ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᒃ ᑭᐅᔾᔪᑕᐅᓪᓗᓂ 2025−ᒧᑦ ᑲᓇᑕᒥ ᑮᓇᐅᔭᑦ ᐊᑐᖅᑐᒃᓴᓄᑦ:
"ᓄᓇᕗᑦ ᒐᕙᒪᒃᑯᖏᑦ ᑐᙵᓱᒃᑎᑦᑎᕗᑦ ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᓂᖏᓐᓂᒃ ᑮᓇᐅᔭᓂᒃ ᐊᑐᕈᒪᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᑕᒪᑐᒪᓂ ᐊᕐᕌᒍᒥ ᑲᓇᑕᐅᑉ ᒐᕙᒪᒃᑯᖏᑦᑕ ᐊᑐᕈᒫᕐᓂᐊᖅᑐᖁᑎᖏᓐᓂᒃ.
ᐊᑯᓂᐅᓗᐊᖅᑐᖅ, ᐊᐅᓚᔪᓐᓇᐅᑎᓄᑦ ᐱᑕᖃᙱᓐᓂᖅ ᐅᑭᐅᖅᑕᖅᑐᒥ ᐊᒻᒪ ᖃᓪᓗᓈᓂ ᑲᓇᑕᒥ ᑭᒡᓕᖃᖅᑎᑦᑎᕗᖅ ᑮᓇᐅᔭᓕᐅᕋᓱᖕᓂᕐᒧᑦ ᐱᕕᒃᓴᓂᒃ ᐊᒻᒪ ᓄᓇᓕᖕᓂ ᖃᓄᐃᙱᑦᑎᐊᕈᓯᕐᓂᒃ. ᓴᖅᑭᑕᐅᓂᖏᑦ ᓄᑖᑦ ᐅᑭᐅᖅᑕᖅᑐᒥ ᐱᖁᑎᕐᔪᐊᓄᑦ ᑮᓇᐅᔭᑦ ᑭᒡᒐᖅᑐᐃᕗᑦ ᐊᑯᓂᐊᓗᒃ ᐃᓕᓴᕆᔭᐅᔭᕆᐊᖃᓕᕐᓂᖏᓐᓂᒃ ᐅᑭᐅᖅᑕᖅᑐᒥ ᐱᖁᑎᕐᔪᐊᑦ ᑲᓇᑕᓕᒫᒥ ᐱᖁᑎᕐᔪᐊᕆᔭᐅᓂᖏᓐᓂᒃ, ᐱᒻᒪᕆᐊᓘᓪᓗᑎᒃ ᓇᖕᒥᓂᖃᕐᓂᕐᒧᑦ, ᑮᓇᐅᔭᓕᐅᕋᓱᖕᓂᕐᒧᑦ ᐱᕈᖅᐸᓪᓕᐊᓂᕐᒧᑦ, ᐊᒻᒪ ᖃᓄᐃᙱᑦᑎᐊᕐᓂᕐᒧᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᓄᓇᓕᑦᑎᓐᓂ.
ᑲᔪᖏᖅᓴᖅᑕᐅᓗᐊᙳᐊᖅᐳᒍᑦ ᑮᓇᐅᔭᑦ ᐊᑐᖅᑐᒃᓴᑦ ᑕᐅᑐᒐᖃᓪᓗᐊᑕᕐᒪᑕ ᐅᑭᐅᖅᑕᖅᑐᒥ ᐱᔪᓐᓇᕐᓂᖅᑖᖅᑎᑦᑎᕙᓪᓕᐊᓂᕐᒥᒃ ᐊᒻᒪ ᓯᕗᒻᒧᐊᒃᑎᑦᑎᕙᓪᓕᐊᓂᕐᒥᒃ ᖃᓄᐃᓕᐅᕈᑕᐅᔪᒪᔪᓂᒃ ᐃᖏᕐᕋᔪᓕᕆᓂᕐᒧᑦ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᒪᓕᒃᑐᓂᒃ ᓄᓇᕘᑉ ᑕᐅᑐᙳᐊᖅᑕᖓᓂᒃ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᖅᑯᑎᒋᔭᐅᓂᐊᖅᑐᓂᒃ, ᑐᓚᒃᑕᕐᕖᑦ, ᐊᖅᑯᑎᑦ, ᐊᒻᒪ ᐆᒻᒪᖅᑯᑎᓄᑦ ᐊᐅᓚᔪᓐᓇᐅᑎᑦ ᓴᙱᒃᑎᒋᐊᕈᑕᐅᔪᓐᓇᖅᑐᑦ ᓄᓇᕗᒻᒥ ᐱᓕᕆᐊᒃᓴᖏᓐᓂᒃ ᑲᓇᑕ ᐊᑦᑕᕐᓇᖅᑐᒦᑦᑕᕆᐊᖃᙱᓐᓂᖓᓄᑦ ᐃᒻᒥᒃᑯᓪᓗ ᓄᓇᓕᒡᔪᐊᖑᓂᖓᓂᒃ.
