ᐃᖃᓗᐃᑦ, ᓄᓇᕗᑦ (ᒪᐃ 20, 2025) – ᓄᓇᕗᑦ ᒐᕙᒪᒃᑯᑦ (GN) ᐅᐃᓂᐹᒡᒥ ᓴᓈᓄᓪᓗ ᑕᑯᔭᒐᖃᕐᕕᒃ-ᖃᐅᒪᔪᖅ (WAG) ᓄᑖᙳᕆᐊᖅᑎᑦᑎᓯᒪᕗᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ (MOA−ᒥᒃ) ᐅᖓᕙᕆᐊᖅᑎᑦᑎᔪᒪᓪᓗᑎᒃ ᐊᕐᕌᒍᓄᑦ−ᖁᓕᓄᑦ ᐱᓕᕆᖃᑎᒌᖕᓂᕆᔭᐅᓂᐊᖅᑐᒥᒃ ᐊᐅᓚᑦᑎᓂᐊᕐᓗᓂ ᐃᓚᒋᔭᐅᔪᒥᒃ ᓄᓇᕗᑦ ᒐᕙᒪᖓᑕ ᑲᑎᖅᓱᖅᓯᒪᔭᖏᓐᓂᒃ.
ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᓇᓗᓇᐃᔭᐃᓯᒪᔪᖅ ᑐᑭᖏᓐᓂᑦ ᐅᐃᓂᐹᒡᒥ ᓴᓇᙳᐊᒐᖃᕐᕕᖕᒥᑦ-- ᖃᐅᒪᔪᖅ ᑲᔪᓯᓗᓂ ᐃᓂᖃᖅᑎᑦᑎᔪᖅ 7,000 ᐅᖓᑖᓂᑦ ᓄᓇᕗᑦ ᒐᕙᒪᒃᑯᑦ ᓴᓇᙳᐊᒐᖏᓐᓂᒃ ᑲᑎᖅᓱᖅᑕᐅᔪᑦ, ᐊᑐᐃᓐᓇᐅᑎᑦᑎᓗᑎᒃ ᐋᖅᑭᒃᐸᓪᓕᐊᓂᕐᒧᑦ ᐱᔨᑦᑎᕋᐅᑎᓂᒃ ᐊᒻᒪ ᐱᓕᕆᖃᑎᒌᒡᓗᑎᒃ ᐱᒻᒪᕆᐅᔪᓂᒃ ᐱᓕᕆᐊᒃᓴᓂᒃ. ᓄᓇᕗᑦ ᒐᕙᒪᒃᑯᑦ ᐊᑭᓖᖃᑦᑕᕐᓂᐊᖅᐳᑦ ᐅᐃᓂᐹᒡ ᓴᓇᙳᐊᒐᖃᕐᕕᖕᒧᑦ $715,000 ᐅᑭᐅᑦ ᑕᓪᓕᒪᑦ ᐊᑐᕐᓂᐊᖅᑐᓂᒃ. ᑖᓐᓇ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐃᓱᓕᕝᕕᖃᖅᑎᑕᐅᕗᖅ 2030−ᒥ.
"ᐊᓕᐊᓇᐃᒍᓱᒃᐳᖓ ᐱᓕᕆᖃᑎᖃᐃᓐᓇᕈᓐᓇᕋᒪ ᐅᐃᓂᐸᐃᒡ ᓴᓇᙳᐊᒃᑲᓄᑦ ᑕᑯᔭᒐᖃᕐᕕᖕᒥ ᐊᑯᓂᐅᔪᒃᑯᑦ ᑲᒪᒋᔭᐅᑎᓪᓗᒋᑦ ᓴᓇᐅᒐᑦᑎᐊᕙᑦ ᑲᑎᖅᓱᖅᑕᐅᓯᒪᔪᑦ. ᐱᒻᒪᕆᐅᕗᖅ ᒐᕙᒪᕗᑦ ᑕᒪᒃᑯᐊ ᓯᓚᕐᔪᐊᒥ ᓄᐊᑕᕗᑦ ᓴᐳᑎᔭᐅᓯᒪᑦᑎᐊᕐᓗᑎᒃ ᐊᒻᒪᓗ ᑐᖅᑯᖅᑕᐅᓯᒪᑦᑎᐊᕐᓗᑎᒃ ᑕᒪᒃᑯᐊ ᐅᑎᖅᑎᑕᐅᓇᓱᐊᖅᑎᓪᓗᒋᑦ. ᑖᔅᓱᒨᓇ ᖃᓄᖅᑑᕈᑎᒃᑯᑦ ᐱᓕᕆᖃᑎᒌᖕᓂᒃᑯᑦ, ᓄᓇᕘᑉ ᐃᓕᖅᑯᓯᓕᕆᓂᕐᒧᑦ ᐱᐅᔪᑦ ᐸᐸᑕᐅᕗᑦ ᐊᒻᒪᓗ ᐱᔭᒃᓴᐅᓪᓗᑎᒃ ᑭᖑᕚᒃᓴᑦᑎᓐᓄᑦ ᖃᐃᔪᓄᑦ", ᐅᖃᖅᑐᖅ ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ, ᓄᓇᕗᒻᒥ ᓯᕗᓕᖅᑎ ᐲᔾᔭᐃ ᐊᕿᐊᕈᖅ.
