(ᓯᑎᐱᕆ 12, 2025 − ᐃᖃᓗᐃᑦ, ᓄᓇᕗᑦ) ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ (ᓄᓇᕗᑦ ᑐᙵᕕᒃᑯᑦ) ᐅᓪᓗᒥ ᓴᖅᑭᑦᑎᖅᑲᐅᕗᑦ ᓄᓇᕗᒻᒥ ᐅᑭᐅᖅᑕᖅᑐᒥ ᓄᓇᖁᑎᖓᓂ ᓴᐳᒻᒥᔭᐅᓂᖓᓂᓪᓗ ᐸᕐᓇᒍᑎᒥᒃ, ᐋᖅᑭᒃᑕᐅᓯᒪᓪᓗᓂ ᐃᓱᒪᒋᔭᐅᔪᓄᑦ ᐊᒻᒪ ᓯᕗᓪᓕᐅᔾᔭᐅᔪᒪᔪᓄᑦ ᐅᖃᐅᓯᐅᓚᐅᖅᑐᓂᑦ ᐅᑭᐅᖅᑕᖅᑐᒥ ᓄᓇᖁᑎᖓᓂ ᓴᐳᒻᒥᔭᐅᓂᖓᓄᓪᓗ ᑲᑎᒪᑎᓪᓗᒋᑦ ᐃᖃᓗᖕᓂ ᔫᓂᐅᓵᖅᑐᒥ.
ᓄᓇᓕᕆᓂᕐᒥᑦ ᐱᓕᕆᖃᑕᐅᔪᒪᔪᑦ ᐅᑭᐅᖅᑕᖅᑐᒥ ᐊᖏᒡᓕᕙᓪᓕᐊᑎᓪᓗᒍ ᐊᒃᑐᖅᑕᐅᔪᓪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᒃᑲᓕᕙᓪᓕᐊᑎᓪᓗᒍ, ᐱᒻᒪᕆᐊᓘᕗᖅ ᓄᓇᕗᒻᒥᐅᑦ ᐊᔪᕆᖅᓲᔾᔨᓗᑎᒃ ᑲᓇᑕᐅᑉ ᓄᓇᖁᑎᖓᑕ ᐱᓕᕆᐊᒃᓴᖏᓐᓂᒃ. ᑲᑎᒪᕐᔪᐊᕐᓂᖅ ᐸᕐᓇᒍᑎᓗ ᓇᓗᓇᐃᖅᓯᔪᐃᓐᓇᐅᕘᒃ ᐃᓄᐃᑦ ᐱᓕᕆᐊᒃᓴᓪᓗᐊᑕᖏᓐᓂᒃ ᓇᓗᓇᐃᖅᓯᑎᓪᓗᒋᑦ ᑲᓇᑕᐅᑉ ᐱᓇᓱᐊᖅᑕᖓᓂ ᐅᑭᐅᖅᑕᖅᑐᒥ. ᓄᓇᕗᒻᒥ ᐅᑭᐅᖅᑕᖅᑐᒥ ᓄᓇᖁᑎᖓᓂ ᓴᐳᒻᒥᔭᐅᓂᖓᓂᓪᓗ ᐸᕐᓇᒍᑎᒥ ᐊᔾᔨᒌᙱᑦᑐᓂᒃ ᑕᐅᑐᖅᑰᖅᑕᐅᔪᓂᒃ ᑲᑎᑎᑦᑎᕗᑦ ᓄᓇᕘᑉ ᓯᕗᓂᒃᓴᖓᓂ ᓴᐳᒻᒥᔭᐅᓂᖓᓂᑦ, ᑐᙵᕕᒋᔭᐅᓪᓗᓂᓗ ᑕᐅᑐᙳᐊᖅᑕᐅᔪᖅ ᐱᒻᒪᕆᐅᒋᔭᐅᔪᓄᑦ ᐊᒻᒪ ᓯᕗᓪᓕᐅᔾᔭᐅᔪᒪᔪᓄᑦ ᐃᓄᖕᓄᑦ ᓄᓇᕗᒻᒥ ᐊᖏᕐᕋᓕᖕᓄᑦ.
