ᐃᖃᓗᐃᑦ, ᓄᓇᕗᑦ (ᒪᐃ 20, 2025) – ᓄᓇᕗᒻᒥ ᐱᓕᕆᖃᑎᒌᑦ ᑲᑎᒪᔨᕋᓛᖏᑦ (NPC) – ᐅᑯᐊᖑᓪᓗᑎᒃ ᓯᕗᓕᖅᑏᑦ ᑲᑎᒪᔨᖏᑦ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂᒃ. (ᓄᓇᕗᑦ ᑐᙵᕕᒃᑯᑦ) − ᐅᓪᓗᒥ ᐃᖃᓗᖕᓂ ᑲᑎᒪᖅᑲᐅᔪᑦ ᓯᕗᒻᒧᐊᒃᑎᑦᑎᓇᓱᒃᖢᑎᒃ ᑲᑐᔾᔨᓗᑎᒃ ᓯᕗᓪᓕᐅᑎᔪᒪᔭᖏᓐᓂᒃ.
ᑲᑎᒪᑎᓪᓗᒋᑦ, ᑲᑎᒪᔨᕋᓛᑦ ᐊᖏᕈᑎᖃᓚᐅᖅᐳᑦ ᒪᕐᕉᖕᓂᒃ ᓄᑖᓂᒃ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᓂᒃ ᖃᓄᖅᑑᕈᑎᒃᓴᓂᒃ ᐱᔾᔪᑎᖃᓪᓗᐊᑕᖅᖢᑎᒃ ᐊᐅᓚᔪᓐᓇᐅᑎᓂᒃ ᐊᒻᒪ ᐅᑭᐅᖅᑕᖅᑐᒥ ᓇᖕᒥᓂᕆᔭᐅᓂᖓᓂᒃ ᐊᒻᒪ ᓴᐳᔾᔭᐅᓯᒪᓂᖓᓂᒃ. ᑲᑎᒪᔨᕋᓛᑦ ᑕᓪᓕᒪᑦ ᐱᓕᕆᔾᔪᑎᒃᓴᓄᑦ ᐸᕐᓇᐅᑎᖏᑦ ᐱᔾᔪᑎᖃᓗᐊᖅᐳᑦ ᓄᑕᖅᑲᓄᑦ ᖃᓄᐃᙱᑦᑎᐊᖅᑎᑦᑎᓂᕐᒧᑦ, ᐃᓐᓇᕐᓄᑦ, ᐃᒡᓗᓕᕆᓂᕐᒧᑦ, ᓄᓇᓕᖕᓂ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐱᓕᒻᒪᒃᓴᖅᑎᑦᑎᓂᕐᒧᑦ.
"ᐅᐱᒋᕙᕗᑦ ᓄᓇᕗᑦ ᑐᙵᕕᒃᑯᑦ ᓄᑖᒥᒃ ᓯᕗᓕᖅᑎᑖᓵᖓᑦ ᐱᓕᕆᖃᑎᒌᒃᐸᓪᓕᐊᓂᖏᓐᓄᑦ ᓯᕗᒻᒧᐊᒃᑎᑦᑎᓇᓱᒃᖢᑎᒃ ᐅᖃᖃᑎᒌᖕᓂᕐᒥᒃ ᑖᒃᑯᓂᖓ ᐱᒻᒪᕆᐅᔪᓂᒃ ᐱᓕᕆᐊᒃᓴᓂᒃ, ᐊᒃᑐᐃᕙᒃᑐᑦ ᑭᒃᑯᑐᐃᓐᓇᑦᑎᐊᓂᒃ ᓄᓇᑦᑎᓐᓂ," ᓯᕗᓕᖅᑎ ᐱᔭᐃ ᐊᕿᖃᕈᖅ ᐅᖃᖅᑐᖅ. "ᖁᕕᐊᓲᑎᖃᖅᐳᒍᑦ ᐱᓕᕆᖃᑎᒌᒍᓐᓇᕐᓂᑦᑎᓐᓂᒃ ᑲᓇᑕᒥ−ᐱᕈᖅᓴᐃᓂᕐᒧᑦ ᐱᓕᕆᐊᓂᒃ ᐃᑲᔫᑕᐅᓂᐊᖅᑐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓴᐳᔾᔭᐅᓯᒪᔪᓂᒃ. ᐱᕙᓪᓕᐊᑎᑦᑎᔪᒍᑦ ᑖᒃᑯᓂᖓ ᐱᓪᓗᐊᑕᐅᔪᓂᒃ ᐊᒻᒪᓗ ᓂᕆᐅᒃᐳᒍ ᐱᓕᕆᖃᑎᖃᐃᓐᓇᕐᓂᐊᕐᓂᑦᑎᓐᓂᒃ ᓄᓇᕗᑦ ᑐᙵᕕᒃᑯᓐᓂᒃ ᐱᐅᓯᕙᓪᓕᐊᖁᓪᓗᒋᑦ ᐃᓄᐃᑦ ᐊᒻᒪᓗ ᓄᓇᕗᒻᒥᐅᑦ ᐃᓅᓯᖏᑦ."
