ᐅᖃᖅᑎᑦᑎᔩ,
ᐅᓪᓗᒥ ᓇᖏᖅᓯᔪᖓ ᓇᓗᓇᐃᖅᓯᒍᒪᓪᓗᖓ ᐱᔭᕇᖅᑕᐅᓯᒪᑦᓯᐊᓕᕐᓂᖓᓂᒃ ᓄᓇᕗᒻᒥ ᐃᓐᓇᒻᒪᕆᓐᓄᑦ ᖃᓄᖅᑑᕈᑎ.
ᐃᓐᓇᒻᒪᕆᕗᑦ ᐱᔾᔪᑎᒋᓪᓗᒋᑦ, ᐱᕕᑦᓴᖃᕈᓐᓃᓕᕋᑦᑕ. ᑐᐊᕕᕐᓇᖅᑑᓂᖓ ᒐᕙᒪᒋᔭᑦᑕ ᑐᓴᑦᓯᐊᖅᓯᒪᔭᖏᑦ ᑐᑭᓯᓇᑦᓯᐊᖅᑐᒥᒃ ᐃᓐᓇᒻᒪᕆᒋᔭᑦᑎᓐᓂᒃ. ᖃᓄᐃᓕᒋᐊᕈᑎᖃᕆᐊᖃᓕᖅᑐᒍᑦ ᐃᓅᓯᖏᑦ ᐊᑲᕐᕆᔮᖅᑐᒦᓕᒃᑲᓐᓂᖁᓪᓗᒋᑦ. ᑕᒪᓐᓇ ᑐᐊᕕᕐᓇᖅᑑᓂᖓ ᐃᓱᒪᒋᓪᓗᒍ ᒐᕙᒪᒋᔭᕗᑦ ᐱᓕᕆᐊᖃᕆᐊᓕᓚᐅᖅᑯᑦ ᐋᖅᑭᑦᓱᐃᓂᕐᒧᑦ ᐃᓐᓇᒻᒪᕆᓐᓄᑦ ᖃᓄᖅᑑᕈᑎᒥᒃ ᑲᒪᒍᑕᐅᓂᐊᕐᓗᓂ ᐱᔭᕆᐊᓕᖏᓐᓂᒃ ᐃᓐᓇᒻᒪᕆᕈᖅᐸᓪᓕᐊᔪᑦ ᓄᓇᕗᒻᒥᐅᑦ.
89-ᓂᒃ ᖃᓄᐃᓕᒋᐊᕈᑕᐅᒋᐊᓕᓐᓂᒃ ᓇᓗᓇᐃᖅᑕᐅᔪᖃᖅᓯᒪᔪᖅ ᖃᓄᖅᑑᕈᑎᒥ. ᐊᒻᒪᓗ, ᐅᖃᖅᑎᑦᑎᔩ, ᖁᕕᐊᓱᓪᓚᕆᑦᑐᖓ ᓇᓗᓇᐃᖅᓯᒍᓐᓇᕋᒪ ᕿᓚᒥᐅᔪᒃᑯᑦ ᖃᓄᐃᓕᒋᐊᕈᑎᖃᕐᓂᐊᕋᑦᑕ ᐃᓚᖓᓂᒃ ᐊᑐᓕᖁᔭᐅᓯᒪᔪᒥᒃ: ᐊᑦᑕᓇᖏᑦᑐᒃᑯᑦ ᐃᖏᕐᕋᔪᓕᕆᓂᖅ.
