ᐅᖃᖅᑎᑦᑎᔩ, ᐅᓪᓗᒥ ᓂᑯᕕᑉᐳᖓ ᑐᓴᖅᑎᑦᑎᔪᒪᓪᓗᖓ ᐅᖃᖃᑎᒌᖕᓂᑦᑎᐊᕚᓘᓚᐅᖅᑐᒥᒃ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᑎᓪᓗᒋᑦ, ᕕᕗᐊᕆ 3−ᖑᑎᓪᓗᒍ.
ᐅᖃᖅᑎᑦᑎᔩ, ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᓲᖑᕗᑦ ᐊᕐᕌᒍᑕᒫᖅ ᓯᕗᒻᒧᐊᒃᓯᔪᒪᓪᓗᑎᒃ ᐅᑭᐅᖅᑕᖅᑐᒥᑦ ᐱᔪᒥᒋᔭᐅᕙᒃᑐᓂᑦ, ᐅᖃᖃᑎᒌᒃᖢᑎᒃ ᖃᓄᐃᔾᔪᑕᐅᔪᓂᒃ ᐃᓱᒪᒋᔭᐅᕙᒃᑐᓂᑦ ᐃᓱᒫᓘᑎᒋᔭᐅᕙᒃᑐᓂᓪᓗ, ᐅᑭᐅᖅᑕᖅᑐᒥᓪᓗ ᐋᖅᑭᒋᐊᕈᑎᓕᐅᖅᐸᒃᖢᑎᒃ.
ᐅᖃᖅᑎᑦᑎᔩ, ᑖᓐᓇ ᓯᕗᓪᓕᖅᐹᕆᓚᐅᖅᐸᕋ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᕆᕙᒃᑕᖓᓂᑦ ᓄᓇᕗᒻᒥ ᓯᕗᓕᖅᑎᐅᑎᓪᓗᖓ. ᑲᑎᒪᑎᓪᓗᑕ ᐅᖃᐅᓯᖃᓚᐅᖅᐳᒍᑦ ᐱᒻᒪᕆᖕᓂ ᐅᑭᐅᖅᑕᖅᑐᒥᑦ ᓯᕗᓪᓕᐅᔾᔭᐅᔭᕆᐊᓕᖕᓂᑦ ᓲᕐᓗ ᐊᐅᓚᔪᓐᓇᐅᑏᑦ, ᐃᒡᓗᓕᕆᓂᖅ, ᐅᑭᐅᖅᑕᖅᑐᖅ ᐊᒻᒪᓗ ᐅᑭᐅᖅᑕᖅᑐᒥᑦ ᐊᑐᐊᒐᐃᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖏᑦ ᑕᐃᓯᒐᓛᒡᓗᒍᑦ.
ᐅᖃᖅᑎᑦᑎᔩ, ᐊᖏᓛᖑᔪᑦ ᓯᕗᓪᓕᐅᑎᔭᕆᐊᖃᖅᑕᑦᑎᓐᓂ ᐅᑭᐅᖅᑕᖅᑐᒥᑦ ᐊᑐᐊᒐᕐᒥᑦ ᐊᐅᓚᔪᓐᓇᐅᑏᑦ ᐃᒡᓗᓕᕆᓂᕐᓗ. 2020 ᓄᓇᕗᒻᒥ ᐊᐅᓚᔪᓐᓇᐅᑎᓄᑦ ᐃᓚᑰᓂᕆᔭᐅᔪᓄᑦ
ᑭᒡᓕᓯᓂᐊᕐᓂᖅ ᐱᔭᕇᖅᑕᐅᓚᐅᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ, ᓇᓗᓇᐃᕆᕗᖅ ᐊᐅᓚᔪᓐᓇᐅᑏᑦ ᐊᒡᒍᖅᓯᒪᓂᖏᑦ ᑎᑭᐅᒪᓕᖅᑎᑕᐅᔭᕆᐊᓖᑦ ᑲᓇᑕᓕᒫᒥᑦ. ᐊᐅᓚᔪᓐᓇᐅᑎᓄᑦ ᑮᓇᐅᔭᑦ ᐋᖅᑭᒋᐊᕈᓐᓇᕆᐊᖃᖅᐳᑦ ᑲᒪᒋᔭᐅᑦᑎᐊᕐᓗᓂᓗ ᐊᑯᓂᐅᔪᒧᑦ ᐊᐅᓚᔪᓐᓇᐅᑎᓄᑦ ᐱᔭᐅᔭᕆᐊᓕᖕᓄᑦ.