"ᑲᑐᔾᔨᓂᕐᒧᑦ ᑐᕌᒐᕗᑦ ᐊᑕᖏᖅᓯᒪᐃᓐᓇᕆᐊᓕᒃ ᐊᔾᔨᒌᑎᑦᑎᓗᓂᓗ ᐊᑐᓕᖅᑎᑦᑎᓂᕐᒥᑦ ᓄᓇᕗᒻᒥ ᐊᖏᕈᑎᒥᑦ, ᓴᐳᔾᔨᑐᐃᓐᓇᙱᖦᖢᓂ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑭᓯᐊᓂᑦᑕᐅᖅ ᑐᙵᕕᒋᔭᐅᒋᓪᓗᓂ ᐋᖅᑭᒋᐊᕈᑎᓄᑦ, ᐅᑭᐅᖅᑕᖅᑐᒥ ᓇᖕᒥᓂᕆᔭᐅᓂᖓᓄᑦ, ᐊᒻᒪ ᓴᐳᔾᔭᐅᓯᒪᓂᖓᓄᑦ ᑐᙵᕕᖃᖅᑐᖅ ᐃᓄᐃᑦ ᐱᐅᓯᑐᖃᖏᓐᓂᒃ ᐊᒻᒪ ᐊᑐᖅᑕᐅᖏᓐᓇᖅᑐᓂᒃ ᐊᒻᒪ ᐃᓄᖃᐃᓐᓇᖅᑐᓂᒃ," ᐅᖃᓚᐅᖅᐳᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᔨᐅᕆᒥ ᑑᕐᙶᓗᒃ. "ᑖᒃᑯᐊ ᒪᕐᕉᒃ ᓄᑖᒃ ᐱᓕᕆᔾᔪᑎᒃᓴᓄᑦ ᐸᕐᓇᐅᑏᒃ ᐋᖅᑭᒃᑕᐅᓯᒪᕗᑦ ᐱᐅᓯᒋᐊᕈᑕᐅᓇᓱᒃᖢᑎᒃ ᐅᑭᐅᖅᑕᖅᑐᒥ ᐊᐅᓚᔪᓐᓇᐅᑎᓄᑦ ᐱᐅᓯᒋᐊᕈᑕᐅᓗᑎᒃ ᐃᓄᐃᑦ ᐃᓅᓯᖏᓐᓄᑦ ᐅᔾᔨᕐᓇᖅᑐᒥᒡᓗ ᓯᕗᒻᒧᐊᒃᑎᑦᑎᓗᑎᒃ ᑲᓇᑕᒥ ᐱᓕᕆᐊᒃᑯᒥᒋᔭᐅᔪᓂᒃ ᓴᙱᒃᑎᒋᐊᕐᓗᒍ ᐅᑭᐅᖅᑕᖅᑐᖅ ᓇᖕᒥᓂᖃᖃᑕᐅᓂᖓ ᒪᑐᐃᖅᓯᔾᔪᑕᐅᓪᓗᓂᓗ ᒪᑭᒪᔾᔪᑎᓄᑦ ᐱᑕᖃᑐᐃᓐᓇᕆᐊᓕᖕᓂᒃ ᓄᓇᕗᒻᒥ."
ᑲᑎᒪᔨᕋᓛᑦ ᐱᓕᕆᓲᖑᕗᑦ ᑲᔪᓯᑎᑦᑎᓇᓱᒃᖢᑎᒃ ᐱᓕᕆᖃᑎᒌᓄᑦ ᓱᓕᓂᕋᕈᑎᒥᒃ, ᐊᖏᖅᑕᐅᓚᐅᖅᓯᒪᔪᖅ ᒫᔾᔨ 2022−ᒥ, ᐃᓕᑕᖅᓯᐅᒪᓪᓗᑎᒡᓗ ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᔾᔨᒌᓂᒃ ᓯᕗᓪᓕᐅᑎᔪᒪᔭᖏᓐᓂᒃ ᐃᓱᒪᒋᔭᖃᕐᓂᖏᓐᓂᒃ, ᐊᒻᒪ ᐱᓕᕆᖃᑎᒌᖕᓃᑦ ᐃᑲᔫᑕᐅᓂᐊᕐᓂᖏᓐᓂᒃ ᓄᓇᕗᒥᐅᓕᒫᓄᑦ. ᑐᕌᒐᕆᔭᐅᓂᐊᖅᑐᖅ ᑖᒃᑯᓄᖓ ᐱᓕᕆᖃᑎᒌᓄᑦ ᐊᑐᓕᖅᑕᐅᓗᑎᒃ ᐃᓄᐃᑦ ᐊᔪᖅᓴᙱᓐᓂᖏᑦ ᓇᓗᓇᐃᖅᓯᕙᒡᓗᑎᒃ ᐋᖅᑭᒋᐊᕈᑎᒃᓴᓂᒃ, ᖃᐅᔨᒪᔨᑕᕆᔭᐅᓗᑎᒃ, ᐊᒻᒪ ᐊᒃᓱᕈᕐᓇᖅᑐᑦ ᑲᒪᒋᔭᐅᓗᑎᒃ.
ᓄᓇᕗᒻᒥ ᐱᓕᕆᖃᑎᒌᓄᑦ ᓱᓕᓂᕋᕈᑎᑦ ᐱᔭᒃᓴᐅᕗᑦ ᐃᑭᐊᖅᑭᕕᒃᑯᑦ ᐅᕙᙵᑦ www.tunngavik.com.