ᐅᖃᖅᑎᑦᑎᔩ, ᐃᓕᓴᖅᓯᑲᐃᓐᓇᕈᒪᒐᒪ ᐃᑲᔪᖅᓯᒪᔪᓂᒃ ᓯᕗᓕᖅᑎᐅᓪᓗᑎᒃ ᖃᓄᐃᓕᐅᖅᑎᐅᓯᒪᔪᓂᒃ ᑲᔪᓯᑦᓯᐊᕈᑕᐅᓯᒪᔪᒥᒃ ᐊᖅᑯᓵᖅᓯᒪᔭᑦᑎᓐᓂ ᐊᑎᓕᐅᖅᑕᐅᓚᐅᕐᓂᖓᓄᑦ ᓄᓇᕗᒻᒥ ᓄᓇᓕᕆᓂᕐᒧᑦ ᓄᓇᒦᖔᖅᑐᓂᓪᓗ ᓇᒻᒥᓂᖅᓱᕐᓂᕐᒧᑦ ᐊᖏᕈᑎᒧᑦ.
ᐃᓘᓐᓇᒐᓚᑕ ᑕᑯᔪᒍᑦ ᐱᔭᕇᖅᑕᐅᓯᒪᔪᓂᒃ 239-ᓂᒃ ᒪᑉᐱᒐᓕᓐᓂᒃ ᓇᒻᒥᓂᖅᓱᕐᓂᕐᒧᑦ ᑎᑎᕋᖅᓯᒪᔪᓂᒃ ᐱᓕᕆᔾᔪᑎᑦᓴᐅᓂᐊᕐᓗᓂ ᐊᔪᕐᓇᖏᑦᑐᓂᒃ ᐱᔾᔪᑎᐅᔪᓂᒃ − ᐅᑎᖅᑎᑦᓯᓂᕐᒧᑦ ᐃᓱᒪᓕᐅᕈᑎᖃᕈᓐᓇᓂᕐᒧᑦ ᓄᓇᕗᒻᒥ ᒐᕙᒪᒃᑯᑦ ᓄᓇᖁᑎᖏᓐᓂ ᐃᒪᖏᓐᓂᓗ ᓄᓇᕗᒻᒧᑦ, ᑕᒫᓃᒋᐊᖃᕐᖓᑦ. ᐊᕐᕌᒍᓂᒃ ᐱᖓᓱᓂᒃ, ᓇᒻᒥᓂᖅ ᓄᓇᒦᖔᖅᑐᓕᕆᓂᕐᒧᑦ ᐃᓱᒪᓕᐅᕈᑎᖃᖃᑦᑕᓛᓕᖅᑐᒍᑦ ᑮᓇᐅᔭᖅᑖᕐᕕᒋᕙᓪᓗᒋᓪᓗ ᐲᔭᖅᑕᐅᓂᖏᑦ ᓄᓇᒦᖔᖅᑐᑦ ᐱᕚᓪᓕᕈᑎᑦᓴᐃᑦ.
ᓇᒻᒥᓂᖅᓱᕐᓂᖅ − ᐊᐅᓚᑦᓯᔨᐅᓕᒃᑲᓐᓂᕈᓐᓇᕐᓂᕗᑦ.
ᑕᑯᖃᑦᑕᙱᑕᕗᑦ ᐃᑲᕐᕋᕋᓴᐃᑦ, ᐅᓪᓗᐃᑦ, ᐱᓇᓱᐊᕈᓰᑦ, ᑕᖅᑮᑦ, ᐊᕐᕌᒍᐃᓪᓗ ᐃᓕᐅᖅᑎᕆᓯᒪᓂᖏᑦ ᐊᑐᓂᑦ ᐅᖃᐅᓯᖅᑕᖏᓐᓂᒃ ᐊᑐᓂᑦ ᒪᑉᐱᒐᖏᓐᓂ. ᐱᔭᑦᓴᖃᕐᓇᖅᑐᒻᒪᕆᐊᓗᒃ ᐊᖅᑯᓵᕆᐊᖃᖅᑐᓂ
ᒪᓕᒐᖅᑎᒍᑦ ᐊᔪᕐᓇᖅᑐᒃᑰᕈᑕᐅᔪᓂᒃ ᑐᑭᒧᐊᖅᑎᑕᐅᑎᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ, ᓄᓇᕗᑦ ᑐᙵᕕᒃᑯᑦ ᑲᓇᑕᐅᓪᓗ ᒐᕙᒪᒃᑯᖏᑦ. ᐊᔪᕐᓇᖏᑦᑐᑯᓘᖏᑦᑐᖅ ᐸᕐᓇᐅᑎᖃᕆᐊᖃᕐᓂᕐᒧᑦ ᐊᑐᓂᑦ ᐃᓗᓕᖏᓐᓂᒃ ᓲᕐᓗ ᓄᑦᑎᖅᑕᐅᒐᔭᕐᓂᖏᓐᓂᒃ ᐃᖅᑲᓇᐃᔭᖅᑏᑦ ᐊᑐᓕᖅᑎᑦᓯᕙᓪᓕᐊᓂᕐᒧᓪᓗ ᐸᕐᓇᐅᑎᓂᒃ ᓄᑦᑎᑕᐅᓪᓚᑦᑖᕐᕕᑦᓴᖓᓄᑦ 2027-ᒥ. ᖁᔭᓐᓇᖅᑐᖅ, ᓄᓇᕗᑦ ᒐᕙᒪᒃᑯᖏᑦ ᐊᔪᙱᑦᑐᒻᒪᕆᓐᓂᒃ ᐊᔩᖅᑎᓄᑦ ᐊᖏᔪᖅᑳᖃᖃᑦᑕᓚᐅᕐᖓᑕ ᓇᓗᓇᐃᖅᓯᓯᒪᒍᓐᓇᖅᑐᓂᒃ ᐊᑐᓂᑦ ᓇᓗᓇᐃᔭᖅᓯᒪᔪᑦ ᐃᓗᓕᖏᑦ ᐅᔾᔨᕆᔭᐅᑦᓯᐊᕈᓐᓇᖁᓪᓗᒋᑦ.
ᐅᖃᖅᑎᑦᑎᔩ, ᑕᒪᓐᓇ ᐱᒋᐊᓪᓚᕆᓚᐅᖅᓯᒪᔪᖅ ᓄᓇᕗᑦ ᒐᕙᒪᒃᑯᖏᑕ ᐊᔩᖅᑎᓄᑦ ᐊᖏᔪᖅᑳᖑᑎᓪᓗᒍ ᑑᓂ ᐸᓂᑭᑦ − ᔫᑳᓐᒥ ᓯᕗᓕᖅᑎᒥᓂᖅ. 2008-ᒥ, ᐊᔩᕈᑎᖃᕐᓂᕐᒧᑦ ᐊᑐᐊᒐᕐᓂᒃ ᐊᖏᕈᑎᒃᑯᑦ ᐊᑎᓕᐅᖅᑕᐅᔪᖃᓚᐅᖅᓯᒪᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᕗᑦ ᑐᙵᕕᒃᑯᓄᓪᓗ ᑐᕌᒐᖃᖅᑐᑎᒃ ᐊᖏᕈᑎᓕᐅᕈᒪᓂᕐᒧᑦ ᓯᕗᓪᓕᖅᐹᖅᓯᐅᒻᒥᒃ.
ᓇᒻᒥᓂᕗᑦ ᒥᓂᔅᑕ ᒪᓕᒐᓕᕆᔨᒃᑯᓐᓄᑦ ᐃᓂᑖᓕᓚᐅᖅᓯᒪᒻᒥᔪᖅ ᐊᔩᖅᑎᓄᑦ ᐊᖏᔪᖅᑳᖑᓂᕐᒧᑦ 2012-ᒥ, ᐊᔩᕈᑎᖃᓪᓚᑦᑖᓕᖅᑐᑎᒃ ᐱᒋᐊᖅᑐᑎᒃ 2014-ᒥ − ᑕᐃᑲᓂ ᓴᐃᒪᓐ ᐊᕙ ᐃᓂᑖᓕᓚᐅᖅᓯᒪᔪᖅ ᑕᕝᕙᓂ ᐱᒻᒪᕆᐅᔪᒥ ᐃᓂᐅᔪᒥ.
2019-ᒥ − ᑎᑭᐅᑎᓚᐅᖅᓯᒪᒻᒥᔪᑦ ᑐᕌᖅᑕᒥᓄᑦ − ᓯᕗᓪᓕᖅᐹᖅᓯᐅᑎ ᐊᖏᕈᑎ ᐊᑎᓕᐅᖅᑕᐅᑎᓪᓗᒍ.
ᐱᓕᕆᐊᑦᓴᒻᒪᕆᐊᓗᒃ ᑐᓂᔭᐅᓕᓚᐅᖅᓯᒪᒻᒥᔪᖅ ᐸᐅᓗᓯ ᓱᕕᒐᕐᒧᑦ 2020-ᒥ, ᐱᔭᕇᕈᔾᔨᓕᓚᐅᖅᑐᓂ.
ᐊᖑᑏᑦ, ᖁᔭᓐᓇᒦᒃ.
ᖁᔭᓐᓇᒦᒃ, ᐅᖃᖅᑎᑦᑎᔩ.