Kavamangit Nunavutim Newfoundland Labradormilu atiliuqhimajun Titiraqmik Tukihidjutimik

Ottawa, Ontariomi (Iidjirurvia 8, 2023) – Ublumi, Kavamangit Newfoundland Labradormilu Nunavunmilu atiliuqhimajut Titiraqmik Tukihidjutimik (MOU) hakugikhariami pidjutainni havaqatigiingnirni, paannariingnirni, hivunikhamilu pivalliarnirnun.

Titiraq Tukihidjuti (MOU) atiliuqtauhimajuq Nanngarijaujumin Andrew Furey, Hivuliqti Newfoundland Labradormilu, uumannga Nanngarijaujuq P.J. Akeeagok, Hivuliqti Nunavut, Nanngarijaujuq Lisa Dempster, Minista Munarijuq Labradormi Qanuriliurutainnun unalu Minista Munarijuq Nunaqaqqaaqhimajunun Qanuriliurutainnun Mamiharnikkullu, unalu Nanngarijaujuq Pamela Hakongak Gross, Tukliq Hivuliqti, Nunavut Kavamangani. MOUkut atiliuruti pivaktuq pitillugu Northern Lights 2023 katimarjuarnirmi Ottawami.

Ukiuqtaqtumi nuatqatigiikhuta, inuit Newfoundland Labradormilu uvanilu Nunavunmi pilgit inuhikkut, pitquhikkut inuuqatigiingnikkullu pidjutinik pipkaijun havaqatigiingnirnik paannariigutiniklu. Tamarmik nunagijaujun pilgit hakugiktunik Nunaqaqqaaqhimajunik inugiangnirnik pidjutiqatigiikhutiklu aajjikkiingniqaqtunik-ihumagidjutinik pidjutinik qajangnaittukkut aularaanginnaqtukkullu Ukiuqtaqtumi pivallianirnun, turaangaplutik pinikkut atauttikkut ikajuutikhanik Ukiuqtaqtunun Nunaqaqaaqtunullu nunallaanun.

Una MOU pipkaijuq parnaqutikkut havaqatigiigutinik nunagijaujuni ilitariplunilu atuni hakugigutiit ajuitaillu taapkununga pimmarigharnikkut piangaijarnikkut inuqatigiingnikkullu pivallianirnun pinikkullu ikajuutikhanik taimaa uuktuqvikhat nuidjutainnin Ukiuqtaqtumi.

Kavamangit angiqhimajut piliuriami Havaqatigiingnikkut Atuqtipkainikkullu Katimajikhanik, ikhivautaqatigiigutiqarlunilu ukunannga Labradormin Qanurilirutainnun Havagvianin, pidjutiplugu Newfoundland Labradorlu Kavamanga, uumanngalu Kavamaliqijikkut Havagvianin, pidjutiplugu Nunavut Kavamanga. Katimajiit atauttikkut piliurniaqtun pidjutikhamik havaqatigiingnirnun ihuarhainirnullu kavamatkunni taapkunani atauttikkut pijumajainni.

Newfoundland Labradorlu Nunavullu atauttikkut pijumajun havagutigilugin aajjikkiiniqarutiit talvuunga hivumuudjutikkut aallangajukkut, pimmarigharnikkut piangaijarnikkut inuqatigiingnikkullu pivallianirnun, akhuurhainirnun aallakkiingnirqarnirnun ilauqataunirnillu ikajuriami aulapkainirmullu aullariktunik, piangittuniklu nunallaanik.

Uqautaujut

“Nakuugijavun paannariigutiqativun Nunavut Kavamangani. Nunakkut nuatqatigiiktugun atauttikkullu pidjutiqatigiiktugun amigaittuni piangaijarnikkut, inuuqatigiingnikkut pitquhikkullu pidjutinik. Atiliurnia uumani Titirami Tukihidjutimi hakugikhaqtait havagutivun havaqatigiikhimmaarutiptikni ukunani atauttikkut hivulliutijumajaptikni imaatun hilaup aallanguqtirutaani, aanniaqtailinikkut munaridjutainni, iglukhaitigun uvanilu amigarnarhinikkut upalungaiqhimadjutikhani.”
Nanngarijaujuq Andrew Furey
Hivuliqti Newfoundland Labradormilu

“Nunavutip pidjutaa Newfoundland Labradormilu tunngajuq atauttikkut uppiridjutini atauttikkullu tariukkut ingilraami pidjutainni. Una paannariiguti pipkaqtitaatigun havaqatigiikluta angikliharnirnun piangaijaidjutinun imaatun iqaluliqinirnun, aquinirnun, ukunanilu ublumiutanun qaritaujakkuurutikkut atadjutinik. Hinaanittuni avikturhimajiujuni havaqatigiingniaqtugun auladjutikhanik akhuuqtun naudjutikhanun ikajuutaujuqlu Kanadaup aulapkainiqarvianun.”
Nanngarijaujuq P.J. Akeeagok
Nunavutim Hivuliqtia

“Newfoundland Labradorlu Nunavullu atauttikkut aajjikkiingniqaqtunik pidjutilgit talvunga qajangnaittukkut aularaanginnaqtukkullu pivallialiurnirnun Ukiuqtaqtumi. Niriuktugun piliurnirmun uumani aulahimaaraaqpaktumi pidjutiqatigiigutiptikni pipkainikkullu amigaiqjuummiqtunik havangnikkut uuktuqvikhanik atauttikkullu havagutikhanik upalungaijarutikhakkut hivunikhamik pivallianirnun amigaiqjuummiqtunullu piangiajarnikkut hulidjutinun.”
Nanngarijaujuq Lisa Dempster
Minista Munarijuq Nunaqaqqaaqhimajunun Qanuriliurutainnun Mamiharnikkullu
Minista Munarijuq Labradormi Qanuriliurutainnun

“Talvuuna uumani Titiraqmi Tukihidjutimi, kavamavun havaktaaqtun hakugikhaqtaaqtait inungnun pivalliadjutit ikiklilaaqtirlugillu aivikhaittun umanilu niqikhailliurnirnik. Atauttikkut, hakugikhaqtaaqtavun ajuittun havaktivun taimaa paannariiqatikkut iliharutini ajuirharutinilu pidjutilgit pijaaqtullu ukunani ungahingmiittuni nunallaaptikni.”
Nanngarijaujuq Pamela Hakongak Gross
Nunavutim Tuklia Hivuliqti

###

Titiraq Tukihidjutit Ukunani Kavamait Newfoundland Labradormilu uumanilu Nunavut Kavamangani.