Uqaqtittijii, ublumi naunaijarumajara puirurnaittuq qanuriliuruti nunaptingnun Kanadamullu: aullaqtirutaa uumani Nunavunmi Ukiuqtaqtumi Atanniqtuidjutikkut Amiridjutikkullu Hanaqidjuti.
Una Piliuqhimajuq-Nunavunmi pidjutikhaq hivulliqpangujuq taimaittuni, atadjutihimajuq Inuinnait uppiridjutainni ihumagijainnilu. Nauhimajuq uumanga Ukiuqtaqtumi Atanniqtuidjutikkut Amiridjutillu Katimanirjuamin pipkaihimajaptingni Juunmi, talavani Inuinnait hivuliluqtiit, kavamait, paannarijauullu katihimajun piliuriami atauttikkut tautugutimi hivunikhamun nunaptingnun. Pivallialiuqtauhimajuq paannaqatigiikpiaqhugu Nunavut Tunngavitkut, tautuktiplugu atauttikkut ilihimadjutiptingni una atanniqtuidjutit aullaqtirutaujuq piqaqhuni hakugiktuni, mahulingaittuni nunallaani Inuinnarnilu ilauqpiarutainnik ihimaliurutini nunaptingnun imaptingnullu.
Uqaqtittijii, nunarjuaq iikkiliqtaa ukiuqtaqtuq. Apiqhuutit atanniqtuidjutikkut, amiridjutikkut, mahulingainirnilulu ihumadjutiunginnaruiqtut; qilamiurnaqhijun qitqaniittullu Kanadaup hivunikhaani. Piqarhuni uuminga Hanaqidjutimi, Nunavut hivumuujuq hiuvliuqtiupluni hivumuurutaanik Kanadaup innianik hivulilutiujumajainniklu Ukiuqtaqtumi.
Qitqani hanaqidutimi ukua hitamat Inuinnarnin-hivuliuqtaujun nunagijami-piliurnirnik havaktakhanik akihaqtuqtaujun Nunavut Kavamanganin uumangalu Nunavut Tunngavitkinnin; uumanga Qikiqtarjuaq Itijuni Tariumi Tulaktarvik, una Ukiuqtaqtumi Amiridjutikkut Aulavik/Qurluqtuarjungmi (Grays Bay) Tulaktarvik Apqutilu; una Kivalliq Imakkut-Alrujaqtut (Hydro-Fibre) Atadjuti, unalu Iqalungni Imakkut-pauwaliuruti havaktakhq. Tamaita hapkunani aallanguqtiujaaqtut piniaqhimadjutit hakugikhaqtaa atanniqtuidjuti huli tuniudjutipluni ikajuutiqhaqpiarutinun Nunavunmiunnun. Pimmarigharniaqtait atadjutit, atadjutilugu Nunavut tamainnun Kanadamun nunarjuamullu, angmaqtirlugi aularaanginnaqtun piangaijarnirnun pivallialiurutit, mikhilaaqtillugulu aturaanginnarutit uqhuqlungni. Atauttikkut, tautuktitaa qanuqtun maniliurutikkut Nunavunmun tukilik maniliurutiujun Kanadaup amiridjutaani ilingaijarutaanullu.
Una hanaqidjutikhaq piliuqhimajuq tallimani atauttikkut-atahimajuni ikajuutini: hakugiktut mahulingaittun nunallaat, atanniqtuidjutimi amiridjutinilu tunngajun Nunavutim ihumagidjutainni, Nunavutim havaanga uvani ukiuqtaqtumi nunarjuangani, piangaijarnikkut uuktuqvikhanik, uvanilu hilaup aallanguqtirninganut mahulingainirmi. Hapkuat ikajuut naunaiqtijun ajunaittumik itquumanirmik: Ukiuqtaqtumi atanniqtuidjuti uumanilu Inuinnarni amiridjutainnun hivumuujukhaq ikajuqatigiiklutik.
Uqaqtittijii, una hanaqidjuti hakugikhaqjuummiqtaa naunaittuq itquumadjuti: Kanadaup atanniqtuidjutaa Ukiuqtaqtumi tunnganuq Inuinnait idjutainni, qaujihimadjutainni, munaridjutainnilu. Maniliurutikkut nunallaaptingni piliurnikkullu paannariigutinik, piliuliqtugun apqutikhamik havagutiniaqtait Nunavunmiut ublumi pilaaqhuutilugillu kingulliit aulapkailugu una tautungniq hivumun.
Uqautilluarumajatka inulrammiit Nunavunmiutat: una hanaqidjutit piujuq ilingnun. Pijuq hivunikhaanun nunaptingnun, ukununga uuktuutikhanun pikharnun, ukunungalu munaridjutikhanun hivumuudjutiniaqtat hivulliuqtiuplutin aqagukhanun.
Quana, Uqaqtittijii.