ᐱᕙᓪᓕᐊᔪᑦ ᑐᓴᕋᑦᓴᑦ
ᓯᕗᓕᖅᑎ ᐊᕿᐊᕈᖅ ᓇᓗᓇᐃᖅᓯᔪᖅ ᐊᖏᔪᖅᑲᐅᑎᓂᒃ ᐃᖅᑲᓇᐃᔭᖅᑎᓂᒃ ᐊᓯᔾᔨᖅᑕᐅᔪᓂᒃ
ᐃᖃᓗᐃᑦ, ᓄᓇᕗᑦ (ᔭᓐᓄᐊᓕ 28, 2022) − ᓯᕗᓕᖅᑎ ᐱᔭᐃ ᐊᕿᐊᕈᖅ ᖁᕕᐊᑦᑐᖅ ᓇᓗᓇᐃᖅᓯᒍᓐᓇᕋᒥ ᑎᒃᑯᐊᖅᑕᐅᓂᖓᓂᒃ ᔨᒥ ᐅᓈᓕᒃ ᒥᓂᔅᑕᐅᑉ ᑐᒡᓕᐊᓄᑦ ᒐᕙᒪᓕᕆᔨᒃᑯᓐᓄᑦ ᐊᒻᒪᓗ ᑎᑎᕋᖅᑎᐅᓂᕐᒧᑦ ᒥᓂᔅᑕᐅᖃᑎᒌᑦ ᑲᑎᒪᔨᖏᓐᓄᑦ. ᐅᓈᓕᒃ ᐱᓕᕆᐊᑦᓴᖃᕐᓂᐊᕐᓗᓂ ᖃᓄᖅᑑᕐᓂᒃᑯᑦ ᐸᕐᓇᐃᓂᕐᒧᑦ ᑐᑭᒧᐊᖅᑎᑦᓯᓂᕐᒧᓪᓗ ᓄᓇᕗᑦ ᒐᕙᒪᒃᑯᖏᓐᓂ, ᐱᒋᐊᕐᓗᓂ ᔭᓐᓄᐊᓕ 31, 2022.
ᑕᐃᕕᑎ ᑯᓄᒃ ᑭᖑᕝᕖᓂᐊᖅᑐᖅ ᒥᔅᑕ ᐅᓈᓕᒻᒥᒃ ᒥᓂᔅᑕᐅᑉ ᑐᒡᓕᐊᓄᑦ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ, ᐱᒋᐊᕐᓗᓂ ᐱᖓᑦᓯᖅ, ᕕᕝᕗᐊᓕ 9, 2022.
ᓯᕗᓕᖅᑎ ᐊᑐᓕᖁᔨᒻᒥᔪᖅ ᐃᐅᕆᓐ ᑕᕗᕈ ᐃᓄᖓᓄᑦ ᐊᖏᔪᖅᑳᖑᓂᕐᒧᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ., ᑲᑎᒪᔨᓄᑦ ᐊᖏᖅᑕᐅᓚᐅᖅᑎᓪᓗᒍ.
“ᖁᕕᐊᑦᑐᖓ ᐱᓕᕆᖃᑎᒋᒍᓐᓇᕐᓂᐊᕋᒃᑯ ᔨᒥ ᐅᓈᓕᒃ ᐊᒻᒪᓗ ᑕᐃᕕᑎ ᑯᓄᒃ,” ᐅᖃᖅᓯᒪᔪᖅ ᓯᕗᓕᖅᑎ ᐊᕿᐊᕈᖅ. “ᑕᑯᒍᓐᓇᖅᓯᒪᔮᒃᑲ ᑕᒪᒃᑮᒃ ᐱᓕᕆᑎᓪᓗᒋᒃ, ᐃᖅᑲᓇᐃᔮᒥᓐᓅᖅᑑᒃ ᐊᕐᕌᒍᕋᓴᕐᓂᒃ ᐃᖅᑲᓇᐃᔮᖃᖅᓯᒪᓪᓗᑎᒃ ᐊᑑᑎᖃᑦᓯᐊᖅᑐᓂᓪᓗ ᐃᓱᒪᒋᔭᖏᓐᓂᒃ. ᖁᕕᐊᒻᒥᔪᖓ ᑐᙵᓱᑦᑎᒍᓐᓇᕋᒃᑯ ᐃᐅᕆᓐ ᑕᕗᕈ ᓯᕗᓕᖅᑎᐅᓂᐊᕐᓂᖓᓄᑦ ᐱᓕᕆᐊᑦᑎᑦᑎᓐᓂᒃ ᐃᓪᓗᓕᕆᓂᕐᒧᑦ, ᓯᕗᓪᓕᖅᐸᐅᑎᓐᓂᐊᕋᑦᑎᒍ ᐱᓕᕆᐊᑦᑎᓐᓂᓂ ᒐᕙᒪᐅᓪᓗᑕ.”