ᓴᖅᑭᑕᐅᓂᖓ ᐅᔭᕋᖕᓂᐊᒐᒃᓴᑦᑎᐊᕙᖕᓄᑦ ᓇᖕᒥᓂᕆᔭᐅᔪᓄᑦ ᑮᓇᐅᔭᑦ ᓴᖅᑭᑕᐅᓂᖓᓗ ᐊᖏᔪᓄᑦ ᐱᓕᕆᐊᒃᓴᓄᑦ ᑎᑎᕋᕐᕕᒃ ᑐᕌᖓᓪᓗᓂ ᐅᑭᐅᖅᑕᖅᑐᒧᑦ ᐊᓪᓗᕆᐊᕈᑎᒻᒪᕆᐅᕗᑦ ᒪᒃᐱᖅᓯᓂᕐᒧᑦ ᓄᓇᕗᑦ ᐱᔭᐅᔪᒪᑐᐃᓐᓇᕆᐊᓕᖕᓂᑦ ᐅᔭᕋᑦᑎᐊᕙᖕᓂᒃ ᐱᓕᕆᖃᑎᖃᕐᓗᑎᒃ ᐃᓄᖕᓂᒃ. ᑖᒃᑯᐊ ᐊᑐᖅᑕᐅᔪᒪᔪᑦ ᐃᑲᔫᑕᐅᓂᐊᖅᐳᑦ ᓄᓇᕗᒻᒥᐅᑦ ᐱᕚᓪᓕᕈᑎᖃᖁᓪᓗᒋᑦ ᐱᕙᓪᓕᐊᑎᑦᑎᓂᕐᒥᒃ ᓯᕗᒻᒧᐊᒃᑎᑦᑎᓯᓐᓈᑦ ᑲᓇᑕᒥ ᑮᓇᐅᔭᓕᐅᕋᓱᖕᓂᕐᒧᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᑐᕌᒐᕆᔭᐅᔪᓂᒃ.
ᒐᕙᒪᑐᖃᒃᑯᑦ ᓴᖅᑭᑎᑦᑎᓂᕆᔭᖓᑦ ᐆᒥᖓ, ᓴᓇᓂᖅ ᑲᓇᑕᒥ ᐊᖏᕐᕋᕆᔭᐅᔪᓂᒃ, ᐃᑲᔪᖅᑐᖅᑕᐅᓪᓗᓂ $2.8 ᐱᓕᐊᓐᓂᒃ ᓄᓇᓕᒡᔪᐊᕐᒥᐅᑕᓄᑦ, ᓄᓇᓕᕋᓛᖑᓂᖅᓴᓄᑦ, ᐅᑭᐅᖅᑕᖅᑐᒥᓗ ᓄᓇᖃᖅᑳᖅᑐᓄᑦ ᐃᒡᓗᒋᔭᐅᕙᒃᑐᓄᑦ, ᓇᓗᓇᐃᖅᓯᕗᖅ ᐊᖏᔪᒻᒪᕆᖕᒥᒃ ᓯᕗᒻᒧᐊᖅᐸᓪᓕᐊᓂᕐᒥᒃ. ᒥᓂᔅᑕ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᐅᑎᓄᑦ ᓯᕗᒃᑲᖅᑕᐃᓗᓂ ᒐᕙᒪᐅᖃᑎᒌᙱᑦᑐᓂᑦ ᓄᓇᖃᖅᑳᖅᓯᒪᔪᓄᑦ ᐃᒡᓗᓕᕆᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᑦ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᓯᖏᓐᓂᒡᓗ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓂᑦ, ᓄᓇᕗᑦ ᐱᓕᕆᐊᖃᖕᓂᐊᖅᑐᑦ ᐃᓄᐃᑦ ᐃᒡᓗᓕᕆᓂᖕᒧᑦ ᓯᕗᓪᓕᐅᔾᔭᒃᓴᖏᑦ ᓯᕗᓪᓕᐅᓗᑎᒃ ᕿᑎᐊᓃᓪᓗᑎᒃᓗ. ᑲᓇᑕᒥ ᐊᐅᓚᔪᓐᓇᐅᑎᓄᑦ ᑮᓇᐅᔭᖃᕐᕕᖓ ᐊᖏᒡᓕᒋᐊᖅᓯᒪᔪᖅ $3 ᐱᓕᐊᓐ ᑐᕌᒐᖓ ᓄᓇᖃᖅᑳᖅᓯᒪᔪᑦ ᐊᐅᓚᔪᓐᓇᐅᑎᖏᓐᓄᑦ ᓴᙱᒃᑎᒋᐊᕈᑕᐅᒃᑲᓐᓂᕐᓂᐊᖅᑐᖅ ᐱᔪᓐᓇᕐᓂᕆᔭᐅᔪᓄᑦ ᐃᓄᐃᑦ ᓄᓇᓕᖏᓐᓂ.
ᑲᓇᑕᒥ ᐃᒡᓗᓕᐅᕐᓂᖅ ᐊᖅᑯᑎᒋᓗᒍ, ᑕᐅᑐᒐᖃᓪᓗᐊᑕᕐᓂᖅ ᓂᐅᕕᐊᒃᓴᕆᔭᐅᙱᑦᑐᓂᒃ, ᐊᑭᑐᓗᐊᙱᑦᑐᓂᒃ, ᐊᒻᒪ ᓴᓇᔭᐅᓯᒪᔪᓂᒃ ᐃᒡᓗᓂᒃ, ᐃᓚᖃᖅᖢᓂ ᓄᑖᒥᒃ $1.5 ᐱᓕᐊᓐ ᑲᓇᑕᒥ ᐃᒡᓗᓂᒃ ᐊᑐᖅᑐᐊᕐᓂᕐᒧᑦ ᓴᐳᔾᔨᓯᒪᓂᕐᒧᑦ ᑮᓇᐅᔭᓂᒃ, ᐃᑲᔪᕐᓂᐊᖅᐳᑦ ᓴᐳᔾᔨᓯᒪᓂᕐᒥᒃ ᐊᖏᒡᓕᒋᐊᖅᑎᑦᑎᓂᕐᒥᒡᓗ ᐊᑭᑐᓗᐊᙱᑦᑐᓂᒃ ᐊᑐᖅᑕᐅᖔᕈᓐᓇᖅᑐᓂᒃ ᓄᓇᕗᒻᒥ. ᓄᓇᕗᑦ ᒐᕙᒪᖓ ᑐᙵᓱᒃᑎᑦᑎᒋᕗᖅ ᐃᓕᓴᖅᓯᓂᕐᒥᒃ ᐱᓕᕆᖃᑎᖃᕐᓂᕐᒥᓂᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᐃᒡᓗᓕᐅᕐᓂᐊᕐᓗᑎᒃ 700-ᓂᒃ ᓄᑖᓂᒃ ᐃᒡᓗᓂᒃ, ᑕᒪᓐᓇ ᐊᓪᓗᕆᐊᕈᑎᓪᓗᐊᑕᐅᔪᖅ ᑭᐅᓯᓂᐊᕐᓗᓂ ᓄᓇᕗᒻᒥ ᐃᒡᓗᑭᒃᓴᕐᓂᕆᕙᒃᑕᖓᓂᒃ ᐃᑲᔪᖅᑐᐃᓂᕐᒥᒡᓗ ᓄᓇᓕᖕᓂᓗ ᐊᖏᒡᓕᕙᓪᓕᐊᓂᕆᔭᐅᔪᒥᒃ.
