ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᑎᓯᐱᕆ 21, 2021
ᓯᕗᓕᖅᑎᒥᑦ ᑐᓴᒐᒃᓴᑦ ᓄᑖᙳᕆᐊᖅᓯᒪᔪᑦ:
ᐅᓪᓛᒃᑯᑦ,
ᐊᐃᑦᑖᖑᒐᓗᐊᖅ, ᕿᑲᕆᐊᕐᓂᐊᓕᕋᑦᑕ ᐃᓱᒫᓗᖕᓇᖅᑐᓂ ᐱᕙᓪᓕᐊᔪᖃᖅᖢᑕ.
ᐅᓪᓛᖑᔪᖅ ᓄᓇᕗᑦ ᒪᕐᕉᖕᓂᒃ ᓄᕙᒡᔪᐊᕐᓇᖅ-19−ᖃᓕᕐᒪᑦ. ᑖᒃᑯᐊᒃ ᐸᓐᓂᖅᑑᒦᑦᑑᒃ.
ᑕᒪᓐᓇ ᐅᖃᐅᓯᐅᓵᑦᑎᐊᖅᑐᖅ ᒫᓇᓵᕈᓗᒃ ᐊᒻᒪᓗ ᓘᒃᑖᖅ ᐹᑐᓴᓐ ᓇᓗᓇᐃᔭᐃᔪᓐᓇᕐᓂᐊᖅᑐᖅ, ᐱᔭᕆᐊᖃᖅᐸᑦ.
ᖃᐅᔨᒪᔪᖓ ᐊᒥᓱᑎᒍ ᖃᓄᐃᙱᑦᑎᐊᖅᑐᒥ ᖁᕕᐊᓱᒃᕕᒃᓯᐅᕈᒪᓚᐅᕋᓗᐊᕋᑦᑕ ᓲᕐᓗ ᓯᕗᓂᐊᓂ ᓄᕙᒡᔪᐊᕐᓇᖅ-19 ᓄᓇᕐᔪᐊᒥ ᖃᓂᒪᓂᖃᓚᐅᖅᑳᖅᑎᓐᓇᒍ.
ᑭᓇᑐᐃᓐᓇᖅ ᐅᕙᓐᓂᒃ ᖃᐅᔨᒪᔪᖅ, ᖃᐅᔨᒪᖕᒪᑦ ᖁᕕᐊᓱᒡᕕᖕᒥ ᕿᑲᕐᓇᖅ ᖁᕕᐊᒋᑦᑎᐊᕐᓂᓐᓂ, ᐱᓗᐊᖅᑐᒥ ᐱᙳᐊᑲᑕᒃᑎᓪᓗᒋᑦ. ᑕᒪᑐᒪᓂ ᐊᕐᕋᒍᒥ, ᐱᙳᐊᖅᑐᓂᑦ ᐃᓚᐅᑲᑕᔾᔭᙱᑦᑐᖓ. ᐃᓚᒃᑲ ᓄᓇᖅᑲᑎᒃᑲᓗ ᐊᑦᑕᕐᓇᖅᑐᒥᑎᑦᑕᐃᓕᒪᓂᐊᕋᒃᑭᑦ.
ᐅᖃᒃᑲᓐᓂᕐᓗᒍ, ᑕᒪᑐᒪᓂ ᖁᕕᐊᓱᒡᕕᖕᒥ, ᐅᔾᔨᖅᓱᑦᑎᕆᐊᖃᕕᒡᔪᐊᕐᓂᐊᖅᐳᒍᑦ. ᐅᔾᔨᖅᓱᙱᑐᐃᓐᓇᓕᕐᓗᑕ ᐱᔭᕆᐊᖃᙱᓚᒍᑦ. ᐅᓄᖅᓯᕙᓪᓕᐊᑐᐃᓐᓇᖅᑐᓂᑦ ᑕᑯᕗᒍᑦ Omicron−ᒥ ᓄᕙᕐᔪᐊᕐᓇᖅᑖᖅᐸᓪᓕᐊᔪᓂᒃ ᑲᓇᑕᓕᒫᒥ−ᓈᓴᖅᑕᐅᔪᑦ ᐃᓱᒫᓗᖕᓇᖅᑐᒻᒪᕆᐊᓘᕗᑦ.
ᖃᐅᔨᒪᔪᒍᑦ ᐊᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔭᖏᑦ ᒪᓕᒡᓗᒋᑦ, ᒪᑐᐊᖅᓯᕙᒡᓗᑕ ᐊᒻᒪ ᑲᐱᔭᐅᓯᒪᑦᑎᐊᕐᓗᑕ ᓴᐳᔾᔨᔾᔪᑎᑦᑎᐊᕙᐅᓛᖑᕗᑦ ᓄᓇᑦᑎᓐᓂ ᓄᓇᕘᒥ.