ᐸᕐᓇᒍᑕᐅᔪᖅ ᐊᒃᑐᐊᓂᖃᖅᐳᖅ ᐅᖃᐅᓯᐅᓯᒪᔪᓂᒃ ᐃᓄᐃᑦ ᓯᕗᓕᖅᑎᖏᓐᓂᒃ, ᓄᓇᕘᒥ ᐊᒻᒪ ᑲᓇᑕᒥ ᑭᒡᒐᖅᑐᖅᑎᓂᒃ, ᐃᓐᓇᕐᓂᒃ, ᒪᒃᑯᒃᑐᓂᒃ ᐊᓯᖏᓐᓂᒡᓗ ᐱᓕᕆᖃᑕᐅᓪᓗᐊᑕᖅᑐᓂᒃ.
"ᑲᓇᑕᒥ ᓴᖅᑭᔮᓕᖅᑎᑦᑎᒃᑲᓐᓂᖅᑎᓪᓗᑕ ᐅᑭᐅᖅᑕᖅᑐᒥ, ᓄᓇᕗᑦ ᑲᑎᒪᖃᑕᐅᔭᕆᐊᖃᖅᐳᖅ ᐋᖅᑭᒃᓱᐃᕙᓪᓕᐊᓗᑎᒃ ᐊᑐᐊᒐᕐᓂᒃ ᓯᕗᓂᒃᓴᑦᑎᓐᓂ ᓇᓗᓇᐃᖅᓯᔪᓂᒃ," ᓯᕗᓕᖅᑎ ᐲᔭᐃ ᐊᕿᐊᕈᖅ ᐅᖃᖅᑐᖅ. "ᑖᓐᓇ ᐸᕐᓇᒍᑎ ᓇᓗᓇᐃᖅᓯᕗᖅ ᓄᓇᕗᒻᒥᐅᑦ ᓯᕗᓕᖅᑎᐅᓂᖏᓐᓂᒃ ᓯᕗᒻᒧᐊᒃᑎᑦᑎᕙᓪᓕᐊᑎᓪᓗᒋᑦ ᑲᓇᑕᒥ ᒪᑭᒪᔾᔪᑎᓂᒃ, ᐆᒻᒪᖅᑯᑎᖃᖅᑎᑦᑎᑦᑎᐊᕐᓂᕐᒥᒃ ᐊᒻᒪ ᐃᖏᕐᕋᔪᓕᕆᓂᕐᒧᑦ ᐱᓕᕆᐊᒃᓴᓂᒃ ᓴᐳᔾᔨᓯᒪᓂᐊᖅᑐᓂᒃ ᑲᓇᑕᐅᑉ ᓄᓇᖁᑎᖓᓂ ᐱᕕᒃᓴᖃᖅᑎᑦᑎᓗᑕᓗ ᐃᓄᖁᑎᑦᑎᓐᓄᑦ."
"ᐃᓄᐃᑦ ᑐᙵᕕᒋᔭᐅᖏᓐᓇᐅᔭᖅᐳᑦ ᑲᓇᑕᐅᑉ ᓴᖅᑭᔮᕐᓂᖓᓄᑦ ᐅᑭᐅᖅᑕᖅᑐᒥ. ᑲᓇᑕᒥᐅᑦ ᓄᓇᖁᑎᖃᙱᓚᑦ ᐃᓄᐃᑦ ᓴᐳᔾᔭᐅᓯᒪᙱᑉᐸᑕ," ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᔨᐅᕆᒥ ᑐᕐᙶᓗᒃ. "ᑖᓐᓇ ᐸᕐᓇᒍᑕᐅᔪᖅ ᓇᓗᓇᙱᑦᑎᐊᖅᐳᖅ ᐅᑭᐅᖅᑕᖅᑐᒥ ᓄᓇᖁᑎᖓᓂ ᑕᓯᐅᖅᑕᐅᔭᕆᐊᖃᖅᐳᑦ ᐃᓄᖕᓄᑦ−ᐊᐅᓚᑕᐅᓗᑎᒃ ᓯᕗᓪᓕᐅᔾᔭᐅᔪᒪᔪᑦ."
ᐅᖃᓕᒫᕈᒪᒍᕕᐅᒃ ᓄᓇᕗᑦ ᐅᑭᐅᖅᑕᖅᑐᒥ ᓄᓇᖁᑎᖓᓂ ᓴᐳᒻᒥᔭᐅᓂᖓᓂᓪᓗ ᐸᕐᓇᒍᑎ, ᐅᕗᙵᕐᓗᑎᑦ: https://www.arcticsecuritysummit.ca