ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᓴᖅᑭᖅᑎᑦᓯᒍᒪᓪᓗᖓ ᐱᖓᓲᔪᖅᑐᖓᓐᓂᒃ ᒪᓕᒐᓕᐅᖅᑏᑦ ᑐᕌᒐᖓᓐᓂᒃ ᐊᑎᓕᒃ ᑲᑐᔾᔨᓗᑕ. ᐅᖃᐅᓯᐅᓯᒪᒻᒪᑦ ᑲᒥᓯᓇᐅᑉ ᐅᖃᐅᓯᕐᖓᐅᑎᖓᓂ ᐊᑐᐊᓚᐅᖅᑕᕗᑦ ᐋᖅᑭᑦᓱᖅᑕᐅᑎᓪᓗᒍ ᑐᕌᒐᖅ ᑭᖑᓂᑦᑎᓐᓂ ᑕᐃᒪᐃᒍᑕᐅᓚᐅᖅᓯᒪᙱᑦᑐᖅ.
ᓯᕗᓪᓕᖅᐹᒥ ᓄᓇᕗᒻᒥ, ᓄᓇᕗᑦ ᒐᕙᒪᒃᑯᖏᑕ ᑐᕌᒐᖓ ᐋᖅᑭᑦᓱᖅᑕᐅᓯᒪᔪᖅ ᐅᖃᖃᑎᒌᒍᑕᐅᓂᒃᑯᑦ ᒪᓕᒐᓕᐅᖅᑎᓕᒫᓄᑦ, ᓯᕗᓕᖅᑎᖏᓐᓂᒃ ᓄᓇᕗᑦ ᑐᙵᕕᒃᑯᑦ ᓄᓇᕗᒻᒥᓗ ᐱᖓᓱᓄᑦ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
ᐅᖃᖅᑎᑦᑎᔩ, ᖁᔭᓐᓇᒦᕈᒪᔭᒃᑲ ᒪᓕᒐᓕᐅᖅᑎᐅᖃᑎᓕᒫᒃᑲ, ᐱᓗᐊᖅᑐᒥ ᒪᓕᒐᓕᐅᖅᑎᑐᐃᓐᓇᐃᑦ ᐊᖏᓚᐅᕐᖓᑕ ᐃᓇᒃᑲᒃᑭᑦ ᐋᖅᑭᑦᓱᐃᖃᑎᒋᒍᒪᓪᓗᒋᑦ ᑐᕌᒐᑦᑎᓐᓂᒃ − ᖃᐅᔨᒪᔪᖓ ᑭᖑᓪᓕᖅᐹᖅᓯᐅᑦ ᑎᑎᕋᖅᓯᒪᔪᑦ ᓴᙱᓂᖅᓴᐅᓂᖏᓐᓂᒃ ᐊᑕᖏᖅᑐᒋᑦ ᐃᑲᔪᖅᓯᒪᓂᖏᓐᓄᑦ.
ᐅᖃᖅᑎᑦᑎᔩ, ᐅᐱᒋᔭᕋ ᑖᓐᓇ ᑐᕌᒐᕗᑦ, ᐱᔭᑦᓴᖃᖅᑐᒻᒪᕆᐅᒍᑕᐅᑐᐃᓐᓇᖏᓐᓂᖓᓄᑦ, ᑭᓯᐊᓂᑦᑕᐅᖅ ᓇᓗᓇᐃᕈᑎᐅᑦᓯᐊᕐᖓᑦ ᐊᑦᓱᕉᑎᖃᕐᓂᑎᓐᓂᒃ ᑲᑐᔾᔨᖃᑎᖃᕐᓂᕐᒧᑦ ᐱᓕᕆᖃᑎᖃᕐᓂᒧᓪᓗ ᓄᓇᕗᑦ ᐱᐅᓂᖅᓴᐅᓕᖁᓪᓗᒍ.