ᓄᑖᖅ ᐅᖃᐅᓯᐅᓵᖅᑐᖅ ᓄᓇᓖᑦ ᓴᙱᔫᓂᖏᓐᓄᑦ ᑮᓇᐅᔭᑦ, ᐱᑎᑦᑎᓂᐊᖅᑐᖅ $51 ᐱᓕᐊᓐ ᐊᕐᕌᒍᓄᑦ ᖁᓕᓄᑦ, ᐱᑎᑦᑎᒃᑲᓐᓂᖅᑐᖅ ᐱᒻᒪᕆᐅᔪᒥᒃ ᐱᕕᒃᓴᒥᒃ ᓯᕗᒻᒧᐊᒃᑎᑦᑎᓂᕐᒥᒃ ᐱᓪᓗᐊᑕᕐᓂᒃ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᓕᕆᐊᒃᓴᓂᒃ ᐱᓕᕆᖃᑎᖃᕐᓗᑎᒃ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐅᑭᐅᖅᑕᖅᑐᒥᓗ ᐊᕕᒃᑐᖅᓯᒪᓂᐅᔪᓂ. ᓄᓇᕗᑦ ᐱᑐᐃᓐᓇᕆᐊᖃᓕᖅᐳᖅ ᐱᓕᕆᖃᑎᖃᑦᑎᐊᕐᓂᕐᒥᒃ ᒐᕙᒪᑐᖃᒃᑯᓐᓂ ᐱᓕᕆᖃᑎᒋᕙᒃᑕᒥᓂᒃ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᑮᓇᐅᔭᓕᐅᕈᑕᐅᒃᑲᓂᕋᓱᒃᑐᑦ ᐃᒡᓗᓕᕆᓂᕐᒧᑦ, ᐆᒻᒪᖅᑯᑎᓕᕆᓂᕐᒧᑦ, ᐃᖏᕐᕋᔪᓕᕆᓂᕐᒧᑦ, ᓄᓇᓕᖕᓂᓗ ᒪᑭᒪᔾᔪᑕᐅᔪᑦ ᐊᒃᑐᐊᓂᖃᖅᐳᑦ ᐊᔾᔨᖃᙱᑦᑐᓂᒃ ᐱᔭᐅᔭᕆᐊᓕᖕᓂᒃ ᐅᑭᐅᖅᑕᖅᑐᒥ ᓄᓇᓕᑦᑎᓐᓂ.
ᑐᙵᓱᒃᑎᑦᑎᒋᕗᒍᑦᑕᐅᖅ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐃᑲᔪᖅᑐᐃᓂᐊᕐᓂᖏᓐᓂᒃ ᐃᓄᐃᑦ ᓯᓚᑦᑐᖅᓴᕐᕕᒡᔪᐊᖅᑖᖁᓪᓗᒋᑦ. ᑖᓐᓇ ᐱᓕᕆᐊᖑᔪᖅ ᐃᓄᐃᑦ ᐃᓕᓐᓂᐊᖅᑎᖁᑎᖏᑦ ᖁᕝᕙᓯᖕᓂᖅᓴᒥᒃ ᐃᓕᓐᓂᐊᕈᓐᓇᕐᓂᐊᕐᒪᑕ ᓄᓇᒋᔭᒥᖕᓂ, ᒪᓕᒡᓗᑎᒃ ᐊᖏᖅᓯᒪᓂᑦᑎᓐᓂᒃ ᐃᓕᓐᓂᐊᕐᓂᕐᒧᑦ, ᓴᐃᒻᒪᖃᑎᒌᖕᓂᕐᒧᑦ, ᐊᒻᒪ ᓇᖕᒥᓂᖅᓱᕈᓐᓇᕐᓂᕐᒧᑦ.
ᑮᓇᐅᔭᑦ ᐊᑐᖅᑐᒃᓴᑦ ᑕᐅᑐᒐᖃᓪᓗᐊᑕᖅᐳᑦ ᐅᑭᐅᖅᑕᖅᑐᒥ ᐱᖁᑎᑖᕆᔭᐅᕙᒃᑐᓄᑦ ᐊᓂᒍᐃᔪᓐᓇᕐᓂᕐᒥᒃ ᐊᒻᒪ ᓄᓇᖃᖅᑳᖅᓯᒪᔪᑦ ᐊᔾᔨᒌᒃᑎᑕᐅᓪᓗᑎᒃ ᐃᓚᐅᕙᖕᓂᖏᑦ ᑕᑯᒃᓴᐅᑎᑦᑎᒃᑲᓐᓂᖅᐳᑦ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᔭᐅᖅᑐᖅᑕᐅᔅᓲᔭᖅᑐᓂᒃ ᓄᓇᕗᒻᒥᐅᓄᑦ. ᑖᒃᑯᐊ ᐊᑐᖅᑕᐅᔪᑦ ᐃᑲᔪᕐᓂᐊᖅᐳᑦ ᐱᕈᖅᑎᑦᑎᕙᓪᓕᐊᓂᕐᒥᒃ ᑲᔪᓰᓐᓇᕈᓐᓇᕐᓂᖅᓴᓂᒃ, ᓄᓇᓕᖕᓂ−ᐊᐅᓚᑕᐅᔪᓂᒃ ᑮᓇᐅᔭᓕᐅᕋᓱᖕᓂᕐᒧᑦ ᐊᑐᖅᑕᐅᕙᒃᑐᓂᒃ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ.
ᖃᐅᔨᒪᒐᓗᐊᖅᑎᓪᓗᑕ ᓄᑕᖅᑲᑦ ᓯᕗᓪᓕᐅᑎᑕᐅᓗᑎᒃ ᐱᓕᕆᐊᖑᕙᓪᓕᐊᔪᒪᔪᖅ ᐅᖃᐅᓯᐅᓚᐅᙱᓐᓂᖓᓂᒃ ᑕᒪᑐᒪᓂ ᐊᕐᕌᒍᒥ ᑮᓇᐅᔭᑦ ᐊᑐᖅᑐᒃᓴᓂᒃ, ᐊᖏᖅᓯᒪᐃᓐᓇᖅᐳᒍᑦ ᐱᓕᕆᖃᑎᖃᕈᒪᓪᓗᑕ ᒐᕙᒪᑐᖃᒃᑯᓐᓂ ᐱᓕᕆᖃᑎᒋᕙᒃᑕᑦᑎᓐᓂᒃ ᖃᐅᔨᒪᔭᐅᖁᓪᓗᒋᑦ ᐃᓄᐃᑦ ᓄᑕᖅᑲᑦ ᐊᔾᔨᒌᒃᑐᒥᒃ ᐱᖃᑦᑕᐃᓐᓇᖁᓪᓗᒋᑦ ᑲᒪᒋᔭᐅᔾᔪᑎᓄᑦ ᐊᒻᒪ ᐱᔨᑦᑎᕋᐅᑎᓄᑦ, ᒪᓕᒡᓗᑎᒃ ᑐᙵᕕᒋᔭᐅᔪᓂᒃ ᔪᐊᑕᓐ ᑐᙵᕕᖏᓐᓂᒃ.
ᐊᑕᐅᑦᑎᒃᑯᑦ, ᑖᒃᑯᐊ ᑮᓇᐅᔭᓕᐅᕈᑕᐅᓇᓱᒃᑐᑦ ᐊᓯᔾᔨᕈᑕᐅᔪᓐᓇᖅᐳᑦ ᓄᓇᕗᑦ ᓯᕗᓂᒃᓴᖓᓄᑦ, ᐱᑕᖃᙱᓐᓂᐅᔪᑦ ᒪᑐᔭᐅᓗᑎᒃ, ᐱᕕᒃᓴᖃᖅᑎᑦᑎᓗᑎᒃ, ᓴᙱᒃᑎᒋᐊᕐᓗᒍᓗ ᑲᓇᑕᐅᑉ ᐅᑭᐅᖅᑕᖅᑐᖓ ᓇᖕᒥᓂᖃᕐᓂᖓᓄᑦ ᑲᑐᔾᔨᖃᑎᖃᕐᓂᒃᑯᑦ ᐃᓄᖕᓂᒃ."