ᐅᖃᖅᑏ, ᒪᐃ 21-ᒥ 22-ᒥᓗ ᓯᕗᓕᖅᑎᐅᔪᑦ ᐅᐊᓕᓂᕐᒥ ᐊᒻᒪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᔨᓗᓇᐃᒥ ᐅᖃᖃᑎᒌᓚᐅᖅᐳᑦ ᓯᕗᓪᓕᐅᔾᔭᐅᔪᒪᔪᓂᒃ ᐊᒻᒪᓗ ᑲᑐᔾᔨᓪᓗᑎᒃ ᖃᓄᐃᓕᐅᕈᑕᐅᔪᓂᒃ ᖃᔅᓯᑲᓪᓚᖕᓂᒃ ᐱᔾᔪᑕᐅᓗᐊᖅᑐᓂᒃ ᐱᖃᓯᐅᑎᓪᓗᒋᑦ ᑮᓇᐅᔭᓕᐅᕋᓱᖕᓂᕐᒧᑦ ᐆᒻᒪᖅᑯᑎᒧᓪᓗ ᐊᖅᑯᑎᐅᔪᑦ, ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑎᑦᑕᐃᓕᒪᓂᖅ ᐊᒻᒪᓗ ᓄᓇᖁᑎᖓᓂ, ᓯᓚᕐᔪᐊᒥᓪᓗ ᑕᐅᖅᓰᓂᕐᒧᑦ ᑖᒃᓰᔭᕐᓂᕐᒧᓪᓗ.
ᖁᕕᐊᓱᒃᐳᖓ ᓇᓗᓇᐃᖅᓯᔪᓐᓇᕋᒪ ᐃᑲᔪᖅᓱᖅᑕᐅᕐᔪᐊᓚᐅᕐᒪᑕ ᓄᓇᕗᒻᒥ ᓯᕗᓪᓕᐅᔾᔭᐅᖁᔭᐅᔪᑦ.
ᓯᕗᓕᖅᑎᐅᖃᑎᒃᑲᓗ ᐃᓕᓴᖅᓯᓚᐅᖅᑐᒍᑦ ᐱᒻᒪᕆᐅᓂᖏᓐᓂᒃ ᐊᖏᔫᑎᑦ ᐱᓕᕆᐊᑦ ᓲᕐᓗ ᐅᑭᐅᖅᑕᖅᑐᒥ ᓇᐅᑦᓯᖅᑐᕆᐊᖃᕐᓂᕐᒧᑦ ᓄᓇᖓᓂ/ᒍᕋᐃᔅ ᐸᐃ ᐊᑐᕆᐊᖅ ᑐᓚᑦᑕᕐᕕᓪᓗ ᑲᒪᒋᔭᐅᒍᑎᐅᓗᓂ ᑲᓇᑕ ᓇᒻᒥᓂᖃᕐᓂᖓᓂᒃ ᓇᓗᓇᐃᖅᓯᓯᒪᓂᕐᒧᑦ.
ᐅᖃᖅᑏ ᑐᑦᓯᕋᓚᐅᕐᒥᔪᒍᑦ ᑮᓇᐅᔭᖃᖅᑎᑦᓯᖁᓪᓗᒋᑦ ᐅᑭᐅᖅᑕᖅᑐᒥ ᐊᑐᐃᓐᓇᖃᕈᓐᓇᖅᓯᖁᓪᓗᑕ ᓄᓇᒦᖔᖅᑐᓂᒃ, ᐱᕚᓪᓕᕈᑎᑦᓴᐅᓗᑎᒃ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓄᑦ, ᑐᙵᕕᓕᐅᕐᓂᒧᓪᓗ ᐅᑭᐅᖅᑕᖅᑐᒥ ᓄᓇᓕᖏᓐᓂ.
