ᐅᖃᖅᑏ, ᐅᓪᓗᒥ ᓇᖏᖅᓯᕗᖓ ᓇᓗᓇᐃᖅᓯᔪᒪᓪᓗᖓ ᐱᒻᒪᕆᐊᓗᖕᒥᒃ ᓄᓇᕘᒧᑦ ᑲᓇᑕᒧᓪᓗ: ᓴᖅᑭᑕᐅᓂᖓ ᓄᓇᕗᑦ ᐅᑭᐅᖅᑕᖅᑐᖓᑕ ᓄᓇᖁᑎᖓᓂ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᓪᓗ ᐸᕐᓇᒍᑎ.
ᑖᓐᓇ ᓄᓇᕗᒻᒥ ᓴᓇᔭᐅᓯᒪᔪᖅ ᐱᓕᕆᔾᔪᑕᐅᓂᐊᖅᑐᖅ ᓯᕗᓪᓕᖅᐹᑦᑎᐊᖑᕗᖅ ᑕᐃᒪᐃᑦᑐᒥᒃ, ᑐᙵᕕᖃᖅᖢᓂ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᑕᐅᑐᖅᑰᖅᑕᖏᓐᓂᒡᓗ. ᑖᓐᓇ ᓴᖅᑭᓚᐅᖅᑐᖅ ᐅᑭᐅᖅᑕᖅᑑᑉ ᓄᓇᖁᑎᖓᓂ ᐊᑦᑕᓇᖅᑐᒦᑎᑦᑕᐃᓕᓂᕐᒧᓪᓗ ᑲᑎᒪᕕᔾᔪᐊᖅᑎᓪᓗᑕ ᔫᓂᒥ. ᐃᓄᐃᑦ ᓯᕗᓕᖅᑎᖏᑦ, ᒐᕙᒪᐃᑦ, ᑲᑐᔾᔨᖃᑎᒋᔭᖏᓪᓗ ᑲᑎᓚᐅᕐᒪᑕ ᑲᑐᔾᔨᓪᓗᑎᒃ ᑕᐅᑐᙳᐊᖅᑕᒥᓂᒃ ᐋᖅᑭᒃᓱᐃᓪᓗᑎᒃ ᓄᓇᕗᑦ ᓯᕗᓂᒃᓴᖓᓄᑦ. ᑖᓐᓇ ᓴᖅᑭᑕᐅᓚᐅᖅᓯᒪᔪᖅ ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᒋᓪᓗᑎᒍᑦ, ᐃᓱᒪᒋᔭᖃᖅᖢᑕ ᑲᑐᔾᔨᓪᓗᑕ ᐅᒃᐱᕈᓱᒃᑲᑦᑕ ᓄᓇᖁᑎᖓ ᐱᒋᐊᓲᖑᒻᒪᑦ ᓴᙱᔪᓂᑦ, ᓴᐱᓕᖅᓴᕋᐃᙱᑦᑐᓂᑦ ᓄᓇᓕᖕᓂ ᐃᓄᐃᓪᓗ ᐃᓱᒪᓕᐅᖃᑕᐅᖃᑦᑕᕐᓗᑎᑦ ᓄᓇᑦᑕ ᐃᒪᐅᓪᓗ ᒥᒃᓵᓄᑦ.
ᐅᖃᖅᑏ, ᓯᓚᕐᔪᐊᕐᒥᐅᑦ ᐅᑭᐅᖅᑕᖅᑐᒧᑦ ᓵᑉᐸᓪᓕᐊᓕᕐᒪᑕ. ᐊᐱᖅᑯᑎᐅᔪᑦ ᓄᓇᖁᑎᖓᓂ, ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᑦ, ᓴᐱᓕᖅᓴᕋᐃᙱᓐᓂᕐᒥᓪᓗ ᐃᓱᒪᒋᔭᐅᑐᐃᓐᓇᕈᓐᓃᖅᑐᑦ; ᑐᐊᕕᕐᓇᖅᑑᕗᑦ ᑐᙵᕕᒋᔭᐅᓪᓗᑎᒡᓗ ᑲᓇᑕᐅᑉ ᓯᕗᓂᒃᓴᖓᓄᑦ. ᑖᔅᓱᒧᖓ ᐸᕐᓇᒍᑎᒧᑦ, ᓄᓇᕗᑦ ᓯᕗᒧᑦ ᐊᓪᓗᕆᐊᖅᑐᖅ ᓯᕗᓕᖅᑎᐅᓗᓂ ᓯᕗᒧᒋᐊᖅᑎᑦᑎᓂᕐᒧᑦ ᑲᓇᑕᐅᑉ ᓴᖅᑭᔮᕐᓂᖓᓂᒃ ᓯᕗᓪᓕᐅᑎᔪᒪᔭᖏᓐᓂᓪᓗ ᐅᑭᐅᖅᑕᖅᑐᒥ.
