Kattujiluta Pidjutikhamik Piliurniq

Uqaqtittijii, ublumi iliuraliqtunga uuminnga 6siujumik maligaliuqviup pidjutikhaq atilik Kattujiluta. Uqaqtauhimapluni Kamisinaup uqautaani havagutimi pidjutijumi piliurnikkut uuminnga pidjutimik anginiqaqpiaqtuq.

Hivulliqpaami nunaptikni, Nunavut Kavamanga pidjutikhaa piliuqtauhimajuq talvuunga piqqaarhimajumin uqaqatigiingnirnin ukunani tamainni Ilaujunin Maligaliuqvingmin, hivuliqtiinnin Nunavut Tunngavitkunnin, ukunanngalu Nunavunmi pingahunin Avikturhimanirnin Inuit Timiqutainnin.

Uqaqtittijii, qujagijumajatka havaqatitka, ukualluallu MLA-ngujun angiqpangmagu ilauqunira ikajuriami piliurnikkut uuminnga pidjutimik – ilihimajunga kingulliqpaaq inirhimaittuq hakugitqijaujuq talvannga taimainnin tuniutiinnin.

Uqaqtittijii, quviagijara una pidjuti, taimainnaungittumin piniaqpiarhimajumun pidjutikhaanin, kihimi pidjutaungmallu naunaitkutaanik havagutiptikni atauttikkut ikajurutikkullu talvunga nakuutqijaujumun nunaptiknun.

Tamaita MLAt ikhivajun uvani igluami ikajuqpaktun piliurningani uumani pidjutimi. Ilaupluta maligaliurvingmi, ikhivavaktugun kaimalluriktumi – igluaq piliuqtauhimajuq tautuktipkarhugu tamaptikni angiqaqtigiingnikkut kavamaudjutikpun. Uumani maligaliurvingmi, tamapta ilaujugun atauhirmi iliuttumi tamaptalu nipivun humaagijaujun.

Uqaqtittijii, una pidjuti aulahimmaarutaujuq talvannga ingilradjutimin. Kattujiluta naunaitkutaujuq kavamapta havagumaniani nutaanguqtiqhimajumi pidjutiqatigiingnikkut tunnganiqaqtuq atauttikkut ihumagittiarutini. Una pidjuti tunijuq naunaitkutikhamik ukununga atauttikkut hulidjutikhanun pijaami piqpiaqtunik aallangurutikhanik.

Una havaqagtiigutaujuq pidjutikhami piliurnikkut havaguti tautuktitaatigun turaangajavun aajjikkiiktun. Tamapta angiqhimajugun ukunani hivulliutijaulluaqtukhani nunaptikni.

Uqaqtittijii, niriuktunga havaqagilugin tamaita havaqatitka ukuallu Nunavunmi Inuit Katimaviit pijaami turanngajunik naunaijaqhimajunik uvani Kattujiluta pidjutimi. Ilihimajunga havaqatigiingnikkut atauttikkut, atautikkut nipiqarluta, pipkainiaqtuq hakugitqijaujumik Nunavunmik.

Quana, Uqaqtittijii.

Date