ᐅᐊᓕᓂᕐᒥ ᓯᕗᓕᖅᑏᑦ ᑎᓕᓯᓚᐅᖅᑐᑦ ᑲᓇᑕᒥᒃ ᓇᓗᓇᐃᖅᓯᒋᐊᒃᑲᓐᓂᑐᐃᓐᓇᖏᓪᓗᑎᒃ ᓇᒻᒥᓂᖃᖅᑎᐅᓂᕐᒥᒃ − ᑐᑦᓯᕋᓚᐅᖅᑐᒍᑦ ᐊᑯᓂᐅᔪᒧᑦ ᑮᓇᐅᔭᖃᖅᑎᑦᓯᖁᓪᓗᒋᑦ ᐃᑲᔪᖅᓱᐃᓂᕐᒧᑦ ᖃᓄᐃᖏᓪᓗᑎᒃ ᐃᓅᓯᖃᑦᓯᐊᕐᓂᕐᒧᑦ, ᓴᐱᓕᖅᑕᐃᓕᒍᓐᓇᖏᓪᓗᑎᒃ ᐅᑭᐅᖅᑕᖅᑐᒥ ᓄᓇᓕᖏᓐᓂ, ᐃᖅᑲᓇᐃᔮᑦᓴᖃᖅᑎᑦᓯᓂᕐᒧᑦ, ᓯᕗᒧᒋᐊᖅᑎᑦᓯᓂᕐᒧᑦ ᓄᓇᖃᖅᑳᖅᑐᒥᓃᑦ ᑮᓇᐅᔭᓕᕆᓂᒃᑯᓪᓗ ᓴᐃᒻᒪᖃᑎᒌᒍᑎᖃᕐᓂᕐᒧᑦ, ᐊᑦᓱᖏᖅᑕᐅᒋᐊᕐᓗᓂᓗ ᐊᑲᐅᓈᖅᑐᒥ ᐃᓂᖃᕐᓂᑎᓐᓂᒃ ᐅᑭᐅᖅᑕᖅᑐᒥ.
ᐅᖃᖅᑏ, ᐅᖃᐅᓯᕆᓚᐅᖅᑕᑦᑕ ᐃᓚᖓ ᐱᔾᔪᑎᖃᓚᐅᖅᑐᖅ ᐆᒻᒪᖅᑯᑎᓕᕆᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖅᑯᑎᓂᒃ ᐊᑐᖅᑕᐅᔪᓐᓇᕐᓂᐊᖅᑐᓂᒃ ᐆᒻᒪᖅᑯᑎᖃᕐᓂᕐᒧᑦ ᐊᒻᒪᓗ ᐱᔭᕆᐊᖃᓪᓚᕆᒃᑐᓂᑦ ᐅᔭᕋᖕᓂᐊᒐᒃᓴᓂᑦ. ᐊᑐᓚᐅᖅᑐᖓ ᒫᓐᓇᐅᔪᖅ ᐃᑲᔪᖅᑐᐃᓪᓗᖓ ᐃᓄᖕᓄᑦ-ᐊᐅᓚᑕᐅᔪᓂᒃ ᑭᕙᓪᓕᕐᒥ ᐆᒪᖅᑯᑎᓕᕆᓂᕐᒧᑦ-ᑲᑎᑦᑎᔪᒥᑦ ᐃᑲᔪᖅᑐᖅᑕᐅᖕᒥᔪᖅ ᒫᓂᑑᕙᐅᑉ ᒐᕙᒪᒃᑯᖏᓐᓂ.
ᐅᐊᓕᓂᕐᒥ ᓯᕗᓕᖅᑎᐅᓪᓗᑕ ᐃᑲᔪᖅᑐᐃᕗᒍᑦ ᐱᓕᕆᐊᖑᐃᓐᓇᖅᑐᒥᒃ ᓴᙱᒃᑎᒋᐊᖅᑎᑦᑐᒪᓪᓗᒍ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐊᑦᑕᕐᓇᙱᑦᑐᒦᖁᓪᓗᒋᑦ. ᐅᖃᐅᓯᕆᒃᑲᓐᓂᓚᐅᖅᐸᕗᑦ ᒐᕙᒪᑐᖃᒃᑯᓐᓂ ᓱᒃᑲᒃᑎᒋᐊᖁᓪᓗᒍᑦ NATO−ᑯᑦ ᓴᐳᔾᔨᓂᕐᒧᑦ ᑮᓇᐅᔭᖅᑐᕐᓂᕐᒧᑦ ᑐᕌᒐᖓᑦ 2%−ᒥᑦ GDP, ᓇᓗᓇᐃᕈᒪᓪᓗᑎᒍᓪᓗ ᐱᓕᕆᐊᒃᓴᐅᔪᓂᑦ ᑖᒃᑯᓇᙵᑦ ᑮᓇᐅᔭᓕᐅᕈᑕᐅᓇᓱᐊᖅᑐᓂᑦ ᐃᑲᔪᕈᒪᓂᕐᒧᑦ ᑎᑭᐅᑎᖁᓪᓗᒋ ᐱᒻᒪᕆᐅᔪᓂ ᐱᕙᓪᓕᐊᑎᑦᑎᓂᕐᒧᑦ ᑎᑭᑕᐅᓇᓱᐊᖅᑐᓂ ᐅᑭᐅᖅᑕᖅᑐᒥ ᑲᓇᑕᓕᒫᒥᓗ.
