ᓯᕗᓕᖅᑎᐅᑉ ᓴᖅᑭᑕᖏᑦ ᑲᑐᔾᔨᓗᑕ ᐱᕙᓪᓕᐊᓂᖓᓄᑦ ᐅᓂᒃᑳᖅ

ᐃᖃᓗᐃᑦ, ᓄᓇᕗᑦ (ᒫᔾᔨ 14, 2023) − ᐅᓪᓗᒥ ᒪᓕᒐᓕᐅᕐᕕᖕᒥ, ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᓴᖅᑭᑦᑎᖅᑲᐅᕗᖅ ᐅᓂᒃᑳᒥᒃ ᑕᐃᔭᐅᔪᒥᒃ, ᓄᓇᕗᑦ ᒐᕙᒪᒃᑯᑦ ᐱᕙᓪᓕᐊᓂᖓᓂᒃ ᑲᑐᔾᔨᓗᑕ ᐱᓕᕆᐊᒃᓴᖏᓐᓂᒃ ᓯᕗᓪᓕᐅᑎᑕᐅᔪᒪᔪᑦ: ᓇᓗᓇᐃᖅᑕᐅᔪᑦ 2022−ᒥ ᐱᓕᕆᐊᖑᓯᒪᔪᑦ 2023−ᒧᓪᓗ ᐸᕐᓇᐅᑎᑦ. 

ᑖᒃᑯᐊ ᐱᕙᓪᓕᐊᓂᖓᓂ ᐅᓂᒃᑳᑦ ᒪᓕᒃᐳᑦ ᐊᓂᒍᖅᑎᑕᐅᓂᖏᓐᓂᒃ ᑮᓇᐅᔭᖅᑐᕈᑎᒃᓴᐃᑦ ᐃᑲᔪᖅᑐᐃᔪᑦ ᒐᕙᒪᒃᑯᑦ ᐱᓕᕆᐊᕆᓯᒪᔭᖏᓐᓂᒃ, ᑐᕌᒐᖃᖅᑐᑦ ᐃᓐᓇᕈᖅᐸᓪᓕᐊᔪᑦ ᐃᓱᒪᒋᔭᐅᓪᓗᑎᒃ ᓄᓇᕗᒻᒥ, ᐃᒡᓗᓕᕆᓂᕐᒥᒃ ᐃᓚᒋᐊᖅᑎᑦᑎᓂ, ᖃᓄᐃᙱᑎᑦᑎᓂᖅ ᒪᒥᓴᖅᑎᑦᑎᓂᕐᓗ, ᐃᑲᔫᑎᑖᕋᓱᐊᒃᑲᓐᓂᕐᓗᑎᒃ ᐃᓕᓐᓂᐊᕐᓂᕐᒥᒃ, ᐊᔾᔨᒌᙱᑦᑐᓂᒡᓗ ᓄᓇᓕᖕᓂ ᑮᓇᐅᔭᓕᐅᕈᑎᖃᕋᓱᐊᕐᓂᖅ.

"ᑖᓐᓇ ᐅᓂᒃᑳᖅ ᓴᖅᑭᔮᖅᑎᑦᑎᔪᖅ ᐊᑐᕐᓂᐊᕐᓂᕋᖅᓯᒪᔭᑦᑎᓐᓂᒃ ᑐᓴᐅᒪᑎᑦᑎᕙᓪᓕᐊᔪᒪᓪᓗᑕ ᐊᑐᓕᖅᑎᑕᐅᓂᖓᓂ ᑲᑐᔾᔨᓗᑕ ᐊᑐᐃᓐᓇᐅᓗᓂ. ᐊᓕᐊᓇᐃᒍᓱᑦᑎᐊᖅᐳᖓ ᑐᓴᖅᑎᑦᑐᓐᓇᕋᒃᑭᑦ ᑖᒃᑯᓂᖓ ᐱᓕᕆᐊᕆᓯᒪᔭᑦᑎᓐᓂᒃ ᐊᕐᕌᒍᒥ ᓇᑉᐸᖓᓂᓪᓗ ᓯᕗᓕᖅᑎᓂᒃ," ᓯᕗᓕᖅᑎ ᐊᕿᐊᕈᖅ ᐅᖃᖅᐳᖅ. 

ᐅᓂᒃᑳᒦᖃᑕᐅᔪᖅ ᓇᐃᓈᖅᓯᒪᔪᖅ 2022−ᒥ ᐱᓕᕆᐊᖑᓯᒪᔪᑦ, ᐊᖏᕈᑕᐅᓯᒪᔪᑦ ᒐᕙᒪᒃᑯᓐᓂ ᐱᓕᕆᐊᕆᔪᒪᔭᖏᑦ 2023−ᒥ, ᐱᓕᕆᐊᖑᔪᓪᓗ ᓇᓗᓇᐃᕈᑎᖏᑦ ᐊᒃᑐᐊᓂᓖᑦ ᑕᒪᐃᓐᓄᑦ ᑕᓪᓕᒪᓄᑦ ᐱᓕᕆᐊᒃᓴᓪᓗᐊᑕᖏᓐᓄᑦ ᓯᕗᓪᓕᐅᔾᔭᐅᔪᒪᔪᓄᑦ.

ᓄᓇᕗᒻᒥᐅᑦ ᑐᙵᓱᒃᑎᑕᐅᕗᑦ ᕿᒥᕐᕈᖁᔭᐅᓪᓗᑎᒃ ᑖᔅᓱᒥᖓ ᐊᔾᔨᙳᐊᒥᒃ ᓄᓇᕗᒻᒥ ᐱᕙᓪᓕᐊᓂᕆᔭᐅᔪᑦ ᐃᑭᐊᖅᑭᕕᖓᓂ ᐅᕙᓂ ᓄᓇᕗᒻᒥ ᒐᕙᒪᖓᑦ ᐱᕚᓪᓕᕐᓂᖅ ᑲᑐᔾᔨᓗᑕ ᐱᓕᕆᐊᒃᓴᖏᓐᓂ ᓯᕗᓪᓕᐅᔾᔭᐅᔭᕆᐊᓕᖕᓂ.