ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᕗᖓ ᐅᖃᐅᓯᖃᕈᒪᓪᓗᖓ ᑲᓇᑕᒥ ᑲᑎᒪᔨᑦ ᑲᑐᔾᔨᖃᑎᒌᑦ ᐅᖃᓕᒫᕈᓐᓇᕐᓂᕐᒧᑦ/ᑎᑎᕋᕈᓐᓇᕐᓂᕐᒧᑦ ᐃᓕᑕᕆᔭᐅᔾᔪᑎᒥᒃ.
ᐅᖃᖅᑎᑦᑎᔩ, ᐅᓇ ᐃᓕᑕᕆᔭᐅᔾᔪᑎᑖᖑᓂᐊᖅᑐᖅ ᖁᕕᐊᓲᑕᐅᓂᐊᕐᒪᑦ ᐃᑲᔫᑎᑦᑎᐊᕚᓗᖕᓂᒃ ᐃᑲᔪᖅᑕᐅᕐᔪᐊᖅᓯᒪᓂᑦᑎᓐᓄᑦ ᑲᓇᑕᒥ ᐅᖃᓕᒫᕈᓐᓇᕐᓂᖅ ᐱᒻᒪᕆᐅᒋᔭᓕᖕᓄᑦ. ᓄᓇᕗᒻᒥ, ᑐᓐᓂᖅᑯᓯᐊᖅ ᐃᓕᑕᖅᓯᔾᔪᑕᐅᕗᖅ ᐃᓄᖕᓄᑦ ᐃᑲᔪᖅᑐᐃᔪᓄᑦ ᐊᓯᒥᓂᒡᓗ ᑲᔪᓇᖏᖅᓴᐃᓲᓄᑦ ᐃᓄᒃᑎᑐᑦ ᐅᖃᓪᓚᖃᑦᑕᖁᔨᔪᓄᑦ ᐱᕙᓪᓕᐊᑎᑦᑎᖁᔨᓲᓄᓪᓗ ᐅᖃᓕᒫᕈᓐᓇᕐᓂᕐᒧᑦ ᐅᖃᓪᓚᖕᓂᒃᑯᑦ, ᑎᑎᖅᑲᑎᒍᑦ, ᐅᕝᕙᓘᓐᓃᑦ ᑎᑎᕋᐅᔭᕐᓂᒃᑯᑦ ᓴᖅᑭᑕᐅᔪᒃᑯᑦ.
ᓯᑎᐱᕆ 8-ᒥ, ᐅᐱᒍᓱᑦᑎᐊᓚᐅᖅᐳᖓ ᑐᓴᖅᑎᑦᑎᔪᓐᓇᓚᐅᕋᒪ ᑲᓇᑕᒥ ᑲᑎᒪᔨᑦ ᑲᑐᔾᔨᖃᑎᒌᖏᓐᓂᙶᖅᑐᒥ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᔩᓚ ᐸᓪᓗᖅ−ᑯᓘᑎᐊᐃ.
ᐅᓇ ᐃᓕᑕᕆᔭᐅᔾᔪᑎ ᐃᓕᑕᖅᓯᔪᖅ ᔩᓚᐅᑉ ᑕᖃᔪᓐᓇᕋᓂ ᐱᓕᕇᓐᓇᖃᑦᑕᓚᐅᕐᓂᖓᓄᑦ ᐆᒻᒪᖅᑎᑦᑎᒃᑲᓐᓂᕋᓱᒃᖢᓂ ᐃᓄᒃᑎᑐᑦ ᐅᖃᐅᓯᕐᒥᒃ ᐊᕐᕌᒍᒐᓴᕐᓄᑦ. ᖃᖓᑦᑎᐊᕐᓂ ᑐᑭᓕᐅᕆᑎᒋᓯᒪᓕᖅᑐᖅ 11,000 ᐅᖃᐅᓯᖅᑕᓂᒃ ᐊᔪᙱᑎᑕᐅᖁᓪᓗᒍ Facebook-ᑯᑦ ᐃᓄᒃᑎᑑᖅᑐᓂᒃ ᑎᑎᕋᐅᓯᖃᖃᑕᐅᖁᓪᓗᒍ. ᐱᓕᕆᖃᑦᑕᖅᓯᒪᖕᒥᔪᖅ ᓈᒻᒪᒋᔭᐅᔪᓂᒃ ᐃᓄᒃᑎᑐᑦ ᐅᖃᐅᓯᒃᑯᑦ ᐊᑐᖅᑕᐅᔪᓐᓇᖅᑐᒃᑯᑦ ᐱᕕᖃᕈᑕᐅᔪᓐᓇᕐᒪᑦ ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ ᐊᑐᖅᑕᐅᔪᓐᓇᕐᓗᓂ Microsoft ᑐᑭᓕᐅᕆᔾᔪᑎᒧᑦ.
ᐊᓕᐊᓇᐃᒍᓱᖃᑎᒋᔪᒪᔭᕋ ᔩᓚ ᖁᔭᓕᔪᒪᓪᓗᒍᓗ ᐱᓇᔪᑦᑎᐊᖏᓐᓇᖃᑦᑕᕐᓂᖓᓄᑦ ᐃᓄᒃᑎᑐᑦ ᐅᖃᐅᓯᖅᑕᖅ ᐱᕚᓪᓕᖅᐸᓪᓕᐊᖏᓐᓇᖁᓪᓗᒍ (ᓴᙱᒃᑎᒋᐊᖁᓪᓗᒍ).
ᖁᔭᓐᓇᒦᒃ, ᐅᖃᖅᑎᑦᑎᔩ.