ᓴᓂᑭᓗᐊᖅ, ᓄᓇᕗᑦ (ᔫᓂ 13, 2025) −ᓄᓇᕗᒻᒥ ᒐᕙᒪᒃᑯᑦ (GN) ᓄᓇᕗᒻᒥᓪᓗ ᐃᓕᓐᓂᐊᑎᑦᓯᔩᑦ ᑲᑐᔾᔨᖃᑎᒌᖏᑦ (NTA) ᐅᓪᓗᒥ ᐊᑎᓕᐅᕆᔪᑦ ᓄᑖᒥᒃ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᒥᒃ.
"ᑖᓐᓇ ᐊᑎᓕᐅᖅᑕᐅᓂᖓ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎ ᓇᓗᓇᐃᖅᓯᕗᖅ ᐱᒻᒪᕆᐅᔪᒥᒃ ᐊᓂᒍᖅᑕᐅᔪᒥᒃ ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ," ᐅᖃᖅᑐᖅ ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᑕᐃᕕᑎ ᐊᕿᐊᕈᖅ. "ᑖᓐᓇ ᑲᑐᔾᔨᖃᑎᒌᓐᓂᖅ ᐊᑦᑐᐊᓂᖃᖅᑐᖅ ᐃᑲᔪᖅᑐᐃᓂᑦᑎᓐᓂ ᐊᑦᓱᕈᖅᓱᑎᒃ ᐱᓕᕆᖃᑦᑕᖅᑐᑦ ᑐᓂᓯᒪᑦᓯᐊᖅᑐᓄᑦ ᐃᓕᓐᓂᐊᑎᑦᓯᔨᓂᑦ ᐅᖃᐅᓯᖃᕐᓂᕐᒧᑦ ᐱᔭᕆᐊᖃᖅᑕᖏᑦ ᐊᑦᓱᕈᕐᓇᖅᑐᓪᓗ, ᓴᙱᓕᖅᑎᑦᓯᕗᒍᑦ ᐱᔪᓐᓇᕐᓂᑦᑎᓐᓂᒃ ᐱᔨᑦᓯᕋᕐᓂᕐᒧᑦ ᐃᓕᓐᓂᐊᖅᑎᓂᑦ ᓄᓇᕗᒻᒥ. ᑲᑐᔾᔨᓗᑕ, ᐱᕈᖅᑎᑦᓯᕙᓪᓕᐊᔪᒍᑦ ᓯᕗᓂᑦᓴᑦᓯᐊᕙᒻᒥᑦ ᓄᓇᕗᒻᒧᑦ.”
"ᖁᕕᐊᓱᑦᑐᖓ ᑖᓐᓇ ᐊᖏᕈᑎ ᐃᓕᑕᖅᓯᒻᒪᑦ ᐱᒻᒪᕆᐅᓂᖓᓂ ᐃᓄᐃᑦ ᐅᖃᐅᓯᖓ ᐃᓕᓐᓂᐊᕐᓂᓕᕆᓂᒻᒥᑦ ᑕᒪᕐᒥᓪᓗ ᐱᓕᕆᖃᑎᒌᓚᐅᖕᓂᖏᓐᓂᑦ ᓴᖅᑭᑦᑎᑦᓯᓂᕐᒧᑦ ᐱᐅᔪᓂᒃ ᐃᑲᔪᖅᑐᐃᔾᔪᑎᓂᑦ ᐃᓕᓐᓂᐊᑎᑦᓯᔨᓄᑦ ᐃᑲᔪᓐᓂᐊᖅᑐᓂᑦ ᓴᙱᓂᖅᓴᒥᑦ ᓯᕗᓂᒃᓴᖃᖁᓪᓗᒋᑦ ᐃᓕᓐᓂᐊᖅᑎᖁᑎᕗᑦ," ᐅᖃᖅᑐᖅ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐹᒥᓚ ᕼᐊᑯᖓᒃ ᒍᕉᔅ. "ᑖᓐᓇ ᐊᖏᖃᑎᒌᒍᑎ ᐃᑲᔪᖅᑐᐃᕗᖅ ᐃᓕᓐᓂᐊᑎᑦᓯᔨᑦᑎᓐᓂᒃ ᐃᑲᔪᖅᓱᓂᓗ ᓴᖅᑭᑎᑦᓯᓂᕐᒥᒃ ᐃᓕᓐᓂᐊᖅᐸᓪᓕᐊᓂᕐᒧᑦ ᑕᒪᒃᑯᐊ ᐃᓕᓐᓂᐊᖅᑏᑦ ᑲᔪᓯᓂᖃᑦᓯᐊᕈᓐᓇᕐᓗᑎᒃ ᑐᓴᐅᒪᖃᑦᑕᐅᑎᖏᓐᓇᕐᓂᕐᒧᑦ ᐃᓕᖅᑯᓯᖏᓐᓂᑦ."