ᑕᐃᒪᑦᑐᖅ ᑕᒪᔅᓯ ᐱᓕᕆᖃᑕᐅᓂᐊᖅᐳᓯ ᓄᓇᕗᒻᒥ ᓄᕙᕐᔪᐊᕐᓇᖅ-19−ᒥᑦ ᐊᑦᑕᕐᓇᖅᑕᐃᓕᒪᑎᑦᑎᓗᓯ.
ᐅᑯᐊ ᐱᖃᓯᐅᔾᔭᐅᔪᑦ:
- ᐱᔭᕆᐊᖃᓪᓚᙱᑦᑐᑦ ᐊᐅᓪᓚᑲᑕᙱᓪᓗᑎᒃ.
- ᑲᐱᔭᐅᓗᑎᑦ ᓇᒡᓕᒋᔭᑎᓪᓗ ᑎᓕᐅᕐᓗᒋᑦ ᑲᐱᔭᐅᖁᓗᒋᑦ.
- ᐱᖓᔪᖓᓂ ᑲᐱᔭᐅᓗᑎᑦ ᐊᔪᕐᓇᙱᑉᐸᑦ.
- ᖁᕕᐊᓱᒡᕕᖕᒥ ᐃᓄᑭᓪᓗᓯ ᑲᑎᙵᓗᓯ.
- ᐃᓄᒋᐊᒃᑐᓂᑦ ᑲᑎᙵᑎᑦᑎᙱᓪᓗᓯ.
- ᒪᑐᐊᖅᓯᒪᓗᑎᑦ.
- ᖁᕕᐊᓱᒡᕕᖕᒥ ᑲᑎᙵᓕᕈᔅᓯ ᐃᓄᑭᑲᑕᒡᓗᓯ.
- ᖃᓂᒪᑲᑕᓕᕈᕕᑦ ᖃᐅᔨᓴᖅᑕᐅᓗᑎᑦ ᐅᐸᒃᑕᐅᑦᑕᐃᓕᒪᓕᕐᓗᑎᓪᓗ.
ᓘᒃᑖᖅ. ᐸᑕᓴᓐ ᐃᓱᒪᒃᓴᖅᓯᐅᑦᑎᐊᖅᓯᒪᓂᖓᓄᑦ ᓄᓇᕗᒻᒥ ᓴᐳᔾᔭᐅᓯᒪᑦᑎᐊᖅᓯᒪᕗᖅ ᐊᕐᕌᒍᓂ ᒪᕐᕉᖕᓂᒃ ᐊᓂᒍᖅᑐᓂᒃ. ᐅᖃᐅᔾᔪᓯᐊᕆᓚᐅᖅᑕᕗᑦ ᒪᓖᓐᓇᕆᐊᖃᖅᐸᕗᑦ.
ᐃᓄᐃᑦ ᐊᒃᑐᖅᑕᐅᓯᒪᓛᖑᔪᑦ ᓄᕙᕐᔪᐊᕐᓇᒧᑦ ᐊᓐᓂᐊᕐᕕᖕᒥ ᐃᖅᑲᓇᐃᔭᖅᑎᒋᔭᕗᑦ. ᐃᖢᐊᖅᓴᐃᔨᕗᑦ, ᓘᒃᑖᕗᑦ, ᐊᒻᒪᓗ ᓄᓇᓕᖕᓂ ᐋᓐᓂᐊᖅᑐᓕᕆᔨᐅᔪᖅ ᖁᔭᓐᓇᒦᕈᒪᔭᒃᑲ ᐊᒃᓱᕈᑦᑎᐊᖅᖢᑎᒃ ᐱᓕᕆᖃᑦᑕᓚᐅᕐᒪᑕ ᐊᕐᕌᒍᓂ ᒪᕐᕉᖕᓂᒃ ᐊᓂᒍᖅᑐᓂᑦ. ᓱᓕ ᐊᔪᙱᒋᔭᐅᓪᓚᕆᒃᐳᓯ ᓄᓇᓕᑦᑎᓐᓂ.
ᑭᖑᓪᓕᖅᐹᕆᓗᒍ, ᖁᕕᐊᓱᒡᕕᒃᓯᐅᑦᑎᐊᖁᕙᔅᓯ ᐊᓂᕝᕕᐊᖅᓯᐅᑦᑎᐊᕐᓗᓯᓗ. ᐳᐃᒍᖅᑕᐃᓕᒋᑦ, ᖁᕕᐊᓲᑎᒃᓴᑦᑎᐊᕙᐅᓛᖑᕗᑦ ᐃᓚᑦᑎᓐᓄᑦ ᖃᓄᐃᙱᑦᑎᐊᕐᓂᖅ.