ᐸᕐᓇᒍᑕᐅᔫᑉ ᑐᙵᕕᓪᓗᐊᑕᖓ ᑎᓴᐅᕗᑦ ᐃᓄᖕᓄᑦ−ᐊᐅᓚᑕᐅᔪᑦ ᑲᓇᑕᒥ−ᐱᕈᖅᐸᓪᓕᐊᑎᑦᑎᓂᕐᒧᑦ ᐱᓕᕆᐊᒃᓴᑦ ᐊᔭᐅᖅᑐᖅᑕᐅᓪᓗᑎᒃ ᓄᓇᕗᑦ ᒐᕙᒪᒃᑯᓐᓄᑦ ᐊᒻᒪ ᓄᓇᕗᑦ ᑐᙵᕕᒃᑯᓐᓄᑦ: ᕿᑭᖅᑕᕐᔪᐊᕐᒥ ᐃᑎᔪᒥ ᑐᓚᒃᑕᕐᕕᒃ, ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᖅᑯᑎ/ᖁᕐᓗᖅᑐᐊᕐᔪᖕᒥ ᑐᓚᒃᑕᕐᕕᒃ ᐊᒻᒪ ᐊᖅᑯᑦ, ᑭᕙᓪᓕᕐᒥ ᐃᒪᕐᒧᑦ ᓄᑭᓪᓚᐅᑎᒧᑦ ᐊᑦᑕᑕᕐᕕᒃ, ᐊᒻᒪ ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᖅ. ᐊᑐᓂ ᑖᒃᑯᐊ ᐊᓯᔾᔨᖅᐸᓪᓕᐊᔪᑦ ᐱᓕᕆᐊᖑᕙᓪᓕᐊᔪᒪᔪᑦ ᓴᙱᒃᑎᒋᐊᖅᑎᑦᑎᕗᑦ ᓄᓇᖁᑎᖓᓂ ᑲᔪᓯᑎᑦᑎᓪᓗᑎᒡᓗ ᓄᓇᕗᒻᒥᐅᓄᑦ ᐃᑲᔫᑎᐅᓂᐊᖅᑐᓂᒃ. ᐱᐅᓯᕚᓪᓕᖅᑎᑦᑎᓂᐊᖅᐳᑦ ᐊᑦᑕᑕᕐᕕᐅᔪᒥᒃ, ᑲᑎᙵᓕᕐᓗᑎᒃ ᓄᓇᕗᒻᒥ ᑲᓇᑕᓕᒫᒧᑦ ᓄᓇᕐᔪᐊᒧᓪᓗ, ᒪᒃᐱᖅᓯᓗᑎᒃ ᑲᔪᓰᓐᓇᕈᓐᓇᖅᑐᓂᒃ ᐱᕙᓪᓕᐊᔪᓕᕆᓂᕐᒥᒃ, ᐊᑐᐃᓐᓇᕆᐊᖃᓗᐊᕈᓐᓃᕐᓗᑎᒃ ᐅᖅᓱᐊᓗᖕᒥᒃ. ᑲᑎᖦᖢᒋᑦ, ᑕᑯᒃᓴᐅᑎᑦᑎᕗᑦ ᖃᓄᖅ ᑮᓇᐅᔭᓕᐅᕋᓱᐊᕐᓂᖅ ᓄᓇᕗᒻᒥ ᑐᑭᖃᕐᒪᖔᑦ ᐱᕈᖅᓴᐃᓂᖅ ᑲᓇᑕᐅᑉ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᔪᖅᓴᙱᓐᓂᖓᓄᓪᓗ.