"ᐅᐃᓂᐹᒡᒥ ᓴᓇᙳᐊᒐᓄᑦ ᑕᑯᔭᒐᖃᕐᕕᒃ-ᖃᐅᒪᔪᖅ ᐅᐱᒍᓱᒃᑐᖅ ᐃᑲᔪᖅᑐᐃᖏᓐᓇᕐᓂᖏᓐᓄᑦ ᓄᓇᕗᑦ ᒐᕙᒪᒃᑯᓐᓂ ᐊᕐᕌᒍᓄᑦ ᑕᓪᓕᒪᒃᑲᓐᓂᕐᓄᑦ. ᖁᔭᓕᕗᒍᑦ ᐅᒃᐱᕆᔭᐅᔪᓐᓇᕋᑦᑕ ᐃᓂᖃᖅᑎᑦᑎᒋᐊᒃᓴᖅ ᐊᒻᒪ ᓴᓇᙳᐊᒐᓂᒃ ᑲᑎᖅᓱᐃᔪᓐᓇᕐᒪᑕ ᐅᓂᒃᑳᖅᑐᐊᖏᓐᓂᒃ ᐊᒻᒪ ᐱᐅᓯᖏᓐᓂᒡᓗ ᓄᓇᑦᑎᓐᓂ ᓄᓇᓕᖕᓄᑦ ᓄᓇᕗᒻᒧᑦ ᐅᑎᕋᓱᖕᓂᖏᓐᓄᑦ. ᑕᒪᓐᓇ ᐱᓕᕆᖃᑎᒌᖕᓂᖅ ᐃᑲᔪᑦᑎᐊᖅᓯᒪᔪᖅ ᓴᙱᒃᑎᒋᐊᖅᑎᑦᑎᓂᕐᒥᑦ ᐃᓕᖅᑯᓯᕐᒧᑦ ᐊᒃᑐᐊᖃᑎᒌᖕᓂᕐᒧᑦ ᐊᕕᒃᑐᖅᓯᒪᔪᓂᑦ. ᐱᓕᕆᖃᑎᒌᒃᓯᒪᔪᒍᑦ ᐅᓄᖅᑐᓄᑦ ᑐᑭᖃᑦᑎᐊᖅᑐᓄᑦ ᐱᓕᕆᐊᒃᓴᓄᑦ ᐊᕐᕌᒍᒐᓴᕐᓄᑦ, ᓂᕆᐅᒃᐳᖓᓗ ᑲᔪᓯᓂᐊᕐᓂᕐᒥᒃ ᑖᔅᓱᒥᖓ ᑲᑐᔾᔨᖃᑎᒌᖕᓂᕐᒥᒃ," ᐅᖃᖅᑐᖅ ᓯᑏᕙᓐ ᐳᐊᕆᔅ, ᐅᐃᓂᐹᒡᒥ ᓴᓇᙳᐊᒐᖃᕐᕕᖕᒥ-ᖃᐅᒪᔪᕐᒧᑦ ᑐᑭᒧᐊᒃᑎᑦᑎᔨ ᐊᒻᒪ ᐊᐅᓚᑦᑎᔨᒻᒪᕆᒃ.
ᑖᓐᓇ ᐊᖏᖃᑎᒌᒍᑎ ᓴᖅᑭᓯᒪᔪᖅ ᐊᑯᓂᐊᓗᒃ ᑲᑐᔾᔨᖃᑎᒌᒍᑕᐅᖃᑦᑕᖅᓯᒪᓕᖅᑐᓄᑦ ᓄᓇᕗᑦ ᒐᕙᒪᒃᑯᓐᓄᑦ ᐊᒻᒪ ᒫᓂᑑᐸᐅᑉ ᒐᕙᒪᒃᑯᖏᓐᓄᑦ, ᐱᒋᐊᖅᓯᒪᔪᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᐊᑎᓕᐅᖅᑕᐅᓯᒪᓪᓗᓂ ᑕᒪᐃᓐᓄᑦ ᐱᓕᕆᖃᑕᐅᔪᓄᑦ 2015-ᒥ. ᑕᒪᓐᓇ ᐱᓕᕆᖃᑎᒌᖕᓂᖅ ᐋᖅᑭᒃᓱᖅᑕᐅᓯᒪᕗᖅ ᐃᒃᐱᒋᔭᖃᑦᑎᐊᖅᖢᓂ, ᑐᓴᐅᒪᔭᐅᑦᑎᐊᖅᖢᑎᒃ ᐃᓕᖅᑯᓯᑐᖃᕐᓄᑦ ᓯᕗᓪᓕᖅᐸᐅᔾᔭᐅᓯᒪᔪᑦ, ᐱᓕᕆᐊᖃᓪᓚᕆᒍᒪᓂᕐᒥᒡᓗ ᐅᔾᔨᕐᓇᖅᓯᑎᑦᑎᓂᕐᒥᒃ ᔭᒐᑎᑦᑎᑦᑕᐃᓕᒪᓂᕐᒥᒡᓗ ᓄᓇᖃᖅᑳᖅᑐᑦ ᐃᓕᖅᑯᓯᖏᓐᓂᒃ ᓴᓇᙳᐊᖅᑕᖏᓐᓂᒡᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ.