭᔮᖅᑎᒃᑲᓐᓂᕈᒪᓪᓗᒍ. ᐃᓚᐅᑎᑦᑎᓪᓗᑕ ᐱᓕᕆᕝᕕᖕᓂ, ᑐᑦᑕᕐᕕᖕᓂ, ᐃᓄᐃᑦ ᑲᑐᔾᔨᖃᑎᒌᖏᓐᓂ, ᑭᒃᑯᓕᒫᓂᒡᓗ, ᓇᓗᓇᐃᖅᓯᕗᒍᑦ ᐃᓄᒃᑐᑦ ᐅᖃᐅᓯᖅ ᐱᕈᖅᐸᓪᓕᐊᖏᓐᓇᕐᓂᖓᓂ ᐅᖃᐅᓯᖅ ᐃᓕᓐᓂᐊᖅᑕᐅᓪᓗᓂ, ᐊᐅᓚᑕᐅᓗᓂ, ᖃᐅᑕᒫᓪᓗ ᐃᓅᓯᑦᑎᓐᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.