ᐅᖃᖅᑎᑦᑎᔩ,
ᑲᒪᓇᖅᑐᐊᓘᒌᓐᓇᐅᔭᖅᐸᕋ ᑲᔾᔮᕐᓇᕐᓂᖓᓄᑦ ᓄᓇᕗᑦ ᐱᖓᓐᓇᖅᐸᓯᐊ. ᖃᖓᑦᑎᐊᖅ ᐳᓛᕆᐊᕐᓂᕆᓚᐅᖅᑕᕋ ᕿᑎᕐᒥᐅᑦ ᓄᓇᓕᖓᓐᓄᑦ ᐅᖅᓱᖅᑑᕐᒧᐊᓚᐅᖅᑕᕋ ᐊᔾᔨᐅᙱᑦᑑᓚᐅᙱᑦᑐᖅ.
ᑐᙵᓱᒃᑎᑦᑎᑎᓪᓗᑎᑦᑦ ᐅᖃᖅᑎᑦᑎᔩ, ᐅᖅᓱᖅᑑᓕᐊᓚᐅᕋᒪ ᐋᒡᒌᓯ 1−ᒥ ᐊᒻᒪ 2-ᒥ. ᖁᔭᓐᓇᒦᕈᒪᕙᒋᑦ ᓄᓕᐊᓪᓗ ᐋᓂ ᑐᙵᓇᑦᑎᐊᓚᐅᕋᔅᓯᒃ.
ᐅᖅᓱᖅᑑᒥ ᑐᙵᓱᒃᑎᑕᐅᓚᐅᖅᐳᒍᑦ ᒪᐃᔭ ᒦᒐᓐ ᐳᐊᑕᒧᑦ. ᐅᖅᑰᔪᒻᒪᕆᐅᓚᐅᖅᐳᖅ ᓯᕿᓐᓂᑦᑎᐊᖅᖢᓂᓗ, ᐊᒻᒪ ᐅᐱᒍᓱᓚᐅᖅᐳᖓ ᓂᕆᑎᑦᑎᔪᓐᓇᓚᐅᕋᒪ ᐅᖅᓱᖅᑑᕐᒥᐅᓂᒃ ᓂᕆᕕᔾᔪᐊᕆᐊᖅᑐᓚᐅᖅᑐᓂᒃ.
ᐅᖃᖅᑎᑦᑎᔩ, ᐊᐅᓚᑦᑎᓂᔅᓯᓐᓄᑦ ᐅᐸᒍᑎᓚᐅᕋᒪ ᕼᐋᒻᒪᓚᒃᑯᑦ ᑲᑎᒪᔨᖏᓐᓄᑦ ᓈᓚᒋᐊᖅᑐᖅᖢᖓ ᑭᐅᔭᖅᑐᖅᖢᖓᓗ ᐊᐱᖅᑯᑕᐅᔪᒥᒃ. ᐃᒃᓯᕚᖃᑎᒋᓚᐅᖅᐸᒃᑲ ᕿᑭᖅᑕᖅ ᐃᒡᓗᓕᕆᔨᒃᑯᑦ ᓇᖏᖃᑎᒋᓪᓗᒋᑦ ᓄᓇᖃᕐᕕᐅᔪᓂᑦ ᓄᓇᕗᑦ 3000-ᓂᑦ ᐃᒡᓗᓕᐅᖅᐸᓪᓕᐊᓕᖅᑎᓪᓗᒋᑦ ᐊᐅᔭᐅᓚᐅᖅᑐᖅ. ᐳᓛᕆᐊᓚᐅᕋᒃᑯ ᐆᒻᒪᕆᒃᑐᖅ ᐋᓐᓂᐊᕕᒃ ᐊᐅᓚᑕᐅᓪᓗᓂ ᐱᓕᕆᒃᑲᒻᒪᕆᖕᓄᑦ ᐃᖅᑲᓇᐃᔭᖅᑎᓄᑦ. ᑲᒪᒋᔭᐅᖏᓐᓇᕆᐊᖃᖅᑐᒃᑯᕕᖕᒥ, ᐃᓐᓇᕐᓂᒃ ᐅᖃᖃᑎᖃᓚᐅᖅᐳᖓ ᓄᓇᓕᖕᓂᙶᖅᑐᓂᒃ ᖃᐅᔨᓚᐅᖅᐳᖓᓗ 10-ᓂᒃ ᐃᒡᓕᓕᒃ ᐅᐸᒃᑕᕐᕕᒃ ᓄᓇᓕᖕᓂ ᐃᖅᑲᓇᐃᔭᕐᕕᓪᓗᐊᑕᐅᓂᖓᓂᒃ.
