Uqaqtittijii, ublumi uqautigijumajara ilaudjutiga uvani Ukiuqtaqtumi Qajangniadjutimi Aulapkainiqarnikkullu Katimanirjuaq pivaktuq Iqalungni Aktuupa 3mi, 2022.
Uqaqtittijii, Nunavunmi senator Dennis Patterson pipkaqtitaa una atauhirmi-ublulik katimaniq paannariigutikkut ukunani nunallaani avikturhimanirnilu timiqutini ilaujullu Nunavutim Inuit Development Corporations Association (Inuit Pivallianirnun Kuapuriisinga Katimajiit) unalu Nunasi Kuapuriisinga.
Uqaqtittijii, uvani uqautigivaktavun Ukiuqtaqtumi aulapkainiqarniq qanuqtullu hakugikharnirni ikajurnirnilu aanniaqtailinirnun mahulingainnirnullu nunallaanik tamaani Ukiuqtaqtumi.
Uqaqtittijii, una katimaniq tuniqjuk uukturvikhamik uqaqatigiigutikhakkut tuhaqtidjutaa imaa $4.9 billion maniliqtuutini nutaanguqtirnikkut una North American Aerospace Defense Command (North Americami Ikiangani Amiridjutaani Pijukhaq). Una Defense Command (Amiridjutikkut Pijukhak) ukunani Kanadami-USAmi havaqatigiiguti tunijuq ikiani amirinirmi hapummidjutikkullu tamarmingnun nunagijaujunun. Una maniliqtuuti atuqtauniaqtuq pimmarigharlugin amirhidjutit Ukiuqtaqtumi.
Uqaqtittijii, quviahukpaktunga uqautigapkit katimajaqtuqtun mighaagun akhuurnarnianik hakuhikharutaanik aulapkainikarnikkut qajangnaidjutimilu Kanadami Ukiuqtaqtumi.
Uqaqtatka akhuurutait ilaupkainirmun paanarinirmullu Inuit Ukiuqtaqtumiunullu ihumaliulirnirmi hulaqutittaaqtunik avikturhimadjutiptingnik. Uqarhimajungalu nakuutqijaujuq hakugikhariami aulapkainiqarnirmun taimaatun pipkainirnun inungnun nunallaanullu Ukiuqtaqtumi.
Uqaqtittijii, niriuktunga uqaqtigiikhimmaarnirnun uvani Ukiuqtaqtumi aulapkaiqarnirnun qajangnaidjutimilu, ilaqaqtuq havangnirnik kiudjutikhanun Nunavutip aulapkaidjutainnun, ingilradjutainnun, ukunaniu alrujaqtuqtuni-tuhaumapkaidjutikkut piqangidjutinun.
Quana, Uqaqtittijii.