ᐊᖏᔪᒥᒃ ᑮᓇᐅᔭᖃᖅᑎᑕᐅᙱᓗᐊᕆᕗᖅ ᐃᒡᓗᓕᕆᔭᕆᐊᖃᓪᓚᕆᖕᓂᖅ ᓄᓇᕗᒻᒥ. ᓄᓇᕗᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖃᖅᑎᑕᐅᖏᓐᓇᕆᐊᖃᖅᐳᖅ ᑭᒃᑯᑐᐃᓐᓇᕐᓄᑦ ᐃᒡᓗᒃᓴᓄᑦ ᐃᓚᑰᓂᕆᔭᖏᓐᓄᑦ ᐊᒥᒐᕈᑕᐅᔪᓄᓪᓗ ᐸᓚᐅᒻᒥᖅᓯᖁᓪᓗᒍᑦ ᐃᓄᒋᐊᓗᐊᖃᑦᑕᕐᓂᖅ. ᐅᖃᖅᑎᑦᑎᔩ, ᐊᐅᓚᔪᓐᓇᐅᑎᓄᑦ, ᐊᖏᖃᑎᒌᒍᑕᐅᔭᕆᐊᖃᖅᐳᖅ ᐊᕐᕌᒍᒐᓴᖕᓄᑦ ᐅᐸᓗᖓᐃᔭᐅᑕᐅᓯᒪᔪᒃᑯᑦ ᑮᓇᐅᔭᖃᖅᑎᑕᐅᓗᓂᑦ ᐱᖃᓯᐅᔾᔨᓗᓂᑦ ᐋᖅᑭᒋᐊᖃᑦᑕᕈᓐᓇᕐᓂᖅ ᐋᖅᑭᒃᑕᐅᓯᒪᔪᓄᑦ ᐊᑐᖅᑕᐅᕙᓪᓕᐊᔪᓄᓪᓗ ᑮᓇᐅᔭᑎᒍᑦ, ᐃᓕᑕᖅᓯᓯᒪᔪᒃᑯᑦ ᓄᓇᕗᑦ ᑭᒡᓕᖃᕈᑎᖏᓐᓂᑦ.
ᐃᓱᒪᒌᓐᓇᕐᓗᒍᑦ ᐊᑐᑦᑎᐊᕐᓂᕆᔭᖓ ᑕᑎᖃᕐᓂᖓᓂᑦ ᐱᓕᕆᐊᖃᕈᒪᓂᕐᒧᑦ ᑐᕌᖓᔪᒧᑦ, ᐅᐸᓗᖓᐃᔭᖅᓯᒪᔪᒃᑯᑦ ᑮᓇᐅᔭᖃᖅᑎᑦᑎᓂᕐᒧᑦ ᑎᑭᐅᒪᖁᓪᓗᒍᑦ ᐱᒻᒪᕆᖕᓂ ᐱᔭᕆᐊᓕᑦᑎᓐᓄ, ᐱᓕᕆᖃᑎᖃᖃᑦᑕᐃᓐᓇᖅᐳᒍᑦ ᐱᒋᐊᕈᒪᓪᓗᑕᓗ ᐊᑐᓕᖅᑎᑦᑎᓂᕐᒥᑦ ᑕᒪᑐᒥᖓ ᐱᓕᕆᔾᔪᑎᒃᓴᒥᑦ.
ᐅᖃᖅᑎᑦᑎᔩ, ᐱᓕᕆᐊᖃᐃᓐᓇᕈᒪᕗᒍᑦ ᐱᔭᕇᕈᒪᓪᓗᒍᑦ ᐅᑭᐅᖅᑕᖅᑐᒥᑦ ᓯᓚᓕᕆᓂᕐᒧᑦ ᐅᓂᒃᑳᖅ ᐊᑎᓕᐅᖅᑕᐅᔪᒃᓴᐅᓗᓂᑦ ᐅᑭᐅᖅᑕᖅᑐᒥᑦ ᓯᕗᓕᖅᑎᐅᔪᓄᑦ ᑲᑎᒪᓕᖅᑎᓪᓗᒋᑦ ᐅᐱᕐᖔᖑᓂᐊᖅᑐᖅ. ᑖᓐᓇ ᐅᓂᒃᑳᖅ ᐃᑲᔫᑎᓂᐊᖅᑐᖅ ᐅᖃᖃᑎᒌᓕᕈᑕᐅᕙᒡᓗᓂᓗ ᐃᑲᔪᐃᔪᒪᓂᕐᒧᑦ ᐊᑐᓗᐊᖅᑕᐃᓕᓇᓱᐊᕐᓂᕐᒥᑦ ᓄᓇᓕᖕᓂᑦ ᐅᑭᐅᖅᑕᖅᑐᒥᑦ. ᑭᖑᓪᓕᕐᒥᑦ, ᓴᖅᑭᑦᑎᓇᓱᐊᕐᓂᖅ ᐅᑭᐅᖅᑕᖅᑐᒥᑦ ᓯᓚᓕᕆᓂᕐᒧᑦ ᐱᔨᑦᑎᕋᕐᕕᖕᒥᑦ ᓄᓇᕗᑦ ᒐᕙᒪᖓᓂ ᐱᕕᖃᓕᖅᐹᓪᓕᕈᑕᐅᓇᔭᖅᐳᖅ ᓯᓚᐅᑉ ᒥᒃᓵᓅᖓᔪᓂᑦ ᐱᖃᓯᐅᔾᔨᑦᑎᐊᕐᓂᖅᓴᐅᓕᕐᓗᑎᒡᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᓱᒪᓕᐅᕆᖃᑦᑕᕐᓂᕐᒥᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.