ᐅᖃᖅᑎᑦᑎᔩ,
ᒫᓐᓇᕈᓗᒃ ᐱᓇᓱᐊᕈᓯᒐᓚᐅᓂᐊᖅᑐᓂ ᓄᓇᕗᑦ ᒐᕙᒪᒃᑯᖏᑦ ᓇᓪᓕᐅᓂᖅᓯᐅᓛᖅᑐᑦ ᐊᖏᔪᒥᒃ ᑎᑭᐅᑎᓯᒪᔭᑦᑎᓐᓂᒃ − 25 ᐊᕐᕌᒍᐃᑦ.
ᐅᐱᒍᓱᑦᑐᖓ ᓄᓇᕗᒻᒥᒃ. ᐊᕐᕌᒍᑕᒫᑦ, ᐋᖅᑭᑦᑕᐅᓚᐅᖅᓯᒪᒻᒪᑎᓂᒃ ᑭᒃᑯᓕᒫᓄᑦ ᒐᕙᒪᕗᑦ, ᓴᙱᓂᖅᑖᒃᑲᓐᓂᓯᒪᔪᒍᑦ. ᐃᓱᒪᒍᑦᑕ ᒐᕙᒪᒋᔭᕗᑦ ᓲᕐᓗ ᐃᒡᓗᑎᑐᑦ, ᐃᒡᓗᓕᕙᓪᓕᐊᓯᒪᔪᒍᑦ ᐊᐳᑎᓂᒃ ᐋᖅᑭᑦᓱᖅᑕᐅᓯᒪᔪᓂᒃ ᑭᖑᓂᑦᑎᓐᓂ ᑭᖑᕚᕇᓄᑦ, ᑐᙵᕕᓕᐅᖅᑐᑎᒃ, ᐱᕈᖅᐸᓪᓕᐊᒍᓐᓇᖁᓪᓗᑕ.
ᓄᓇᕗᑦ ᐊᐅᓚᑕᐅᔪᖅ ᐊᖏᖃᑎᒌᑦᑎᐅᔪᓄᑦ ᒐᕙᒪᓄᑦ ᑐᙵᕕᖃᖅᑐᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᓇᓖᕌᕈᑕᐅᓯᒪᓂᖓ ᐊᐅᓚᑦᓯᒍᒪᓂᕐᒧᑦ ᓄᓇᕗᒻᒥᒃ ᑕᐃᒪᓐᓇ ᓇᒻᒥᓂᖅ ᓂᕈᐊᖅᓯᒪᔭᕗᑦ. ᐃᓕᓴᖅᓯᒍᑎᒋᔭᕗᑦ ᖃᐅᔨᒪᓂᖏᓐᓂᒃ ᐃᓐᓇᕆᔭᑦᑕ ᐅᑉᐱᕆᔭᖏᑎᒍᑦ ᐱᕈᖅᓴᐃᒍᑎᒋᓯᒪᔭᖏᓐᓂᒃ ᐅᕙᑦᑎᓐᓂᒃ. ᒐᕙᒪᓕᕆᓂᕐᒧᑦ ᐋᖅᑭᐅᒪᓂᕗᑦ ᑐᙵᕕᖃᖅᑐᖅ ᐃᓅᖃᑎᒌᓐᓂᕐᒧᑦ ᑐᑭᖓᓂᒃ ᐋᔩᖃᑎᒌᓐᓂᖅ, ᐃᓱᒪᓕᐅᖃᑎᒌᓪᓗᓂ, ᐅᖃᖃᑎᒌᓐᓂᒃᑯᑦ ᐊᒻᒪᓗ ᐊᖏᖃᑎᒌᓐᓂᒃᑯᑦ.
ᓄᓇᓕᕗᑦ ᐱᕈᖅᐸᓪᓕᐊᔪᑦ ᖃᑭᕙᓪᓕᐊᓪᓗᑎᓪᓗ ᐱᓕᕆᐊᖃᖅᐸᓪᓕᐊᑎᓪᓗᑕ ᐊᔾᔨᒌᙱᑦᑐᓂᒃ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ. ᒪᒃᑯᑦᑐᕗᑦ ᑐᕌᒐᕐᒥᓂᒃ ᑎᑭᐅᑎᖃᑦᑕᓕᖅᑐᑦ ᐃᖅᑲᓇᐃᔮᖅᑖᖅᐸᓪᓕᐊᓂᕐᒧᑦ ᓴᓇᔪᓕᕆᔨᐅᓂᕐᒧᑦ ᐃᖅᑲᓇᐃᔮᓄᓪᓗ ᓱᕐᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᒐᓕᕆᓂᕐᒧᓪᓗ. ᓯᕗᓂᑦᓴᕆᔭᕗᑦ.
