ᐅᖃᖅᑎᑦᑎᔩ, ᐅᓪᓗᒥ ᓇᖏᖅᓯᔪᖓ ᐃᓕᓴᕆᒍᒪᓪᓗᒋᑦ ᑭᒃᑯᑐᐃᓐᓇᕐᓂᒃ ᐱᔨᑦᓯᕋᖅᑎᐅᔪᑦ ᐃᖅᑲᓇᐃᔭᖅᑎᕗᑦ ᐱᔨᑦᓯᕋᖅᑎᕗᓪᓗ. ᐊᔪᙱᓂᖅᐹᖑᓚᐅᖅᑐᑦ ᐊᐅᓚᑦᓰᓐᓇᕈᓐᓇᖁᓪᓗᒋᑦ ᐊᔪᕐᓇᖅᑐᒃᑰᖅᑎᓪᓗᑕ. ᐅᖃᐅᓯᖃᕈᒪᒻᒥᔪᖓ ᐊᔾᔨᒌᙱᑦᑐᓂᒃ ᐃᑲᔫᑎᐅᖃᑦᑕᓚᐅᖅᑐᓂᒃ ᓄᓇᕗᑦ ᒐᕙᒪᒃᑯᖏᓐᓂ ᑕᒪᑐᒪᓂ ᑭᖑᓪᓕᖅᐹᒥ ᓯᐊᕐᒪᐸᓪᓕᐊᓂᖓᓂ ᓄᕙᔾᔪᐊᕐᓇᖅ 19.
ᐅᖃᖅᑎᑦᑎᔩ, ᓄᓇᕗᒻᒥ ᓄᓇᓕᓐᓂ ᒐᕙᒪᐃᑦ ᐱᒻᒪᕆᐊᓗᒻᒥᒃ ᐱᓕᕆᖃᑕᐅᓚᐅᖅᑐᑦ ᓯᐊᕐᒪᑦᑕᐃᓕᑎᑦᓯᓂᕐᒧᑦ ᓄᕙᔾᔪᐊᕐᓇᖅ 19-ᒥᒃ ᓄᓇᕗᒻᒥ. $4 ᒥᓕᐊᓐ ᐊᑐᖅᑐᑦᓴᓕᐊᖑᓚᐅᖅᑐᑦ ᓄᓇᓕᓐᓂ ᒐᕙᒪᓄᑦ ᐃᑲᔪᑎᐅᓪᓗᑎᒃ ᐱᑕᖃᕆᐊᖃᓪᓚᕆᑦᑐᓂᒃ ᓄᓇᓕᓐᓂ ᐱᔨᑦᓯᕋᐅᑎᓂᒃ.
ᓄᓇᓕᓐᓂ ᓈᓚᐅᑎᖃᕐᕖᑦ, ᐱᒻᒪᕆᐅᓂᖃᖅᑐᑦ ᓄᓇᕗᒻᒥᐅᑦ ᑐᓴᐅᒪᐃᓐᓇᕈᓐᓇᖁᓪᓗᒋᑦ, ᑐᓂᔭᐅᓚᐅᖅᑐᑦ ᖄᒃᑲᓐᓂᖓᒍᑦ $375,000 ᓄᓇᓕᓐᓂ ᓈᓚᐅᑎᖃᕐᕖᑦ ᐊᐅᓚᔾᔪᑎᖏᓐᓄᑦ.
ᔭᓐᓄᐊᓕᒥ, ᒐᕙᒪᒃᑯᑦ ᒥᑭᔫᑎᓄᑦ ᓇᒻᒥᓂᖃᖅᑎᐅᔪᓄᑦ ᐃᑲᔫᑎ ᐊᑐᐃᓐᓇᐅᑎᑕᐅᓚᐅᖅᑐᖅ ᖄᒃᑲᓐᓂᖓᒍᑦ ᑮᓇᐅᔭᖃᖅᑎᑕᐅᓂᕐᒧᑦ $5,000-ᒨᖓᔪᓂᒃ ᐃᑲᔫᑎᑦᓴᐅᓗᑎᒃ ᐱᔪᓐᓇᖃᑕᐅᔪᓄᑦ ᓇᒻᒥᓂᖃᖅᑎᐅᔪᑦ ᐊᑭᓕᖅᓱᕆᐊᓕᖏᓐᓄᑦ, ᐊᒻᒪᓗ $625,000 ᐃᑲᔫᑎᐅᓚᐅᕐᒥᔪᑦ ᓄᓇᕗᒻᒥ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ ᐃᑲᔫᑎᑦᓴᐅᓗᑎᒃ ᐊᖑᓇᓱᑦᑎᓄᑦ ᓄᓇᕗᒻᒥᐅᓄᑦ ᐊᖑᓇᓱᖃᑦᑕᕈᓐᓇᖁᓪᓗᒋᑦ ᐃᓄᓕᖅᑕᓂᒃ ᓂᕿᑦᓯᐊᕙᓐᓂᒃ.
ᑭᖑᓪᓕᖅᐹᒥ, ᒐᕙᒪᒃᑯᑦ ᓴᓂᕐᕙᐃᓚᐅᖅᑐᑦ $7.7 ᒥᓕᐊᓐ ᓂᕆᔭᑦᓴᖃᑦᓯᐊᖅᑎᑦᓯᓂᕐᒧᑦ ᐊᔪᖅᓴᓗᐊᑦᑕᐃᓕᑎᑦᓯᓂᕐᒧᓪᓗ ᐃᑲᔫᑎᓄᑦ.
ᐅᖃᖅᑎᑦᑎᔩ, ᐃᓕᓴᕆᒍᒪᔭᒃᑲ ᖁᔭᓐᓇᒦᕈᒪᓪᓗᒋᓪᓗ ᐊᑕᖏᖅᑐᒋᑦ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᖏᑦ, ᐊᒻᒪᓗ ᓄᓇᕗᒻᒥ ᓄᓇᓕᓐᓂᓗ ᒐᕙᒪᓂ ᑲᑐᔾᔨᖃᑎᕗᑦ, ᑕᖃᔫᔮᕈᓐᓇᕋᑎᒃ ᐊᑦᓱᕉᑎᖃᖅᐸᓚᐅᖅᑐᑦ ᐊᕐᕌᒎᓯᒪᔫᓐᓂᒃ ᒪᕐᕉᓐᓂᒃ ᑕᒪᒃᑯᓄᖓ ᐃᑲᔪᖅᑕᐅᒋᐊᖃᓪᓚᕆᑦᑐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.