ᐱᑦᑎᐊᖃᑦᑕᐅᑎᓗᓯ ᐊᑦᑕᕐᓇᖅᑐᒦᑦᑕᐃᓕᓗᓯᓗ.
ᖁᔭᓐᓇᒦᒃ.
ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᒐᒃᓴᖏᑦ:
ᐅᓪᓛᒃᑯᑦ,
ᓯᕗᓪᓕᕐᒥ ᐃᓕᓴᕆᔪᒪᕙᒃᑲ ᐊᓐᓂᐊᕐᕕᖕᒥ ᐃᖅᑲᓇᐃᔭᖅᑎᓕᒫᑦ ᐊᒃᓱᕈᑦᑎᐊᖅᖢᑎᒃ ᐱᓕᕆᖃᑦᑕᖅᓯᒪᔪᑦ ᓄᕙᕐᔪᐊᕐᓇᖅ-19 ᖃᓂᒪᓐᓇᐅᑎᓪᓗᒍ. ᐱᓇᔪᖃᑦᑕᕐᓂᓯ ᐱᕐᔪᐊᒻᒪᕆᐊᓘᕗᖅ ᓄᓇᕗᒻᒥ ᑲᔪᓯᑦᑎᐊᖁᔨᓗᓯ ᖃᓂᒻᒪᓐᓇᒥ ᓄᖅᑲᖅᑎᑦᑎᓇᓱᒃᑎᓪᓗᑕ. ᐃᑲᕐᕋᓂᒃ ᐅᓄᖅᑐᓂᒃ ᐃᖅᑲᓇᐃᔭᖃᑦᑕᖅᐳᓯ ᐅᓄᖅᑐᓪᓗ ᓄᖅᑲᖓᑲᑕᑦᑎᐊᓚᐅᙱᖦᖢᑎᒃ. ᐃᓛᓯᒍᑦ ᖁᕕᐊᓱᒡᕕᖕᒥ ᐃᖅᑲᓇᐃᔭᐃᓐᓇᕐᓂᐊᖅᐳᓯ ᖃᐅᔨᒪᖁᕙᔅᓯᓗ ᑐᓐᓂᖅᑯᑎᒋᖃᑦᑕᕐᓂᓯ ᐱᓕᕆᔪᒪᑦᑎᐊᕐᓂᓯᓗ ᐅᐊᑲᓪᓛᓘᕗᖅ ᓄᓇᕗᒻᒥᐅᑦ ᑲᒪᒋᔪᒪᓪᓗᒋᑦ. ᒪ'ᓇ, ᖁᔭᓐᓇᒦᒃ. ᖃᐅᔨᒪᔪᖓ, ᐅᕙᖓᓗ ᓄᓇᕗᒻᒥᐅᓕᒫᓪᓗ ᖁᖁᔭᓪᓕᑦᑎᐊᕐᒪᑕ ᐱᓕᕆᐊᕆᓯᒪᔭᔅᓯᓐᓄᑦ ᑕᐃᒪᐃᖏᓐᓇᕐᓂᐊᖅᐳᓪᓗ.
ᓄᓇᕗᒻᒥᐅᑦ ᒫᓐᓇᐅᔪᖅ ᑐᓴᖅᑎᑦᑐᒪᕙᒃᑲ ᐊᐃᑦᑖᖑᒐᓗᐊᖅ, ᐋᓐᓂᐊᕐᕕᖕᒥ ᐱᓕᕆᔨᕗᑦ ᐱᔭᒃᓴᖃᓗᐊᕐᒪᑕ ᐃᑲᔪᖅᑎᒃᓴᖏᑦ ᐊᒥᒐᖅᖢᑎᒃ ᓄᓇᕘᓕᒫᒥ ᕿᓚᒻᒥᐅᔪᖅ. ᐃᖅᑲᓇᐃᔭᖅᑎᑦᑕ ᐊᑐᒐᒃᓴᖏᑦ ᐊᒥᒐᖃᑦᑕᖅᐳᑦ, ᐊᒻᒪᓗ ᐊᒃᓱᕈᖅᖢᑕ ᐃᖅᑲᓇᐃᔭᖅᑎᓴᖅᓯᐅᖃᑦᑕᕋᓗᐊᖅᖢᑕ ᐃᖅᑲᓇᐃᔭᖅᑎᖃᐃᓐᓇᕋᓱᒃᖢᑕᓗ ᐃᖢᐊᖅᓴᐃᔨᓂᒃ ᓄᓇᕗᒻᒥ ᐱᔭᐅᔭᕆᐊᓕᖕᓂᒃ, ᐱᔨᑦᑎᕋᖅᑎᓂᒃ ᐱᑕᖃᑦᑎᐊᙱᓐᓂᖓᓂ ᐃᒃᐱᒋᔭᐅᓂᐊᖅᐳᑦ ᓄᓇᓕᖕᓂ ᐅᓄᖅᑐᓂᑦ ᕿᑲᕐᓇᐅᑎᓪᓗᒍ. ᐅᑯᐊ ᐱᖃᓯᐅᑎᓪᓗᒋᑦ ᐃᓚᖏᑦ ᒥᒃᖠᒋᐊᖅᑕᐅᓪᓗᑎᒃ ᑲᐴᑎᓂᒃ ᐊᑐᐃᓐᓇᐅᑎᑦᑎᔪᑦ ᓲᕐᓗ ᓄᕙᓗᐊᔾᔭᐃᒃᑯᑦ ᑲᐴᑎ ᐊᒻᒪ ᓄᕙᕐᔪᐊᕐᓇᖅ-19−ᒧᑦ ᑲᐴᑎ. ᐊᒃᓱᕈᕐᓇᖅᑐᖅᓯᐅᕈᑎᕗᑦ ᐊᒃᑐᐊᓂᖃᖅᐳᑦ ᑲᓇᑕᒥ ᖃᓄᐃᑉᐸᓪᓕᐊᓂᖓᓂ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᒋᔭᐅᔪᑦ, ᖃᓂᒪᓐᓇᖅ ᐊᑲᐅᙱᑦᑐᒥᒃ ᐊᒃᑐᐃᓯᒪᓪᓗᓂ ᐃᖅᑲᓇᐃᔭᖅᑎᖏᓐᓂᒃ ᐊᔾᔨᒌᙱᑦᑐᑎᒍᑦ.
ᓄᓇᕗᒻᒥᐅᑦ ᐊᐱᕆᔪᒪᕙᒃᑲ ᐃᓕᓴᖅᓯᖁᓪᓗᒋᑦ ᐃᖢᐊᖅᓴᐃᔨᕗᑦ ᐱᓇᔪᑦᑎᖃᑦᑕᕐᓂᖏᓐᓂᒃ ᑐᓐᓂᖅᑯᑎᒋᓯᒪᓂᖏᓐᓂᒡᓗ, ᐊᒃᓱᕈᕐᓇᖅᓯᐅᖃᑦᑕᖏᓪᓗ ᐃᖢᐊᖅᓴᐃᔩᑦ ᒫᓐᓇᐅᔪᖅ ᓄᕙᕐᔪᐊᕐᓇᖅ Omicron ᓴᖅᑭᓯᒪᓕᖅᑎᓪᓗᒍ.
ᓄᓇᕗᒻᒥᐅᑦ ᐊᐱᕆᔪᒪᕙᒃᑲ ᐱᓕᕆᖃᑕᐅᖁᓪᓗᒋᑦ ᐊᑦᑕᕐᓇᖅᑕᐃᓕᒪᑎᑦᑎᓗᑎᒃ ᓄᕙᕐᔪᐊᕐᓇᖅ-19−ᒥᑦ ᖁᕕᐊᓱᒡᕕᐅᑎᓪᓗᒍ. ᓱᓕᕗᖅ, Omicron ᓄᕙᕐᔪᐊᕐᓇᖅ ᓄᑕᖑᓪᓗᓂ ᑲᑉᐱᐊᓇᖅᑐᒻᒪᕆᐊᓘᕗᖅ. ᑭᓯᐊᓂ ᖃᐅᔨᒪᔪᐃᓐᓇᐅᔪᒍᑦ ᐊᑦᑕᕐᓇᖅᑕᐃᓕᒪᑎᑦᑎᔪᓐᓇᕋᑦᑕ− ᑲᑎᙵᔪᑦ ᐃᓄᑭᑉᐸᒡᓗᑎᒃ, ᐱᔭᕆᐊᖃᓪᓚᕆᙱᑦᑐᑦ ᐊᐅᓪᓚᖃᑦᑕᙱᓪᓗᑎᒃ, ᖃᓂᒪᒍᕕᑦ ᐊᖏᕐᕋᖅᓯᒪᓗᑎᑦ, ᒪᑐᐊᖅᓯᒪᕙᒡᓗᑎᑦ, ᑲᐱᔭᐅᓗᑎᑦ, ᐊᒡᒐᑎᑦ ᐅᐊᓴᕋᔪᒡᓗᒋᑦ. ᐱᓕᕆᖃᑕᐅᓂᐊᖅᐳᑎᑦ ᖃᑕᙳᑎᑎᑦ, ᓄᓇᖅᑲᑎᑎᑦ, ᐊᒻᒪ ᓄᓇᕗᒻᒥ ᐊᑦᑕᕐᓇᖅᑕᐃᓕᒪᑎᑦᑎᖃᑕᐅᓗᑎᑦ.