ᑕᒪᑐᒧᖓ, ᐅᖃᖅᑎᑦᑎᔩ, ᐊᑐᐃᓐᓇᕈᖅᑎᑦᓯᓛᖅᑐᒍᑦ ᐃᓐᓇᒻᒪᕆᓐᓄᑦ ᓄᓇᓯᐅᑎᒥᒃ ᓄᓇᓕᓐᓄᑦ ᐊᑐᓕᖅᑎᐸᓪᓕᐊᓗᒍ ᐃᒥᒃᑰᖅᑐᓂ, ᐱᒋᐊᕈᑎᖃᕐᓗᑕ ᑕᓪᓕᒪᓂᒃ. ᓄᓇᓯᐅᑏᑦ ᐃᓐᓇᒻᒪᕆᓐᓄᑦ ᐱᒻᒪᕆᐅᔪᓄᑦ ᐋᓐᓂᐊᕐᕕᓕᐊᕆᐊᖃᖅᑎᓪᓗᒋᑦ ᐅᐸᒍᔾᔭᐅᒍᓐᓇᖁᓪᓗᒋᑦ ᐅᓪᓗᑕᒫᓪᓗ ᑲᒪᒋᒋᐊᓕᖏᓐᓂᒃ ᓲᕐᓗ ᓂᕿᓂᒃ ᓂᐅᕕᕆᐊᕆᐊᖃᖅᑎᓪᓗᒋᑦ. ᓯᕗᓪᓕᖅᐹᑦ ᓄᓇᓯᐅᑏᑦ ᓄᓇᓕᓐᓄᑦ ᑎᑭᑎᑕᐅᓛᖅᑐᑦ ᐅᒥᐊᕐᔪᐊᖃᕐᓇᖅᓯᑉᐸᑦ.
ᐅᖃᖅᑎᑦᑎᔩ, ᖃᓄᖅᑑᕈᑎ ᐱᔾᔪᑎᓕᒃ ᐃᑲᔪᕈᑕᐅᒐᓱᐊᖅᑐᓂ ᑲᒪᒋᒋᐊᓕᑦᑎᓐᓂᒃ ᐱᓗᐊᖑᐊᖅᑐᒥᒃ ᑲᑐᔾᔨᓗᑕ ᑐᕌᒐᑦᑎᓐᓂ − ᐃᓐᓇᕈᖅᐸᓪᓕᐊᓂᖅ ᐅᐱᓐᓇᖅᑑᓗᓂ. ᐊᖏᖅᓯᒪᓚᐅᕋᒪ ᓄᐊᑦᓯᒍᒪᓂᕐᒧᑦ ᐅᖃᐅᓯᑦᓴᖏᓐᓂᒃ ᐃᓐᓇᒻᒪᕇᓪᓗ ᓄᓇᕗᓕᒫᒥ. ᐊᑯᓐᓂᖓᓂ ᕕᕝᕗᐊᓕ ᐊᒻᒪᓗ ᒪᐃ 2023, ᒪᕐᕉᓐᓂᒃ ᐃᓐᓈᓐᓂᒃ ᐊᑐᓂᑦ ᓄᓇᓕᓐᓂᒃ ᐃᓇᑕᐅᔪᖃᖃᑕᐅᓚᐅᖅᑐᖅ ᐊᕕᑦᑐᖅᓯᒪᓂᐅᔪᓂ ᑲᑎᒪᑎᑕᐅᔪᓄᑦ ᑲᙱᖅᖠᓂᕐᒥ, ᐃᖃᓗᑦᑑᑎᐊᕐᒥ, ᒥᑦᑎᒪᑕᓕᒻᒥ, ᐃᖃᓗᓐᓂ, ᐊᑐᕙᒥᓗ.