ᐸᕐᓇᒍᑕᐅᔪᑦ ᐋᖅᑭᒃᑕᐅᓯᒪᕗᖅ ᑕᓪᓕᒪᓂᒃ ᑲᑎᙵᔪᓂᒃ ᑐᙵᕕᖕᓂᒃ: ᐊᓂᒍᐃᔪᓐᓇᑦᑎᐊᖅᑐᓂᒃ ᓄᓇᓕᖕᓂ, ᓄᓇᖁᑎᖓᓂ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᖅ ᑐᙵᕕᖃᖅᑐᑦ ᓄᓇᕗᒻᒥ ᑕᐅᑐᖅᑰᖅᑕᐅᔪᓂᒃ, ᓄᓇᕗᑦ ᐱᓕᕆᐊᒃᓴᖓ ᐅᑭᐅᖅᑕᖅᑐᒥ ᓄᓇᕐᔪᐊᒥ, ᑮᓇᐅᔭᓕᐅᕋᓱᖕᓂᕐᒧᑦ ᐱᕕᒃᓴᑦ, ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᓂᒍᐃᔪᓐᓇᕐᓂᖅ. ᑖᒃᑯᐊ ᑐᙵᕖᑦ ᓇᓗᓇᐃᖅᓯᕗᑦ ᓇᓗᓇᙱᑦᑐᒥᒃ ᓱᓕᔪᒥᒃ: ᐅᑭᐅᖅᑕᖅᑐᒥ ᓄᓇᖁᑎᖓᓂ ᐊᒻᒪ ᐃᓄᖕᓂᑦ ᐊᑦᑕᕐᓇᖅᑐᒦᑎᑦᑎᑦᑕᐃᓕᒪᓂᖅ ᓯᕗᒻᒧᐊᒋᐊᖃᖅᐳᖅ ᑲᑐᑎᓗᑕ.
ᐅᖃᖅᑏ, ᑖᓐᓇ ᐸᕐᓇᒍᑕᐅᔪᖅ ᓇᓗᓇᐃᖅᓯᕗᖅ ᓱᓕᑦᑎᐊᖅᑐᒥᒃ: ᑲᓇᑕᐅᑉ ᓄᓇᖁᑎᖓᓂ ᐅᑭᐅᖅᑕᖅᑐᒥ ᑐᙵᕕᖃᖅᐳᖅ ᐃᓄᐃᑦ ᐱᑕᖃᕐᓂᖏᓐᓄᑦ, ᖃᐅᔨᒪᔭᖏᓐᓄᑦ, ᐊᒻᒪ ᑲᒪᔨᐅᓂᖏᓐᓄᑦ. ᑮᓇᐅᔭᖃᖅᑎᑦᑎᓂᒃᑯᑦ ᓄᓇᓕᑦᑎᓐᓂ ᑲᑐᔾᔨᖃᑎᒌᖕᓂᕐᒥᓪᓗ, ᐊᖅᑯᓯᐅᖅᐳᒍᑦ ᓄᓇᕗᒻᒥᐅᓂᑦ ᐱᔨᑦᑎᕋᕐᓂᐊᖅᑐᓂᑦ ᐅᓪᓗᒥ ᑲᔪᖏᖅᓴᐃᓗᑕᓗ ᑭᖑᕚᕆᓂᐊᖅᑕᑎᓐᓂ ᑲᔪᓯᑎᑦᑎᖁᓪᓗᒋᑦ ᑕᐅᑐᙳᐊᖅᑕᒥᑦ ᓯᕗᒧᑦ.
ᐱᓗᐊᖅᑐᒥᑦ ᒪᒃᑯᑦᑐᓄᑦ ᐅᖃᕈᒪᕗᖓ ᓄᓇᕗᒻᒥᐅᓂᑦ: ᑖᓐᓇ ᐸᕐᓇᐅᑎ ᐃᓕᖕᓄᑦ ᑐᕌᖓᕗᖅ. ᓄᓇᕗᑦ ᓯᕗᓂᒃᓴᖓᓄᑦ, ᐱᕕᒃᓴᕆᔭᐅᔪᓂᑦ ᐱᑖᕆᓂᐊᖅᑕᔅᓯᓐᓄᑦ, ᑲᒪᒋᔭᒃᓴᓄᓪᓗ ᑲᔪᓯᑎᓐᓂᐊᖅᑕᔅᓯᓐᓄᑦ ᓯᕗᒧᑦ ᓯᕗᓕᖅᑎᐅᓗᓯ ᓯᕗᓂᒃᓴᑦᑎᓐᓂ.
ᖁᔭᓐᓇᒦᒃ, ᐅᖃᖅᑎᑦᑎᔩ.