2020-ᒥᓂᑦ, ᔨᒥ ᐅᓈᓕᒃ ᐱᔨᑦᓯᖅᓯᒪᔪᖅ ᒥᓂᔅᑕᒧᑦ ᑐᒡᓕᐅᓪᓗᓂ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ. ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᒋᓚᐅᖅᑕᖓ ᐱᓕᕆᐊᑦᓴᖃᖅᑎᐅᓪᓗᓂ ᐱᕙᓪᓕᐊᔪᓕᕆᓂᕐᒧᑦ, ᐃᓚᒋᔭᐅᓪᓗᑎᒃ ᐊᕕᑦᑐᖅᓯᒪᓂᐅᔪᓂ ᐊᐅᓚᑕᐅᔪᓄᑦ, ᐅᔭᕋᕐᓂᐊᖅᑐᓕᕆᓂᕐᒧᑦ, ᐳᓚᕋᑦᑐᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᓪᓗ.
ᑕᐃᕕᑎ ᑯᓄᒃ ᐱᓕᕆᐊᖃᖃᑦᑕᖅᓯᒪᓪᓚᕆᑦᑐᖅ ᐊᖏᔪᖅᑳᖑᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂ, ᐃᓄᐃᑦ ᑲᑐᔾᔨᖃᑎᒌᖏᓐᓂ, ᐱᕙᓪᓕᐊᔪᓕᕆᓂᕐᒧᑦ ᑎᒥᐅᔪᓂ ᓄᓇᕗᒻᒥ. ᒫᓐᓇᒫᖑᓚᐅᖅᑐᕐᓗ ᐊᐅᓚᑦᓯᔨᒻᒪᕆᐅᓚᐅᖅᑐᓂ ᓄᓇᕗᑦ ᑐᙵᕕᒃᑯᓐᓂ.
ᐃᐅᕆᓐ ᑕᕗᕈ ᐊᕐᕌᒍᐃᑦ 25 ᐅᖓᑖᓄᑦ ᐊᑑᑎᖃᖅᓯᒪᔪᓂᖅ ᐃᓪᓗᓕᕆᓂᕐᒧᑦ ᐊᑭᑐᔫᑎᓕᕆᓂᕐᒧᓪᓗ ᐃᓚᒋᐅᔭᐅᓪᓗᓂ ᐃᖅᑲᓇᐃᔭᖅᓯᒪᓂᖓ ᓄᓇᑦᓯᐊᕐᒥ ᐃᒡᓗᓕᕆᔨᕐᔪᐊᒃᑯᖏᓐᓄᑦ. ᑭᖑᓂᑦᑎᓐᓂ, ᒥᓂᔅᑕᐅᑉ ᑐᒡᓕᐊᓄᑦ ᐃᑲᔪᖅᑎᐅᓯᒪᔪᖅ, ᐊᑭᑐᔫᑎᓕᕆᓂᕐᒧᑦ ᓄᓇᓕᓐᓂ ᒐᕙᒪᒃᑯᓐᓂᓗ ᐱᔨᑦᓯᕋᖅᑎᒃᑯᖏᓐᓄᑦ ᐊᒻᒪᓗ ᒥᓂᔅᑕᒧᑦ ᑐᒡᓕᐅᓯᒪᓪᓗᓂ ᐊᑭᑐᔫᑎᓕᕆᓂᕐᒧᑦ ᐃᓪᓗᓕᕆᓂᕐᒧᓪᓗ ᓄᕙ ᓯᑰᓴᒥ ᒐᕙᒪᒃᑯᖏᓐᓄᑦ.
“ᖁᔭᓐᓇᒦᕈᒪᔭᕋ ᕗᔨᓂᐊ ᒨᓐᔅ ᐱᓕᕆᐊᖃᓚᐅᕐᓂᖓᓄᑦ ᒥᓂᔅᑕᒧᑦ ᑐᒡᓕᐊᓪᓗᓂ ᒐᕙᒪᓕᕆᔨᒃᑯᓐᓄᑦ ᐊᕐᕌᒍᕋᓴᕐᓂᓪᓗ ᐱᔨᑦᓯᕋᖅᓯᒪᓂᖓᓄᑦ ᓯᕗᓕᖅᑎᐅᓯᒪᓂᖓᓄᓪᓗ, ᑲᔪᓯᑦᓯᐊᕈᔾᔭᐅᖁᕙᕋ ᓯᕗᒧᒋᐊᖅᑎᓪᓗᒍ,” ᐅᖃᖅᓯᒪᔪᖅ ᓯᕗᓕᖅᑎ ᐊᕿᐊᕈᖅ. “ᐃᓕᓴᕆᕈᒪᒻᒥᔭᕋ ᖁᔭᓐᓇᒦᕐᓗᒍᓗ ᓄᖅᑲᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᖏᔪᖅᑳᖑᓂᕐᒧᑦ, ᑎᐅᕆ ᐊᐅᓪᓚ ᐊᕐᕌᒍᕋᓴᕐᓂᒃ ᐱᔨᑦᓯᕋᓚᐅᕐᓂᖓᓄᑦ ᓄᓇᕗᑦ ᒐᕙᒪᒃᑯᖏᓐᓄᑦ.”
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᐅᒍᓐᓇᖅᑐᖅ:
ᓰᒪ ᓴᕼᐊ ᔨᕆᕼᐃ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ, ᓯᕗᓕᖅᑎ ᐊᕿᐊᕈᖅ ᐊᓪᓚᕝᕕᖓᓂ
867-975-5058 or
867-222-5344
szerehi6@gov.nu.ca