ᐋᑐᕚ, ᐋᓐᑎᐅᕆᐅ (ᕕᕗᐊᕆ 8, 2023) – ᐅᓪᓗᒥ, ᓂᐅᕙᐅᓐᓛᓐ ᐊᒻᒪ ᓛᐸᑐᐊᑉ ᒐᕙᒪᒃᑯᖏᑦ ᐊᑎᓕᐅᖅᑲᐅᕗᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒧᑦ (MOU) ᓴᙱᒃᑎᒋᐊᖁᓪᓗᒍ ᐱᓕᕆᖃᑎᒌᒍᑕᐅᔪᑦ, ᐱᓕᕆᖃᑎᒌᑦ, ᐊᒻᒪ ᓯᕗᓂᒃᓴᒥ ᐱᕙᓪᓕᐊᑎᑦᑎᓂᖅ.
ᐊᖏᖃᑎᒌᒍᑦ ᐊᑎᓕᐅᖅᑕᐅᓚᐅᖅᑐᖅ ᒪᓕᒐᓕᐅᖅᑎᒧᑦ ᐋᓐᓄᓘ ᕘᕆᒧᑦ, ᓯᕗᓕᖅᑎ ᓂᐅᕙᐅᓐᓛᓐᒧᑦ ᐊᒻᒪ ᓛᐸᑐᐊᒧᑦ, ᒪᓕᒐᓕᐅᖅᑎ ᐲᔾᔭᐃ ᐊᕿᐊᕈᖅ, ᓯᕗᓕᖅᑎ ᓄᓇᕗᒻᒧᑦ, ᒪᓕᒐᓕᐅᖅᑎ ᓖᓴ ᑎᒻᔅᑐ, ᒥᓂᔅᑕ ᑲᒪᒋᔭᓕᒃ ᓛᐸᑐᐊᒥᑦ ᒥᓂᔅᑕᓗ ᑲᒪᒋᔭᓕᒃ ᓄᓇᖃᖅᑳᖅᑐᓕᕆᔨᒃᑯᑦ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ, ᒪᓕᒐᓕᐅᖅᑎᓗ ᐹᒥᓚ ᕼᐊᑯᖓᒃ ᒍᕈᔅ, ᓯᕗᓕᖅᑎᐅᑉ ᑐᒡᓕᐊ, ᓄᓇᕗᑦ ᒐᕙᒪᖓ. ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐊᑎᓕᐅᔪᖅ ᖁᕕᐊᓲᑎᖃᖅᑎᓪᓗᒋᑦ ᐊᖅᓴᕐᓃᑦ 2023 ᑲᑎᒪᕕᒃᔪᐊᕐᓂᕐᒥ ᐋᑐᕚᒥ.
ᐅᑭᐅᖅᑕᖅᑐᒥ ᓴᓂᓪᓕᕆᔭᐅᓪᓗᑎᒃ, ᓂᐅᕙᐅᓐᓛᓐ ᐊᒻᒪ ᓛᐸᑐᐊᒥᐅᑦ ᐊᒻᒪ ᓄᓇᕗᒻᒥᐅᑦ ᓇᖕᒥᓂᖅ, ᐃᓕᖅᑯᓯᕐᒥᓂᒃ ᐊᒻᒪ ᐃᓅᖃᑎᒌᓂᒃ ᐱᓕᕆᖃᑎᒌᒍᓯᖃᖅᐳᑦ ᑲᑐᔾᔨᖃᑎᒌᒍᑕᐅᓯᒪᔪᓂᒃ ᐊᒻᒪ ᐱᓕᕆᖃᑎᒌᒍᑕᐅᔪᓂᒃ. ᑕᒪᕐᒥᒃ ᑭᒡᒐᖅᑐᐃᕖᑦ ᓄᓇᖃᖅᑳᖅᓯᒪᔪᓂᒃ ᐃᓄᖃᑦᑎᐊᕐᒪᑕ ᐃᓱᒪᖃᑎᒌᑦᑎᐊᖅᐸᒃᖢᑎᒡᓗ ᐊᑦᑕᕐᓇᙱᑦᑐᓂᒃ ᐊᒻᒪ ᑲᔪᓯᑦᑎᐊᕈᓐᓇᖅᑐᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᑎᑕᐅᒋᐊᓕᖕᓂᒃ, ᑲᒪᒋᓗᒋᑦ ᐊᓂᒍᖅᑎᑕᐅᒋᐊᓕᑦ ᑕᒪᐃᓐᓄᑦ ᐃᑲᔫᑎᒃᓴᐅᓇᓱᒃᑐᑦ ᐅᑭᐅᖅᑕᖅᑐᒥᐅᓄᑦ ᐊᒻᒪ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓄᑦ.
ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᓇᓗᓇᐃᖅᓯᓯᒪᕗᖅ ᖃᓄᖅᑑᕈᑎᓄᑦ ᑲᑐᔾᔨᖃᑎᒌᖕᓂᕐᒥᒃ ᑭᒡᒐᖅᑐᐃᕕᐅᔪᓄᑦ ᐊᒻᒪ ᐃᓕᓴᖅᓯᓪᓗᑎᒃ ᓴᙱᓂᖏᓐᓂᒃ ᐊᒻᒪ ᐊᔪᙱᓐᓂᖏᓐᓂᒃ ᐱᐅᓯᒋᐊᖅᑎᑦᑎᓂᕐᒥᒃ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᐃᓅᖃᑎᒌᓂᒃ ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᐃᑲᔫᑕᐅᔪᓐᓇᖅᑐᓂᒃ ᐱᕕᒃᓴᐃᑦ ᓴᖅᑭᑉᐸᓪᓕᐊᑎᓪᓗᒋᑦ ᐅᑭᐅᖅᑕᖅᑐᒥ.
ᒐᕙᒪᒃᑯᑦ ᐊᖏᖅᓯᒪᔪᐃᓐᓇᐅᓕᖅᑐᑦ ᐋᖅᑭᒃᓯᔪᒪᓪᓗᑎᒃ ᑲᑐᔾᔨᖃᑎᒌᒃᑐᓂᒃ ᐊᑐᓕᖅᑎᑦᑎᔨᓂᒡᓗ ᑲᑎᒪᔨᕋᓛᓂᒃ, ᐃᒃᓯᕙᐅᑕᖃᕐᓂᐊᖅᑐᑦ ᓛᐸᑐᐊᒥᐅᑦ ᐊᒡᓚᕝᕕᒻᒪᕆᖓᓐᓄᑦ, ᑭᒡᒐᖅᑐᕐᓗᒋᑦ ᓂᐅᕙᓐᓛᓐ ᐊᒻᒪ ᓛᐸᑐᐊᒥ ᒐᕙᒪᒃᑯᑦ, ᐊᒻᒪ ᒐᕙᒪᓕᕆᔨᒃᑯᑦ, ᑭᒡᒐᖅᑐᕐᓗᒋᑦ ᓄᓇᕗᑦ ᒐᕙᒪᒃᑯᑦ. ᑲᑎᒪᔨᕋᓛᑦ ᑲᑐᔾᔨᓗᑎᒃ ᐋᖅᑭᒃᓯᓂᐊᖅᑐᑦ ᐋᖅᑭᒃᓯᒪᓂᕆᓂᐊᖅᑕᖓᓂᒃ ᐱᓕᕆᖃᑎᒌᖕᓂᕐᒧᑦ ᐊᒻᒪᓗ ᑐᑭᒧᐊᒃᑎᑦᑎᓂᕐᒧᑦ ᒐᕙᒪᑎᒍᑦ ᐱᔪᒥᒋᔭᐅᓂᒃᑯᑦ.
ᓂᐅᕙᓐᓛᓐ ᐊᒻᒪᓗ ᓛᐸᑐᐊ ᐊᒻᒪᓗ ᓄᓇᕗᑦ ᑲᑐᔾᔨᕗᑦ ᐱᕈᖅᐸᓪᓕᐊᑎᑦᑎᔪᒪᓪᓗᑎᒃ ᐊᔾᔨᒌᖕᓂᖏᓐᓂ ᓯᕗᒧᐊᒃᑎᑦᑎᓂᒃᑯᑦ ᓄᑖᓂᒃ, ᐱᕚᓪᓕᖅᑎᑦᑎᓂᒃᑯᑦ ᐱᕙᓪᓕᐊᔪᓕᕆᓂᕐᒥᒃ ᐊᒻᒪᓗ ᐃᓅᓯᓕᕆᓂᕐᒥᒃ, ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᐊᔾᔨᒌᙱᑦᑐᓂᒃ ᐊᒻᒪᓗ ᐃᓚᐅᑎᑦᑎᓂᒃᑯᑦ ᐃᑲᔪᖅᑐᐃᓂᒃᑯᑦ ᑲᔪᓯᑎᑦᑎᓗᑎᓪᓗ ᐆᒻᒪᕆᒃᑐᓂᒃ, ᒪᑭᑕᑦᑎᐊᖅᑐᓂᒃ ᓄᓇᓕᖕᓂᒃ.
