ᐅᖃᖅᑎᑦᑎᔩ, ᓇᖏᖅᓯᕗᖓ ᐅᓪᓗᒥ ᐅᖃᐅᓯᖃᕈᒪᓪᓗᖓ ᐃᓚᐅᓂᕆᓚᐅᕐᑕᓐᓂᖅ ᐅᑭᐅᖅᑕᖅᑐᒥ ᓇᐅᑦᑎᖅᓱᖅᑎᑦ ᐊᒻᒪ ᒐᕙᒪᒃᑯᑦ ᓄᓇᖁᑎᖓᓄᑦ ᑲᑎᒪᓂᐅᓚᐅᖅᑐᒥ ᐃᖃᓗᖕᓂ ᐅᑐᐱᕆ 3, 2022−ᖑᑎᓪᓗᒍ.
ᐅᖃᖅᑎᑦᑎᔩ, ᓄᓇᕗᒻᒧᑦ ᐃᑦᑐᖅ ᒪᓕᒐᓕᐅᕐᕕᖕᔪᐊᕐᒥ ᑕᓂᔅ ᐹᑐᓴᓐ ᑲᑎᒪᑎᑦᑎᓚᐅᕐᒪᑦ ᐆᒥᖓ ᐅᓪᓗᕐᒧᑦ−ᐊᑕᐅᓯᖕᒧᑦ ᐊᑐᕐᑕᐅᓚᐅᕐᑐᖅ ᐱᓕᕆᖃᑎᖃᕐᖢᑎᒃ ᓄᓇᓕᖕᓂᑦ ᐊᕕᒃᑐᕐᓯᒪᔪᓂᓪᓗ ᑲᑐᔾᔨᖃᑎᒌᓂᑦ ᐃᓚᐅᓪᓗᑎᒃ ᓄᓇᕗᒻᒥᑦ ᐃᓄᐃᑦ ᐱᕙᓪᓕᐊᔪᓕᕆᓂᖕᒧᑦ ᑯᐊᐳᕇᓴᖏᑦᑕ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᓯ ᑯᐊᐳᕇᓴᓐ.
ᐅᖃᖅᑎᑦᑎᔩ, ᑕᒡᕙᓂ ᐅᖃᐅᓯᖃᓚᐅᕐᐳᒍᑦ ᐅᑭᐅᖅᑕᑑᑉ ᓄᓇᖁᑎᐊᓂ ᖃᓄᕐᓗ ᓴᙱᒃᑎᑉᐹᓪᓕᕈᓐᓇᕐᒪᖔᖓᓐᓂᑦ ᐃᑲᔪᖅᑐᐃᓗᑎᒃᓗ ᖃᓄᐃᙱᑦᑎᐊᕐᑐᓂ ᒪᑭᒪᔪᓐᓇᕐᑐᓂᑦ ᓄᓇᓕᖕᓂᑦ ᐅᑭᐅᖅᑕᖅᑐᒥᑦ.
ᐅᖃᖅᑎᑦᑎᔩ, ᑕᒡᕙᓂ ᐱᕕᖃᕐᓇᓚᐅᕐᐳᖅ ᐅᖃᐅᓯᖃᕐᓗᑕ ᑐᓴᖅᑎᑦᑎᓂᖕᒥᑦ $4.9 ᐱᓕᐊᓐ ᑮᓇᐅᔭᓂ ᓄᑖᙳᕆᐊᕆᓂᐊᕐᓗᒍ ᑲᓇᑕᒥᐅᑦ ᒥᐊᓕᒐᐃᓪᓗ ᐅᐊᖕᓇᖓᓂᑦ ᖃᖓᑕᓲᒃᑯᑦ ᓴᐳᓐᓂᐊᕐᑎᒃᑯ. ᓴᐳᓐᓂᐊᕐᑎᒃᑯᑦ ᑲᓇᑕᓗ−ᒥᐊᓕᒐᓪᓗ ᐱᓕᕆᐊᕆᕙᔾᔪᒃ ᖃᖓᑕᓲᒃᑯᑦ ᖃᐅᔨᓴᕐᐸᒃᖢᑎᒃ ᓴᐳᔾᔨᓯᒪᕙᒃᖢᑎᒃᓗ ᑕᒪᐃᓐᓄᒃ ᓄᓇᓕᒡᔪᐊᕐᓅᒃ. ᑕᒪᓐᓇ ᐱᕈᕐᓴᐃᓂᖅ ᐊᑐᕐᑕᐅᓂᐊᕐᑐᖅ ᐱᐅᓯᕚᓪᓕᖅᑎᑦᑎᓂᖕᒥᑦ ᓇᐅᑦᑎᕐᓱᕈᑎᓂ ᐅᑭᐅᖅᑕᖅᑐᒥᑦ.
ᐅᖃᖅᑎᑦᑎᔩ, ᐅᐱᓚᐅᕐᐳᖓ ᐅᖃᓪᓚᒋᐊᒃᓴᖅ ᑲᑎᒪᔭᕐᑐᕐᓯᒪᔪᓄᑦ ᐱᒻᒪᕆᐅᓂᖓᓂ ᓴᙱᒃᑎᓴᐃᓂᖕᒥᑦ ᓄᓇᖁᑎᒥᑦ ᓇᐅᑦᑎᕐᓱᕐᓂᖕᒥᓪᓗ ᑲᓇᑕᒥ ᐅᑭᐅᖅᑕᖅᑐᒥᑦ.
ᐅᖃᒃᑲᓐᓂᕐᐳᖓ ᐱᒻᒪᕆᐅᓂᖓᓂ ᐃᓚᐅᑎᑦᑎᓗᑕ ᐱᓕᕆᖃᑎᖃᕐᓗᑕᓗ ᐃᓄᖕᓂᑦ ᐅᑭᐅᖅᑕᖅᑐᒥᐅᓂᓪᓗ ᐃᓱᒪᓕᐅᕆᑎᓪᓗᑕ ᐊᒃᑐᐃᓇᔭᕐᑐᖅ ᓄᓇᖁᑎᑦᑎᓐᓂᑦ. ᐅᖃᓚᐅᕐᒥᔪᖓᑦᑕᐅᖅ ᐊᑲᐅᓛᖅ ᓴᙱᒃᑎᓐᓂᐊᕐᓗᒍ ᓄᓇᖁᑎᕗᑦ ᐱᕈᕐᓴᐃᓗᑕ ᐃᓄᖕᓂᑦ ᓄᓇᓕᖕᓂᓪᓗ ᐅᑭᐅᖅᑕᖅᑐᒥᑦ.
ᐅᖃᖅᑎᑦᑎᔩ, ᓂᕆᐅᒃᐳᖓ ᐅᖃᖃᑎᖃᐃᓐᓇᖃᑦᑕᕐᓂᖕᒥᑦ ᐅᑭᐅᖅᑕᖅᑑᑉ ᓄᓇᖁᑖᓂ ᓇᐅᑦᑎᕐᓱᕐᑎᓂᓪᓗ, ᐃᓚᐅᓗᓂ ᐱᓕᕆᓗᑕ ᓄᓇᕘᑉ ᒪᑭᒪᐅᑎᖃᑦᑎᐊᙱᓐᓂᑦ, ᐃᖏᕐᕋᔾᔪᑎᖃᑦᑎᐊᙱᓐᓂᖕᒧᑦ, ᑐᓴᐅᒪᔾᔪᑎᖃᑦᑎᐊᙱᓐᓂᐅᔪᓂᓪᓗ.
ᖁᔭᓐᓇᒦᒃ, ᐅᖃᖅᑎᑦᑎᔩ.