ᐅᖃᖅᑎᑦᑎᔩ, ᐅᖃᐅᓯᐅᖏᓐᓇᓚᐅᖅᐳᖅ ᐱᔾᔪᑎᖃᖅᖢᓂ ᑮᓇᐅᔭᑎᒍᑦ ᓇᓗᓇᕈᔪᒃᐸᒃᑐᓂᒃ ᐃᖅᑲᓇᐃᔭᖅᑎᓄᑦ ᓇᖕᒥᓂᕆᔭᐅᔪᓄᓪᓗ ᓴᖅᑭᑎᑕᐅᔪᓄᑦ ᐊᑭᓕᕆᐊᖃᓕᖅᐸᒃᑐᓂᑦ ᓴᖅᑭᑎᑕᐅᔪᓂᑦ ᑲᓇᑕᒥ. ᐅᐊᓕᓂᕐᒥ ᓯᕗᓕᖅᑎᐅᓪᓗᑕ ᓇᓗᓇᐃᖅᓯᒃᑲᓐᓂᓚᐅᖅᐳᒍᑦ ᐱᓕᕆᓪᓚᕆᒍᒪᓂᑦᑎᓐᓂᒃ ᐃᓕᒌᓄᑦ ᑲᓇᑕᒥ ᐱᓕᕆᖃᑎᒌᒡᓗᑎᒃ ᑭᐅᔪᒪᓪᓗᒋᑦ ᐊᒥᐊᓕᒃᑲᒥᐅᑦ ᐊᑭᓕᕆᐊᖃᓕᖅᑕᖏᓐᓂᒃ ᐃᑲᔪᖅᑐᐃᔪᒪᓂᕐᒧᓪᓗ ᓄᓇᓕᖕᓂ ᐃᖅᑲᓇᐃᔭᖅᑎᓂᒃ ᓇᖕᒥᓂᕆᔭᐅᔪᓂᒡᓗ ᐊᒃᑐᖅᑕᐅᓯᒪᔪᓂᒃ ᑕᐅᖅᓰᓂᕐᒧᑦ ᐅᓚᕕᓴᖅᑕᐅᔪᓄᑦ.
ᒪᓕᒐᓕᐅᖅᑎᐅᖃᑎᒃᑲᓗ ᐊᐱᕆᓚᐅᕋᑦᓯ ᒐᕙᒪᑐᖃᒃᑯᓐᓂᑦ ᓯᕗᓪᓕᖅᐸᐅᑦᑎᐅᔾᔨᖁᓪᓗᑕ ᓴᐃᓃᓯᒃᑯᑦ ᐊᑭᓕᕆᐊᖃᖁᔭᖏᓐᓂᒃ ᐊᒻᒪᓗ ᓇᓗᓇᐃᖅᓯᓪᓗᑕ ᐱᒻᒪᕆᐅᓂᖓᓂᒃ ᐃᓚᐅᖃᑦᑕᕐᓂᐅᔪᖅ ᓴᐃᓃᓯᒃᑯᑦ ᐱᐅᓯᕚᓕᖁᓪᓗᒍ ᑕᐅᖅᓰᖃᑦᑕᐅᑎᓂᖅ.
ᐅᖃᖅᑎᑦᑎᔩ, ᐃᖃᓗᓕᕆᓂᖅ ᐱᓪᓗᐊᑕᐅᕗᑦ ᓄᓇᕗᒻᒥ ᑮᓇᐅᔭᓕᐅᕈᑎᓄᑦ, ᐅᐊᓕᓂᕐᒥ ᓯᕗᓕᖅᑏᑦ ᖁᕕᐊᓱᓚᐅᖅᐳᒍᑦ ᑕᑯᔭᕆᐊᒃᓴᖅ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᐃᑲᔪᕈᒪᓪᓚᕆᖕᓂᖓᓂ ᐃᒪᕐᒥᐅᑕᓂᒃ ᓂᕿᒋᔭᐅᕙᒃᑐᓂᒃ ᐊᒃᑐᖅᑕᐅᓯᒪᔪᓂᒃ ᓴᐃᓃᓯᒃᑯᑦ ᐊᑭᓕᕆᐊᖃᖅᑕᖏᓐᓄᑦ.
ᐅᖃᖅᑏ ᑲᑎᒪᓂᐅᓚᐅᖅᑐᑦ ᐱᒻᒪᕆᐅᖃᑕᐅᔪᑦ ᓯᕗᒋᐊᖅᑎᑦᓯᓂᕐᒧᑦ ᓄᓇᕗᒻᒥ ᓯᕗᓪᓕᐅᔾᔭᐅᒍᒪᔪᓂᒃ. ᐃᐅᓪᐳᑕ ᑐᙵᓱᑦᑎᑦᓯᔨᐅᓛᖅᑐᖅ ᐱᖓᓐᓇᕐᒥ ᓯᕗᓕᖅᑏᑦ ᑲᑎᒪᓂᖓᓂᒃ 2026-ᒥ.
ᖁᔭᓐᓇᒦᒃ.