ᐅᖃᖅᑎᑦᑎᔩ,
ᐅᓪᓗᒥ ᓇᖏᖅᓯᕗᖓ ᐅᖃᐅᓯᖃᕈᒪᓪᓗᖓ ᒫᓐᓇ ᐅᐱᒍᓱᖕᓂᕋᖅᑐᖓ ᓇᖕᒥᓂᖃᓕᕋᒪ Toronto Maple Leaf-ᑯᑦ ᐅᕕᓂᕈᖓᓐᓂᒃ ᑐᓐᓂᖅᑯᑕᐅᓚᐅᖅᑐᖅ ᐅᕙᓐᓄᑦ ᓯᕗᓕᖅᑎᒧᑦ ᐋᓐᑎᐅᕆᐅᒧᑦ ᑕᒡ ᕗᐊᑦ−ᒧᑦ.
ᐅᖃᐅᓯᖃᔾᔮᙱᒃᑲᓗᐊᖅᑎᓪᓗᖓ ᐱᙳᐊᕐᓂᕆᔭᓐᓂᒃ ᐅᓪᓗᒥ, ᐅᖃᖅᑎᑦᑎᔩ, ᐅᖃᕈᓐᓇᖅᑐᖓ ᖁᕕᐊᓱᑦᑎᐊᖅᑐᖓ ᐳᓛᖅᓯᒪᑎᓪᓗᖓ ᑐᕌᓐᑐᒧᑦ ᐋᒡᒋᓯ 3-ᒥ, ᓯᕗᓕᖅᑎ ᕗᐊᑦ ᐅᕙᖓᓗ ᐊᑎᓕᐅᓚᐅᕋᓐᓄᒃ ᐊᖏᖃᑎᒌᒍᒻᒥᒃ ᑖᒃᑯᓇᙵᑦ ᑭᒡᒐᖅᑐᐃᕝᕕᒋᔭᑦᑎᓐᓄᑦ.
ᐅᖃᖅᑎᑦᑎᔩ, ᑕᕝᕘᓇ ᐊᖏᕈᑎᒃᑯᑦ, ᓄᓇᕗᑦ ᐊᒻᒪ ᐋᓐᑎᐅᕆᐅ ᓄᑖᒥᒃ ᑐᙵᕕᖃᓕᖅᐳᑦ ᕿᓂᕐᓗᑎᒃ ᓲᕐᓗ ᐋᓐᓂᐊᖅᑐᓕᕆᓂᕐᒥᒃ, ᐃᖏᕐᕋᔪᓕᕆᓂᕐᒥᒃ, ᓄᓇᓖᑦ ᐊᐅᓚᔪᓐᓇᐅᑎᖏᓐᓂᒃ, ᐱᓕᒻᒪᒃᓴᕐᓂᕐᒥᒃ, ᐊᒻᒪ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᖕᓂᖏᓐᓂᒃ.
ᓄᓇᕗᑦ ᐊᒻᒪ ᐋᓐᑎᐅᕆᐅ ᐊᑯᓂᐊᓗᒃ ᖃᓄᐃᓕᐅᖃᑦᑕᖅᓯᒪᓂᑰᕗᑦ ᐱᓕᕆᖃᑎᒋᔭᐅᓪᓗᑎᒃ, ᖁᔭᒋᔪᒪᕙᕋᓗ ᓯᕗᓕᖅᑎ ᕗᐊᑦ ᐃᑲᔪᖅᑐᐃᑦᑎᐊᓚᐅᕐᓂᖓᓄᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂ.
ᑕᒪᐃᓐᓄᑦ ᐃᑲᔫᑎᖃᖅᑐᒃᑯᑦ ᐱᓕᕆᖃᑎᒌᖕᓂᒃᑯᑦ, ᓄᓇᕗᑦ ᐱᑎᑦᑎᓲᖅ ᒪᑭᒪᐅᑎᒃᓴᓄᑦ ᐱᕕᒃᓴᓂᑦ ᐋᓐᑎᐅᕆᐅᒧᑦ ᑕᐅᖅᓰᓗᑎᒃ ᐱᖁᑎᓂᒃ ᑭᒃᑯᑐᐃᓐᓇᕐᓄᓪᓗ ᐱᔨᑦᑎᕋᐅᑎᓂᒃ ᐊᑐᐃᓐᓇᐅᙱᑦᑐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐊᒥᓱᓄᓪᓗ ᓄᓇᕗᒥᐅᓄᑦ, ᐋᓐᑎᐅᕆᐅ ᐊᐅᓪᓚᕐᕕᐅᓪᓗᐊᑕᖃᑦᑕᖅᑎᓪᓗᒍ. ᐃᓕᓐᓂᐊᒡᔪᐊᒨᖓᒐᓗᐊᖅᐸᑦ, ᐊᔾᔨᐅᙱᑦᑐᒥᒃ ᐋᓐᓂᐊᖅᑐᓕᕆᓂᕐᒥᒃ, ᐅᕝᕙᓘᓐᓃᑦ ᓂᐅᕕᕐᓂᕐᒥᒃ ᐊᒻᒪᓗ ᐳᓚᕋᖅᑐᓕᕆᓂᕐᒥᒃ, ᑕᐅᓴᖏᓐᓃᑦᑐᑦ ᓄᓇᕗᒥᐅᑦ ᐅᐸᖃᑦᑕᖅᑐᑦ ᓯᓚᖅᑲᑎᖏᓐᓄᑦ ᐊᕕᒃᑐᖅᓯᒪᔪᓄᑦ ᐊᕐᕌᒍᑕᒫᑦ.
ᐃᓚᒋᔭᐅᓪᓗᓂ ᐊᖏᖃᑎᒌᒍᑎᒧᑦ ᐱᓕᕆᖃᑎᒌᖕᓂᐊᖅᑐᑦ ᐊᑐᓕᖅᑎᑦᑎᓂᕐᒧᓪᓗ ᑲᑎᒪᔨᕋᓛᑦ ᓴᖅᑭᑕᐅᓗᑎᒃ ᓯᕗᒻᒧᐊᒃᑎᑦᑎᓗᑎᒃ ᑲᑐᔾᔨᖃᑎᒌᒡᓗᑎᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ. ᐅᖃᖅᑎᑦᑎᔩ, ᑲᑐᔾᔨᖃᑎᒌᖕᓂᖅ ᓯᕗᓪᓕᐅᔾᔭᐅᓯᒪᓪᓚᕆᒃᑐᖅ ᑲᑐᔾᔨᓗᑕ ᐱᓕᕆᐊᒃᓴᑎᓐᓄᑦ ᐅᒃᐱᕈᓱᓪᓚᕆᒃᖢᑕᓗ ᐋᓐᑎᐅᕆᐅ ᐃᓚᒋᔭᐅᓚᕆᒍᓐᓇᕐᓂᖓᓂᑦ ᑲᓇᑕᒥ-ᐱᕈᖅᓴᐃᓂᕐᒧᑦ ᐱᓇᓱᐊᕐᓂᕐᒥᑦ ᐅᑭᐅᖅᑕᖅᑐᒥᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.