ᐃᖃᓗᐃᑦ, ᓄᓇᕗᑦ (ᕕᕗᐊᕆ 16, 2023) – ᓄᓇᕗᑦ ᒐᕙᒪᖓ ᓯᕗᒻᒧᐊᖅᐸᓪᓕᐊᕗᖅ ᐱᓇᔪᖕᓂᕆᔭᒥᓂᒃ ᑲᔪᓯᑎᑦᑎᔪᒪᓪᓗᑎᒃ ᐱᓪᓗᐊᑕᕐᒥᒃ ᑲᑐᔾᔨᓗᑕ ᐱᔭᒃᓴᕆᔭᖏᓐᓂᒃ ᓯᕗᓪᓕᖅᐸᐅᔾᔭᐅᓯᒪᔪᓂᒃ ᐋᖅᑭᒃᓱᐃᔪᒪᓪᓗᑎᒃ ᐅᐸᓗᖓᐃᔭᐅᑎᓄᑦ ᖃᓄᐃᓕᐅᕐᓂᕐᒧᑦ ᐸᖕᓇᐅᑎ ᐃᓐᓇᕐᓄᑦ ᓄᓇᕗᒻᒥ. ᑖᓐᓇ ᐸᖕᓇᐅᑎ ᐃᓱᒪᓕᐅᕈᑕᐅᓂᐊᕐᐳᖅ ᐱᔾᔪᑎᓕᖕᓂ ᐃᓐᓇᐃᑦ ᐱᓕᕆᐊᒃᓴᕆᕙᒃᑕᖏᓐᓄᑦ ᐱᔨᑦᑎᕋᕐᓂᖏᓐᓄᓪᓗ ᑕᒪᒃᑯᐊ ᐃᓐᓇᐃᑦ ᐃᓅᔪᓐᓇᕐᓂᐊᕐᒪᑕ ᐊᕐᕌᓂᐅᓵᖅᑐᓂᒃ ᐃᒃᐱᒋᔭᖃᑦᑎᐊᕐᓗᑎᒃ ᑲᒪᒋᔭᖃᑦᑎᐊᕐᓗᑎᒡᓗ, ᖃᓂᓐᓂᖅᓴᐅᓗᑎᒃ ᐃᓚᒌᓄᑦ ᓄᓇᕗᒻᒥ.
ᑕᒪᑐᒪᓂ ᐱᓇᓱᐊᕈᓯᕐᒥ, ᒐᕙᒪᒃᑯᑦ ᑲᑎᒪᑎᑦᑎᓛᖅᑐᑦ ᓯᕗᓪᓕᖅᐹᒥ ᑕᓪᓕᒪᓂᒃ ᐊᕕᒃᑐᖅᓯᒪᔪᓂᒃ ᑲᑎᒪᑎᑦᑎᓗᑎᒃ, ᐱᒋᐊᕈᑎᖃᕐᓗᑎᒃ ᑭᕙᓪᓕᕐᒥ ᐃᓐᓇᐃᑦ ᑲᑐᔾᔨᖃᑎᒌᓂᒃ ᑲᖏᖅᖠᓂᕐᒥ. ᒪᕐᕉᖕᓂᒃ ᐃᓐᓇᑐᑦ ᑕᒪᐃᓐᓂᒃ ᓄᓇᓕᖕᓂ ᓂᕈᐊᖅᑕᐅᔪᖃᕐᓂᐊᖅᐳᖅ ᐃᓚᐅᖁᔭᐅᓗᑎᒃ ᐊᕕᒃᑐᖅᓯᒪᔪᓂ ᑲᑎᙵᑎᑕᐅᔪᓂᒃ.
“ᓄᓇᕗᒻᒥᐅᑦ ᐃᓐᓇᕈᖅᐸᓪᓕᐊᔪᑦ ᑕᑯᔭᕆᐊᖃᖅᐳᑦ ᐱᐅᓯᕙᓪᓕᐊᔪᓂᒃ ᖃᐅᑕᒫᑦ ᐊᑐᖃᑦᑕᖅᓯᒪᔭᖏᓐᓂᒃ,” ᐅᖃᓚᐅᕐᑐᖅ ᓯᕗᓕᖅᑎ ᐲᔭᐃ ᐊᕿᐊᕈᖅ. “ᑕᒪᓐᓇ ᐱᒋᐊᓲᖑᕗᖅ ᐱᔭᕆᐊᖃᓕᓚᐅᖅᑳᖅᑎᓐᓇᒋᑦ ᑲᒪᒋᔭᐅᑦᑎᐊᕆᐊᓖᑦ. ᐊᐅᓚᑕᐅᓪᓗᓂ ᑲᑐᔾᔨᓗᑕ ᐱᓕᕆᐊᒃᓴᕆᔭᐅᔪᒥᑦ, ᒐᕙᒪᕗᑦ ᐱᓕᕆᐊᖃᕐᓂᐊᖅᐳᑦ ᐊᖓᔪᖅᑳᕗᑦ ᐃᑦᑐᕆᔭᐅᔪᓪᓗ/ᓂᖏᐅᕆᔭᐅᔪᑦ ᐃᓐᓇᕈᖁᓪᓗᒋᑦ ᐃᖢᕐᕆᑦᑎᐊᕐᓗᑎᒃ ᐊᑦᑕᕐᓇᙱᑦᑐᒦᓪᓗᑎᒡᓗ ᐊᖏᕐᕋᕆᔭᒥᓂ.