ᖁᕕᐊᓱᒡᕕᐅᓕᕐᒪᑦ, ᐃᓄᐃᑦ ᖁᕕᐊᓱᒋᐊᖃᓕᖅᐳᑦ ᖁᕕᐊᓲᑎᖃᕐᓗᑎᒡᓗ. ᐅᒃᐱᕈᓱᒃᑐᖓ ᐊᑦᑕᕐᓇᖅᑕᐃᓕᒪᑎᑦᑏᓐᓇᕈᓐᓇᕐᓂᑦᑎᓐᓂ ᖁᕕᐊᓲᓯᖃᕐᓗᑕᓗ ᖁᕕᐊᓱᒡᕕᖕᒥ; ᐅᔾᔨᖅᓱᑦᑎᐊᙱᓐᓇᕈᑦᑕ ᐳᐃᒍᖅᑕᐃᓕᓗᒋᓪᓗ ᖃᐅᔨᓯᒪᔭᕗᑦ ᐊᕐ[ᕋᒍᒥ ᐊᓂᒍᖅᑐᒥᑦ.
ᑕᐃᒪᑦᑐᖅ ᑕᒪᔅᓯ ᖁᕕᐊᓱᒡᕕᔅᓯᐅᑦᑎᐊᕐᓂᐊᖅᐳᓯ ᐊᓂᕝᕕᐊᓯᐅᑦᑎᐊᕐᓗᓯᓗ.
ᖁᔭᓐᓇᒦᒃ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᓴᒐᒃᓴᖏᑦ:
ᐅᓪᓛᒃᑯᑦ,
ᐊᓯᔾᔨᖅᐸᓪᓕᐊᔪᒻᒪᕆᐊᓗᐃᑦ ᑐᓴᒐᒃᓴᐃᑦ ᐱᔾᔪᑎᒋᓪᓗᒋᑦ Omicron ᒥᒃᓵᓄᑦ, ᐊᔪᕐᓇᖅᑐᓂᒃ ᐃᓱᒪᓕᐅᕈᑎᖃᕆᐊᖃᕐᓂᐊᖅᐳᒍᑦ. ᐃᕐᙲᓐᓇᖅ ᓄᖅᑲᖅᑎᑦᑎᔪᒍᑦ ᖃᖓᑦᑎᐊᖅ ᑎᓕᓯᔾᔪᑕᐅᓚᐅᖅᑐᒥᒃ ᓄᓇᓕᖕᓂ ᐃᓄᒋᐊᖕᓂᖅᓴᐃᑦ ᑲᑎᙵᔪᓐᓇᖅᑎᑕᐅᓚᐅᖅᑐᑦ ᖁᕕᐊᓱᒡᕕᐅᓕᖅᐸᑦ. ᑖᓐᓇ ᐋᖅᑭᒃᑕᐅᓇᓱᒃᑎᓪᓗᒍ ᐊᔪᓇᓚᐅᖅᐳᖅ ᐊᒃᓱᕈᕐᓇᓚᐅᖅᐳᕐᓗ, ᑭᓯᐊᓂ ᑕᐃᒪᐃᑦᑕᕆᐊᖃᖅᐳᖅ ᐅᓄᖅᓯᕙᓪᓕᐊᑐᐃᓐᓇᓕᕐᓂᖏᓐᓄᑦ Omiccron−ᒥ ᖃᓂᒻᒪᒃᐸᓪᓕᐊᔪᑦ.
ᓇᓗᓇᐃᖅᓯᔾᔪᑕᐅᔪᓂᑦ ᑕᑯᓚᐅᖅᐳᑦ Omicron ᐊᐃᑦᑐᕐᓘᑕᐅᓴᕋᐃᕕᒡᔪᐊᕐᒪᑦ, ᑕᐃᒃᑯᐊᓘᓐᓃᑦ ᒪᕐᕈᐃᖅᖢᑎᒃ ᑲᐱᔭᐅᓯᒪᔫᒐᓗᐊᑦ ᐊᐃᑦᑐᕐᓗᒃᑕᐅᔪᓐᓇᖅᐳᑦ, ᐊᓯᔾᔩᔭᕆᐊᖃᓕᖅᐳᒍᓪᓗ ᖃᓄᐃᓕᐅᕐᓂᑦᑎᓐᓂ ᐅᓄᖅᓯᕙᓪᓕᐊᑐᐃᓐᓇᖅᑐᑦ ᑲᑉᐱᐊᓇᖅᑐᖅ ᒪᓕᒐᓱᒡᓗᒍ. ᐱᔭᕆᐊᖃᓪᓚᕆᙱᑦᑐᑦ ᐊᐅᓪᓚᑲᑕᖁᙱᑦᑎᐊᐸᕗᑦ ᒫᓐᓇᐅᔪᖅ. ᑕᐃᒃᑯᐊ ᐊᐅᓪᓚᕈᒪᓂᐊᖅᑐᑦ ᓄᓇᕗᒻᒧᓪᓗ ᐅᑎᕐᓂᐊᒃᓗᑎᒃ ᑲᐱᔭᐅᔾᔪᑎᒥᓂᒃ ᓇᓗᓇᐃᒃᑯᑕᖃᕐᓗᑎᒃ ᐅᓪᓗᓄᑦ 14−ᓄᑦ ᐊᓂᑦᑕᐃᓕᔭᕆᐊᖃᖅᐳᑦ ᓄᓇᕗᒻᒧᑦ ᐅᑎᑐᐊᕈᑎᒃ. ᐃᓄᒋᐊᒡᓗᑎᒃᑕᐅᖅ ᑲᑎᙵᑲᑕᖁᔭᐅᙱᑉᐳᑦ. ᑭᒃᑯᑐᐃᓐᓇᑦᑎᐊᑦ ᐳᓛᕆᐊᖃᑦᑕᖅᑐᑦ ᐃᓄᒋᐊᓗᐊᑲᑕᖁᔭᐅᙱᑉᐳᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᖕᓂ ᐃᓄᖕᓂᑦ, ᓲᕐᓗ ᐃᓐᓇᒃᑯᕕᖕᓂ ᐊᒻᒪ ᑲᒪᒋᔭᐅᖏᓐᓇᖅᑐᒃᑯᕕᖕᓂ. ᑲᑎᑦᑐᒪᓂᐊᕈᔅᓯ, ᐊᑦᑕᕐᓇᖅᑕᐃᓕᒪᑎᑦᑎᓗᓯ ᐊᒻᒪᓗ ᐃᓄᒋᐊᓗᐊᖅᑕᐃᓕᒪᓗᓯ.
ᑕᐃᒃᑯᐊ ᓄᓇᓖᑦ ᖃᓄᐃᓕᐅᖅᑎᑦᑎᔪᒪᓂᐊᖅᑐᑦ ᓲᕐᓗ ᐱᙳᐊᖅᑎᑦᑎᔪᒪᔪᑦ ᓯᐊᕐᕆᔮᕐᕕᖕᓂ ᐱᙳᐊᕐᕕᖕᒥᓘᓐᓃᑦ, ᒪᓕᒋᐊᖃᕐᓂᐊᖅᐳᑦ ᒫᓐᓇ ᑲᑎᙵᔪᓄᑦ ᑭᒡᓕᒋᑎᑕᐅᔪᒥᒃ, 50−ᐳᓴᓐ ᐃᓐᓄᒍᓐᓇᕐᓂᖓ ᐅᖓᑖᓄᐊᕆᐊᖃᙱᖦᖢᑎᒡᓗ ᐅᕝᕙᓘᓐᓃᑦ 100−ᓂᒃ ᐃᓄᖃᕐᓗᑎᒃ, ᓇᓕᐊᑐᐃᓐᓇᖅ ᐊᑦᑎᖕᓂᖅᓴᐅᔪᖅ. ᑕᒪᓐᓇ ᐊᑐᕆᐊᖃᓪᓚᕆᒃᐳᖅ ᖃᓂᒪᓐᓇᒥ ᐊᐃᑦᑐᕐᓗᐃᑎᑦᑎᙱᓐᓂᖅᓴᐅᖁᓪᓗᑕ.
ᓄᓇᓕᐅᖃᑎᒌᑦᑕᐅᖅ ᑲᑎᙵᑲᑕᖁᙱᒻᒥᔭᕗᑦ ᐊᐅᓪᓚᑲᑕᖁᙱᖦᖢᒋᓪᓗ. ᐊᓯᐊᓄᑦ ᓄᓇᓕᖕᓂ ᓂᐅᕐᕈᓂᐊᕈᕕᑦ ᖃᓄᐃᓕᐅᕆᐊᖅᑐᕐᓗᑎᑦ ᐅᕝᕙᓘᓐᓃᑦ ᐳᓛᕆᐊᕐᓗᑎᑦ, ᐊᐃᑦᑐᕐᓗᐃᑎᑦᑎᑐᐃᓐᓇᕆᐊᖃᖅᖅᐳᑎᑦ Omiᖃᑭᓕᓴ ᓄᕙᕐᔪᐊᕐᓇᒥᑦ ᓄᓇᕗᒻᒥ. ᓄᖅᑲᖅᑎᑦᑎᔭᕆᐊᖃᑐᐃᓐᓇᕆᐊᖃᖅᑐᒍᑦ ᓄᓇᓕᖕᓂ ᓂᐅᕐᕈᑲᑕᖃᑦᑕᖅᑐᓂᒃ, ᓇᓗᓇᐃᖅᓯᔪᖃᖅᐸᑦ ᓄᕙᕐᔪᐊᕐᓇᖅ−19−ᑖᖅᑐᒥᒃ. ᑭᓇᑐᐃᓐᓇᖅ ᐊᓯᐊᓄᑦ ᓄᓇᓕᖕᓄᑦ ᓂᐅᕐᕈᔪᖅ ᐅᐸᒃᒃᓯᒪᔭᖓᓃᖏᓐᓇᕆᐊᖃᕐᓂᐊᖅᐳᖅ ᑭᓯᐊᓂ ᐊᐅᓪᓚᑲᑕᒃᑐᓄᑦ ᑭᒡᓕᒋᑎᑕᐅᔪᖅ ᐊᑐᕈᓐᓃᖅᑎᑕᐅᒃᐸᑦ. ᑕᐃᒪᐃᓕᐅᕆᐊᖃᕐᓂᐊᖅᐳᑦ ᐊᐅᓚᑕᐅᓵᓕᓂᖅᓴᐅᖁᓪᓗᒍ Omicron-ᒥ ᐊᓐᓂᐊᓕᑲᑕᑐᐃᓐᓇᕆᐊᓖᑦ.
ᐅᔾᔨᕈᓱᑦᑎᐊᖁᔨᓪᓚᕆᒃᐳᖓ ᐃᓄᐃᑦ ᒪᓕᒋᐊᖃᕐᓂᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔭᖏᓐᓂᒃ ᒪᑐᐊᖅᓯᒪᔭᕆᐊᖃᕐᓂᖏᓐᓂᒡᓗ. ᓇᓗᓇᐃᖅᓯᔾᔪᑕᐅᔪᓂᑦ ᖃᐅᔨᓚᐅᖅᐳᑦ ᒪᑐᐊᖅᓯᒪᖃᑦᑕᖅᑐᑦ ᐊᑑᑎᖃᓪᓚᕆᖕᓂᖏᓐᓂᒃ ᐅᓄᙱᓐᓂᖅᓴᐅᖁᓪᓗᒋᑦ ᐊᒻᒪᓗ ᐊᐃᑦᑐᕐᓗᐃᙱᓐᓂᖅᓴᐅᓗᑎᒃ Omicron−ᑖᖅᑐᑦ. ᐋᓐᓂᐊᕐᕕᖕᒥ ᒪᑐᐊᖅᑖᕈᓐᓇᙱᒃᑯᕕᑦ, ᐱᖓᓱᑦ ᖃᓕᕇᒃ ᒪᑐᐊᑦ ᑕᑯᒃᓴᐅᑎᑦᑎᓯᒪᕗᑦ ᐊᐃᑦᑐᕐᓗᐃᓐᓇᙱᓐᓂᖅᓴᐅᓂᖏᓐᓂᒃ.
Omicron-ᒧᑦ ᖃᓂᒪᔾᔪᑕᐅᔪᑦ ᐊᔾᔨᒋᔭᐅᙱᑉᐳᑦ ᓄᕙᕐᔪᐊᕐᓇᖅ-19−ᒧᑦ ᖃᓂᒪᔾᔪᑕᐅᔪᒧᑦ. Omicron ᓇᓗᓇᐃᕆᐊᒃᓴᖅ ᐊᔪᕐᓇᖅᑐᖅ ᓄᕙᑐᐃᓐᓇᖅᑐᓂᑦ. ᑕᒪᓐᓇ ᐱᔾᔪᑎᒋᓪᓗᒍ, ᖃᓂᒪᑲᑕᓕᓵᕈᓂ, ᖁᐃᖅᓱᑲᑕᒡᓗᓂ, ᑕᒋᐅᑲᑕᒡᓗᓂ, ᐃᒡᒋᐊᕐᓗᒡᓗᓂ, ᑲᒃᑭᓕᑲᑕᒡᓗᓂ, ᐅᐸᒃᑕᐅᑦᑕᐃᓕᒪᓕᕐᓂᐊᖅᐳᑎᑦ ᐅᖄᓚᓗᑎᓪᓗ ᓄᕙᕐᔪᐊᕐᓇᖅ-19 ᐅᖄᓚᕝᕕᖓᓄᑦ 1-888-975-8601−ᒧᑦ ᖃᐅᔨᓴᖅᑕᐅᔪᒪᓗᑎᑦ.