ᐱᓕᕆᐊᖑᕙᓪᓕᐊᒍᓐᓇᖅᓯᒪᔪᖅ 25-ᓂᒃ ᐊᕐᕌᒍᓂᒃ ᓇᓪᓕᐅᓂᖅᓯᐅᕈᑎᖃᓛᖅᑎᓪᓗᑕ, ᐅᐱᓐᓇᕋᓂ ᐊᑎᓕᐅᖅᑕᐅᓚᐅᕐᓂᖓ ᓄᓇᕗᒻᒥ ᓄᓇᓕᕆᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᓇᒻᒥᓂᖅᓱᕐᓂᕐᒧᑦ ᐊᖏᕈᑎ, ᓴᖅᑭᖅᑕᐅᓚᐅᕐᓂᖓᓗ ᕕᕝᕗᐊᓕ 14-ᒥ ᐃᓄᙳᖅᓴᐃᕕᒃ: ᐃᓕᓐᓂᐊᕈᑎᖃᕐᓂᖅ ᐱᔾᔪᑎᖃᖅᑐᓂᒃ. ᐋᖅᑭᑦᓱᖅᑕᐅᓯᒪᔪᖅ ᓄᓇᕗᑦ ᒐᕙᒪᒃᑯᖏᓐᓄᑦ, ᓄᓇᕗᑦ ᑐᙵᕕᒃᑯᓐᓄᑦ, ᑲᓇᑕᐅᓪᓗ ᒐᕙᒪᒃᑯᖏᓐᓄᑦ, ᑖᓐᓇ ᐃᓕᓐᓂᐊᖅᑎᑦᓯᓂᕐᒧᑦ ᐱᒋᐊᖅᑎᑕᐅᓯᒪᔪᖅ ᓇᓗᓇᐃᖅᓯᓯᒪᒍᑕᐅᓂᐊᖅᑐᖅ ᓄᓇᕗᒻᒥ ᐃᓄᐃᑦ ᐱᔪᓐᓇᕐᓂᑖᖅᐸᓪᓕᐊᒍᓐᓇᖁᓪᓗᒋᑦ ᖃᐅᔨᒪᓂᖅᑖᖁᓪᓗᒋᓪᓗ ᐊᐅᓚᑦᓯᒍᓐᓇᓂᕐᒧᑦ ᓇᐅᑦᓯᖅᑐᖅᑎᐅᓂᕐᒧᑦ ᓄᓇᕗᒻᒥ ᓄᓇᖏᓐᓂᒃ, ᐃᒪᖏᓐᓂᒃ, ᓄᓇᒦᖔᖅᓯᒪᔪᓂᓪᓗ − ᑕᒪᒃᑯᐊ ᖃᓄᓕᐃᓕᐅᖅᑎᐅᓂᕐᒧᑦ ᐱᓕᕆᐊᑦᓴᖃᖅᑎᐅᓂᕐᒧᓪᓗ ᓄᑦᑎᖅᑕᐅᑉᐸᑕ ᒐᕙᒪᑐᖃᒃᑯᓐᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ.
ᐱᕈᖅᐸᓪᓕᐊᑎᓪᓗᑕ ᐊᕕᑦᑐᖅᓯᒪᓂᐅᓂᑦᑎᓐᓂᒃ ᒐᕙᒪᐅᓂᑦᑎᓂᓪᓗ, ᒪᒃᑯᑦᑐᓂᒃ ᓄᓇᕗᒻᒥᐅᓂᒃ ᐃᓚᕙᓪᓕᐊᒋᐊᖃᖅᑐᒍᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ. ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐅᔭᖅᑎᑖᖅᐸᓪᓕᐊᖏᓐᓇᖅᑐᑦ. ᑕᑯᒋᐊᕐᓗᒍᑦ ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᑦ ᕿᓂᕐᓗᓯ ᐃᖅᑲᓇᐃᔮᓂᒃ ᐃᓕᓐᓄᑦ ᓈᒻᒪᓈᖅᑐᓂᒃ. ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᓂᖅ ᐊᑑᑎᖃᑦᓯᐊᖅᑐᓂᒃ ᐊᖅᑯᑎᐅᔪᖅ ᓯᕗᒧᑦ. ᐃᑲᔪᕆᑦᓯ ᑐᙵᕕᓕᐅᖅᐸᓪᓕᐊᖏᓐᓇᓂᕐᒧᑦ ᓄᓇᕗᒻᒥᒃ, ᐊᑐᓂᑦ ᐊᓪᓗᕆᐊᕈᑎᒃᑯᑦ, ᐊᕐᕌᒍᐃᑦ 25 ᐊᓂᒍᕐᒥᑉᐸᑕ ᖁᕕᐊᓲᑎᑦᓴᖃᒃᑲᓐᓂᓛᕋᑦᑕ.
ᑭᖑᓪᓕᖅᐹᒥ, ᓂᕆᐅᑦᓯᐊᖅᑐᖓ 25-ᓂᒃ ᐊᕐᕌᒍᓂᒃ ᓇᓪᓕᐅᓂᖅᓯᐅᕈᑎᖃᕐᓂᕐᒧᑦ ᖁᕕᐊᓱᐊᒍᑎᖃᕐᓂᕐᒥᒃ ᓄᓇᕗᓗᑦᑖᒥ. ᐃᓇᑦᑕᐃᓐᓇᒃᑲ ᓄᓇᕗᒻᒥᐅᑦ ᖁᕕᐊᓲᑎᖃᖃᑕᐅᖁᓪᓗᒋᑦ ᑕᒪᑐᒥᖓ ᐱᒻᒪᕆᐅᔪᒥᒃ ᑎᑭᐅᑎᓯᒪᔭᑦᑎᓐᓂᒃ, ᑭᓯᐊᓂᑦᑕᐅᖅ ᑐᙵᕕᓕᐅᖃᑕᐅᓗᓯ ᓯᕗᓂᑦᓴᑦᑎᓐᓄᑦ.
ᖁᔭᓐᓇᒦᒃ, ᐅᖃᖅᑎᑦᑎᔩ.