ᖁᔭᓕᑦᓯᐊᖅᑐᖓ ᐱᕕᖃᕈᓐᓇᓚᐅᕐᖓᑕ, ᐅᖃᐅᓯᑦᓴᖃᖅᑐᑎᒃ ᐊᑐᓕᖁᔨᔾᔪᑎᑦᓴᖃᖅᑐᑎᓪᓗ 73 ᐃᓐᓇᒻᒪᕇᑦ. ᑖᓐᓇ ᖃᓄᖅᑑᕈᑎ ᓴᖅᑭᖅᑕᐅᒍᓐᓇᕋᔭᓚᐅᖏᑦᑐᖅ ᐃᑲᔪᕐᓂᖏᑉᐸᑕ. ᖁᔭᓕᕕᒋᒍᒪᔮᒃᑲ ᒪᓕᒐᓕᐅᖅᑏᒃ ᒥᐊᓕ ᕿᓕᖅᑎ ᐊᒻᒪᓗ ᔪᐊᓇ ᖁᐊᓴ ᐃᓱᒪᒋᓯᒪᔭᖏᓐᓂᒃ ᑎᓕᓯᔾᔪᑎᒋᓯᒪᔭᖏᓐᓂᓪᓗ, ᐋᖅᑭᑦᓱᐃᒍᑕᐅᓚᐅᖅᑐᑦ ᑕᒪᑐᒥᖓ ᐱᓕᕆᐊᖑᓯᒪᔪᒥᒃ. ᖄᒃᑲᓐᓂᖓᒍᑦ ᐃᓚᓯᒋᐊᖃᑕᐅᓚᐅᕐᖓᑎᒃ ᐊᑑᑎᖃᑦᓯᐊᖅᑐᓂᒃ. ᐊᑑᑎᖃᑦᓯᐊᖅᑐᒥᒃ ᑲᑎᒪᓂᖃᓚᐅᕋᑦᑕ ᓯᕗᕐᖓᒍᑦ ᒪᓕᒐᓕᐅᖅᑎᐅᓪᓗᑕ ᑲᑎᒪᓂᑦᑕ.
ᐃᓘᓐᓇᑎᒐᓚᒃ ᓄᓇᕗᑦ ᒐᕙᒪᒃᑯᖏᓐᓂ ᐱᓕᕆᕕᖏᑦ ᑎᒥᖁᑎᖏᓪᓗ ᐊᑐᓕᖅᑎᑦᓯᒋᐊᖃᕐᓂᕐᒧᑦ ᖃᓄᐃᓕᒋᐊᕈᑎᖃᕆᐊᖃᖅᑐᑎᒃ ᑐᕌᒐᖃᕐᓗᑎᒃ ᐱᔨᑦᓯᕋᕐᓂᕐᒧᑦ ᐃᓐᓇᒻᒪᕆᓐᓄᑦ.
ᐊᑦᓱᕉᑎᖃᕐᓂᐊᖅᑐᒍᑦ ᓇᓗᓇᐃᖅᓯᓯᒪᒐᓱᐊᕐᓂᕐᒧᑦ ᖃᓄᖅᑑᕈᑎ ᑐᙵᕕᖃᑦᓯᐊᖁᓪᓗᒍ ᐊᑕᖏᖅᑐᓄᑦ ᓄᓇᓕᓐᓃᖔᖅᑐᓂᒃ ᐃᓱᒪᒋᔭᐅᔪᑎᒍᑦ, ᖄᒃᑲᓐᓂᖓᒍᑦ ᑐᙵᕕᖃᕐᓗᓂ ᐃᓐᓇᒻᒪᕇᑦ ᐃᓅᓯᓪᓚᑦᑖᖏᓐᓂ ᐊᑐᖅᓯᒪᔭᖏᓐᓂᒃ, ᐱᔭᕆᐊᓕᖏᓐᓂᒃ, ᐱᒍᒪᓂᕆᔭᖏᓐᓂᓪᓗ. ᓇᓗᙱᑦᑐᒍᑦ ᓴᖅᑭᖅᑕᐅᔪᑦ ᐊᑑᑎᖃᕐᓂᖏᓐᓂᒃ ᓇᓗᓇᐃᕈᑕᐅᓛᕐᖓᑕ.
ᓴᖅᑭᖅᑎᓐᓂᐊᖅᑕᕋ ᑐᓴᓚᐅᖅᑕᕗᑦ ᐅᓂᒃᑳᓕᐊᖅ ᐊᒻᒪᓗ ᓄᓇᕗᒻᒥ ᐃᓐᓇᒻᒪᕆᓐᓄᑦ ᖃᓄᖅᑑᕈᑎ ᐅᓪᓗᒥ.
ᖁᔭᓐᓇᒦᒃ, ᐅᖃᖅᑎᑦᑎᔩ.