ᐱᒻᒪᕆᐅᓂᖅᓴᒃᑯᑦ, ᐳᓛᕆᐊᓚᐅᕋᒪ ᓄᓇᓕᖕᓂ ᑐᖁᖓᔪᒃᑯᕕᖕᒧᑦ, ᐃᒡᓗᑐᖃᐅᔪᖅ ᐅᖅᑰᓇᕐᓂᖃᕋᓂ. ᑖᓐᓇ ᐆᒃᑑᑎᐅᔪᖅ ᖃᓄᖅ ᐊᑯᓂᐅᑎᒋᔪᖅ ᓄᓇᕗᒻᒥ ᓄᓇᓖᑦ ᐊᐅᓚᔪᓐᓇᐅᑎᖏᓐᓄᑦ ᐊᑭᓕᒃᓴᐃᑦ ᑎᑭᐅᑎᔪᓐᓇᕐᒪᖔᑕ, ᐊᒃᑐᐃᔾᔪᑕᐅᔪᓐᓇᕋᓗᐊᕐᓗᓂ ᐃᓅᔪᓐᓃᖅᑐᒧᑦ ᑲᒪᒋᔭᐅᓂᖓᓄᑦ.
ᐃᓕᓴᕆᓂᐊᖅᐸᕋ ᐅᖃᖅᑎᑦᑎᔩ, ᓂᐅᕐᕈᓯᒪᓚᐅᕋᒪ ᓄᓇᓕᖕᒥᐅᑦ ᕿᒃᓵᖕᓇᖅᑐᒃᑰᓵᖅᑎᓪᓗᒋᑦ ᐃᓅᔪᓐᓃᖅᑐᖃᓚᐅᖅᑎᓪᓗᒍ ᓄᓇᖅᑲᑎᒋᓚᐅᖅᑕᖏᓐᓂᑦ. ᓄᒫᓇᕋᓗᐊᖅᑎᓪᓗᒍ, ᐅᖅᓱᖅᑑᕐᒥᐅᑦ ᑐᙵᓇᑦᑎᐊᓚᐅᖅᐳᑦ ᐊᒻᒪ ᓴᐱᓕᓚᐅᙱᖦᖢᑎᒡᓗ. ᐃᓄᐃᑦ ᐃᓕᖅᑯᓯᖓ ᐆᒪᖕᒪᑦ ᐊᒻᒪᓗ ᖃᓄᐃᙱᑎᐊᖅᖢᑎᒃ ᑕᕝᕙᓂ ᓄᓇᖅᑲᑎᒌᑦ. ᖁᔭᓐᓇᒦᒃ ᑕᐃᓃᑦ ᐊᔮᔮᖅᑏᑦ ᕿᓚᐅᔾᔭᖅᑎᓕᒫᓪᓗ, ᒪᒃᑯᒃᑐᓂᑦ ᐃᓐᓇᕐᓄᑦ, ᑕᒪᑐᒥᖓ ᐊᑐᓚᐅᖅᑐᑦ ᐱᖅᑯᓯᑐᖃᒃᑯᑦ.
ᑕᐃᒪᓐᓇ ᐅᖃᐃᓐᓇᖃᑦᑕᕋᑦᑕ, ᑭᓯᐊᓂ ᖃᐅᔨᐊᓪᓚᓚᐅᖅᑎᓪᓗᑎᒍᑦ ᑐᙵᓇᑦᑎᐊᕐᓂᖏᑦ ᑲᔾᔮᕐᓇᖅᑐᐊᓘᓂᖓᓗ ᐅᖅᓱᖅᑑᖅ, ᐅᖃᕕᒃᖢᖓ ᐅᖃᖅᑐᖓ:
ᖁᔭᓐᓇᒦᒃ, ᐅᖃᖅᑎᑦᑎᔩ.