Uqaqtittiiji,
Nangiqtunga ublumi uqariami nakuujumik iniktirutijunut Nunavut Inirniqhaat Inirniqhatlu Ihumaliutqiqtaujuqhamik.
Pidjutigaanggat Inirniqhaaptingnut, ikaangniit naittutun itpaktuq. Ihumagijauvaktuq qilamiungnaktutun itpaktuq kavamavut tuhaavaktut nipiqquqtujumik naunaittiaqtumiklu Inirniqhaanit. Hadja havaktuqhaujuguq nakuuhijaami inuuhinggit. Qilamiugutautigiplugu ihumami kavamavut havaliqtait Ihumaliutqiqtaujuqhamik Inirniqhaaptingnut Inirniitlu uqautaujunik ihariangniit utuqqangguliqtuni Nunavunmiut.
Piqaqtuguq 89 nik hulidjutiqhanut naunaiqhimajut talvani ihumaliutqiqtaujuqhami. Imaalu, Uqaqtittiiji, quviahukpiaqtun’nga uqariami uvagut qilaminnuaq huliniaqhimajuguq atauhirmun tahapkunani ihumagijaujuni: qajarnaittumik agjaqtaudjutiqhatigun.
Nungunianun, Uqaqtittiiji, tuniniaqtugut Inirniqhaat’ agjaqtautiqhanik nunallaanut pidjutilutik, aulaqtigilutik talimanik. Agjaqtuutit pipkainiaqtait Inirniqhaat talvunggaudjutigilugit upautijaamingnik pijaamingnik ubluq tamaat pijaqhainnut taapkuatut niuviriamingnik niqiqhanik. Hivuliqpaaq agjaqtuutiqhaq nunallaanunggarniaqtut umiakkut ukiugani.
Uqaqtittiiji, Ihumaliutqiqtaujuqhaq pidjutilluaqhimajuq ikajuriami tikiutijaami atauhiq an’nginiqaqtuq Katujjiluta hivuniqhaaptingni – inirniqhaangguqpallianikkut pittiaqhuni. Uqariiqtun’nga katitiqlugit uqaqtainnik Inirniqhaanit tamaani nunaptingni. Qitqani Iidjirurvia Qiqaijaluarvialu 2023, malruuk Inirniqhaat tamainni nunallaani ilauqujaujut avikturviinni katimadjutainni Kangiqlinirmi, Iqaluktuuttiaq, Mittimatalingmi, Iqaluit Ottawamilu.
Qujajunga ilauqataungmata, kiudjutait ihumaliuqtaitlu tunijauhimajut hapkunanit 73 Inirniqhaat. Una ihumaliutqiqtaujuqhaq pilimaittuugaluaq ilaunggitpata. Qujajun’ngalu Maligaliuqtiit Mary Kiliktee Joanna Quassalu ihumagijainnik, pitquidjutaitlu havauhiqhaliuqhugu una havauhiqhaq.
Tamavjait havagviit aviktuqhimajumilu kuapuraisiit havaaqarniaqtut atuliqtittinirmun hapkua hulidjutiqhat, hivuniqhaqaqlutik kivraqtuinirmun Inirniqhaaptingnut.
Aqhuuqpaktuguq imaa pijaami una ihumaliutqiqtaujuqhamun tun’ngaviqariami tahapkunani nunallaani ihumagijainnik, imaalu pidjutijaulutik Inirniqhaat’ atuqpiaqpaktainnik, ihariangniit, niriugijainniklu. Naammigiqpiaqtatka iniktigutit naunaijautigijauniaqtut.
Uqarniaqtatka taaffuminga Humik Tuhaajuguq unniudjutimik Nunavutimlu Inirniqhaat An’gahuqhiitlu Ihumaliutqiqtaudjutaa ublumi.
Quana, Uqaqtittiiji.