"ᖁᔭᓕᔪᒍᑦ ᐃᓚᒋᔭᐅᔪᓄᑦ ᐃᑲᔪᖅᑐᐃᑦᓯᐊᓚᐅᖕᓂᖏᓐᓂᑦ ᑖᑦᓱᒪᖓᑦ ᐊᖏᕈᑎᒥᑦ," ᐅᖃᖅᑐᖅ ᔭᔅᑎᓐ ᒥᑦᓯᑦ, ᐊᖓᔪᖅᑳᖅ ᓄᓇᕗᒻᒥᑦ ᐃᓕᓐᓂᐊᑎᑦᓯᔨᓄᑦ ᑲᑐᔾᔨᖃᑎᒌᒃᑯᖏᓐᓄᑦ. "ᑖᓐᓇ ᐊᖏᕈᑕᐅᔪᖅ ᓯᕗᒻᒧᑦ ᐊᓪᓗᕆᐊᖅᓂᐅᕗᖅ − ᑐᙵᕕᐅᔪᖅ ᐱᕈᖅᐸᓪᓕᐊᑎᒍᓐᓇᕐᑕᕗᑦ. ᓱᓕ ᐱᔭᑦᓴᖃᒃᑲᓐᓂᖅᑎᓪᓗᒍ ᐃᓕᓐᓂᐊᑎᑦᓯᔩᑦ ᓄᓇᕗᒻᒥ ᐃᑉᐱᒋᔭᐅᑦᓯᐊᖅᑐᑦ, ᐃᑲᔪᖅᑐᖅᑕᐅᓗᑎᒃ ᑐᓴᖅᑕᐅᓗᑎᓪᓗ, ᓂᕆᐅᑉᐳᒍᓪᓗ ᑖᓐᓇ ᐊᖏᖃᑎᒌᒍᑎ ᓇᓗᓇᐃᖅᓯᒻᒪᑦ ᓄᑖᙳᕆᐊᖅᓯᒪᔪᒥᒃ ᐊᖏᖅᓯᒪᓂᖏᓐᓂᒃ ᓄᓇᕗᒻᒥ ᒐᕙᒪᒃᑯᓐᓂ ᐱᓕᕆᖃᑎᖃᕈᒪᓪᓗᑎᒃ ᐅᕙᑦᑎᓐᓂᒃ ᐱᐅᓯᒋᐊᖅᑎᑦᓯᖁᓪᓗᒋᑦ ᐃᓕᓐᓂᐊᑎᑦᓯᓚᕆᓐᓂᕐᒧᑦ ᓄᓇᕗᒻᒥ."
ᓇᓗᓇᐃᖅᑕᐅᓂᐊᔪᑦ ᓄᑖᒧᑦ ᐊᖏᕈᑎᒧᑦ ᐃᓚᖃᖅᐳᑦ:
- 9 ᐳᓴᓐᑎᒥᑦ ᑮᓇᐅᔾᔭᒃᓵᓄᑦ ᐊᑭᑦᑐᕆᐊᕐᓂᖅ ᐱᒋᐊᕐᓗᓂ ᔪᓚᐃ 1, 2025−ᒥ, 3 ᐳᓴᓐᑎᒥᑦ ᑮᓇᐅᔾᔭᑦᓵᖏᑦ ᐊᑭᑦᑐᕆᐊᕐᓗᑎᒃ ᐱᒋᐊᕐᓗᓂ ᔪᓚᐃ 1, 2026−ᒥ, 3 ᐳᓴᓐᑎᒥᓪᓗ ᑮᓇᐅᔾᔭᑦᓵᖏᑦ ᐊᑭᑦᑐᕆᐊᕐᓗᑎᒃ ᔪᓚᐃ 1, 2027−ᒥ.
- ᐱᔪᓐᓇᖅᑎᑕᐅᔪᑦ ᐃᖅᑲᓇᐃᔭᐃᓐᓇᕐᓂᕐᒧᑦ ᐊᑭᓕᖅᑕᐅᒃᑲᓐᓂᖅᐸᑦᑐᑦ ᓄᓇᕗᒻᒥ ᐃᓕᓐᓂᐊᑎᑦᓯᔨᓄᑦ.
- ᐱᐅᓯᕚᓪᓕᑎᑦᓯᓂᕐᒧᑦ ᐃᓄᒃᑐᑦ ᐅᖃᐅᓯᕐᒧᑦ ᐱᓕᕆᐊᖅ ᐅᔾᔨᕈᓱᑦᑎᑦᓯᓂᕐᒧᑦ ᐱᒻᒪᕆᐊᓗᒻᒥᒃ ᐱᓕᕆᐊᖃᖅᐸᓐᓂᖏᓐᓂᒃ ᐃᓕᓐᓂᐊᑎᑦᓯᔩᑦ ᐸᕐᓇᐃᓂᕐᒧᑦ ᐅᖃᐅᓯᕐᒥᒃ ᐆᒻᒪᕆᐊᖅᑎᑦᓯᒃᑲᓐᓂᕐᓂᕐᒧᑦ ᐃᓕᖅᑯᓯᕐᒥᓪᓗ ᔭᒐᑎᑦᓯᑦᑕᐃᓕᒪᓂᕐᒥᒃ.
ᐊᖏᖃᑎᒌᒍᑎ ᐊᑐᓯᒋᐊᓛᖅᑐᖅ ᔪᓚᐃ 1, 2025−ᒥ, ᔫᓂ 30, 2028−ᒧᓄ.