“ᐱᓕᕆᑎᓪᓗᑕ ᒪᑐᐃᖅᓯᓇᓱᒃᖢᑕ ᑲᒪᒋᔭᐅᖏᓐᓇᖅᑐᒃᑯᕕᖕᒥ ᐃᓐᓇᖁᑎᕗᑦ ᐊᖏᕐᕋᖅᓯᒪᖁᓪᓗᒋᑦ, ᖃᐅᔨᒪᔪᒍᑦ ᐱᔨᑦᑎᕋᐅᑎᑦ ᐊᒥᒐᕐᓂᖏᓐᓂᒃ ᐃᑲᔪᖅᑐᐃᔾᔪᑎᓪᓗ ᐃᓐᓇᖁᑎᑦᑎᓐᓄᑦ ᒫᓐᓇ ᑕᒫᓃᑦᑐᓄᑦ,” ᓯᕗᓕᖅᑎ ᐊᕿᐊᕈᖅ ᐅᖃᓚᐅᕐᐳᖅ. “ᑖᓐᓇ ᐅᐸᓗᖓᐃᔭᐅᑎ ᐊᐅᓚᑦᑎᔾᔪᑕᐅᓇᓱᖕᓂᐊᖅᑐᖅ ᐃᑲᔪᖅᑐᐃᔾᔪᑎᓂᒃ ᓄᓇᓕᖕᓂ ᐃᑲᔪᕐᓗᒋᓪᓗ ᐃᓐᓇᐃᑦ ᕿᒥᕐᕈᑎᓪᓗᒋᑦ ᐱᓕᕆᐊᒃᓴᓂᒃ ᐊᒻᒪ ᐱᔨᑦᑎᕋᐅᑎᓂᒃ ᓄᓇᕗᑦ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᓂᒃ, ᕼᐋᒻᒪᓚᒃᑯᓐᓂ, ᐊᒻᒪ ᑮᓇᐅᔭᓕᐅᕋᓱᒃᑎᐅᙱᑦᑐᓂᒃ.”
ᑕᖅᑭᓂ ᐊᒡᒋᖅᑐᓂ, ᑐᓴᕋᓱᑲᑕᖕᓂᐊᖅᑐᑦ ᕿᑭᖅᑖᓘᑉ ᐅᐊᖕᓇᖓᓂ, ᕿᑭᖅᑖᓘᑉ ᓂᒋᐊᓂ, ᐊᒻᒪ ᕿᑎᕐᒥᐅᓂ, ᐊᒻᒪ ᐋᑐᕚᒥ ᑐᓴᕋᓱᒡᓗᑎᒃ ᐃᓐᓇᕐᓂᒃ, ᐃᓚᒌᓂᒃ, ᓄᓇᓕᖕᓂ, ᐊᒻᒪ ᐱᓕᕆᖃᑕᐅᔪᓂᒃ. ᐃᓚᐅᑎᑦᑎᓕᖅᐸᑕ ᐃᓄᒃᑎᑑᕐᓂᐊᖅᐳᑦ ᐊᐅᓚᑕᐅᓗᓂᓗ ᐃᓐᓇᕐᓄᑦ ᐅᖃᐅᔾᔪᐃᔨᓄᑦ ᐊᑐᓂ ᐊᕕᒃᑐᖅᓯᒪᔪᓂ.
ᑕᓪᓕᒪᑦ ᐅᖓᑖᓄᑦ ᑲᑎᓐᓂᐅᔪᑦ, ᐊᓯᖏᑦ ᐅᖃᖃᑎᖃᕐᓂᕐᒧᑦ ᐊᑐᖅᑕᐅᖃᑦᑕᖅᑐᑦ, ᓲᕐᓗ ᐊᐱᖅᓱᕐᓃᑦ, ᑲᑎᙵᓗᑎᒃ ᑲᑎᒪᓃᑦ, ᐊᒻᒪᓗ ᓈᓚᐅᑎᒃᑰᕐᓃᑦ, ᐊᑐᖅᑕᐅᔪᖕᓇᖅᑐᑦ ᑲᑎᖅᓱᐃᓂᕐᒧᑦ ᑐᑭᓯᐅᒪᔾᔪᑎᓂᒃ ᐃᓐᓇᕐᓂᑦ ᐃᓚᐅᔪᖕᓇᙱᑦᑐᓂᒃ ᐊᕕᒃᑐᖅᓯᒪᔪᓂᑦ ᑲᑎᓐᓂᐅᔪᓄᑦ.
ᓄᓇᕗᑦ ᒐᕙᒪᒃᑯᑦ ᐃᓚᐅᔪᓂᒃ ᐅᓂᒃᑳᖃᑦᑕᕐᓂᐊᖅᐳᑦ ᓇᓗᓇᐃᖅᓯᓇᓱᓕᖅᐸᑕ ᓇᓗᓇᐃᖅᓯᓇᓱᒡᓗᑎᓗ ᓇᓂᔭᖏᓐᓂᒃ.