ᐅᓄᓗᐊᕐᒪᑕ ᖃᐅᔨᒪᔭᐅ[ᕋᓂᙱᑦᑐᑦ, ᐅᓄᓗᐊᖅᖢᑎᒡᓗ ᐅᓗᕆᐊᓇᖅᑐᑦ ᓄᓇᕗᒻᒥᐅᓂᑦ ᖃᓄᐃᙱᑦᑐᓂᑦ ᐊᑦᑕᕐᓇᖅᑐᒧᐊᖅᓯᓇᔭᖅᑐᓂᑦ. ᖃᐅᔨᕗᒍᓪᓕ ᐃᓄᐃᑦ ᐱᖓᔪᖓᓂ ᑲᐱᔭᐅᓯᒪᔪᑦ 75 ᐳᓴᓐᑎᓗ 80 ᐳᓴᓐᑎᓗ ᐊᑯᓐᓂᖓᓂ ᐋᓐᓂᐊᓗᐊᕌᓗᒐᔭᙱᑦᑐᑦ ᐋᓐᓂᐊᕕᖕᒧᐊᖅᑕᐅᙱᓐᓂᖅᓴᐅᓗᑎᒡᓘᓐᓃᑦ Omicron ᐊᔾᔨᒋᙱᑕᖓᓄᑦ. ᑭᒃᑯᑐᐃᓐᓇᑦᑎᐊᑦ ᑲᐱᔭᐅᖁᓪᓗᒋᑦ ᑎᓕᐅᖅᐸᕗᑦ. ᒪᕐᕉᖕᓂᒃ ᑲᐱᔭᐅᓯᒪᒍᕕᑦ, ᐱᖓᔪᖓᓂ ᑲᐱᔭᐅᓂᐊᖅᐳᑎᑦ.
ᓴᐳᔾᔨᓯᒪᓂᖅ ᓄᓇᕗᒻᒥᑦ ᓄᕙᒡᔪᐊᕐᓇᖅ-19−ᒥ ᑭᒃᑯᓕᒫᖅ ᑲᒪᒋᔭᒃᓴᕆᕙᐅᒃ, ᐊᒃᓱᕈᕆᐊᖃᐃᓐᓇᖅᖢᑕᓗ. ᐊᑯᓂᐊᓘᓕᕐᒪᑦ ᐊᕐᕌᒎᒃ ᒪᕐᕉᒃ. ᖃᐅᔨᒪᔪᖓ ᑕᖃᓂᕐᓂ, ᑭᓯᐊᓂ ᐱᓇᔪᒍᑎᒋᔭᑦᑎᓐᓂ ᓄᖅᑲᕆᐊᖃᙱᑉᐳᒍᑦ. ᐃᖅᑲᐅᒪᔭᕆᐊᖃᖅᐳᒍᑦ ᖃᓄᐃᙱᓐᓂᕗᑦ ᐅᓗᕆᐊᓇᖅᑐᒦᙱᓐᓂᕗᓪᓗ ᒪᓕᖕᒪᑦ ᓴᐳᔾᔨᔾᔪᑎᒃᓴᓂ ᓴᖅᑭᓯᒪᔭᑦᑎᓐᓂᑦ. ᐋᓐᓂᐊᖅᑐᓕᕆᔨᒃᑯᑦ ᐊᑐᖁᔭᐅᔪᑦ, ᒪᑐᐊᖅᓯᒪᓂᖅ, ᐊᓂᑦᑕᐃᓕᒪᔭᕆᐊᖃᕐᓂᖅ ᐅᖃᐅᔾᔭᐅᒑᖓᕕᑦ ᐊᒻᒪᓗ ᐋᓐᓂᐊᓕᕇᒃᑯᑎᑦ ᑲᑎᖦᖢᒋᑦ ᐊᑑᑎᓕᖕᒥᑦ ᓴᐳᔾᔨᓯᒪᔾᔪᑎᐅᕗᖅ ᓄᕙᒡᔪᐊᕐᓇᖅ-19−ᒥᑦ. ᑕᒪᓐᓇ ᐊᑕᐅᑦᑎᒃᑰᖅᑕᐅᔭᕆᐊᓕᒃ, ᐊᑐᓂ ᐃᒻᒥᒃᑰᖅᑐᑦ ᓈᒻᒪᙱᒻᒪᑦ.
ᓄᓇᕗᒻᒥᐅᑦ ᖁᔭᓕᕙᒃᑲ ᕿᓄᐃᓵᑦᑎᐊᕐᒪᑕ ᐱᓕᕆᖃᑕᐅᑦᑎᐊᖅᖢᑎᒡᓗ. ᖁᕕᐊᓱᒡᕕᖕᒥ ᖁᕕᐊᓱᒋᑦᑎ ᐊᓂᕝᕕᐊᓯᐅᖅᑎᐊᕐᓗᓯᓗ. ᐃᓅᑦᑎᐊᕆᔅᓯ ᖃᓄᐃᙱᑦᑎᐊᕐᓗᓯᓗ.
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ:
https://www.gov.nu.ca/health/information/covid-19-novel-coronavirus
ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ:
https://www.gov.nu.ca/health/information/nunavuts-path
ᑐᑭᓯᒋᐊᕈᒪᒍᕕᑦ ᑲᐱᔭᐅᓐᓇᐅᓛᖅᑐᓂᑦ ᐅᕗᙵᕐᓗᑎᑦ:
https://gov.nu.ca/health/information/covid-19-vaccination