ᐅᖃᐅᓯᐅᓯᒪᔪᑦ
"ᐱᒻᒪᕆᐅᒋᔭᕗᑦ ᐱᓕᕆᖃᑎᒌᖕᓂᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ. ᓄᓇᑎᒍᑦ ᓴᓂᓪᓕᕆᒐᑦᑎᒍᑦ ᐊᒻᒪᓗ ᐊᒥᓱᓂᒃ ᑮᓇᐅᔭᓕᐅᕈᑎᖃᕈᓐᓇᖅᖢᑕ, ᐃᓅᖃᑎᒌᖕᓂᒃᑯᑦ ᐊᒻᒪᓗ ᐃᓕᖅᑯᓯᖃᑎᒌᖕᓂᒃᑯᑦ. ᐊᑎᓕᐅᕆᓂᖅ ᑖᔅᓱᒥᖓ ᑎᑎᕋᖅᓯᒪᔪᒥᒃ ᑐᑭᓯᐅᒪᖃᑦᑕᐅᑎᓂᕐᒧᑦ ᓴᙱᒃᑎᒋᐊᖅᑎᑦᑎᕗᖅ ᐱᓇᔪᖕᓂᕆᔭᑦᑎᓐᓂᒃ ᐱᓕᕆᖃᑎᒌᖏᓐᓇᕐᓗᑕ ᐱᓕᕆᖃᑎᒌᒍᑕᐅᓪᓗᑎᒃ ᓯᕗᓪᓕᖅᐸᐅᔾᔭᐅᓯᒪᔪᓄᑦ ᓲᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᒡᓗᖃᖅᑎᑦᑎᓂᕐᒧᑦ ᑐᐊᕕᕐᓇᖅᑐᓄᓪᓗ ᐱᕙᒌᔭᖅᓯᒪᓂᕐᒧᑦ."
ᒪᓕᒐᓕᐅᖅᑎ ᐋᓐᑐᕉ ᕘᕆ
ᒐᕙᒪᒋᔭᐅᔪᖅ ᓂᐅᕙᓐᓛᓐᑦᒥᐅᓄᑦ ᓛᐸᑐᐊᒥᐅᓄᓪᓗ
"ᓄᓇᕗᑦ ᐱᓕᕆᖃᑎᖃᕐᓂᖓ ᓂᐅᕙᐅᓐᓛᓐ ᐊᒻᒪ ᓛᐸᑐᐊᒥ ᑐᙵᕕᖃᖅᐳᖅ ᐊᔾᔨᒌᓂᒃ ᐱᒻᒪᕆᐅᒋᔭᐅᔪᓂᒃ ᐊᒻᒪ ᖃᐅᔨᔭᐅᖃᑦᑕᖅᓯᒪᔪᓂᒃ ᑲᓇᑕᐅᑉ ᐅᐊᖕᓇᖓᓂ ᐱᐅᓯᕆᔭᐅᖃᑦᑕᖅᓯᒪᔪᓂᒃ. ᑖᒃᑯᐊ ᑲᑐᔾᔨᖃᑎᒌᒍᓯᑦ ᐱᓕᕆᖃᑎᒌᒍᑎᒋᔪᓐᓇᕋᑦᑎᒍᑦ ᐊᔾᔨᒌᙱᑦᑐᓂᒃ ᑮᓇᐅᔭᓕᐅᕈᑎᖃᕋᓱᐊᖅᑎᓪᓗᑕ ᐃᖃᓗᒐᓱᐊᕐᓂᒃᑯᑦ, ᐳᓚᕋᖅᑐᓕᕆᓂᒃᑯᑦ, ᐊᒻᒪ ᒫᓐᓇᓕᓴᕐᓄᑦ ᐃᑭᐊᖅᑭᕕᒃᑯᑦ ᑲᓲᒪᖃᑦᑕᐅᑎᓂᒃᑯᑦ. ᓯᒡᔭᖅᐸᓯᖕᒦᑦᑐᓄᑦ ᑲᑐᔾᔨᖃᑎᒌᖕᓂᐊᖅᑐᒍᑦ ᐊᐅᓚᔪᓐᓇᐅᑎᑦ ᐱᔾᔪᑎᒋᓗᑎᒍᑦ ᐱᕈᖅᐹᓪᓕᕈᓐᓇᖅᑐᑦ ᐃᑲᔫᑕᐅᔪᓐᓇᖅᑐᓪᓗ ᑲᓇᑕᒥ ᑎᒍᒥᐊᖅᑕᐅᔪᓂᒃ."