ᒪᓕᒐᓕᐅᖅᑎᓕᒫᑦ ᐃᑦᓯᕚᖅᑐᑦ ᑕᕝᕙᓂ ᐋᖅᑭᑦᓱᐃᖃᑕᐅᓯᒪᔪᑦ ᑐᕌᒐᑦᑎᓐᓂᒃ. ᒪᓕᒐᓕᐅᖅᑎᐅᓪᓗᑕ, ᐃᑦᓯᕚᕋᑦᑕ ᐊᕙᓗᓯᒪᓪᓗᑕ ᐊᒻᒪᓗᑭᑖᒥ − ᐃᓪᓗᕈᓯ ᐋᖅᑭᑦᑕᐅᓯᒪᔪᖅ ᓇᓗᓇᐃᒃᑯᑕᐅᓗᓂ ᐋᖅᑭᐅᒪᓂᖓᓂᒃ ᐊᖏᖃᑎᒌᑦᑎᐅᓂᕐᒧᑦ ᐊᐅᓚᑦᓯᔨᐅᓂᕐᒧᑦ ᐱᓕᕆᔾᔪᓯᑦᑎᓐᓂᒃ. ᒪᓕᒐᓕᐅᕐᕕᒻᒥ, ᐃᓚᒋᔭᐅᔪᐃᓐᓇᐅᔪᒍᑦ ᐊᑕᐅᓯᐅᖃᑎᒌᓐᓂᕐᒧᑦ ᐊᑕᖏᖅᑐᑕᓗ ᓂᐱᕗᑦ ᐱᒻᒪᕆᐅᓪᓗᑎᒃ.
ᐅᖃᖅᑎᑦᑎᔩ, ᑖᒃᑯᐊ ᑐᕌᒐᕗᑦ ᑲᔪᓯᒍᑕᐅᔪᖅ ᑐᕌᖅᑕᑦᑎᓐᓄᑦ. ᑲᑐᔾᔨᓗᑕ ᓇᓗᓇᐃᒃᑯᑕᐅᔪᖅ ᒐᕙᒪᒋᔭᑦᑕ ᐊᖏᕈᑎᖃᖅᓯᒪᓂᖏᓐᓂᒃ ᓄᑖᕐᖑᕆᐊᖅᓯᓂᕐᒥᒃ ᐱᓕᕆᖃᑎᒌᓐᓂᕐᒥᒃ ᐅᑉᐱᕆᖃᑎᒌᑦᓯᐊᕐᓗᑕ. ᑖᒃᑯᐊ ᑐᕌᒐᐃᑦ ᑐᑭᒧᐊᖅᑎᑦᓯᒍᑕᐅᓂᐊᖅᑐᑦ ᑲᑐᔾᔨᓂᒃᑯᑦ ᖃᓄᐃᓕᒋᐊᕈᑎᖃᕐᓂᕐᒧᑦ ᐊᓯᔾᔨᖅᓯᓪᓚᑦᑖᕈᒪᓂᑦᑎᓐᓄᑦ.
ᑖᓐᓇ ᑲᑐᔾᔭᐅᓯᒪᓪᓗᓂ ᑐᕌᒐᖅ ᐋᖅᑭᑦᓱᖅᑕᐅᓯᒪᓂᖓ ᓇᓗᓇᐃᕈᑕᐅᓚᐅᖅᑐᖅ ᑐᕌᒐᕗᑦ ᓇᓕᒧᒌᓐᓂᖏᓐᓂᒃ. ᐊᑕᖏᖅᑐᑕ ᐊᖏᖃᑎᒌᑦᓯᒪᔪᒍᑦ ᐱᓗᐊᙳᐊᖅᑐᓂᒃ ᓯᕗᓪᓕᐅᑎᒍᒪᔭᑦᑎᓐᓂᒃ ᓄᓇᕗᒻᒥ.
ᐅᖃᖅᑎᑦᑎᔩ, ᓂᕆᐅᑦᓯᐊᖅᑐᖓ ᐱᓕᕆᖃᑎᒋᒍᓐᓇᕐᓂᐊᕋᒃᑭᑦ ᒪᓕᒐᓕᐅᖅᑎᐅᖃᑎᒃᑲ ᓄᓇᕗᒻᒥᓗ ᐃᓄᐃᑦ ᑲᑐᔾᔨᖃᑎᒌᖏᑦ ᑐᕌᒐᕗᑦ ᑎᑭᐅᑎᒍᓐᓇᖁᓪᓗᑎᒍ ᓇᓗᓇᐃᖅᑕᐅᓯᒪᔪᑦ ᑲᑐᔾᔨᓗᑕ ᑐᕌᒐᓂ. ᓇᓗᙱᑦᑐᖓ ᐱᓕᕆᖃᑎᒌᓐᓂᒃᑯᑦ, ᐊᑕᐅᓯᐅᖃᑎᒌᒥᒃ ᓂᐱᖃᕐᓗᑕ, ᓴᖅᑭᕈᑕᐅᓂᐊᖅᑐᖅ ᑐᙵᕕᖃᑦᓯᐊᒃᑲᓐᓂᕐᓂᖅᓴᒥᒃ ᓄᓇᕗᒻᒥᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.