ᐅᖃᖅᑎᑦᑎᔩ, ᓱᕈᓰᑦ ᓯᕗᓂᑦᓴᕆᔭᕗᑦ ᓄᓇᕗᒻᒥ. ᓯᕗᓕᖅᑎᐅᓪᓗᖓ, ᐊᑖᑕᒋᔭᐅᓪᓗᖓ, ᖁᓅᒻᒥᖅᓯᒪᒻᒪᕆᑦᑐᖓ ᐃᑉᐸᑦᓴᖅ ᑲᓇᑕᒥ ᑕᒻᒪᖅᓯᒪᔪᖅᓯᐅᖅᑎ ᑭᐅᕋᓐ ᕼᐅᒐᓐ ᐅᓂᒃᑳᓕᐊᒥᓂᖓ ᐱᔾᔪᑎᒋᓪᓗᒍ ᓇᓗᓇᐃᖅᓯᒍᑕᐅᓚᐅᖅᑐᖅ ᐊᐅᓚᑕᐅᖃᑦᑕᕐᓂᖏᓐᓂᒃ ᓱᕈᓯᕐᓄᑦ ᐃᓚᒌᓄᓪᓗ ᐱᔨᑦᓯᕋᐅᑎᐅᔪᑦ ᓄᓇᕗᒻᒥ ᑐᐊᕕᕐᓇᖅᑐᒃᑯᑦ ᐃᓱᒫᓗᓐᓇᖅᑐᒦᒍᑕᐅᓕᕐᓂᖓᓂᒃ.
ᐅᖃᖅᑎᑦᑎᔩ, ᓱᕈᓰᑦ ᐱᔾᔪᑕᐅᒻᒪᑕ, ᑭᐅᔾᔪᑎᕗᑦ ᕿᓚᒥᒃᑰᕆᐊᖃᓪᓚᕆᑦᑐᖅ. ᐊᑕᖏᖅᑐᒥᒃ ᐃᑲᔪᖅᓱᖅᑕᐅᓗᓂ ᒥᓂᔅᑕᐅᖃᑎᒌᓄᑦ, ᒐᕙᒪᒋᔭᕗᑦ ᐊᑐᐃᓐᓇᕈᖅᑎᑦᓯᓂᐊᖅᑐᑦ ᐱᓕᕆᔾᔪᑎᑦᓴᓂᒃ ᐃᓄᓕᕆᔨᒃᑯᑦ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ, ᐃᖅᑲᓇᐃᔭᖅᑐᓕᕆᔨᒃᑯᓪᓗ ᑲᒪᒋᔭᖃᕈᓐᓇᖁᓪᓗᒋᑦ ᑮᓇᐅᔭᖅᑎᒍᑦ ᐊᒥᓱᕐᖑᕆᐊᖅᑕᐅᓗᑎᓪᓗ ᐃᖅᑲᓇᐃᔭᖅᑎᖃᕐᓂᖏᑦ. ᒐᕙᒪᓕᕆᔨᒃᑯᑦ ᐋᖅᑭᑦᓯᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᓐᓂ ᑕᒻᒪᖅᓯᒪᔪᖅᓯᐅᕈᑎᓂᒃ ᐃᑲᔪᖅᓱᐃᓂᕐᒧᓪᓗ ᐊᐅᓚᑦᓯᒍᑎᓂᒃ ᐋᖅᑭᑦᓱᐃᓗᑎᓪᓗ ᐊᐅᓚᑦᓯᓂᐅᔪᓂᒃ ᓵᑕᑦᓴᐅᒍᑎᖃᖃᑦᑕᓂᕐᒧᑦ ᐸᕐᓇᐅᑎᓂᒃ. ᒐᕙᒪᒃᑯᓐᓂ ᐊᑕᖏᖅᑐᒥᒃ ᐱᓕᕆᔾᔪᓯᖃᕐᓗᑎᒃ, ᒐᕙᒪᓕᕆᔨᒃᑯᑦ ᖃᐅᔨᓴᖅᐸᓪᓕᐊᖏᓐᓇᕐᓂᐊᖅᑐᑦ ᐱᓕᕆᕕᐅᔪᓂ ᐱᔨᑦᓯᕋᐅᑎᖏᓐᓂᒃ ᐱᔾᔪᑎᒋᓪᓗᒋ ᖃᓄᐃᑦᑕᐃᓕᑎᑕᐅᒋᐊᖃᕐᓂᖏᑦ ᓱᕈᓰᑦ, ᒪᒃᑯᑦᑐᐃᑦ, ᐃᓚᒌᓪᓗ.
ᐅᖃᖅᑎᑦᑎᔩ, ᑕᒪᓐᓇ ᓯᕗᓪᓕᖅᐹᖑᙱᑦᑐᖅ ᑕᒻᒪᖅᓯᒪᔪᖅᓯᐅᖅᑎ ᑎᓕᓯᒋᐊᖅᓯᒪᓂᖓ ᓄᓇᕗᑦ ᒐᕙᒪᒃᑯᖏᓐᓂᒃ ᓴᐳᒻᒥᔭᐅᑦᓯᐊᒃᑲᓐᓂᕐᓂᖅᓴᐅᖁᓪᓗᒋᑦ ᓱᕈᓰᑦ ᐃᑉᐱᒋᔭᖏᑦ. ᐊᖏᖅᑕᒃᑲ ᖃᐅᔨᔭᒥᓂᖏᑦ ᐅᓂᒃᑳᓕᐊᒥ ᖁᔭᓐᓇᒦᖅᑐᒍᓗ ᑕᒻᒪᖅᓯᒪᔪᖅᓯᐅᖅᑎ ᑭᐅᕋᓐ ᕼᐅᒐᓐ ᐅᖃᐅᔾᔨᒋᐊᖅᑎᑦᓯᓯᒪᓂᖓᓄᑦ ᐅᓗᕆᐊᓇᖅᑐᒦᒍᓐᓇᓂᖅᐹᓂᒃ ᓄᓇᕗᒻᒥᐅᓂᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.