ᒪᓕᒐᓕᐅᖅᑎ ᐲᔾᔭᐃ ᐊᕿᐊᕈᖅ
ᓯᕗᓕᖅᑎ ᓄᓇᕗᒻᒧᑦ
"ᓂᐅᕙᓐᓛᓐ ᐊᒻᒪ ᓛᐸᑐᐊ ᐊᒻᒪ ᓄᓇᕗᑦ ᑲᑐᔾᔨᕗᑦ ᐊᔾᔨᒌᓂᒃ ᐱᓕᕆᔾᔪᓯᕐᒥᒃ ᐊᑦᑕᕐᓇᙱᑦᑐᓂᒃ ᐊᒻᒪ ᑲᔪᓯᑎᑕᐅᔪᓐᓇᖅᑐᓂᒃ ᐱᕙᓪᓕᐊᑎᑦᑎᓂᕐᒥᒃ ᐃᓄᐃᑦ ᓄᓇᖓᓐᓂ ᐊᒻᒪ ᐅᑭᐅᖅᑕᖅᑐᒥ. ᓂᕆᐅᒃᐳᒍᑦ ᐱᕈᖅᐸᓪᓕᐊᑎᑦᑎᓂᐊᕐᓂᕐᒥᒃ ᐊᑯᓂᐅᔪᒃᑯᑦ ᐱᓕᕆᖃᑎᒌᒃᐸᖕᓂᑦᑎᓐᓂ ᐊᒻᒪ ᐱᕙᓪᓕᐊᑎᑦᑎᓗᑕ ᐅᓄᖅᓯᒋᐊᖅᓯᒪᔪᓂᒃ ᓇᖕᒥᓂᖃᕐᓂᕐᒧᑦ ᐱᕕᒃᓴᐅᔪᓐᓇᖅᑐᓂᒃ ᐊᒻᒪ ᑲᑐᔾᔨᖃᑎᒌᒡᓗᑎᒃ ᓇᖕᒥᓂᖃᕐᕕᐅᔪᓂᒃ ᐱᕙᒌᔭᖁᓪᓗᒋᑦ ᓯᕗᓂᒃᓴᒥ ᐱᕙᓪᓕᐊᑎᑕᐅᔪᓄᑦ ᐊᒻᒪ ᐅᓄᖅᓯᒋᐊᖅᑎᓪᓗᒋᑦ ᒪᑭᒪᔾᔪᑎᓄᑦ ᐱᓕᕆᐊᑦ."
ᒪᓕᒐᓕᐅᖅᑎ ᓖᓴ ᑎᒻᔅᑐ
ᒥᓂᔅᑕ ᑲᒪᒋᔭᓕᒃ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᐋᖅᑭᒋᐊᕈᑎᖃᕐᓂᕐᒧᓪᓗ
ᒥᓂᔅᑕ ᓛᐸᑐᐊᕐᒥᐅᑦ ᐱᓕᕆᐊᖏᓐᓄᑦ
"ᑖᓐᓇ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐊᑐᕐᓗᒍ, ᒐᕙᒪᕗᑦ ᐱᓕᕆᔪᓐᓇᖅᐳᑦ ᓴᙱᒃᑎᒋᐊᖅᑎᑦᑎᓗᑎᒃ ᐃᓅᖃᑎᒌᓂᒃ ᐱᕙᓪᓕᐊᑎᑦᑎᓂᕐᒥᒃ ᒥᒃᖠᒋᐊᖅᑎᑦᑎᓗᑎᒡᓗ ᐊᖏᕐᕋᖃᙱᑦᑐᓂᒃ ᐊᒻᒪ ᓂᕆᔭᒃᓴᖃᑦᑎᐊᙱᓐᓂᕐᒥᒃ. ᑲᑐᔾᔨᓗᑕ ᓴᙱᒃᑎᒋᐊᖅᑎᑦᑎᔪᓐᓇᖅᑐᒍᑦ ᐊᔪᙱᑦᑎᐊᖅᑐᓂᒃ ᐃᖅᑲᓇᐃᔭᖅᑎᓂᑦ ᑲᑐᔾᔨᖃᑎᒌᒡᓗᑎᒃ ᐃᓕᓐᓂᐊᕐᓗᑎᒃ ᐱᓕᒻᒪᒃᓴᕐᓗᑎᓪᓗ ᐊᒃᑐᐊᓂᓕᖕᓂᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐅᖓᓯᒋᔭᐅᔪᓄᑦ ᓄᓇᓕᖕᓄᑦ."
ᒪᓕᒐᓕᐅᖅᑎ ᐹᒥᓚ ᕼᐊᑯᕐᖓᖅ−ᒍᕌᔅ
ᓯᕗᓕᖅᑎᐅᑉ ᑐᒡᓕᐊ ᓄᓇᕗᒻᒥ
ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐅᑯᑎᒎᓇᖅ: ᓂᐅᕙᓐᓛᓐ ᐊᒻᒪ ᓛᐸᑐᐊ ᒐᕙᒪᒃᑯᖏᑦ ᐊᒻᒪ ᓄᓇᕗᑦ ᒐᕙᒪᒃᑯᖏᑦ.